45. ସ୍ତିଫାନ ଅଡ଼େ ଫିଲିପ୍ପ

ନକେଃତି ମଣ୍ଡଳୀଇଁ ତାକି କିନାରି ବିତ୍ରା ସ୍ତିଫାନ ଦରୁ ଗାଟାସି ରଅସି ମାଚେସି । ଏୱାସି ୱେଂଗି ତାସି ମାଚେସି ଅଡ଼େ ଏୱାସି ପବିତ୍ରଆତ୍ମା ଅଡ଼େ ବୁଦ୍ଧି ତଲେ ନେଞ୍ଜିତାସି ଅଡ଼଼େ ସ୍ତିଫାନ ହାରେକା କାବା ଆନି କାମା କିତେସି ଅଡ଼େ ନେହିଁକି ବିଚାରା କିତେସି ଏନିକିକି ଲୋକୁ ଯୀଶୁତାଣା ନାମିନେରି ।

ରଦିନା, ଏଚିବେଲା ସ୍ତିଫାନ ଯୀଶୁତି କାତା ଜାପ୍ହିମାଚେସି, ଏଚିବେଲା ଯୀଶୁତାଣା ନାମିଲାଃ ଗାଟାରି କଚେକା ଯିହୂଦୀ ସ୍ତିଫାନ ତଲେ ଯୁକ୍ତି କିହାଲି ମାଠ୍ହେରି ।ଏୱାରି ହାରେକା କାର୍ବି ଆହାଁ ମାଚେରି ଅଡ଼େ ସ୍ତିଫାନତି କାତାତି ଧର୍ମନେତାଁଣୀଁଇଁ ମିଚି ୱେସ୍ତେରି । ଏୱାରି ଇଲେଇଚେରି “ମାମ୍ବୁ ତାଂଗେ ମୋଶା ଅଡ଼େ ମାହାପୁରୁତି ବିରୁଦ୍ଦତି କାତା ୱେହ୍ନାଣୀଇଁ ୱେଞ୍ଜାମାନମି!”ଏଦାଆଁତାକି ଧର୍ମନେତାୟାଁ ସ୍ତିଫାନଇଁ ଦସ୍ପା ଅତେରି ଅଡ଼େ ମହାଯାଜକ ଅଡ଼େ ଯିହୁଦୀତାରାତି ନେତାଁ ତାଣା ସ୍ତିଫାନଇଁ ତାତେରି ଏମିନି ତାଣା ସ୍ତିଫାନତି ବିରୁଦ୍ଦତା ହାରେକା ମିଚି ସାକୀ ମାଚେରି ।

ମହାଜାଯକ ସ୍ତିଫାନଇଁ ୱେଚେସି “ଇ ବାରେ କାତା ସାତା କି ?”ଅବ୍ରାହାମତି ବେଲାଟିଏ ମାଠ୍ହାହାଁ ଯୀଶୁବେଲା ପାତେକା ମାହାପୁରୁ ଏମିନି ବାରେ କାଜା କାଜା କାମା କିହା ମାଚେସି ଏମ୍ବାଟି ହାରେକା ଅଣପିକିହାଁ ଏୱାରାଇଁ ଏଲେଇଚେସି ଯେ ମାହାପୁରୁତି ଲୋକୁ ଏନିକି ସବୁବେଲା ତାନି ବୋଲୁତଲେ ତାକିଲାଃତେରି । ଏଦାଆଁ ଜେଚ ଏୱାସି ଏଲେଇଚେସି “ହେ ଆଣ୍ଟ୍ୱା ହିୟାଁ ଅଡ଼େ କିଲିବିଲି କିନାତେରି ମିରୁ ସବୁବେଲା ପବିତ୍ରଆତ୍ମାଇଁ ବାଦା ହିହିମାଞ୍ଜେରି, ଏନିକି ମି ପୁର୍ବେତାରି ସବୁବେଲା ମାହାପୁରୁଇଁ ବାଦା ହିହାଁ ତାନି ଭାବବାଦୀଁଇଁ ପାୟାମାଚେରି । ମାତ୍ର ତାମିଟିଏ ହାରେକା ଲାଗେଃ କିହାମାନେରି! ମିରୁଏ ଖ୍ରୀଷ୍ଟଇଁ ପାୟାମାଞ୍ଜେରି !”

ଏଚିବେଲା ଧର୍ମନେତାୟାଁ ଇଦାଆଁ ୱେଚେରି, ଏୱାରି ଇଚେକା କାର୍ବି ଆହାମାଚେରି ଯେ ଏୱାରି ତାମି କ୍ରିୟୁଁଇଁ ନାବ୍ଗା ଗାଡି କାଲ ଆତେରି । ଏୱାରି ସ୍ତିଫାନଇଁ ଗାଡ଼ା ପାଂଗାତା ରେଜା ଅତେରି ଅଡ଼େ ତାଂଗେ ପାୟାଲି ତାକି ୱାଲି ଗୁରିତେରି ।

ସ୍ତିଫାନ ହାତିବେଲା ଗାଡି କାଲ ଆତେସି ଅଡ଼େ ଏଲେଇଚେସି “ହେ ଯୀଶୁ, ନା ଆତ୍ମା ଇଁ ଅମୁଁ ।” ଏଦାଆଁ ଜେଚ ଏୱାସି ମେଣ୍ଡା କୁତାହାଁ ୱେଣ୍ଡେଏ କାଲ ଆହାଁଏଲେଇଚେସି” ହେ ମାହାପୁରୁ, ଇ ପାପୁ ତାମି ବିରୁଦ୍ଦତା ଏଜି କିଃଆନି ।" ଏଦାଆଁ ଜେଚ ଏୱାସି ହାତେସି ।

ଶାଉଲ ଦରୁଗାଟି ର ଲକୁ ସ୍ତିଫାନଇଁ ପାଇନି ଲୋକୁ ତଲେ ରଣ୍ଡିଏ ମନ ଆହାଁ ମାଚେସି ଏମିନି ଗାଟାସି ପାଇୱି ଆନି ବେଲତା ତାମି ହେମ୍ବରୀଇଁ କାଆଚି ମାଚେସି । ଏ ଦିନା, ଯିରୁଶାଲମତା ମାନି ଲୋକୁ ଯୀଶୁତାଣା ତାକିନି ଲୋକୁଇଁ ସାଆଦି ହିହାଲି ମାଠ୍ହେସି, ଏଦାଆଁ ତାକି ନାମିନାରି ଏଟ୍କାଏଟ୍କା ଟାୟୁତା ହଣ୍ ତୁସ୍ତେରି । ମାତ୍ର, ଇ ବାରେ ଆତି ହିଁ ଜିକେଏ, ଏୱାରି ଏମିନିତାଣା ହାଚେରି ଏମ୍ବାଆଁ ମାହାପୁରୁ ବୋଲୁ ୱେକ୍ହାଲି ମାଠ୍ହେରି ।

ଯୀଶୁତି ର ଶିଷ୍ୟ ଏମିନିଗାଟାଣା ଦରୁ ଫିଲିପ୍ପ ଯିରୁଶାଲମତା ସାଆଦି ଆତି ତାକି ହାଜାମାନି ନାମିନି ଲୋକୁ ବିତ୍ରା ରଅସି ମାଚେସି । ଏୱାସି ଶମରୀୟତା ହାଜାହାଁ ଏମ୍ବାଆଁ ଯୀଶୁତି କାତା ୱେସ୍ତେସି ଅଡ଼େ ହାରେକା ଲୋକୁ ଏମ୍ବାଆଁ ଗେଲ୍ପି ଆତେରି । ଏନେଚୁ ଡାୟୁ, ମାହାପୁରୁତି ର ଦୂତୁ ଫିଲିପ୍ପ ତାଣା ୱାହାଁ ବାଃଲିବୁମିଟି ମାନି ର ଜିରୁଟି ହାଜାଲି ତାକି ଜଲିତେ । ଏୱାସି ଏଚିବେଲା ଏ ଜିରୁଟି ହାଜି ମାଚେସି, ଫିଲିପ୍ପ ମେସ୍ତେସି ଯେ ଇଥିଓପିଆ ରାଜା ଇଲୁତି ର କାଜା ପଦତା ମାନାସି ତାନି ରତତା ୱାହିମାନେସି । ଏ ଲକୁ ତାଣା ହାଜାହାଁ ତାମିତଲେ କାତାଆହାଲି ତାକି ପବିତ୍ରଆତ୍ମା ଫିଲିପ୍ପଇଁ ଜଲିତେ ।

ଫିଲିପ୍ପ ଏଚିବେଲା ରତତି ଡାଗେ ଆତେସି, ଏ ଇଥିଓପିଆ ଲକୁ ଯିଶାଇୟ ଭାବବାଦୀତି ବହିଟି ପଡ଼ ଆହିମାନାଣୀଁଇଁ ୱେଚେସି । ଏ ଲକୁ ପଡ଼ ଆହିମାଚେସି “ଏୱାରି ମେଣ୍ଡାଲେହେଁ ତାଙ୍ଗେ ପାୟାଲି ତାକି ଅତେରି, ଅଡ଼େ କାତା ଆଆ ମେଣ୍ଡା ଲେହେଁ ଏୱାସି ଗୁତି ଏକ୍ଆତେସି । ଏୱାରି ତାଙ୍ଗେ ଲାଗେଃ ଲେମ୍ବିତେରି ଅଡ଼େ ତାଙ୍ଗେ ନେହିକି ଲେମ୍ବାଃତେରି । ଏୱାରି ତାମି ତାଣା ଟିଏ ତାଙ୍ଗେ ଜୀୱୁ ଅତେରି ।”

ଫିଲିପ୍ପ ଏ ଇଥିଓପିଆ ଲକୁଇଁ ୱେଚେସି ”ନିନୁ ଏନାଆଁ ପଡ଼ ଆହିମାଞ୍ଜି ଏଦାଆଁ ଏନାଆଁ ତେଲ୍ହାଲି ଆଡିମାଞ୍ଜି ?” ଏ ଇତିଓପିଆ ଲକୁ ଏଲେଇଚେସି, ଆଏ, ଆମ୍ବାଃରି ତେଲ୍ପି କିଆଃସାରେ ନାନୁ ଏନିକି ତେଲ୍ହିଇଁ । କାର୍ମା ମେସାହାଁ ନା ଡାଗେ କୁଗାମୁ । ଯୀଶାଇୟ ଏନାଆଁ ତାନି କାତାତି କି ଅଡ଼େ ଆମ୍ବାଃରି କାତାତି ଇମ୍ବାଆଁ ରାଚାମାନେସି ?” ଫିଲିପ୍ପ ତାଂଗେ ତେଲ୍ପିକିହାଁ ଜଲିତେସି ଯେ ଯୀଶାଇୟ ଯୀଶୁତି କାତା ରାଚାମାନେସି ।

ଯୀଶୁତି କାତା ମାନାଣୀଇଁ ନେହି କାବ୍ରୁ ୱେସାଲି ତାକି ଫିଲିପ୍ପ ଏଟ୍କାତି ବାଗା ଜିକେଏ ତେଲ୍ପିକିତେସି । ଏଚିବେଲା ଫିଲିପ୍ପ ଅଡ଼େ ଇଥିଓପିଆ ହାଜିମାଚେରି, ଏୱାରି ର ଏୟୁ ଡାଗେ ୱାତେରି ।

ଇଥିଓପିଆ ଲକୁ ଏଲେଇଚେସି “ମେହ୍ଃମୁ ! ଇମ୍ବାଆଁ ରଚାଇଁ ଏୟୁ ମାନେ ! ନାନୁ ଡୁବନ ଅହାଲି ଆଡିଇଁ କି ?” ଅଡ଼େ ଏୱାସି ତାନି ରତ ତାକି କିନାଣାଇଁ ରତ ଇଟାଲି ତାକି ଏଲେଇଚେସି । ଏଦାଆଁ ତାକି ଏୱାରି ଜିକେଏ ଏୟୁତା ରେତେରି, ଫିଲିପ୍ପ ଏ ଇଥିଓପିଆଇଁ ଡୁବନ ହିତେସି ।

ଏୱାରି ଏୟୁଟି ନିଙ୍ଗା ୱାତି ଡାୟୁ, ପବିତ୍ରଆତ୍ମା ଫିଲିପ୍ପଇଁ ଅର ଟାୟୁତା ଅତେ ଏମିନିତାଣା ଏୱାସି ଯୀଶୁତି କାତାତି ଲୋକୁଇଁ ସବୁବେଲା ୱେସାଲି ମାଠ୍ହେସି । ଇଥିଓପିଆ ତାନି ଇଲୁ ୱାକି ତାକିତେସି, ଏୱାସି ରାହାଁ ମାଚେସି ଯେ ଏୱାସି ଯୀଶୁଇଁ ପୁଚେସି ।

ବାଇବଲତି ର ପୁସ୍ପନି: