1. Ganardin

Kuduban a ganardin kan ambrij dele. Tudru dinna lingan Kitungan Riangan do Ordaran bar tette lingan a kuddub janaban gardieten. Kitungan Ordaran a gardillen atiki, ordaran lunguddam bar arikkadam dakule. Iteja ajanaban sanabjan addead. Bindo kitungan a janggardan da’n alanangka dakule.

Ante saring Kitungan gameten, paledamte. Salete paleddle. Kitungan panaledan gijeten do antate bangsa bar antate “Dinna” gamle tiyhimeten. Anin kanate lanungudan saring ansaeten, antate “Togal” gamle Anin gameten. Kitungan ganardin a pardi dinna lingan Panaledan gabdeleten.

Ganardin anab-bagu dinna lingan Kitungan ordaran a lanka, “Riangan” gadilete gamle baiheten. Anin jaitan a da’n saring lankan ada’n abansale riangan gabdeleten.

Anab-yagi dinna lingan Kitungan gameten do asarsolan saring da’n abansaete do Anin kun asarsolan “Ordar” gameten do Anin da’n ate “Ganing” gameten. Kitungan a gabdellen a kudduban gijeten do antate bangsa dakule.

Ante saring Kitungan gameten, “Ordar lingan kudub janab ne’ebanji do agabanji padabete”. Bar ettegoina dele. Kitungan itente gabdelle gijeten do antate bangsa dakule.

Ganardin anab-unji dinna lingan, Kitungan gameten do Uyungan, Angaijan do Tuituijanji gabdeleten. Kitungan kun a kuddubanji Ordar lingan tana’ran tiyben bar dinan, togalan, angaijanji, do minhumanji arabmadan absele hanan-raman deben asan baiheten. Kitungan gijeten do itente gabdelle antate bangsa dakule.

Anab-monloi dinna lingan Kitungan da’ lingan a kuddub purardanji do ordaran alanka Riang lingan aneng-tedanji gabdelle. Kitungan gijeten do antate bangsa, bar anta-kudub absittaeten.

Ganardin anab-tudru dinna lingan, Kitungan gameten, “Ordar lingan kuddub janab jontunji ganadilan de’te”. Kitungan engale gameten etegoi na dele. Dajinngante orro-baran apsele hananramdage jontunji dakule, dajingante hanapung jontunji bar dajingante tulab jontunji dakule. Kitungan gijeten do anta a kuddub bangsa dakule.

Ante saring Kitungan gameten, Jaba, Anlen anokke mukkan-len ambrij, mandran ado’ng a gabdelba. Ordaran a lanangka do kuddub jontunji alanangka aninji a danen dakute.

Anten asan Kitungan asui arardi-solan pangan pangle mandran ado’ng sabjale, bar ante-alung lingan mandrengnan arangen umpedeten. Kan amandra ahiman Adam tiyhimeten. Kitungan aboi kuttan oskaieten, uante Adam dakuten do kunate sagalben asan anin ado’ng tedte lingan dakkueten.

Kutta a tarangdi lingan Kitungan, ba’gu murda ne’ebanji paddabeten, manan, mandrengna-ne’eban bar roitad do er-roitad ganalaman a tiyten a ne’eban. Kitungan Adam ado’ng baile opungeten do kutta lingan roitad do er roitad ganalaman a tiyten a ne’eban sadan sadle kuddub ne’eban ajo’n rapti-jumte. Bogad kan ne’eban ajo’n anin jumlenden, etteden anin kahidte.

Ante saring Kitungan gameten, Mandran anson adakunaben bangsated. Bindo, ongijja a jontun Adam a sanayaman apsele addakuadji.

Anten asan, Kitungan Adam ado’ng karran abkzndumeten. Ante saring Kitungan Adam a onroijangan aboi pangan pangle aboi insalon sabjaeten do anin ado’ng Adam amangban urungaiten.

Angante Adam anin ado’ng gijeten, tanakud lingan! Kan abo-mandra hen-na ambrij! Anin Insalo gamle ganudingan dete, iten asan gamlenden anin Ongeran saring ganardin dele. Kan asan mandran a ua-yanganji ado’ng omda’n omdale a dukrin batte maiten.

Kitungan, Onger do Insalon ado’ng Anindam anokke mukkan ambrij gabdeleten. Anin aninji ado’ng absittaeten do onger-insalo’nan bar udleng-onan kudba do Ordaran badrijba gametenji. Kitungan itente a kudduban gabdeleten, antate jznjzn bangsa gamle gijeten. Kun-lingan Anin amanoihan dakule. Kan a kudduban ganardin anab-tudru dinna lingan dele.

Angante anab-gulji dinnan yerrai, Kitungan Anin a kuddub baran tabkudeten. Anten asan Kitungan kuddub baran, itente Anin lumle yeraiten kun saring luluneten. Anin anab-gulji dinnan absittale madrideten. Iten asan gamlenden kan a dinna lingan Anin a baran saring luluneten. Kan ambrij Kitungan barij Ordaran do tedte lingan a kuddub janaban gardieten. Baibolan abo-katta-ber: Aparmangta 1-2 Tanub