50. Jisun dayartai.

Bagu ajjar mihum saring ateng ayam barij ordarlingan au'r ateng mandranji Kristu Jisun aberna bangsa anoblingan amdangle yeraiji. Ranukun marangle daku. Jisun sibdaijeten do anin tanakud ayamlingan ordarban dayartai. Bogad anin nami sikoija adyeraiten janangden, anin a sanibdaijan rabrabte.

Anlen Jisun a dayarnan omdeata omdeata, Kitungan a itsuman yante gamle anlen marid do aboi anin a d'ong ganugun a tiytaben a mandrengnan abhanatabe. Anin a itsuman yante gamle anlen anin a rajaman a berna bigardanji a do'ng oblingtabe. Jisun ordarlingan a basueten adnang gameten "Hanangna marhenji Kitungan a rajaman a bangsa anoblingan ordarlingan a dakun kuddub mandranji a d'ong oblingteji, anta tiki na ranasum dinnan yertai."

Ateng mandranji a ompu nami sikoija Jisun a berna endrang a mdangaji. Anin ruangan a yereten abmang, ayengante a mandraji angaja bangsa anoblingan adnamdangadji aninji a temangban bangsa anoblingan oblingben asan Jisun Kristu maranji a d'ong oblingte. Anin gameten"amben yeran yerre kuddub mandranji a ompu hanangna maranji e-abmeba!" do "agadben asan jandruman gu'rre!"

Jisun bar okij gameten"boantan a gamangan saring murda ted. Kan ordarlingan danele a dakun a mandraji yante gamle do'ng Hen assangemtaji, kun ambrij na aninji hen apsele amben tamderre kabhidtabenji. Bogad kan a ordarling kanalkalan a hangle janangden, uywbnaba iten asan gamlenden ordaran anabhanamar sonuman a d'ong Hen daijnan hanlai. Bogad amben tanakud ayam sikoija manglinghen a derten, etteden Kitungan do'ngben anablun tiyte.

Butente ordaran a tanakud a yamlingan mandranji a manglingan iten tangadte antate abganludben asan Jisun anin a hanangna maranji a d'ong aboi arapsuiberan oblingeten. Anin gameten"bo mandra anin a jannong lingan bangsa jabmolan bwdeten. Anin a dimadneten adnang anin assangim maran iyle gomosaran ampra turdisar jabmolan bwdeten bar anin yereten."

Angante jabmolan gurdible dungnaiten, kun mandran a boantaji iylai gameji'- e hang-hangmar aman kun jannong lingan bangsa jabmolan bwdle. Etteden titte iten asan turdisaran gijtate? Hang-hangmaran jalangle gameten, 'bo assangim maran antate lumeten."

Boantanji aninji a gamangan a d'ong gamleji, anlen iten0 turdisaran ate apiba po?"Gamangan gameten, ijja. Bogad amben antate a lumlenden, anta ampra amben gomosaran janang apite. Jandruman a gad-gad a yaman sikoija omdeba, turdisaran rukuan rukule soiba bindo gomosaran gulumi singbahen pangaiba."

Hanangna maranji kun kata beran orde arapsuiberan agaramgam rapti agganludadji, Anten asan aninji a d'ong antate abganludben asan Jisun ado'ng oblinglaji. Jisun gameten"ayengante amandra bangsa jabmolan bwdeten anin Kristun arapsuijan na. Jannongan ordaran na. Bangsa jabmolan Kitungan a rajamling a mandraji a d'ong apsuite."

Turdisaran aninji a d'ong arabmadan tiyte, ayengante a mandraji er-bangsan daku. Ayengante assangim mar turdisaran bwdeten orde bwdle yereten anin sonuman na. Jandruman a gad-gadan deli ordaran a ranasuman do gad-gad maranji Kitungan a pisirdianji na."

Angante ordaran rasumte, anta a yamling pisirdianji pintun a o'nanji a d'ong abrukule hamangtud lingan pidtaji. Uante edanan do ramda ji'n dete. Ante adnang roitad maranji aninji auan Kitungan a rajamlingan uyungan ambrij tana'ran deteji.

Jisun bar okij gameten do ordaran ranasuman a deten hadab darungyung saring anin ordarban dayartai. Anin yante gamle ordaran saring ruangban yereten anin kun ambrij na ordarban dayartai. Anin aboi do'ngan dakute bar anin rianglingan tarub rattam lingan dayartai, dajingte mandra Kristu lingan dakulin karahidan hangleji, aninji karahidan saring ditenji do aninji a d'ong rianglingan rabangteji.

Anta tiki ayengante a Kristu maranji ameng d’ong dakuteji aninji karahidan saring anabdinan a delen a Kristu maranji ampra mailen riangban anamdaijan deteji. Aninji kuddubanji titte Jisun ampra basuteji. Anta tiki, Jisun anin amandranji ampra barij sanabyun do abo maina lingan tordong ayam basuteji.

Ayengante amandraji Jisun amang dertenji aninji a d'ong bo ranub boban atiyben asan Jisun sibdaijeten. aninji Kitungan ampra barij sanabyun batte basule rajagodteji.

Bindo butente Jisun a mang ling adderne Kitungan aninji a d'ong bitsarate. Anin aninji a d'ong kinnorai-lingan pidte, uante edanan do ramda ji'n dete. Kan ambrij bo t’ogin antate angaja abpahide bindo er kaddablabe hamangle dakute. Do bubudanji aninji a d'ong ajumben akkaddabnaji.

Jisun angante dayartai, anin barijlogi sonuman do a rajaman absi'dte. Anin sonuman a d'ong do Kitungan a d'ong a manetaben saring anin a sanandungan apsele sanedan a delen a kuddub mandranji kinnorailingan pidte. Uante tordong ayam apsele to'gin hamangte.

Iten asan gamlenden Adam do Oba Kitungan a d'ong abmaniedji do kan ordarlingan pintun amganleji, anten asan Kitungan kan ate angeten do kan ate absi'dben asan gabri ji'neten. Bindo bo dinna Kitungan aboi tabme ruangan do tabme ordaran gabdelte. Itente ate marid do barij dete.

Jisun do anin a mandranji tabme ordarlingan basuteji, do itente a kuddub dakute kun a kuddub a lanangka anin tordong ayam rajagodte. Anin dile mandran amad'an gosodte do kanalkalan, danukan, edanan er bangsan, kanalkalan do karahidan ade'. Jisun sanabyun do janardin batte anin arajaman a langka rajagodte. Do anin a mandra damanji ampra tordong ayam basute.