8. Kitungan Josep do a birindan a d’ong dangrabte.

Ateng mihum atiki, Jakub agante talaibale, anin boi-boi a manadsi onan, Josep a d’ong a buhanganji butente gupa-med-linji a gijben asan a mangbanji appaiyeten.

Josep a buhangnji anin a d’ong arder-madleji, eten asan gamlenden a u’anji anin a d’ong ateng timyemmeten bar Josep ganumten gijeten do anin aniji a lanangka dane-god mar dete. Agante Josep aninji amangba yeraiten, aninji anin a d’ong urungleji do hani bo’anta bebara maranji amangba temleji.

Josep a buhangji s’ingan a dayarrenji abmang, Josep a sindri ridleji do Kimmedan a mihamlimg tabbubleji. Anta tiki kun sindrin a u’anji a d’ong absuijleji, kun batte anin ogandite do, bo’ tulab jontun Josep a d’ong kabhideten. Jakub boi-boi dukka-neten.

Hani bo’anta bebara maranji Josep a d’ong Misor desaban urungleji. Misor aboi surda, ranapti desa Nilo Alon adamba dakule. Hani boanta bebara maranji Josep a d’ong bo boantan ambrij ranapti do gamang mar Sorkar a dandrab danegod mar amangba timleji. Josep a gamangan a d’ong bangsale gankileten, do Kitungan Josep a d’ong absittaeten.

A gamangan a dukri anin batte a demadben asan ogaleten, bindo kan batte Josep Kitungan a asaggem ling pintun a lumben asan adnordead. Anin barabdale do janoldan batte Josep a d’ong abdusaeten. Kun asan anin a d’ong banondin dele do karoijo-singan anappaiyan dele. Karoijo-sing linagan janang Josep Kitungan a der-derna ling dakule do Kitungan anin a d’ong absitaeten.

Anin er-dusa mar dakule, dele janang Josep karoijo-sing lingan bagu-mihum sikkoija dakule. Bo togal lingan, Paron, “butente a d’ong Misor desa lingan Raja gamteji” bagu ganumtenji anin a d’ong boi-boi bantongijdage abme’eten. A ganumtenji a garam-gaman buteja a hanag-tih-ber mar opungle adraptiadji.

Ganumten a garam-gaman a opungben asan Kitungan Josep a d’ong ranaptin tieten, anten asan Josep a d’ong Paorn apsele karoijo-singan saring anurungan dele. Anin apsele Josep ganumtenji amdangle do gamle, gulji mihum sikkoija Kitungan boi-boi tanrungalan appaitai, kun ambrij gulji mihum kantaran dete.

Josep a d’ong Paron boi-boi taleten, anten asan anin a d’ong anab-bagu ranapti danegod-mar gamle tabgijeten.

Gulji mihum bangsa tanrungalan ayam lingan ateng jandruman a tartumben asan Josep mandranji a d’ong opungeten. Angante gulji mihum kantaran yerrai, yante gamle mangranji ganagan a gaben asan la’a purge hangteji Josep mandranji amang jandruman temeten.

Sattan Misor disa lingan ted, bindo Kananiya desa lingan janang u’ante Jakub do a birindan basuleji, kantara beyale.

Anten asan Jakub a deba onger onanji jandruman a hiben asan Misor desaban appaietenji. Angante a buhanganji jandruman a hiben asan Josep a temangba tanangleji aninji Josep a d’ong rapti adnab-madadji. Bindo Josep aninji a d’ong rapti abmadeten.

Aninji abyar j’elinji orde ijja antate tunjinglen atiki, Josep aninji a d’ong opungle, “hen buhangben, Josep!” a bantong dong. Angante amben er-bangsa baran a lumben asan ogalle bo’ boanta abmele a temlih, bindo Kitungan kun er-bangsan ate banangsan abme’ten. Misor desan yerre a basuba, hen tedte amben do birindabenji apsele rapti oskaitai.

Angante Josep a buhangji s’ingan yarrenji do a u’anji, Jakub a d’ong Josep nami sikkoija a m’eng daku gamle opungleji, anin boi-boi moihdale.

Jakub talaibale, dele janagden anin a birindanji ampra Misor desaban yereten do tedte anin aninji ampra basueten. Jakub a karahidan abmang, anin kuddub dile a onger onanji a d’ong absittaeten.

Etente anosaij janeb-jeban Kitungan Abraam batte subjaeten anate anin Issak a s’i ling surpideten, atiki Jakub a d’ong do anta tiki, Kaub Miggal a onger onanji a d’ong do a birindaji a s’i ling surpideten. Miggal a onger onanji a birinda Israel Miggal a tegaji deleji.