4. Maromak nia promesa ho Abraun

Tinan barak liu ona depoiz inundasaun boot, ema sei nakonu iha mundu no sira sei halo sala ba Maromak no ba malu. Tamba sira hotu ko'alia lian ne'ebé mak hanesan, sira halibur hamutuk no forma sidade ida. Sira la halo tuir Nai Nia orden atu namkari iha mundu laran.

Sira foti-an tebes, no la obedese ba Nai Nia orden atu moris loloos. Liu-liu tan sira komesa harii Tóre aas liu besik to'o iha lalehan. Nai Maromak haree katak se sira nafatin moris hamutuk hodi halo krime, sira sei halo pekadu barak liu tan.

Tan ne'e Nai muda sira Nia lian sai lian oi-oin ne'ebé la hanesan no hafahe sira ba mundu rai klaran. Sidade ne'ebé sira harii ne'e hanaran Babel ka signifika "Konfuzaun".

Tinan atus ba atus tuir mai Nai ko'alia ba mane ida naran Abraun. Nai Maromak hatete ba Nia, " Husik ó-nia nasaun no ó-nia familia hodi la'o ba nasaun ida-ne'ebé Hau sei hatudu ba ó. Hau sei fó bensaun ba ó no halo ó-nia jerasaun sai povu boot ida. Hau sei hamorin ó nia naran. Hau mós sei fó bensaun ba ema ne'ebé fó bensaun ba ó no fó malisan ba sira ne'ebé fó malisan ba ó. Ema hotu iha mundu sei hetan bensaun tamba ó.

Abraun rona ba Maromak nia orden no halo tuir. Nia lori mós ho nia fen, Sarai, hamutuk mós ho nia atan sira hotu inklui buat ne'ebé nia iha hodi bá iha nasaun ne'ebé Maromak haruka nia atu ba, Nia mak rai kanaan.

Bainhira Abraun to'o ba iha rai kanaan, Maromak hatete, "Haree ba ó nia sorin loos no karuk. Hau sei fó nasaun ne'e tomak ba ó, no ó nia jerasaun sei sai nain. "Nune'e Abraun hela metin iha nasaun ne'e.

Iha mós mane ida naran Melkisedek, Nia nu'udar Maromak Poderozu Nia Saserdote ida. Loron ida, bainhira Abraun funu hotu, Nia ho Abraun hasoru malu. Melkisedek fó bensaun ba Abraun no dehan, "Maromak poderozu nain ba lalehan no rai, fó bensaun ba Abraun. "Depoiz Abraun fó presente(oituan husi nia rikusoin) balun ne'ebé Nia hetan husi manán funu ba Melkisedek.

Tinan balun liu ona, maibe Abraun no Sarai seidauk hetan oan-mane. Nai Maromak ko'alia ba Abraun no promete tan ba Nia katakNia sei hetan oan-mane ida no Nia jerasaun sei nakonu hanesan fitun iha lalehan. Abraun fiar ba Nai nia promesa. Maromak deklara katak Abraun ema loos tamba Nia fiar ba Maromak nia promesa.

Tuir mai Maromak halo promesa ho Abraun. Promesa nu'udar konkordansia entre parte rua hodi halo buat ruma ba ida no seluk. Maibe iha kazu ida ne'e, Maromak promete ba Abraun bainhira nia toba dukur hela, maske nune'e Abraun sei bele rona Maromak Nia lian. Maromak dehan, "Hau sei fó ba ó, oan-mane ida husi ó-nia ran rasik, Hau sei fó rai kanaan ba ó-nia jerasaun. "Maibe Abraun seidauk hetan nafatin oan-mane.