14. ୧୪ .ଜଂଗଲ୍ ନୁ ଭାଟ୍‌କାରନା

ପାରମେଶ୍ୱରସ୍ ଇସ୍ରାଏଲ୍ ରିନ୍ ହୁ ନିଯୋମ୍ ବୋନ୍ ତେଂଗାଗେ ମୁଜ୍‌ୟିୟାସ୍ ନେଖାଏ ହୁବଡାରିନ୍ ହିଁଚ୍‌କରାଇ ହୁସ୍ ଘି ଶପଥ୍ ବୋନ୍ ପାଲନ୍ କାମନା ରାଇଦ । ଆରୁ ହୁସ୍ ସିନେ ପାର୍ତା ସ୍ତିନ୍ ଆଗଲୀ ଆଗୁୱାଇ କାମ୍‌ଚାସ୍ । ହୁସ୍ ହୁବଡାରିନ୍ ଶପଥ୍ ଘି ରାଜି ଗେ ହୁଆଁ ବେଦ୍‌ଦାଲାସ୍ । ହୁ ରାଜି ବୋନ୍ କାନାନ୍ ରାଜି ତେଂଗା ଲାର୍ । ପାରମେଶ୍ୱରସ୍ ବାଦଲୀ ଘି ଖୁଟା ନୁ ହୁବଡାର୍ ଘି ଆଘ୍‌ଲି ଆଘ୍‌ଲି କେରାଦ୍ ,ଆରୁ ହୁବଡାର୍ ହୁଦ୍ ଘି ପାଛିଲି ପାଛିଲି କେରାର୍ ।

ପାରମେଶ୍ୱରସ୍ ଆବ୍ରାହାମ୍, ଇସାହାକ୍ ଆରୁ ୟାକୁବ୍ ରିନ୍ ଶପଥ୍ କାମ୍‌ଚା କାଚାସ୍ କା ହୁ ପ୍ରତିଜ୍ଞା ଘି ରାଜିନ୍ ହୁବଡାର୍ ଘି ବାଉଁଶା ଗେ ଚୋସ୍, ଲେକିନ୍ ହୁ ସାମୀଏଁ ନୁ ହୁସାନ୍ ଜୁକକୁ ଗୁଡେ ଜାତିୟାର୍ ରାଲାର୍ । ହୁବଡାରିନ୍ କାନାନୀ ତେଂଗାକାଲାଦ୍ । ହୁ କାନାନୀ ଆଲାର୍ ପାରମେଶ୍ୱଁର୍ ସିନ ଆରାଧାନା ମା କାମାଲାର୍ ଆରୁ ହୁସ୍ ଘି ଆଦେସ୍ ବୋନ୍ ମା ମାନାଲାର୍ । ହୁବଡାର୍ ଝୁଠା ଦେବତା ଗୁଠିନ୍ ପୁଜାପାଠ୍ କାମାଲାର୍ ଆରୁ ମୁରୁକ୍ ଲେଖା ନୁ ଖାରାପ୍ ନାଲଖୁ କାମାଲାର୍ ।

ପାରମେଶ୍ୱରସ୍ ଇସ୍ରାଏଲ୍ ଲିରିନ୍ ତେଂଗୀୟାସ୍,” ଯେ ବାକେନ୍ ନିମ୍ ହୁ ଶପଥ୍ ଘି ରାଜି ନୁ କୋର୍ ହାଲେ ହୁସ୍‌ତାର ଜାମା କାନାନିୟାର୍ ସ୍ତିନ୍ ଛୁଟ୍ କାରା ମନୋର୍ । ହୁବଡାର୍ ଗାନେ ମିତ୍ରତା ଆମ୍‌କେ କାମା ଆରୁ ହୁବଡାରିନ୍ ଆମକେ ବେ ଞ୍ଜେରା । ନିମ୍ ହୁବଡାର୍ ଘି ଜାମା ମୁର୍ତି ଗୁଠିନ୍ ପୁରା ଖତମ୍ କାମ୍‌କେ ଚିଚ୍ କେ । ଆଗାର୍ ନିମ୍ ଏଘାଁ କାଥ୍‌ଥା ବୋନ୍ ମା ମେନୋର୍ ହାଲେ ,ତା ନିମ୍ ଏଘାଁ ଚାଲତେ ହୁବଡା ରଘି ଦେବତା ଗୁଠିନ୍ ପୁଜାପାଠ୍ କାମାଲାଗୋର୍ ।

ଯେ ବାକେନ୍ ଇସ୍ରାଏଲ୍ ଲିର୍ କାନାନ୍ ଘି ସୀମା ନୁ ଆଣସିୟା ର୍ ,ମୁସାସ୍ ଇସ୍ରାଏଲ୍ ଘି ଜାମା ଗୋତର୍ ସ୍ତିନ୍ ଅଣ୍ଟା ଅଣ୍ଟା କାମିକିରୀ ବାରୋଟା ଆଲାରିନ୍ ଚୁନ୍‌ଚାସ୍ । ହୁସ୍ ହୁବଡାରିନ୍ ତାଇୟାସ୍ କା ହୁ ରାଜିଦ୍ ଏସ୍କେ ଆତ୍‌ଲି ବୁଲି କିରୀ ଏରାଗେ ତାଇୟାସ୍ । ହୁବଡାର୍ ହୁ କାନାନିୟାର୍ଘି ଭେଦ୍ ବୋନ୍ ଅନ୍ଦ୍ ରାନା ରାଚାଦ୍ ଆରୁ ଏର୍‌କେ କା ହୁବଡାର୍ ଶକ୍ତି ଶାଳି ଆତ୍ଲ୍ ନାର୍ କା ଦୁର୍ବଳ ଆତ୍ଲ୍ ନାର୍ ।

ହୁ ବାରୋ ଆଲାର୍ କାନାନ୍ ରାଜିନ୍ ନ୍ତି ମାନିକିରୀ ଚାଲିସ୍ ଉଲ୍ଲା ତୋକ୍ କେରାର୍ ଆରୁ ହୁବଡାର୍ କିରିୟାର୍ ବାରଚାର୍ । ହୁବଡାର୍ ଆଲାରିନ୍ ତେଂଗିୟାସ୍ ,”ହୁ ରାଜି ନୁ ମୁରୁକ୍ ଉବଜାନାର୍ ବାଲା ଜାଗାହ ଆତଲି ଆରୁ ଚାଷ୍ ବାସ୍ ମୁରୁକମାନି ଦ୍ । ଲେକିନ୍ ଦସ୍ ଲୋକ୍ ଯାଁଚପାରତାଲ୍ କାମୁର୍ ତେଂଗିୟାର୍ ,”ହୁବଡାର୍ ଘି ପାଡା ଶକ୍ତିଶାଳି ଆତଲି ,ଆରୁ ହୁବ୍‌ଡ଼ା ଆଲାର୍ ଲାମ୍ବା ଚଉଡା଼ ଆତ୍‌ଲା ନାର୍ ! ଲେକିନ୍ ନାମ୍ ହୁବଡାରିନ୍ ହାମ୍‌ଲା କାମୋତ୍ ହାଲେ, ତା ସଥେନ୍ ହି ହୁବଡାର୍ ନାମାରିନ୍ ହାରାବୋଚର୍ ଆରୁ ନାମାରିନ୍ ପିଟୋର୍ ଚର୍ । ”

ହୁବାକେନ୍ ନୁ କାଲେବସ୍ ଆରୁ ୟହୋସୁ ସ୍ ଆରୁ ଦୁସ୍‌ରା ଜୋଡ଼େ ଯାଚପାରତାଲ୍ କାମୁର୍ ତେଂଗିୟାର୍ ,”ସୋଥେନ୍ କା କାନାନ୍ ନ୍ତା ଆଲାର୍ ଲାମ୍ବା ଆରୁ ଶକ୍ତି ଶାଳିର୍, ଲେକିନ୍ ସୋଥେନ୍ ହି ନାମ୍ ହୁବଡାରିନ୍ ହାରାବା ଅଂଗତ୍!ପାରମେଶ୍ୱ ରସ୍ ନାମାଗେ ଲାଗାନ୍ ଲାଢ଼ୋସ୍ !”

ଲେକିନ୍ ଆଲାର୍ କାଲେବ୍ ଆରୁ ୟହୋସୁ ର୍ ଘି କାତ୍‌ଥା ମା ମେନଚାର୍ । ହୁବଡାର୍ ମୁସା ଆରୁ ହାରୁନ୍ ସିନ୍ ଖିସାରାର୍ ଆରୁ ତେଂଗି ୟାର୍ ,”ନିମ୍ ଏମାରିନ୍ ଇ ଖାତ୍‌ରା ଜାଗାନୁ ଏନ୍ଦେର୍ ଗେ ଅନ୍ଦର୍ କାର୍ ? ଏମାରିନ୍ ମିସ୍ର୍ ରାଜିନୁ ରାନା ରାଚାଦ୍ । ଲେକିନ୍ ଏମ୍ ହୁ ରାଜିନୁ କୋମ୍ ହାଲେ ଏମ୍ ଲାଢ଼େ ଇ ନୁ ଖିୟାମ୍ କୋମ୍ , ଆରୁ କାନାନ୍ ନ୍ତା ର୍ ଆଲାର୍ ଏମ୍‌ହାଁଏ ମୁକ୍ କା ଆରୁ ହଦ୍ଦୁ ରିନ୍ ଦାସ୍ ବାନାବୋର୍ । ”ହୁବଡାର୍ ଆଲାର୍ ମିସ୍ରି ରାଜି କିରରାଗେ ଲାଗାନ୍ ଅଣ୍ଟା ଦୁସ୍‌ରା ଆଗୁଆ ସିନ୍‌ ଚାଜା ଚାହାଲାର୍ ।

ବାକେନ୍ ହୁ ଆଲାର୍ ଏନ୍ନେ ତେଂଗିୟାର୍ ବାକେନ୍ ପାରମେଶ୍ୱରସ୍ ମୁରୁଖ୍ ଖିସାରାସ୍ । ହୁସ୍ ମିଲ୍‌ମିଲାପ୍ ତାମ୍ବୁନୁ ବାରଚାସ୍ ଆରୁ ତେଂଗିୟାସ୍,”ନିମ୍ ଏଘାଁ ବିରୁଦ୍ଧନୁ ଛାଲ୍ କାମଚ୍ କାଦାର୍ ,ଇଦ୍ ଘି ଲଗାନ୍ ନିମ୍ ଜାମାର ଇ ଜଂଗଲ୍ ନୁ ଭାଟ୍କାର୍ ନା ପାଡରୋଦ୍ । ହାର୍ ଅଣ୍ଟା ଆଲାର୍ ବିସ୍ ବଛର୍ ନ୍ତା ଆରୁ ହୁସ୍‌ତି ବାଗ୍‌ଗେ ବଛର୍ ନ୍ତା ହୁସାନ୍ ଖିଆର୍ କୋର୍ ଆରୁ ଏକା ବାକେନ୍ ଭି ହୁ ରାଜିନୁ କୋରାଗେ ପଲଦାର୍ ଯେ ବୋନ୍ ଏନ୍ ନିମାଗେ ଚିଆଲ୍ ଦାନ୍ । ଖାଲି କାଲେବ୍ ଆରୁ ୟହୋସୁ ସ୍ କୋରା ଅଂଗର୍ ।”

ଯେ ବାକେନ୍ ଆଲାର୍ ପାରମେଶ୍ୱରସ୍ ଘି ଏନ୍ନେ ତେଂଗତେ ମେନଚାର୍ ,ବାକେନ୍ ହୁର୍ ଦୁଃଖୀ ମାନ୍‌ଚାର୍ ଏନ୍ଦେର୍ ଗେ କା ହୁବଡାର୍ ପାପ୍ କାମ୍‌ଚକାରଚାର୍ । ଇଲେଖାନୁ ହୁବଡାର୍ କାନାନ୍ ନ୍ତାର୍ ଆଲାର୍ ଘି ମିୟାଁ ହାମଲା କାମାଗେ ତେୟାରୀ କାମଚାର୍ । ମୁସାସ୍ ହୁବଡାରିନ୍ ମା’ କାଲାଗେ ଚେତାବାନି ଚିଚାସ୍ ଏନ୍ଦେର୍ ଗେ କା ପାରମେଶ୍ୱରସ୍ ହୁବଡାର୍ ଘି ସାଂଗେନୁ ମାକାଦାସ୍, ଲେକିନ୍ ହୁବଡାର୍ ହୁସଘି କାଥ୍ ଥା ବୋନ୍ ମା ମେନ୍‌ଚାର୍ ।

ପାରମେଶ୍ୱରସ୍ ଇ ଲାଢ଼େଇ ନୁ ହୁବଡାର୍ ଘି ସାଂଗେନୁ ମା କେରାସ୍ ,ଇଦଘି ଲାଗାନ୍ କାନାନିଆର୍ ହୁବଡାରିନ୍ ହାରାବା ଚିଚଚାର୍ ଆରୁ ହୁବଡାର୍ ସ୍ତି ନ୍ ଜୁକକୁରିନ୍ ପିଟେଚାର୍ । ବାକେନ୍ ଇସ୍ରାଏଲ୍ ଲିର୍ କାନାନ୍ ସ୍ତି ନ୍ କିରୟାର୍ । ଆଘଲି ଚାଲିସ୍ ବଛର୍ ତୋକ୍ ,ହୁବଡାର୍ ଜଂଗଲ ନୁ ଇୟା-ହୁୟା ଭାଟ୍ କାରାଚାର୍ ।

ଇସ୍ରାଏଲିର୍ ଆଲାର୍ ସ୍ତିନ୍ ଜଂଗଲ୍ନୁ ଭାଟ୍କାର୍ନା ଘି ଚାଲିଶ୍ ବଛର୍ ଘି ବାଦ୍ ନୁ ପାରମେଶ୍ୱରସ୍ ହୁବ୍ଡ଼ାର୍ ଘି ଦାର୍କାରି ଗୁଠିନ୍ ପୁରା କାମ୍ ଚାସ୍ । ହୁସ୍ ହୁବ୍ଡ଼ାରିନ୍ ସରଗ୍ ସ୍ତିନ୍ “ମାନ୍ନା“ ତେଂଗ୍ନାବାଲା ଆସ୍ମା ଚିଚ୍ ଚାସ୍। ହୁବ୍ଡ଼ାର୍ ଅଡ଼ା ଘି ଝୁଣି ସ୍ତିନ୍ (ଜେ କି ଆଧା ମିଆ ବାରିକିରି ଅଡ଼ାମାନିଦ୍) ହୁଦ୍ ଘି ଛାଇଁନୁ ତାଇୟାଗେ ହୁଦ୍ ଘି ଚାହାନୁ ଅନାଗେ ଲାଗାନ୍ ଆହାଡ଼ା ରୋଦ୍। ହୁ ପୁରା ସମୟନୁ, ପାରମେଶ୍ୱରସ୍ ହୁବ୍ଡ଼ାର୍ ଘି ଚିଢ଼ା ଗୁଠି ଆରୁ ଜୁତା ଗୁଠି ଘି ଏଟ୍ରେନାସ୍ତିନ୍ ବାଚାବା ଉଇୟାସ୍।

ଏତକ ତକ୍ କା ପାରମେଶ୍ୱରସ୍ ହୁବ୍ଡ଼ାର୍ ଗେ ଆମ୍ମୁ ହାପ୍ପାଗେ ଚମତ୍କାର୍ ରୂପ୍ ସ୍ତିନ୍ ଚାଟ୍ ଣିନ୍ ସ୍ତିନ୍ ଆମ୍ମୁ ଅଥ୍ରାସ୍ ଲେକିନ୍ ଇ ଜାମା ମାନ୍ତେ ହୋଇ, ଇସ୍ରାଏଲିର୍ ଆଲାର ଗୁଠିର୍ ପାରମେଶ୍ୱରସ୍ ଘି ବିରୁଦ୍ଦନୁ ଆରୁ ମୁଶାସ୍ ଘି ବିରୁଦ୍ଦନୁ ନିନ୍ଦା କାମ୍ ଚାର୍ ଆରୁ କୁଡ଼ କୁଡ଼ରାର୍। ହାଲେ ହି, ପାରମେଶ୍ୱରସ୍ ବିଶ୍ୱାସ୍ ୟୋଗ୍ଯ ରାଚାସ୍। ହୁସ୍ ଜେନ୍ ଶପଥ୍ କାମ୍ ଚାକା ଚାସ୍ କାହୁସ୍ ଆବ୍ରାହାମ୍, ଇସାହାକ୍ ଆରୁ ୟାକୁବ୍ ଘିର୍ ବଂଶ୍ ଗୁଠିର୍ ଘି ଲାଗାନ୍ ହୁସ୍ କାମ୍ ଚାକା ଚାସ୍।

ଅଣ୍ଟା ଆରୁ ସମୟ ବାକେନ୍ ହୁବ୍ଡ଼ା ଆଲାର୍ ଘି ଚାହାନୁ ଆମ୍ମୁ ମାଲ୍ଲାରୁଦ୍, ପାରମେଶ୍ୱରସ୍ ମୋଶାସିନ୍ ତେଂଗିୟାସ୍, “ଚାଟ୍ ଣିନ୍ତି କାଥ୍ଥା କାମା ହୁସ୍ ତିନ୍ ଆମ୍ମୁ ଉର୍ଖ ।”ଲେକିନ୍ ମୁଶାସ୍ ଚାଟ୍ ଣି ଗାନେ କାଥ୍ଥା ମା କାମ୍ଚାସ୍। ଲେକିନ୍ ଉବୋନ୍, ହୁସ୍ ଲାଠିସ୍ତିନ୍ ଚାଟ୍‌ଣୀ ମିୟାଁ ଦୁଇଥର୍ ଡେମ୍ଚାସ୍ । ଇ ଲେଖାନୁ ହୁସ୍ ପାରମେଶ୍ୱରସ୍ ସିନ୍ ନିରାଦାର୍ କାମ୍‌ଚାସ୍। ଜାମାର୍ ଗେ ହାପ୍ପା ଗେ ଲାଗାନ୍ ଚାଟ୍ ଣିନ୍ତି ଆମ୍ମୁ ଉର୍ଖା ବାର୍ଚ, ଲେକିନ୍ ପାରମେଶ୍ୱରସ୍ ମୁଶାସିନ୍ ଖିସା ରାଚାସ୍ । ହୁସ୍ ତେଂଗିୟାସ୍,”ଏନ୍ଦେର୍ ଗେନିନ୍ ଏନ୍ନେ କାମଚ୍କାଏ , ଏଦ୍ ଘି ଲାଗାନ୍ ନିନ୍ ଶପଥ୍ ଘି ରାଜିନୁ କରାଗେ ପଲ୍ ଦାଏ ।”

ବାକେନ୍ ଇସ୍ରାଏଲ୍ ଲିର୍ ଆଲାର୍ ଚାଲିଶ୍ ବଛର୍ ତକ୍ ଜଂଗଲ୍ନୁ ଭାଟ୍କା ରାଚ୍କା ଚାର୍ । ହୁବାକେନ୍ ପାରମେଶ୍ୱରସ୍ ବିରୁଦ୍ଧ୍ ଲାଡ଼େଇ କାମ୍ ଚାକା ଚାର୍ ହୁବ୍ଡ଼ାର୍ ଜାମାର୍ କେଚ୍ଚାର୍ କେର୍କା ଚାର୍ । ହୁବାକେନ୍ ପାରମେଶ୍ୱରସ୍ ହୁ ଆଲାରିନ୍ ଆରୁ ହି ଶପଥ୍ ଘି ରାଜି ଘି ଶିବାନେ ତକ୍ ଅଚାସ୍ କେରାସ୍ । ଆକ୍କୁନ୍ ମୁଶାସ୍ ମୁରୁକ୍ ପାଚ୍କି ମାନ୍ଚାସ୍ କେର୍କାଚାସ୍, ହୁଦ୍ ଘି ଲାଗାନ୍ ପାରମେଶ୍ୱରସ୍ ଆଲାର୍ ଘି ଆଗ୍ ୱାଇ କାମାଗେ ଲାଗାନ୍ ହୁବ୍ଡ଼ାର୍ ଘି ମାଦେତ୍ ଲାଗାନ୍ ୟହୋଶୁସ୍ ସିନ୍ ଚାଜିୟାର୍ । ପାରମେଶ୍ୱରସ୍ ମୁଶାସ୍ ସିନ୍ ଇ ଶପଥ୍ କାମ ଚାସ୍ କା ଅଣ୍ଟା ଉଲ୍ଲାନୁ ହୁସ୍ ହୁ ଆଲାର୍ ଘି‍ଚାହାନ୍ ମୁଶାସ୍ ଲେଖା ଅଣ୍ଟା ଭବିଷ୍ଯବକ୍ତାସିନ୍ ତାଇୟସ୍।

ହୁ ବାକେନ୍ ପାରମେଶ୍ୱରସ୍ ମୁଶାସିନ୍ ଅଣ୍ଟା ପାର୍ତା ମିୟାଁକାଲାଗେ ତେଂଗିୟାସ୍ ତାକି ହୁ ଶପଥ ଘି ରାଜି ବୋନ୍ ଏରା ଅଂଗସ୍ । ମୁଶାସ୍ ହୁ ଶପଥ୍ ଘି ରାଜିବୋନ୍ ଏରିୟାସ୍ ଲେକିନ୍ ପାରମେଶ୍ୱରସ୍ ହୁ ସିନ୍ ହୁ ସାନ୍ କାଲାଗେ ଅନୁମତିମା ଚିଚ୍ ଚାସ୍ । ତା ମୁଶାସ୍ କେର୍ଚାସ୍ କେରାସ୍, ଆରୁ ଇସ୍ରାଏଲିର୍ ତିରିଶ୍ ଉଲ୍ଲା ତକ୍ ଦୁଃଖି ମାନ୍ଚାର୍ । ୟହଶୁସ୍‍ ହୁବ୍ଡ଼ାର୍ ଘି ପୁନା ଆଗୁଆ ମାନ୍ଚାସ୍ । ଯହଶୁସ୍ ଅଣ୍ଟା ବାନେ ଆଗୁଆ ରାଚାସ୍ ଏନ୍ଦେର୍ ଗେ କା ହୁସ୍ ପାରମେଶ୍ୱରସ୍ ଘି ମିୟାଁ ଭାରସା କାମଚ୍ କା ଚାସ୍ ଆରୁ ହୁସ ଘି କାଥ୍ଥା ଗୁଠି ବୋନ୍ ମାନ୍ ଚାକା ଚାସ୍ ।