15. ଶପଥ୍ ଘି ରାଜି

ଆଖିର୍ନୁ, ଆକ୍କୁନ୍ ହୁ ସମୟ ବାର୍ଚା କା ଇସ୍ରାଏଲି ଆଲାର୍ ଶପଥ୍ ଘି ରାଜି, ଘି କାନାନ୍ ନୁ ପ୍ରବେଶ୍ କାମର୍ । ହୁ ରାଜିନୁ ଏରିହୋ ନାମେ ଘି ଅଂଟା ପାଡ଼ା ରାଚାଦ୍ । ହୁଦ୍ ଘି ହିପାଜିତ୍ ଘି ଲଗାନ୍ ହୁଦ୍ ଘି ଚାରି ପାକ୍ ଖିନୁ ମଜ୍ବୁତ୍ କାଥ୍ଥି ରାଚାଦ୍ । ୟହୋଶୁସ୍ ହୁ ପାଡ଼ାଗେ ଗୁପ୍ତଚୋର୍ ଆଲାରିନ୍ ତାଇୟାସ୍ । ହୁ ପାଡ଼ାନୁ ରାହାଦ୍ ନାମେ ଘି ଅଂଟା ବେସିୟାଦ୍ ରାଲାଦ୍ ହୁଦ୍ ଇବ୍ ଡ଼ା ଯାଂଚ୍ ପାର୍ତାଲ୍ କାମୁରିନ୍ ଛିପା ବାଚାଦ୍, ଆରୁ ବାଦ୍ ନୁ ହୁଦ୍ ହୁବ୍ଡ଼ାରିନ୍ ପାଡ଼ାନ୍ତି ବାଚାବା କିରି ଉର୍ଖା ଗେ ମାଦେତ୍ କାମ୍‌ଚାଦ୍ । ହୁଦ୍ ଏନ୍ନେ କାମ୍‌ଚାଦ୍ ଏନ୍ଦେର୍ ଗେକା ହୁଦ୍ ପାରମେଶ୍ୱରସ୍ ଘି ମିୟାଁ ବିଶ୍ୱାସ୍ କାମାଲାଦ୍ । ଯେ ସମୟନୁ ଇସ୍ରାଏଲ ରିନ୍ ଏରି ହବୋନ୍ ଖତମ୍ କାମର୍ ବକେନ୍ ହୁବ୍ଡ଼ାର୍ ରାହାବ୍ ଆରୁ ହୁବ୍ଡ଼ାର୍ ପରିବାର୍ ରିନ୍ ବାଛା ବାନା ଘି ଲାଗାନ୍ ଶପଥ୍ କାମ୍ ଚିକିଚାଦ୍ ।

ଇସ୍ରାଏଲିର୍ ଆଲାର୍ ଘି ଶପଥ୍ ଘି ରାଜି ନୁ କର୍ନା ଘି ଲାଗାନ୍ ଜାର୍‌ଦାନ୍ ଯୋଢ଼ୁ ପାର୍ ମାନ୍ନା ରାଚାଦ୍ । ପାରମେଶ୍ୱରସ୍ ୟହୋଶୁସ୍ ସିଂନ୍‌ତେଂଗିୟାସ୍, ମୁଖୀଆରିନ୍ ଆଘ୍ଲି କାଲା ଚିୟା ।“ ହୁଦ୍ ଘି ବାଦ୍ ମୁଖୀଆ ସିଂନ୍‌ଜର୍ଦାନ୍ ଜୋଢ଼ୁନୁ ନିଜର୍ ହେଡୁ ଉଇୟାସ୍ ବାକେନି ଆମ୍ମୁ ଘି ଧାରା ଘି ବାହା ନା ଥମରା କେରା, ଯେଏସ୍ କେ କା ଇସ୍ରାଏଲି ଆଲାର୍ ଯୋଢ଼ୁ ଘି ଦୁସ୍‌ରା ପାଖା ତାର ଆରୁ ହାଇ କା ଏହେଁଲା ନ୍ତିନ୍ ପାର୍ ମାନା ଅଂଗର୍ ।

ହୁବ୍ଡ଼ାର୍ ଆଲାର୍ ଗେ ଜରଦାନ୍ ଯୋଡୁ ପାର୍ ମାଂଚାର୍ ବାକେନ୍ ପାରମେଶ୍ୱରସ୍ ୟହୁଶ୍ ସିନ୍ ତେଂଗିୟାସ୍ କା ଏରିହୋ ଘି ମିଆଁ ହାମଲା କାମାଗେ ତିଆର୍ ରରୋ । ହାଲେଭି ହୁଦ୍ କୁକ୍‌କୁ ତାକତ୍‌ବର୍ ପାଡ଼ା ରାଚା । ପାରମେଶ୍ୱରସ୍ ହୁବ୍ଡା ଅଲାରିନ୍ ତେଂଗିୟାସ୍ ହୁବ୍ଡ଼ା ମୁଖିଆ ରିନ୍ ଆରୁ ସେନାରିନ୍ ଛ ଦିନ୍ ତକ୍ ହୁ ପାଡ଼ା ଘି ଚାରି ପାଖୀ ଆରୁ ଚକ୍କର ମାରନା ରାଇ । ଲେକିନ୍ ମୁଖିୟାର୍ ଆରୁ ସେନାର୍ ଗୁଠିର୍ ହନ୍ନେ ନିନ୍ କାମ୍ ଚାର୍ ।

ବାକେଂ ସାତ୍ ଦିନ୍, ଇସ୍ରାଏଲ୍ ଗୁଠିର୍ ହୁ ପାଡା ଘି ଚାରି ପାଖି ଆରୁ ସାତ୍ ଥର୍ ଆରୁ ଚକ୍କର୍ ମାର୍ଚାର୍ । ହୁବ୍‌ଡ଼ା ଘି ପାଡ଼ା ଘି ଚାରି ପାଖି ଆରୁ ସାତ୍ ଥର୍ ଚକ୍କର ମାର୍‌ନା ଘିବାଦ ନୁ, ମୁଖୀଆସ୍ ନିଜର୍ ତୁହୁଣ ଉରିଆସ୍ ଆରୁ ସେନାର୍ ଗୁଠିର୍ ଯୋର୍ ସେ ଚିଇରା ରାଚାର୍ ।

ବାକେନ୍ ଏରିହୋ ଘୀ ଚାରି ପାଖୀ ଆରୁ ନାଚ୍କା କାଥୀ ଖାତ୍ରିଚିଦ୍ ! ଜେସ୍କେ ପାରମେଶ୍ୱରସ୍ ଆଦେଶ୍ ଚିଚ୍କାଚାସ୍ ଇସ୍ରାଏଲର୍ ପାଡା ଘି ଯେତେ ଅଂଟା ଜିନିଶ୍ ବୋନ୍ ନଷ୍ଟ କାମ୍ଚାର୍ । ହୁବ୍ଡ଼ାର୍ ଖାଲି ରାହାବ୍ ଆରୁ ହୁବ୍ଡ଼ା ପରିବାର୍ ବୋନ୍ ଆମ୍ବେୟାର୍ ଚଚାର୍, ଏକାଦ୍ ଇସ୍ରାଏଲିର୍ ଘି ଭାଗ୍ ମାଂଚା କେର୍ କିଚା । ଯେ ବାକେନ୍ କାନାନ୍ ନୁରାନା ବାଲାର୍ ଦୁସ୍‌ରା ଆଲାର୍ ଗୁଠି ମେଂଚାର୍ ଯେ ଇସ୍ରାଏଲିର ଏରିହି ବୋନ୍ ଖତମ୍ କାମ୍ ଚାର୍ ଚିଚଚାର୍, ତା ହୁବ୍ଡ଼ାର୍ ଏଲ୍ ଚିୟାର୍ କେରାର୍ ଇସ୍ରାଏଲ୍ ଆଲାର୍ ହୁଦ୍ ଘି ମିଆଁ ଭି ହାସ୍‌ଲା କାମୋର୍ ।

ପାରମେଶ୍ୱରସ୍ ଇସ୍ରାଏଲ୍ ରିନ୍ ଆଦେଶ ଚିଚ୍କା ଚାସ୍ କା କାନାନ୍ ନୁ ରୁ ବାଲାର୍ ଏନ୍ଦି୍ରିନ୍ ଭି ଜାତିର୍ ଘି ସାଂଗେ ଶାନ୍ତି ଶୃଙ୍ଖଳା କାମ୍‍ନା ମାଲ୍ଲାଦିନ୍ I ଲେକିନ୍ ଗିବୋନିଆଁ ନାମେ ଅଣ୍ଟା କାନାନ୍ ଜାତି ଘି ୟହୋଶୁ ସିନ୍ ଠାକ୍‍ଚାସ୍ କା ହୁବ୍‍ଡ଼ାର୍ କନାନ୍‍ସ୍ତିନ୍ ଗେଚ୍ଛା ଅଣ୍ଟା ଅଢ଼ାସାନ୍ ଘି ରାନାବାଲାର୍ I ହୁବ୍‍ଡ଼ାର୍ ୟହୋଶୁ ସିନ୍ ହୁବ୍‍ଡ଼ାର୍ ଶାନ୍ତି ଶୃଙ୍ଖଳା କାମାଗେ ହେକ୍‌ଖା ଚୋଡ଼ଚାସ I ୟହୋଶୁ ଆରୁ ଅଲ୍‍ଗା ଇସ୍ରାଏଲିର୍ ଘି ଆଗୁଆର୍ ପାରମେଶ୍ଵର ସିନ୍ ମା’ ମେଞ୍ଚାର କା ହୁବ୍‍ଡାର୍ ଗେ ଏନ୍ଦେର୍ କାମନା ରାଇଦ୍ I ହୁଦ୍‍ଘି ଲାଗାନ୍, ହୁବ୍‍ଡାର୍ ଗିବୋନିଆଁ ଘି ସାଂଗେନୁ ଶାନ୍ତି ଶୃଙ୍ଖଳା କାମ୍‍ଚାର୍ I

ତିନ୍ ଦିନ୍ ପାଛ୍‍ଲି, ଇସ୍ରାଏଲିର୍ ଆହାଗେ ଅଙ୍ଗିୟାର କା ଗିବୋନ୍ ଆଲାର୍ କାନାନ୍ ନୁ ହି ରାଲ୍‌ନାର୍ I ହୁବ୍‍ଡାର୍ ଖିସାର୍‍ରାର୍ କେରାର୍ ଏନ୍ଦେର୍ ଗେକା ଗିବୋନିୟର୍ ହୁବ୍‍ଡାରିନ୍ ଧୋଖା ଚିଚ୍‍କାଚାର୍ I ଲେକିନ୍ ହୁବ୍‍ଡାର୍ ଘି ସାଂଗେନୁ କାମ୍‍କାଚାଦ୍ ହୁ ଶାନ୍ତି ଶୃଙ୍ଖଳା ବୋନ୍ କାମ୍‍ଚାର୍ ଉୟାର୍ ଏନ୍ଦେର୍ ଗେ କା ହୁବ୍‍ଡାର୍ ପାରମେଶ୍ଵର ଘି ଆଘ୍‍ଲି କାମ୍‍ଚକାଚାର୍ I ବାକେନ୍ କିଛି ସମୟ ଘି ପାଛ୍‍ଲି, କାନାନ୍ ନୁ ରାନାବାଲାର୍ ଅଣ୍ଟା ଦୁସ୍‍ରା ଜାତି, ଏମୋରିଆଁ ସ୍ତା ରାଜାସ୍ ମେଞ୍ଚାସ୍ କା ଗିବୋନ୍‍ନିୟର୍ ଗୁଠି ଇସ୍ରାଏଲିର୍ ଘି ସାଂଗେ ଶାନ୍ତି ଶୃଙ୍ଖଳା କାମ୍‍ଚାର୍, ଉଦ୍‍ଘି ଲାଗାନ୍ ହୁବ୍‍ଡାର୍ ନିଜର୍ ନିଜର୍ ସେନାରିନ୍ ଅଣ୍ଠାଣସାନ୍ କାମିକିରି ଅଣ୍ଟା ବାଡ଼୍‍କା ସେନା ନାନ୍‍ଚାର୍ ଆରୁ ଗିବୋନ୍ ରାଜି ଘି ମିଆଁ ହାମ୍‌ଲା କାମ୍‍ଚାର୍ ଚିଚାର୍ I ଗିବୋନ୍ ନିୟର୍ ହୁବ୍‍ଡ଼ାରିନ୍ ଘି ମଦେତ୍ କାମାଗେ ୟହୋଶୁସ୍ ଘି ଚାହାଁଗେ ଅଣ୍ଟା ସାନ୍ଦେଶ ତାଇୟାସ୍ I

ଆଖ୍ ରିନୁ ୟହୋଶୁସ୍ ଇସ୍ରାଏଲିର୍ ଘି ସେନାବୋନ୍ ଅନଠାଣ୍ ସାନ୍ କାମ୍ ଚାର୍ ଆରୁ ଗିବୋନୟସ୍ ଘି ଚାହାଁନୁ ଆଣ୍ ସାଗେ ହୁବ୍ ଡ଼ାର୍ ପୁରା ମାହାଁ ତାକ୍ ଏକିୟାର୍ । ଭୋର୍ ପାଇଁ ରିନୁ ହୁବ୍ଡ଼ାର୍ ଏମୋରିୟା ଘି ସେନାରିନ୍ ଚକିତ୍ କାମ୍ ଚାର୍ ଆରୁ ହୁଦ୍ ଘି ମିଆଁ ଲାଢ଼େଇ କାମ୍ ଚାର୍ ଚିଚାର୍ ।

ହୁ ଉଲ୍ଲା ପାରମେଶ୍ୱରସ୍ ଇସ୍ରାଏଲିର୍ ଘି ଲଗାନ୍ ଲାଢ଼ ଚାସ୍ । ହୁବ୍ ଡ଼ାର୍ ଏମୋରିୟା ବୋନ୍ ଘାବ୍ ରା ଚାର୍ ଆରୁ ହୁବ୍ ଡ଼ାର୍ ବାଡ଼କା ବାଡ଼କା ଚିଚଚୁ ଟିଢ଼ା କିରି ଜୁକକୁ ନ୍ତି ଏମୋରିୟା ଗୁଠିରିନ୍ ପିଟେର୍ ଚାର୍ ।

ପାରମେଶ୍ୱରସ୍ ବିଡ଼ି ବୋନ୍ ଆକାଶନୁ ଅଣ୍ଟା ଜାଗାସାନ୍ ଉଏଚାସ୍ ବାକେନ୍ ଇସ୍ରାଏଲିର୍ ଗେ ବାନେ ସମୟ ହାକଖୋର୍ କା ଏମୋରିୟା ବୋନ୍ ପୁରାପୁରି ସ୍ତିନ୍ ହାର୍ ବାଚାର୍ ହୁ ଉଲ୍ଲା, ପାରମେଶ୍ୱରସ୍ ଇସ୍ରାଏଲର୍ ଘି ଲାଗାନ୍ ଅଣ୍ଟା ବାଡ଼୍ କା ଜିତ୍ ମାଂଚାଦ୍ ।

ଯେତେବାକେନ୍ ପାରମେଶ୍ୱରସ୍ ହୁବ୍ଡ଼ା ସେନାରିନ୍ ହାରା ବାଚ୍କା ଘି ପାଛ୍ଲି, ଜୁକ୍କୁ କେନ୍ କାନାନି ଜାତି ଘି ଆଲାର୍ ଇସ୍ରାଏଲ୍ ମିଆଁ ହାମଲା କାମାଗେ ଅଣ୍ଠାଣ୍ ସାନ୍ ମାଂଚ୍ କାଚାର୍ । ୟହୋଶୁସ୍ ଆରୁ ଇସ୍ରାଏଲିର୍ ହାମଲା କାମି କିରି ହୁବ୍ଡ଼ାରିନ୍ ସର୍ବନାସ୍ କାମ୍ଚେ ଚାସ୍ ।

ଇ ଲାଢ଼େଇ ଘି ପାଛ୍ଲି, ପାରମେଶ୍ୱରସ୍ ଇସ୍ରାଏଲ୍ ଘି ଜାମା ଗୋତର୍ ରିନ୍ ଶପଥ୍ ଘି ହୁ ରାଜିନୁ ହୁସ୍ ଗେ ଭାଗ୍ ଚିଚାର୍ । ବାକେନ୍ ପାରମେଶ୍ୱରସ୍ ଇସ୍ରାଏଲିର୍ ବୋନ୍ ହୁଦ୍ ଘି ଜାମା ସୀମା ମିଆଁ ଶାନ୍ତି ପ୍ରଦାନ୍ କାମ୍ ଚାରା ।

ଯେତେବାକେନ୍ ୟହୋଶୁସ୍ ପାଚ୍କି ମାଂଚାସ୍ କେରାସ୍ ତା ହୁସ୍ ଇସ୍ରାଏଲ୍ ଘି ଜାମା ଆଲାରିନ୍ ଅଣ୍ଟା ସାଂଗେନୁ ମେହିୟାସ୍ ହୁବାକେନ୍ ୟହୋଶୁସ୍ ହୁବ୍ଡ଼ା ଆଲାରିନ୍ ୟାଦ୍ ଦିଲାବା ଚାସ୍ କା ହୁବ୍ଡ଼ାର୍ ହୁ କାତଥାବୋନ୍ ପାଳନ କାମାଗେ ଶପଥ୍ କାମ୍ କାଚାର୍, ଲେକିନ୍ ପାରମେଶ୍ୱରସ୍ ହୁବ୍ଡ଼ାର୍ ଘି ସାଂଗେ ସିନେ ପାର୍ତାନୁ ହିଚ୍ କା ଚାର୍ । ହୁବ୍ଡ଼ାର୍ ଆଲାରିନ୍ ପାରମେଶ୍ୱରସ୍ ଘି ମିଆଁ ବିଶ୍ୱାସନୁ ରାଗେ ଆରୁ ହୁଦ୍ ଘି ନିୟମ ଘି ଆନୁସାର୍ ପାଲାନ୍ ନାନାଗେ ଶପଥ୍ ଚିଚ୍ ଚାସ୍ ।