21. ପାରମେଶ୍ୱରସ୍ ମାସିହିସ୍ ଘି ଶପଥ୍ କାମ୍‌ଦାସ୍

ଯେତେବାକେନ୍ ପାରମେଶ୍ୱରସ୍ ଦୁନିଆଁ ବୋନ୍ ସୃଷ୍ଟି କାମ୍‌ଚକାଚାସ୍, ହୁସ ଆହାଲାସ୍ କା ପାଛ୍‌ଲି ଏକିନ୍ ଉଲ୍ଲା ମାସିହିସିନ୍ ତାଇୟା ପାଡ୍‌ର । ହୁସ୍ ଆଦାମ୍ ଆରୁ ହାବାସ୍ତିନ୍ ଶପଥ୍ କାମ୍‌ଚାସ୍ କା ହୁସ୍ ଏନ୍ନେ କାମୋସ୍ । ହୁସ୍ ତେଙ୍ଗିୟାସ୍ କା ହାବାତିନ୍ ଅଣ୍ଟା ବାଉଁଶାର୍ ଜନମ୍ ମାନର୍ ନେର୍ ନେର୍ରୁଘି କୁକ୍‌କୁବୋନ୍ କୁଚର୍ । ଯେନ୍ ନେର୍ରୁ ବୋଦ୍ ହାବାବୋନ୍ ଧୋଖା ଚିଚ୍‌କିଚାଦ୍ ହୁଦ୍ ପୁରାପୁରି ସୈତାନ୍ ରାଚାଦ୍ । ପାରମେଶ୍ୱରସ୍ ଘି ମାନେ ମାସିହି ପୁରାପୁରି ସ୍ତିନ୍ ସୈତାନ୍‌ବୋନ୍ ହାରାବୋଚସ୍ ।

ପାରମେଶ୍ୱରସ୍ ଆବ୍ରାହାମ୍‌ସିନ୍ ଶଫଥ୍ କାମ୍‌କାଚାସ୍ କା ହୁସ୍ ଘି ଚାଲ୍‌ତେ ପୁରା ଦୁନିଆଁ ଘି ଜାମା ଜାତିୟାର୍ ଆସିସ୍ ହାକ୍‌ଖୋର୍ । ପାରମେଶ୍ୱର କିଛି ସମୟ ଘି ବାଦେନୁ ମାସିହି ସିନ୍ ତାଇନାଘି ଚାଲ୍‌ତେ ଇ ଶପଥ୍ ବୋଦ୍ ପୁରା ମାନଦ୍ । ହୁବୋନ୍ ମାସିହି ଦୁନିଆଁ ଜାମା ଜାତିନ୍ତା ଆଲାରିନ୍ ହୁବ୍ଡ଼ାର୍ ଘି ପାପ୍‌ନ୍ତି ଛୁଡ଼ାବୋସ୍ ।

ପାରମେଶ୍ୱରସ୍ ମୁଶାସିନ୍ ଶଫଥ୍ କାମ୍‌କାଚାସ୍ କା ଭବିଷ୍ୟନୁ ହୁ ମୁଶାସ୍ ଘିଲେଖା ଅଣ୍ଟା ଦୁସ୍‌ରା ଭବିଷ୍ୟବକ୍ତାସିନ୍ ତାଇୟସ୍ । ଇ ଭବିଷ୍ୟବକ୍ତାସ୍ ମାସିହିସ୍ ମାନସ୍ । ଇ ଲେଖାନୁ, ପାରମେଶ୍ୱରସ୍ ଆରୁହି ଶପଥ୍ ଘି ହୁ ମାସିହି ସିନ୍‌ତାୟସ୍ ।

ପାରମେଶ୍ୱରସ୍ ରାଜା ଦାଉଦ୍‌ସିନ୍ ଶପଥ୍ କାମ୍‌କାଚାସ୍‌କା ହୁସ୍ ଘି ଅଣ୍ଟା ବାଉଁଶାର୍ ମାସିହି ମାନସ୍ । ହୁସ୍ ରାଜା ମାନସ୍ ଆରୁ ପାରମେଶ୍ୱରସ୍ ଘି ଆଲାର୍‌ଘି ମିୟାଁ ସବୁବାକେନ୍ ଶାସନ୍ କାମୋସ୍ ।

ପାରମେଶ୍ୱରସ୍ ଯିର୍‌ମିୟା ଭବିଷ୍ୟବକ୍ତାସ୍ ଗାନେ କାଥା କାମ୍‌ଚା ଆରୁ ତେଙ୍ଗିୟାସ୍ କା ଉନ୍ଦୁଲ୍ ଅଣ୍ଟା ପୁନା ଶପଥ୍ ହିୟୋଁସ୍ । ହୁ ପୁନା ଶଫଥ୍ ଇସ୍ରାଏଲ୍ ଗାନେ ସିନେନୁ ହିଚ୍‌କାଚାସ୍ ପାଚ୍‌ଚା ଶଫଥ୍ ଲେଖା ମା ମାନଦ୍ । ଯେତେବାକେନ୍ ଆଲାର୍‌ଗାନେ ହୁ ନିଜର୍ ପୁନା ଶଫଥ୍‌ବୋନ୍ ହିୟୋଁସ୍, ତା ହୁସ୍ ହୁବ୍ଡ଼ାର୍ ଘି ମିୟାଁର୍ ନିଜର୍ ରୁପ୍‌ବୋନ୍ ପ୍ରଗଟ୍ କାମୋସ୍ । ହାର୍ ଅଣ୍ଟା ଆଲାର୍ ହୁସିନ୍ ବାନେ ହାକ୍‌ଖୋର୍ ଆରୁ ହୁସ୍ ଘି ନିୟମ୍‌ଗୁଠିବୋନ୍ ପାଲନ୍ କାମାଗେ ଇଚ୍ଛା ଉଇୟୋର୍ । ପାରମେଶ୍ୱରସ୍ ତେଙ୍ଗିୟାସ୍ ଇ ବୋଦ୍ ହୁସ୍ ଘି ନିୟମ୍‌ଗୁଠିବୋନ୍ ହୁବଡାର୍ ଘି ମୋନ୍‌ନୁ ଲିଖ୍‌ନା ଚିନା ଘି ଲେଖା ମାନୋଦ୍ । ହୁବ୍ଡ଼ାର୍ ହୁସ୍‌ଘି ଆଲ୍‌ମାନର୍, ଆରୁ ପାରମେଶ୍ୱରସ୍ ହୁବ୍ଡ଼ାର ଘି ପାପ୍‌ବୋନ୍ ମାଫ୍ କାମୋସ୍ । ହୁସ୍ ମାସିହି ମାନସ୍ ଯେକା ହୁବ୍ଡ଼ାର୍ ଘି ସାଙ୍ଗେନୁ ହୁ ପୁନା ଶପଥ୍‌ବୋନ୍ ହିୟୋଁସ୍ ।

ପାରମେଶ୍ୱରସ୍ ଘି ଭବିଷ୍ୟବକ୍ତାର୍‌ଗୁଠି ଏନ୍ନେ ଭି ତେଙ୍ଗିୟାର୍ କା ମାସିହିସ୍ ଅଣ୍ଟା ଭବିଷ୍ୟବକ୍ତା ମାନସ୍ । ଅଣ୍ଟା ଭବିଷ୍ୟବକ୍ତାସ୍ ହୁ ଆଲାସ୍ ନେର୍ ପାରମେଶ୍ୱରସ୍ ଘି ବାଚନ୍‌ଗୁଠିନ୍ ମେନ୍‌ଦାସ୍ ଆରୁ ଆଲାରିନ୍ ପାରମେଶ୍ୱରସ୍ ଘି ବିଷୟନୁ ଡ଼ିବ୍ଡ଼ିବିଚିଦାସ୍ । ଲେକିନ୍ ତାଇୟାଗେ ପାରମେଶ୍ୱରସ୍ ଶପଥ୍ କାମ୍‌କାଚାସ୍ କା ହୁସ୍ ମାସିହି ଅଣ୍ଟା ବାନେ ଭବିଷ୍ୟବକ୍ତାସ୍ ମାନସ୍ । ହୁସ୍ ମାସିହି ପାରମେଶ୍ୱରସ୍ ଘି ବିଷୟଗୁଠିବୋନ୍ ବାନେକିରି ମେନସ୍, ଆରୁ ହୁସ୍ ଆଲାରିନ୍ ହୁ ବିଷୟବୋନ୍ ବାନେ ଲେଖାନୁ ଶିଖାବୋସ୍ ।

ଇସ୍ରାଏଲ୍ ଯାଜକ୍‌ଗୁଠିର୍ ଆଲାର୍ ଘି ଲାଗାନ୍ ପାରମେଶ୍ୱରସ୍ ଘି ଆଘ୍‌ଲି ବାଲିଦାନ୍ ଚାଢ଼ାବାଗେ ଉଇୟାର୍ । ଇ ବାଲିଦାନ୍ ଆଲାର୍ ଘି ପାପ୍ ଘି ଲାଗାନ୍ ହୁବ୍ଡ଼ାରିନ୍ ପାରମେଶ୍ୱରସ୍ ସ୍ତିନ୍ ଦଣ୍ଡ କାମ୍‌ନା ଜାଗାନୁ ଚାଢ଼ା ବାଚାର୍ । ଯାଜକସ୍ ଜାମାର୍ ଆଲାର୍ ଘି ଲାଗାନ୍ ବିନ୍‌ତି କାମ୍‌ଚାର୍ । ଲେକିନ୍, ହୁସ୍ ମାସିହି ବାନେ ବାଡ଼୍‌କା ଯାଜକ୍ ମାନସ୍ ଯେନ ଟା କା ପାରମେଶ୍ୱରସ୍ ଗେ ଚିୟାଗେ ଅଣ୍ଟା ବାନେ ବାଲିଘି ରୁପ୍‌ନୁ ଖୁଦ୍‌ବୋନ୍ ଚାଢ଼ାବୋସ୍ । ଲେକିନ୍ ହୁସ୍ ଏକ୍‌ଲା ହି ପାପ୍ ମା କାମୋସ୍, ଆରୁ ଯେତେବାକେନ୍ ଖୁଦ୍‌ବୋନ୍ ବାଲି କାମ୍‌ନା ଘି ଲାଗାନ୍ ଚିୟସ୍ ,ତା ଦୁନିଆଁ ଘି ଏନ୍ଦ୍ରି ଭି ତା ଏନ୍ଦ୍ରିନ୍ ଘି ଦୁସ୍‌ରା ବାଲି ଘି ଦାର୍‌କାର୍ ମା ଲାଗୋଦ୍ ।

ଆଲାର୍‌ଘି ମାଝାନୁ ରାଜାସ୍ ଆରୁ ମୁଖିଆର୍ ଶାସନ୍ କାମ୍‌ନାର୍, ଆରୁ ଏକା ଏକା ଗାଲ୍‌ତିଗୁଠି କାମ୍‌ନାର୍ । ରାଜା ଦାଉଦସ୍ ଖାଲି ଇସ୍ରାଏଲିର୍ ଘି ମିୟାଁ ଶାସନ୍ କାମଚାସ୍ , ଲେକିନ୍ ରାଜା ଦାଉଦସ୍ ଘି ବାଉଁଶାର୍ ମାସିହି ପୁରା ଦୁନିଆଁ ଶାସନ୍ କାମୋର୍, ଆରୁ ହୁବ୍ଡ଼ାର୍ ସବୁଦିନ୍ ଘି ଲାଗାନ୍ ଶାସନ୍ କାମୋର୍ । ଇଦ୍‌ଘି ଦୁସ୍‌ରା, ହୁବ୍ଡ଼ାର୍ ସବୁଦିନ୍ ଲାଗାନ୍ ନ୍ୟାୟ ଲେଖାନୁ ଶାସନ୍ କାମୋର୍, ଆରୁ ବାନେକିରି ନିର୍‌ନଇ ଗୁଠିନ୍ ହୋର୍ ।

ପାରମେଶ୍ୱରସ୍ ଘି ଭବିଷ୍ୟବକ୍ତାର୍ ଗୁଠିର ମାସିହିସ୍ ଘି ବାରେ ନୁ ଜୁକ୍‌କୁଗୁଡ଼େ କାତଥା ଗୁଠିବୋନ ତେଂଗୀୟାସ୍ । ଉଦାହରଣ୍ ଘି ଲାଗାନ୍, ମାଲାକି ସ୍ ତେଂଗୀୟାସ୍ ମାସିହିସ୍ ଘି ବାର୍‌ନା ସ୍ତିନ୍ ଆଘଲି ଅଣ୍ଟା ଦୁସ୍‌ରା ଭବିଷ୍ୟବକ୍ତା ବାରସ୍ । ହୁସ୍ ଭବିଷ୍ୟବକ୍ତାସ୍ ଜୁକ୍‌କୁ ମହତ୍‌ପୂର୍ଣ୍ଣ ମାନସ୍ । ଇଦ୍‌ଘି ଦୁସ୍‌ରା, ଯିଶାଇୟ ଭବିଷ୍ୟବକ୍ତାସ୍ ଲେଖା ଦାସ୍‌କା ମାସିହି ଅଣ୍ଟା କୁଆଁରୀନ୍‌ତି ଜନମ୍ ମାନସ୍ । ଆରୁ ମିକା ଭବିଷ୍ୟବକ୍ତାସ୍ ତେଙ୍କାଦାସ୍ କା ମାସିହି ବେଥେଲ୍‌ହେମ୍ ପାଡ଼ାନୁ ଜନମ୍ ମାନସ୍ ।

ଯିଶାଇୟ ଭବିଷ୍ୟବକ୍ତାସ୍ ତେଙ୍କାଦାସ୍ କା ମାସିହିସ୍ ଗାଲୀଲ୍ ଆଡ଼ଡ଼ା ନୁ ରୋସ୍ । ଯେନ୍ ଆଲାର୍ ମୁରୁଖ୍ ଦୁଃଖିନୁ ଆତାଲ୍‌ନାର୍ ଆରୁ ମାସିହିସ୍ ହୁବ୍ଡ଼ାରିନ୍ ଶାନ୍ତିଚୋସ୍ । ହୁସ୍ ଜେଲ୍‌ନୁ ରାନାବାଲାରିନ୍ ଆଜାଦି କାମୋସ୍ । ମାସିହିସ୍ ବେମ୍‌ରିୟାରିନ୍ ଆରୁ ନେର୍ ମା ମେନାର୍, ଏରାଗେ ପଲ୍‌ନାର୍, ତେଙ୍ଗାଗେ ପଲ୍‌ନାର୍ ଆରୁ, ଏକାଗେ ପଲ୍‌ନାର୍ ହୁବ୍ଡ଼ାରିନ୍ ହୁସ୍ ଚାଙ୍ଗା କାମୋସ୍ ।

ଯିଶାଇୟ ଭବିଷ୍ୟବକ୍ତାସ୍ ଇ ଭି ତେଙ୍ଗୟାସ୍ ଆଲାର୍ ମାସିହିସିନ୍ ଇନ୍‌କାର୍ କାମୋର୍ ଆରୁ ହୁସିନ୍ ଆପ୍‌ନା ନାଗେ ଇନ୍‌କାର୍ କାମୋର୍‌ଚୋର୍ । ଦୁସ୍‌ରା ଭବିଷ୍ୟବକ୍ତାର୍ ତେଙ୍ଗ୍‌ୟାର୍ କା ମାସିହିସ୍ ଘି ଅଣ୍ଟା ସାଙ୍ଗେସ୍ ହୁସ୍ ଘି ବିରୁଦ୍ଧ୍‌ନୁ ଚୁଅସ୍ । ଯିଖରୀୟ ଭବିଷ୍ୟବକ୍ତାସ୍ ତେଙ୍ଗିୟାସ୍ କା ହୁସ୍ ସାଙ୍ଗେସ୍ ଏନ୍ନେ କାମାଗେ ଲାଗାନ୍ ଦୁସ୍‌ରା ଆଲାର୍‌ସ୍ତିନ୍ ଚାନ୍ଦି ଘି ତିରିଶ୍ ସିକା ହୋସ୍ । ଇଦ୍‌ଘି ଦୁସ୍‌ରା, କେତ୍‌କୋ ଲୋର୍ ଭବିଷ୍ୟବକ୍ତାର୍ ତେଙ୍ଗିୟାର୍ କା ଆଲାର୍ ଗୁଠିର୍ ମାସିହି ସିନ୍ ପିଟର୍‌ଚୋର୍, ଆରୁ ହୁବ୍ଡ଼ାର ହୁସ୍‌ଘି ଚିଢ଼ାବୋନ୍ ହୁଆଁଗେ ଲାଗାନ୍ ଚିଠା ଟିଡ୍‌ଡାର୍ ।

ଭବିଷ୍ୟବକ୍ତାର୍ ଇ ଭି ତେଙ୍ଗ୍‌ୟାର୍ କା ମାସିହିସ୍ ଏସ୍‌କେ ଖିୟୋସ୍ । ଯିଶାଇୟ ଭବିଷ୍ୟବାଣୀ କାମ୍‌କାଚାସ୍‌କା ମାସିହିସ୍ ଘି ମିୟାଁ ଥୁଫର୍, ହୁସ୍ ଘି ମାଜାକ୍ ଉଡ଼ାବର୍, ଆରୁ ହୁସିନ୍ ଡେମୋର୍ । ହୁବ୍ଡ଼ାର୍ ହୁସିନ୍ ଛେଦର୍ ଚୋର୍ ଆରୁ ହୁସ୍ ବାଡ଼୍‌କା ବାଥା ପିଡ଼ାନୁ ଆରୁ ସାତାବାନାନୁ ଖିୟସ୍‌ କୋସ୍, ଯେତେବାକେନ୍ କା ହୁସ୍ ଏନ୍ଦେର୍ ହି ଗାଲ୍‌ତି ମାଲ୍ଲା କାମ୍‌ଚାକାରୁସ୍ ।

ଭବିଷ୍ୟବକ୍ତାର୍ ଇ ଭି ତେଙ୍ଗ୍‌ୟାର୍ କା ମାସିହିସ୍ ପାପ୍ ମା କାମ୍‌ଦାସ୍ । ହୁସ୍ ପବିତ୍ର ରସ୍ । ଲେକିନ୍ ହୁସ୍ ଇଦ୍‌ଘି ଲାଗାନ୍ ଖିୟୋସ୍ ପାରମେଶ୍ୱରସ୍ ହୁସିନ୍ ଦୁସ୍‌ରା ଆଲ୍‌ରା ଘି ପାପ୍ ଘି ଚାଲ୍‌ତେ ଦଣ୍ଡ ହାଖୋସ୍ । ହୁସ୍ ଘି ଖିନା ଘି ବାଦ୍‌ନୁ ଆଲାର୍ ପାରମେଶ୍ୱରସ୍ ଗାନେ ମିଲ୍‌ରାଗେ ସଫଲ୍ ମାନର୍ । ଇଦ୍‌ଘି ଲାଗାନ୍ ପାରମେଶ୍ୱରସ୍ ଚାହାଲାସ୍ କା ମାସିହିସ୍ ଖିୟୋସ୍ ।

ଭବିଷ୍ୟବକ୍ତାର୍ ଇ ଭି ତେଙ୍ଗିୟାର୍ କା ପାରମେଶ୍ୱରସ୍ ମାସିହି ତିନ୍ ଖିୟାକିରି ହୁନୁନ୍‌ତି ଆରୁ ଉଜ୍‌ଜସ୍ । ଇ ବୋତ୍ ତେଙ୍ଗିତ୍ କା ଇବ୍‌ଡ଼ା ପୁନା ଶଫଥ୍‌ବୋନ୍ ହିୟାଁଗେ ପାରମେଶ୍ୱରସ୍ ଘି ଯୋଜ୍‌ନା ରାଚାଦ୍, ତାକି ହୁବ୍‌ଡ଼ା ଆଲାରିନ୍ ବାଚାବାଗେ ଅଙ୍ଗୋସ୍ ନେର୍‌କା ହୁସ୍ ଘି ବିରୁଦ୍ଧ୍‌ନୁ ପାପ୍ କାମ୍‌ଚାକାର୍‌ନାର୍ ।

ପାରମେଶ୍ୱରସ୍ ଭବିଷ୍ୟବକ୍ତାର୍ ଘି ମିଆଁ ମାସିହିସ୍ ଘି ବାରେନୁ ଜୁକୁଗୁଡ଼େ କାଥାଗୁଠି ଏଥ୍‌ରିଆଦ୍, ଲେକିନ୍ ମାସିହି ହୁ ଭବିଷ୍ୟବକ୍ତାର୍ ରିନ୍ ନେକିର୍ ଘି ଜୀବନ୍ କାଲ୍‌ନୁ ମା ବାର୍‌ଚିକିଚାଦ୍ । ଇ ଭବିଷ୍ୟବକ୍ତାର୍ ଚିନାଘି ୪୦୦ ସ୍ତିନ୍ ଜୁକ୍‌କୁ ବଛର୍ ଘି ବାଦେନୁ, ସାହି ସାମୟ ନୁ, ପାରମେଶ୍ୱରସ୍ ମାସିହିସ୍ ସିନ୍ ଇ ଦୁନିଆଁନୁ ତାୟସ୍ ।