4. ଆବ୍ରାହାମସ୍ ଘି ଗାନେ ପାରମେଶ୍ୱରସ୍ ଘି ଶପଥ୍

ବାଢ଼ି ଘି ଇୟଁ ବରଶ୍ ଘି ବାଦ୍ ନୁ , ଦୁନିଆନୁ ବାଗ୍ ଗେ ଆଲାର୍ ରାଚ୍ କାଚାର୍ , ଆରୁ ହୁବ୍ଡ଼ାର୍ ଆରୁହି ପାରମେଶ୍ୱରସ୍ ଗାନେ ଆରୁ ଏକ୍ ଦୁସ୍ ରେସ୍ ଘି ବିରୁଦ୍ଧ ନୁ ପାପ୍ କାମ୍ ଚାର୍ । ଏନ୍ଦେର୍ ଗେ କା ହୁବ୍ଡ଼ାର୍ ଯେତେର୍ ଅଣ୍ଟା ଭାଷା ନୁ କାଚ୍ ଲେଖ୍ ରାଲାର୍ , ବାକେନ୍ ହୁବ୍ଡ଼ାର୍ ଅଣ୍ଟା ନୁ ମିଲ୍ ରା କିରି ଆରୁ ଦୁନିଆନୁ ନିନ୍ଦାଗେ ଲାଗାନ୍ ପାରମେଶ୍ୱରସ୍ ଘି ହୁକୁମ୍ ଘି ଜାଗାନୁ ଅଣ୍ଟା ପାଡ଼ାବୋନ୍ ବାନା ବାଚାର୍ ।

ହୁବ୍ଡ଼ାର୍ ମୁରୁଖ୍ ଘାମାଣ୍ଡିର୍ ରାଚାର୍, ଆରୁ ହୁବ୍ଡ଼ାର୍ ଏସ୍ କେ ଜୀବନ୍ ବିତା ବାନା ଚାହି ଇ ବାରେନୁ ହୁବ୍ଡ଼ାର୍ ପାରମେଶ୍ୱରସ୍ ଘି ଆଜ୍ଞା ବୋନ୍ ପାଲନ୍ କାମାଗେ ମା ଚାହାଲାର୍ । ଇ ତୋକ୍ କି ହୁବ୍ଡ଼ାର୍ ଅଣ୍ଟା ଏନ୍ନେ ମିନାର୍ ବୋନ୍ ବାନା ବାଗେ ସୁରୁ କାମ୍ ଚାର୍ କା ହୁଦ୍ ସରଗ୍ ତୋକ୍ ଆଣ୍ ସୋଦ୍ । ପାରମେଶ୍ୱରସ୍ ଏରିୟାସ୍ କା ଆଗାର୍ ଇବ୍ଡ଼ାର୍ ଅଣ୍ଟା ନୁ ମିଲ୍ ରା କିରି ବୁରାଇ କାମ୍ ତେ ରୋର୍ ହାଲେ ହୁବ୍ଡ଼ାର୍ ଜୁକ୍ କୁ ପାପ୍ ନାଲ୍‌ଖୁ ବୋନ୍ କାମା ଅଂଗୋର୍ ।

ବାକେନ୍ ପାରମେଶ୍ୱରସ୍ ହୁବ୍ଡ଼ାର୍ ଘି ଭାଷା ବୋନ୍ ଜୁକ୍ କୁ ଲେଖା ଦୁସ୍ ରା ଦୁସ୍ ରା ଭାଷାନୁ ବାଦ୍ଲାବା ଚିଚ୍ ଚାସ୍ । ଆରୁ ହୁ ଆଲାରିନ୍ ଜାମା ସାଂସାର୍ ନୁ ଫେଇଲା ଚିଚ୍ ଚାସ୍ । ହୁ ପାଡ଼ା ବୋନ୍ ହୁର୍ କାମାଗେ ସୁରୁ କାମ୍ ଚାସ୍ ହୁ ବୋନ୍ ବାବେଲ୍ ତେଂଗିୟାର୍, ହୁଦ୍ ଘି ମାନେ” ଗାଡ଼ ବାଡ଼ି” ।

ଶହେ ବରଶ୍ ଘି ବାଦ୍ ନୁ , ପାରମେଶ୍ୱରସ୍ ଆବ୍ରାମ୍ ନାମେ ଘି ଅଣ୍ଟା ଆଲାସ୍ ଗାନେ କାଚ୍ ଲେଖି ରିୟାସ୍ । ପାରମେଶ୍ୱରସ୍ ହୁସିନ୍ ତେଂଗିୟାସ୍ ,” ନିଜର୍ ରାଜିବୋନ୍ ଆରୁ ପରିବାର୍ ବୋନ୍ ଆମ୍ବିକିରି ହୁ ରାଜି ନୁ ବୁଂଗା କାଲା ଜେନ୍ ବୋନ୍ ଏନ୍ ଏ ଦୋନ୍ ଏନ୍ ନିଂଗାନ୍ ଆଶୀର୍ବାଦ୍ ଚୋନ୍ ଆରୁ ନିଘାସ୍ତିନ୍ ଅଣ୍ଟା ବାଡ଼୍ କା ଜାତି ବାନା ବୋନ୍ । ଏନ୍ ନିଘାଏ ନାମେଁ ବୋନ୍ ମାହାଁନ୍ କାମୋନ୍ । ନେର୍ଭି ନିଂଗାନ୍ ଆଶିଷ୍ ଚୋର ଏନ୍ ହୁସିନ୍ ଆଶୀର୍ବାଦ୍ ଚୋନ୍, ଆରୁ ନେର୍ ନିଂଗାନ୍ ଶାରାଫ ଚୋର୍ ଏନ୍ ହୁସିନ୍ ଶାରଫ୍ ଚୋନ୍ । ନିଘାୟ ଲାଗାନ୍ ସଂସାର୍ ଘି ଜାମା କୁଲ୍ ବୋଦ୍ ଆଶିଷ୍ ହାକ୍ ଖୋର୍ ।

ବାକେନ୍ ଆବ୍ରାମସ୍ ପାରମେଶ୍ୱରସ୍ ଘି କାଥ୍ ଥା ବୋନ୍ ମେନ୍ ଚାସ୍ । ହୁସ୍ ନିଜର୍ ଜାମା ଚେଲା ଚୁଟିୟାରିନ୍ ଆରୁ ନିଜର୍ ଜାମା ଧାନୁ ଗୁଠିନ୍ ଆରୁ ସାଂଗେନୁ ନିଜର୍ ଆଲି ସାରେ ବୋନ୍ ଆଚାସ୍ ଆରୁ କାନାନ୍ ରାଜିନୁ ବୁଂଗେ ଚାସ୍ ଜେନ୍ ବୋନ୍ କା ପାରମେଶ୍ୱରସ୍ ହୁସିନ୍ ଏଦ୍କା ଚାସ୍ ।

ଯେବା କେନ୍ ଆବ୍ରାମସ୍ କାନାନ୍ ରାଜିନୁ ଆଣ୍ ସିୟାସ୍ ବାକେନ୍ ପାରମେଶ୍ୱରସ୍ ହୁସିନ୍ ତେଂଗିୟାସ୍ ,”ନିଜର୍ ଚାରି ଖୁଟ୍ ତାରା ଏରା । ଏନ୍ ନିଂଗାନ୍ ଇ ଜାମା ରାଜିବୋନ୍ ଚୋନ୍ ଆରୁ ନିଁଘା ବାଉଁସାର୍ ସବୁଦିନ୍ ଲାଗାନ୍ ଇଦ୍ ଘି ମିୟାଁ ଅଧିକାର୍ ଉଇୟର୍ । ବାକେନ୍ ଆବ୍ରାମସ୍ ହୁ ରାଜିନୁ ବାସ୍ ରାସ୍ କେରାସ୍ ।“

ମାଲିକିସିଦ୍ଦିକ୍ ନାମେ ଘି ଅଣ୍ଟା ଆଲାସ୍ ରାଚାସ୍ , ଯେକି ମାହାନ୍ ପାରମେଶ୍ୱରସ୍ ଘି ସେବକ୍ ରାଚାସ୍ । ଅଣ୍ଟା ଉଲ୍ଲାନୁ ଯେବାକେନ୍ ଆବ୍ରାମସ୍ ଲାଢ଼େଇ କାମ୍ନା ଘି ବାଦ୍ ନୁ କିର୍ ରାଲାସ୍ ବାକେନ୍ ହୁସ୍ ଆରୁ ଆବ୍ରାମସ୍ ଭେଟ୍ ମାନ୍ ଚାର୍ । ମାଲିକିସିଦ୍ଦିକିସ୍ ଆବ୍ରାମସ୍ ସିନ୍ ଆଶୀର୍ବାଦ୍ ଚିଚାସ୍ ଆରୁ ତେଂଗିୟାସ୍ ମାହାନ୍ ପାରମେଶ୍ୱରସ୍ ଯେ କି ସ୍ୱରଗ୍ ଆରୁ ଧାର୍ତି ଘି ମାଲିକ୍ ଆତଲ୍ ଦାସ୍ ହୁସ୍ ନିଂଗାନ୍ ଆଶୀର୍ବାଦ୍ ଚିୟସ୍ । ଆରୁ ଆବ୍ରାମସ୍ ଲାଢ଼େଇନୁ ଜିତାକିରି ଅନ୍ଦର୍‌କା ଜାମା ଜିନିଷ୍ ଘି ଦଶମାଂଶ୍ ମାଲିକିସିଦ୍ଦିକି ସିନ୍ ଚିଚାସ୍ ।

ଇୟଁ ବରଷ୍ ବିତ୍ରା କେରା, ଲେକିନ୍ ଆକ୍ କୁନ୍ ତୋକ୍ ଭି ଆବ୍ରାମସ୍ ଆରୁ ସାରେ ଘି ଅଣ୍ଟା ହି ହାଦ୍ଦୁ ମାଲ୍ଲାରୁଦ୍ । ପାରମେଶ୍ୱରସ୍ ଆବ୍ରାମସ୍ ଗାନେ କାଚ୍ ଲେଖିରିୟାସ୍, ଆରୁ ଆରୁହି ବାଚାସ୍ କା ହୁସ୍ ଘି ଅଣ୍ଟା ହାଦ୍ଦୁ ଜନମ୍ ମାନର୍ । ଆରୁ ଯେ ଲେଖାନୁ ହୁସ୍ ଘି ଅନ୍ ଜୁକ୍ କୁ ବାଉଁଶାର୍ ମାନୋର୍ କୋର୍ ।ଆବ୍ରାମସ୍ ପାରମେଶ୍ୱରସ୍ ଘି ବାଚାନ୍ ଘି ମିୟାଁ ବିଶ୍ୱାସ୍ କାମାଲାସ୍ । ପାରମେଶ୍ୱରସ୍ ଡିବ୍ ଡିବି ଚିଚାସ୍ କା ଆବ୍ରାମସ୍ ଅଣ୍ଟା ଧାର୍ମିକ୍ ଆଲାସ୍ ରାଚାସ୍ । ଏନ୍ଦେର୍ ଗେ କା ହୁସ୍ ପାରମେଶ୍ୱରସ୍ ଘି ବାଚାନ୍ ଘି ମିୟାଁ ବିଶ୍ୱାସ୍ କାମ୍ ଚାସ୍ ।

ବାକେନ୍ ପାରମେଶ୍ୱରସ୍ ଆବ୍ରାମ୍ ସ୍ ଗାନେ ଅଣ୍ଟା ଶପଥ୍ ହିଚାସ୍ । ସାମାନ୍ ରୁପ୍ ନୁ ଅଣ୍ଟା ବାଚାନ୍ ବୋଦ ଯୋଡେ ଦୋଲ୍ ଗୁଠି ଘି ମାଝାନୁ ଏକ୍ ଦୁସ୍ ରେନୁ ନାଲ ଖୁ କାମାଗେ ଲାଗାନ୍ ଅଣ୍ଟା ସାମଝୋତା ମାନିଦ୍ । ପାରମେଶ୍ୱରସ୍ ଆବ୍ରମ୍ ସିନ୍ ହୁ ବାଚାନ୍ ହୁ ବାକେନ୍ କାମଚାକାଚାସ୍ ଯେ ବାକେନ୍ ଆବ୍ରାମ୍ ହାନ୍ଦ୍ରାଲାସ୍ , ଲେକିନ୍ ହୁସ୍ ପାରମେଶ୍ୱରସ୍ ଘି କାତ୍‌ଥାନ୍ ମେନା ଅଂଗାଲାସ୍ । ପାରମେଶ୍ୱରସ୍ ତେଂଗିୟାସ୍,”ଏନ୍ ନିଘାଏଁ ଶାରିର୍ ସ୍ତିନ୍ ସୃଷ୍ଟି କାମିକିରି ନିଂଗାଗେ ନିଘାଁ ଲାଗାନ୍ ଅ ଣ୍ଟା ନିଜର ହାଦଦୁ ଚୋନ୍ । ଏନ୍ ନିଘାଁ ଏ ବାଉଁସାରିନ୍ ଇ କାନାନ୍ ରାଜୀ ବୋନ୍ ଚିୟାଲ୍ ଦାନ୍।“ ଲେକିନ୍ ଭି ଆକକୁନ୍ ତୋକ୍ ଆବ୍ରାମସ୍ ଘି ଅଣ୍ଟା ହି ହାଦଦୁ ମାଲ୍ଲା ରୁଦ୍ ।