50. ଯୀଶୁସ୍ ଆରୁ କିର୍ରାଲ ଦାସ୍ ।
Listen to this story Audio file · 7.9 MB
The words of this recording are below, in Kisan.
ଯୀଶୁସ୍ ଆରୁ କିର୍ରାଲ ଦାସ୍ । ଲଗ୍ ଭଗ୍ ୨୦୦୦ ବରଷ ସ୍ତିନ୍, ସଂସାରନୁ ଜାମା ଜାଗାନୁ ବାଗେସ୍ତିନ୍ ବାଗେ ଆଲ୍ ମାସିହି ଯୀଶୁସ୍ କି ବାରେ ନୁ ଶୁଭ କାତଥା ବୋନ୍ ମେନା ଲାର୍ । କାଲିସିୟା ଉନ୍ନତ କାମାଲିଦ୍ । ଯୀଶୁସ୍ ଓ୍ୱାଦା କାମଚକା ଦାସ୍ ଆକୁନ୍ କା ହୁସ୍ ସଂସାର ଘି ଆଖ୍ରିନୁ ଏନ୍ ଆରୁ କିର୍ ରନ୍ । ହାଲେହିଁ ହୁସ୍ ଆକୁନ୍, ଆରୁ ମାଲ୍ଲା କିର୍ ରୁସ୍, ହାଲେହିଁ ହୁସ୍ ନିଜର ଓ୍ୱାଦା ବୋନ୍ ପୁରା କାମସ୍ ।
ଯେ ବାକେନ୍ ନାମ୍ ଯୀଶୁସ୍ ଘି ଆରି କିରିନା ବାର୍ନା ହୋକ୍ଖାଲ୍ଦାତ ପାରମେଶ୍ୱର ନାମା ସ୍ତିନ୍ ଏନ୍ନେ ରୀତି ସ୍ତିନ୍ ଜୀବନ ଉଜ୍ଜାନ୍ ଘି ଇଛା କମାଲ୍ଦାସ୍ ଯେନ୍ ପବିତ୍ର ରାନାର୍ ଆରୁ ଜେନ୍ ହୁସ୍କୀ ଆଦର କାମନାର୍ । ଯେତେ ବାକେନ୍ ଯୀଶୁସ୍ ଦୁନିଆଁନୁ ରାଲାସ୍ ବାକେନ୍ ହୁସ୍ ତେଙ୍ଗିୟାସ୍, “ଏଘାଏ ଚେଲାର୍ ସଂସାର ଜାମା ଆଡ଼ାଗୁଠି ଘି ଆଲାରିନ୍ ପାରମେଶ୍ୱରସ୍ ଘି ରାଜି ଘି ବାରେନୁ ଶୁଭ କାତଥା ପ୍ରଚାର କାମରୋ, ଆରୁ ଆଖିରିନୁ ବାରସ୍ କୋସ୍ ।“
ଜୁକ୍କୁସ୍ତିନ୍ ଜାତିଗୁଠିର୍ ଆକ୍କୁନ୍ ତୋକ୍ ଯୀଶୁସ୍ ଘି ବାରେନୁ ମାଲ୍ଲା ମେନୁର୍ । ସ୍ୱରଗ ଗେ କିରିନା କାନା ଘି ଆଘ୍ଲି, ଯୀଶୁସ୍ ମାସିହିର୍ ସ୍ତିନ୍ ହୁ ଆଲାରିନ୍ ଶୁଭ କାତଥା ମେନ୍ତାଗେ ତେଙ୍ଗିୟାସ୍ ହୁବ୍ଡ଼ାର୍ ଲବ୍ନି ଏକ୍ଲାଭି ମାଲ୍ଲା ମେନୁର୍ । ହୁସ୍ ତେଙ୍ଗିୟାସ୍, “କାଲା ଆରୁ ଜାମା ଜାତିର ଘି ଆଲାରିନ୍ଗୁଠି ଚେଲା କାମା ଆରୁ“ “ହୋୟାଗେ ହାଲ୍ଲୁ ପାଞ୍ଚା କେର୍କିଚିଇ ।“
ଯୀଶୁସ୍ ଏନ୍ନେ ହିଁ ତେଙ୍ଗିୟାସ୍, “ଏକିନ୍ ଆଲାସ ଘି ସେବକ୍ ନିଜର୍ ମାଲିକସ୍ ସ୍ତିନ୍ ବାଡ଼କା ମାନା ପଲ୍ନାର । ନିଜର ଇ ସଂସାର ଘି ମହତ୍ତ୍ୱପୂର୍ଣ୍ଣ ଆଲାର ଏଂଗାନ୍ ନଫରତ୍ କାମ୍ଚାର, ଆରୁ ଏଙ୍ଘାଏ ଲାଗାନ୍ ଭି ନିମାର----- ଆରୁ ପିଟର୍ ଚୋର୍ । ଇ ସଂସାରନୁ ନିମ୍ ଦୁଃଖି ମାନର, ଲେକିନ୍ ମଜବୁତ୍ ମାନୋର୍ , ଏନ୍ଦେର୍ ଗେ କା ଏନ୍ ସୈତାନ୍ ବୋନ୍ ହରାତା ଚିଚ୍କାଦାନ୍ ଜେନ୍ ଇ ସଂସାର ମିଆଁ ଶାସନ କାମାଲ ଦାସ୍ । ଲେକିନ ନିମ୍ ଆଖରିତକ୍ ଏଙ୍ଘାଁଏ ବିଶ୍ୱାସଯୋଗ୍ୟ ମାନିକିରି ରାଆ, ତା ପାରମେଶ୍ୱରସ୍ ନିମାରିନ୍ ବାଚାବୋସ୍ ।“
ଯୀଶୁସ୍ ନିଜର ଚେଲାରିନ୍ ଇବନ୍ ବୁଝାବାଖେ ଅଣ୍ଟା କାହାନୀ ମେନ୍ତାଚାସ୍ କା ଯେତେ ବାକେନ୍ ସଂସାର ଘି ଆଖ୍ରି ମାନିଦ୍ ତା ଆଲର୍ ଘି ସାଙ୍ଗେନୁ ଏନ୍ଦେର୍ ମାନଦ୍ । ହୁସ୍ ତେଙ୍ଗିୟାସ୍, “ଏକିନ୍ ଆଲାସ୍ ନିଜର ହାଲ୍ଲୁନୁ ବାନେ ମାଞ୍ଜି ଚାହିଁୟାସ୍ । ଯେ ବାକେନ୍ ହୁସ୍ ହାନ୍ଦରାଲାସ୍ ତା ହୁସ୍ଘି ଶତ୍ରୁଦ୍ ବାରଚାଦ୍ ଆରୁ ଗହମ୍ ଘି ମାଞ୍ଜି ଘି ମାଝାନୁ ଜଙ୍ଗ୍ଲି ହପ୍ପା ଘି ମାଝାନୁ ଚାହିଁୟାସ୍ ଚିଇଚାସ୍, ଆରୁ ଫିର୍ ହୁସ୍ ବୁଙ୍ଗାସ୍ ଚିଇଚାସ୍ ।“
“ବାକେନ୍ ହପ୍ପା ଗୁଠି ବାଡକା ମାଞ୍ଚା ତା ସେବକ ସ୍ ହୁ ଆଲାସିନ୍ ତେଙ୍ଗିୟାସ୍ “ହେ ସ୍ୱାମୀ, ନିନ୍ ତା ନିଜର ହାଲ୍ଲୁନୁ ବାନେ ମାଞ୍ଜି ଚାହାଁକା ଦାଏ । ତା ଫିର୍ ଇନ୍ନୁ ଜଙ୍ଗ୍ଲି ହପା ଏନ୍ଦେର ଗେ ରାଇଦ୍ ? ହୁ ଆଲାସ୍ ଜାବାବ୍ ଚିଚାସ୍ ଖାଲି ଏଙ୍ଘାଏ ଶତ୍ରୁ ହିନ ହୁବନ ଚାହାଁ ବେଦ୍ନାର୍ । ଇବ୍ ଏଙ୍ଘାଏ ନେର୍ରିନ୍ ଶତ୍ରୁ ରାନାର ନେର୍ ଏନ୍ନେ କାମ୍ଚ୍କାନାର୍ ।“
“ହୁ ଧାଙ୍ଗରସ୍ ନିଜର ମାଲିକ୍ ସିନ୍ ଜାବାବ୍ ଚିଚାସ୍, ‘ଏନ୍ଦେର୍ ଏମ୍ ଜଙ୍ଗ୍ଲି ହଫାବନ୍ ଚାଡ଼ନା ଖାତାର ?“ ହୁ ମାଲିକ୍ ତେଙ୍ଗିୟାସ୍ , ‘ମାଲ୍ଲା, ଲେକିନ୍ ନିମ୍ ଏନ୍ନେ କାମୋର୍ ତା ନିମ୍ କିଛି ଗହମ ବୋନ୍ ଚାଡ଼ାଗେ ଅଙ୍ଗର୍ । ହୋଇନା ଘି ସମୟ ତୋକ୍ ହଁଖା । ବାକେନ୍ ଜଙ୍ଗଲି ହପା ବନ ଗାଡ଼ଡି ନୁ ଅନ୍ ଠାଣସାନ୍ କାମର୍ ହାଲେ ନିମ୍ ହୁବନ୍ ଜାଲାବାଗେ ଅଙ୍ଗର୍ । ଲେକିନ୍ ଗହମ୍ବନ୍ ଏଙ୍ଘା ହାଲ୍ଲୁସ୍ତିନ୍ ହୁଆ ବାରା ।“
ଚେଲାର ଇ କାଥନୀ ଘି ମତ୍ଲବ୍ ବନ୍ ମା’ ବୁଝ୍ରାର୍, ଇଦ୍ଘି ଲାଗାନ୍ ହୁବ୍ଡ଼ାର୍ ଯୀଶୁସିନ୍ ହୁବନ୍ ବୁଝାବାଗେ ନିବେଦନ୍ କାମ୍ଚାର୍ । ଯୀଶୁସ୍ ତେଙ୍ଗିୟାସ୍, “ବାନେ ମାଞ୍ଜି ଚାହାଁନାବାଲା ଆଲାସ୍ ମାସିହ ସିନ୍ ଦର୍ଶାଲିଦ୍ । ହାଲ୍ଲୁ ସଂସାର ବବାନ୍ ଦର୍ଶାଲିଦ୍ । ବାନେ ମାଞ୍ଜି ପାରମେଶ୍ୱରସ୍ ଘି ରାଜିନ୍ତା ଆଲାର୍ ଦର୍ଶା ଲିଦ୍ ।“
“ଜାଙ୍ଗ୍ଲି ହପ୍ପା ହୁ ଖରାପ୍ ଆଲ, ସୈତାନ୍ ଗି ଆଲାରିନ୍ ଦାର୍ଶା ବିଦ୍ । ହୁ ଆଲାସ୍କି ଶତ୍ରୁ ସୈତାନ୍ ବୋନ୍ ଦାର୍ଶୀଦ୍; ନେର୍ ଜଙ୍ଗ୍ଲି ହପ୍ପା ବୋନ୍ ଚାହିଁୟାସ୍ ଚିଇଚାର୍ । ହୋଇଁନା ଇ ସଂସାର ଘି ଆଖ୍ରି ଘି ବୋନ୍ ଦର୍ଶୀଦ୍ । ଆରୁ ହୋୟୁର୍ ପାରମେଶ୍ୱରସ୍ ଘି ସ୍ୱରଗ ଦୂତ୍ ବୋନ୍ ଦର୍ଶାବିଦ୍ ।“
ଯେ ବାକେନ୍ ସଂସାର ଘି ଆଖ୍ରୀ ମାନଦ୍ ବାକେନ ସ୍ୱରଗ ଦୂତ୍ ହୁ ଜାମା ଆଲାରିନ୍ ଅନ୍ ଠାଣ ସାନ କାମୋର୍ ଯେ ସୈତାନ ଘି ରାନାର୍ । ହୁବଡ଼ା ସ୍ୱରଗ ଦୂତ୍ ହୁବଡ଼ରିନ୍ ଅଣ୍ଟା ମୁରୁଖ୍ ହିଁ ଗରମ ଚିଇଁଚୁ ନୁ ଖେବ୍ଡ଼ର ଚେର୍ । ହୁସାନ୍ ହୁବ୍ଡ଼ା ଆଲାର ଭୟଙ୍କର ତାଡ଼୍ ପାରୋର୍ ଆରୁ ଅଲ୍ଲହର ଆରୁ ନିଜର ପାଲ୍ଲୁ ଚା ବରର୍ । ଲେକିନ୍ ଜେନ୍ ଆଲାର୍ ଧର୍ମୀ ରୋର୍; ହୁବ୍ଡ଼ାର ଯୀଶୁସ୍ ଘି ଅନୁସରଣ କାମରୋ; ହୁର୍ ହୁବଡ଼ାର ଘି ପାର୍ମେଶ୍ୱରସ୍ ବୁଆସ୍ ଘି ରାଜିନୁ ବିଡ଼ି ଘି ସାମାନ୍ ଚାମ୍କାରୋର୍ ।“
ଯୀଶୁସ୍ ଇ ଭି ତେଙ୍ଗିୟାସ୍ କା ହୁ ସଂସାର ଘି ଆଖ୍ରି ମାନ୍ନା ଘି ଆଘ୍ରି ଦୁନିଆ ମିଆଁ କିର୍ଅସ୍ । ହୁସାନ୍ ହୁଦ୍ଘି ତାଲିକାସ୍ତିନ୍ ଆରୁ କିଇରସ୍ ବାରୋସ୍ ଜେସ୍କେ କା ହୁସ୍ କେର୍କାଚାସ୍ । ଲେକିନ୍, ହୁସ୍କି ଆଘ୍ଲିନ ନ୍ତା ଲେଖା ଶରୀର ମାନଦ୍ , ଆରୁ ହୁସ୍ ଆକାଶନୁ ବାଦ୍ଲିନୁ ଅକକିରି ବାରୋସ୍ । ଯେତେବାକେନ୍ ଯୀଶୁସ୍ କିରାଲ୍ଦାସ୍, ତା ଜାମା ଅଣ୍ଟା ମାସିହି ଜେନ୍ କେ ଚାର୍ କେର୍କା ନାର କେଚ୍କାନ୍ ସ୍ତିନ୍ ଭି ଉଜଜୋର୍ କୋର୍ ଆରୁ ହୁ୍ସ ଗାନେ ଆକାଶନୁ ଭେଟ୍ ମାନରୋ ।
ବାକେନ୍ ଜେନ୍ ମାସିହି ଆକ୍କୁନ୍ ଭି ଉଜଲ ଜାଲ୍ଦାସ୍ ହୁସ୍ ଆକାଶନୁ ଉଠାବୋସ୍ ହୋସ୍ କୋସ୍ ଆରୁ ହୁ ଦୁସ୍ରା ମାସିହି ରି ଘି ସାଙ୍ଗେ ସାମିଲ୍ ମାନର୍ କୋର୍ ନେର୍ କେଚ୍କାସ୍ତିନ୍ ଭି ଉଜାକା ନାର୍ । ହୁବ୍ଡ଼ାର୍ ଜାମାର୍ ହୁସାନ୍ ଯୀଶୁସ୍ ଘି ସାଙ୍ଗେନୁ ରୋର୍ । ହୁଦ୍ଘି ପାଛଲି, ଯୀଶୁସ୍ ନିଜର ଆଲାର୍ ଘି ସାଙ୍ଗେନୁ ରୋସ୍ । ବାକେନ୍ ହୁସ୍ ଅଣ୍ଟା ସାଙ୍ଗେନୁ ରାନାର୍ ତା ହୁସ୍କୀ ଚାହାଁନୁ ସବୁ ବାକେନ୍ ଘି ଲାଗାନ୍ ପୁରା ଶାନ୍ତି ମନଦ୍ ।
ଯିସୁ ଘି ମିଆଁ ବିଶ୍ୱାସ୍ କାମନା ବାଲାର୍ ହାର ଅଣ୍ଟା ଆଲାର୍ ଗେ ଅଣ୍ଟା ମୁକୁଟ୍ ଚିୟାଗେ ଲାଗାନ୍ ଶପଥ୍ କାମଚାକାଦାସ୍ ହୁବଡାର୍ ସବୁଦିନ୍ ଲାଗାନ୍ ପାରମେଶ୍ୱରସ୍ ଗାନେ ଅଣ୍ଟା ଜିନିସ୍ ଘି ମିୟାଁ ସାସନ୍ କାମୋର୍ । ହୁବଡାର୍ ଘି ଚାହାନୁ ବାନେ ସାନ୍ତି ମାନୋଦ୍ ।
ଲେକିନ୍ ପାରମେଶ୍ୱରସ୍ ହୁବ୍ଡ଼ା ଜାମାର ଘି ବିଚାର କାମୋସ୍ ନେର୍ ଯୀଶୁ ସିନ୍ ବିଶ୍ୱାସ୍ ମା’ କାମ୍ନାର । ହୁସ୍ ହୁବ୍ଡ଼ାରିନ୍ ନରକ ନୁ ଖେବ୍ଡେ ଚାସ୍ । ହୁସାନ୍ ହୁବ୍ଡ଼ାର ଅଲ୍ଲହୋର୍ ଆରୁ ନିଜର ପାଲ୍ଲୁ ଚାବ୍ରୋର୍, ଆରୁ ହୁବ୍ଡ଼ା ସବୁବାକେନ୍ ଦୁଃଖୁ ମାନ୍ତେ ରୋର୍ । ଏକା ବାକେନ୍ ଭି ତେବେର୍ ବାଲା ଚିଚୁନୁ ହୁବ୍ଡ଼ାର୍ ସବୁବାକେନ୍ ଲାଘ୍ରାଲ୍ କିରୋଦ୍, ଆରୁ ପଚ୍କ ଗୁଠିର୍ ହୁବ୍ଡ଼ାରିନ୍ ମୋହାଗେ ଏକାବାକେନ୍ ଭି ମା’ ରୁକ୍ରୋର୍
ଯେତେ ବାକେନ୍ ଯୀଶୁସ୍ କିର୍ଦାସ୍, ତା ହୁସ୍ ପୁରାପୁରିସ୍ତିନ୍ ସୈତାନ ଘି ଆରୁ ହୁସ୍କି ରାଜିବନ୍ ଖତମ୍ କାମୋଚସ୍ । ହୁ ସୈତାନ୍ ବନ୍ ନରକନୁ ଖେଏବ୍ଡର୍ ଚୋର । ହୁସାନ ସୈତାନ୍ ଜାମ ବାକେନ୍ ଘି ଲାଗାନ୍ ଲାଘ୍ର୍ତେ ରୋଦ୍, ହୁ ଜାମା ଘି ସାଙ୍ଗେ ଜେନ୍ଟା କା ପାରମେଶ୍ୱରସ୍ ଘି କାଥାଗୁଠିନ୍ ମେନ୍ନା ଘି ବାଜାଏ ସୈତାନ୍ ଘି ପାଛ୍ଲି ଏକାଗେ ଚୁନ୍ଚ୍କାର୍ ଚାର୍ ।
ଏନ୍ଦେର ଗେ କା ଆଦମ୍ ଆରୁ ହାୱାଦ୍ ପାରମେଶ୍ୱରସ୍ ଘି କାତ୍ଥାବୋନ୍ ମା’ ମାଞ୍ଚକିଚା ଆରୁ ପାପ ବନ୍ ଇ ସଂସାରକୁ ହୋଇ କିରି ବାର୍ଚାର୍, ପାରମେଶ୍ୱରସ୍ ହୁବ୍ଡ଼ାରିନ୍ ଶ୍ରାପ୍ ଚିଇଚାସ ଆରୁ ହୁବୋନ୍ ଖତମ୍ ନାନା ଗେ ସୋଚାସ୍ । ଲେକିନ୍ କିଛି ଉଲ୍ଲାନୁ ପାରମେଶ୍ୱରସ୍ ଅଣ୍ଟା ସ୍ୱରଗ ଆରୁ ଅଣ୍ଟା ପୁନ୍ନା ଦୁନିଆ ଘି ରଚ୍ନା କାମୋସ୍ ଜେନ୍ଟାକି ଶୁଦ୍ଧ ମାନଦ୍ । ଯୀଶୁସ୍ ଆରୁ ହୁସକୀ ଆଲାର୍ ହୁ ପୁନ୍ନା ଦୁନିଆଁନୁ ରୋର୍, ଆରୁ ହୁର୍ ସବୁବାକେନ୍ ଘି ଲାଗାନ୍ ଜାମା ଜିନିଷଗୁଠି ଘି ମିୟାଁ ଶାସନ୍ କାମୋର୍ । ହୁସାନ୍ ଆଲାର୍ ଘି ହାନ୍ନୁନ୍ ନ୍ତି ଅଣ୍ଟା ହାଞ୍ଜାଲ ବକ୍ ଚିଚରଚେର୍ । ଆକୁନ ଜେଏଦ୍ ଭି ଦକ୍ଲିଫ୍ ୟା ଦୁଃଖୁ ମାନୋର୍ । ହୁବ୍ଡ଼ାର୍ ମା’ ଅଲ୍ଲନ୍ନାର । ହୁବ୍ଡ଼ାର ବିମାର୍ ମା ମାନ୍ନାର୍ ଆରୁ ମାଖିନାର୍ । ଆରୁ ହୁସାନ୍ କିଛି ଭି ଖରାପ୍ ମା’ ମାନିଜ୍ ଯୀଶୁସ୍ ନିଜର୍ ରାଜି ନୁ ବିଚାର୍, ଆରୁ ଶାନ୍ତି ଘି ସାଙ୍ଗେନୁ ଶାସନ କାମୋସ୍ । ହୁସାନ୍ ସବୁବାକେନ୍ ଘି ଲାଗାନ୍ ନିଜର୍ ଆଲାର୍ ଘି ଗାନେ ରୋସ୍ ।
ମାତୀ ୨୪:୨୪; ୨୮:୧୮; ୟହାନ୍ ୧୫:୨୦, ୧୬:୩୩; ପ୍ରକାଶିତ ୨:୧୦; ମାତୀ ୧୩:୨୪-୩୦, ୩୬-୪୨; ୧ ଥିସ୍ଲୁନୀ ୪:୧୩-୫:୧୧; ୟାକୁବ ୧:୧୨; ମାତୀ ୨୨:୧୩; ପ୍ରକାଶିତ ୨୦:୧୦ ;୨୧:୧-୨୨:୨୧ ସ୍ତିନ୍ ଅଣ୍ଟା ବାଇବାଲ ଘି କାଥ୍ନୀ
Free to use, adapt, and share under an open license (CC BY-SA 4.0).