Töpö jupa konoi itö

Egipto tö ulina Israel tili töpö jupa kotio piale itöna töpö pi mönaja totio opama. ¡Noami ipi töpö tatamo mapalonö, Tiosö nö masitatö uli totomanoi iamö töpö juulö piama! Egipto tili töpönaja Israel tili töpö nakoiaja tö noapi tö pewö totatotia jötököma, oro töjö, plata töjö, aitöjö ina. Tiosö na ai tiko töpö pi ku upa naiowi Israel tili töpöna i töpö noka naipasolöma.

Wakalaiaja ölasitö kaina Tiosö nö töpö kai juu, tö mumasoiaja koataka jili pölata töpö kai juu, inatö kuama. I töpö kaina Tiosö kuapalo nai sotiopaja töpö kai ju makokapalo toitioma. Ia nojana i töpö kuapalo sisapö töna tö pi ipama.

Faraon, kama töpö ina kipi töpö pi ku wanisana jaia kopalonö Israel ma töpö noami tatamöpalama ko nökö töpö pi ku jaia konasoma. Faraon, kamani i tiosö kökö i töpöna i Tiosö pata lotete jasua apa asa kilia, sami ipi i Tiosö pata sisawö ina sanöma töpö pewö pi ku upapö töna, Tiosö nö faraon pi taoma jaöatalo ma apa puoma.

Inatö kuanö noami ipi Israel tili töpö tatamo kopö töna faraon, kama löapalawi töpö ina kipi töpönö i töpö nasö suako soköma. Israel tili töpönö Egipto tili töpö wasu ju jailati itö talalönö, tö mö sota kukema faraon löapalawi i töpö ju tasa, mötati pata janaja api itu pata löa löa sota inatö kuoma. I töpö kili totia apa salo: “¿kapilitö pina Egipto tö ulina makö jusa pasia konaso tasoma? ¡Makö söpo pia köle!”. Ina töpö komö kuto totio opama.

Israel tili töpönaja: “¡Pö kiliti! Kamaka pina Tiosö pata sösonö makö löa konö kötö.” Ina Moises kuiaja, Moises naja: “Mötatitu pata janaja api itu pata kuamö kulati iamö pö juulö i töpöna ina a kuu.” Tiosö kuma.

Inatö kuanö, Egipto tili töpönö Israel tili töpö tapa ma apapö töna Tiosö nö mötala ölasi ta pata löa löa sotamaköma.

Mötatitu jitu patana wa poko sononokönö tu pata jamatapalö, ina Moises na Tiosö kuma. Inatö kuaiaja, mötati mötalö patana pilitiso kuköpö töna, Tiosö pina ipoko ta patanö aitö jötömöna ai matu pata jasiamo tali, aitö jötömöna aitu pata jasiamo tali tö kuama.

Israel tili töpö kotona matu pata sokea totilata mötatitu mötalö patana masitatö uli jasitina töpö juulöma.

Inatö kuaiaja, Egipto tili töpönö Israel tili töpö tokö komati itö talalöpö töna Tiosö nö ösamö ölasitö ösa kopamanönö pilitiso jatuka komaköma. Egipto tili töpönö i töpö nasö suako soköma.

Inatö kuanö mötatitu mötalö patana pilitisona i töpönö Israel tili töpö nasö suapalama, maike Tiosö pina Egipto tili töpö kilipalo opa, katosöpö poko pewö kasöpa apa, inatö kuama. I töpö lalupalo pölanö: “¡Pö lölöpa ko! ¡Israel tili töpö pina Tiosö pata jöla pöle!” Ina töpö kutoma.

Mötatitu patana Israel tili töpö pökata totia apako waikitakö noiaja, Moises naja a poko sonona kopalo Tiosö kuma. Ina ianö tö tama jöto kukema, Egipto tili töpöna matu pata kea totikönö tu pata kutionoi ina tu pata kua totia apa ko sotaköma. Egipto tili töpö pewö nasö tua totipasoma.

Egipto tili töpö pewö söa totipasowi i Israel tili töpönö itö ta totio opa salo, Pitilitaja Tiosö na töpö pi ku totio opanö, Moises liki Tiosö kai wösöwi ia, ina töpö pi ku totio opama.

¡Töpö söpasopö töna Tiosö nö töpö löa kopali, noami ipi töpö tatamotinoi itöna töpö löa koni, inatö kuaiaja itö pewö pina töpö pi mönajapalo totio opama! Tiosö kuwi itö tama sisapö töna töpö kua kopasoma. Egipto tili töpöna Tiosö nö töpö löa konönoi itö pina Tiosö na töpö pi mönaja apa salo sateje epi ama töna töpö amamo pi mönajapalo toitioma, noami ipi töpö tatamo ma kopasonoi itö pina töpö amamo totio opa naioma.

Egipto tili töpöna töpö nö löa koni, noami ipi töpö tatamowi töna töpö löa naia koni, ina Tiosö kuanoi itö taöpo ko sinimopö töna, inamatö pewönamö Pascua tö wakalana töpö pi mönajapalo sinimopö töna Tiosö simoma. I töpönö ai ovejawai toita api a söpalönö pantö jölömo mi ipi tö kaina a oanö töpö pi mönajapalo sinimoma.