Töpö ju wani ipapa töpö julolönö sutu upa töpö sapa kopaso tasonoi itö

Israel tili töpö, Juda tili töpö, Tiosö na polakapi i töpö kaikana wanisana apama. Sinai tö jiu patana Tiosö japalonoi itö pewö tama ma kopasoma. Makö jiopa apawi i matö josa konönö pö ote tamoko ina Tiosö kai wösöwi i töpö kupö töna Tiosö nö töpö sima toitioma, maike pitilita sanöma töpö pi kuti ma apama.

Inatö kuaiaja i töpö nisi taö öpawi i töpönö i polakapi i töpö uli wasisamapö töna Tiosö nö tö tamama. Asirio töpö wanisana apaö, töpö lotete epö, i töpönö Israel tö uli pewö wania totipalöma. Asirio tili töpönö sateje epi Israel tili töpö söa totilalönö, ia tö noa api tö pewö kuowi itö pewö sua totilöma, itö uli pata isia naimanöma.

Asirio tili töpönö, töpö kaikanamowi töpö, töpö pilapalo opawi töpö, töpö tatamo taö öpawi töpö, töpö söso taö öpawi töpö, i töpö pewö julönö Asiria tö ulina töpö sulölöma. Israel tili töpö pepalo opa pasiowi töpö söpa pasio ma apanoi Israel tö ulina i töpö kuo jaio sisama.

Inatö kuanö, Asirio töpönö tiko tö ulina ai töpö kuowi töpö nakalönö Israel töpö kuonoi ia töpö taköma. Ji sanöma töpönö itö uli pewö topa komakönö, ia ai Israel tili töpö jipasonoi i töpö i pate töpö sua sotalalöma. Israel tili töpönö i tiko töpö suanoi Samaritano i töpö jilo kuo pasioma.

Pitilita Tiosö na Israel töpö pi ku mi ipaja töpö wasisama pöle i Juda töpönö itö jini ipama. Maike nu töpö wanina töpö pi janoa satia soama, Cananeo töpö i Tiosö pö nu wanina töpö pi ku janua naio sisama. Inatö tamati, Tiosö kai wösöwi i töpö kupö töna Tiosö nö töpö simatima, maike pitilita töpö pi kuti ma apama.

Asirio töpönö Israel tö uli wanianoi itöna 100 inamatö kupo jöka apataja Babilonia töpö i kaikana Nabucodonosor nö Juda tili töpö sö pö töna Tiosö nö a simöpalöma. Babilonia tö uli pata lotete epi tö uli pata kuoma. Juda töpö i kaikana liki Nabucodonosor nö a simawi a kupalonö inamatö pewöna pe epi sitipa totoma toitioma.

Maike sateje epi inamatö jasupaso noiaja, Babilonia tili töpö pina Juda töpö i kaikana tatamo kota wani ipama. Inatö kuaiaja Babilonia töpö wasu ikua kokönö töpö sö ma. I töpönö Jerusalen tö ulina kama töpö julöma, kokamotawi ia sai pata waniapalönö, ia sai osimöna tö noa api tö pewö kule itöjö, itö ulina tö noa api tö pewö kule itöjö, inatö sua ta sotalölöma.

Juda töpö i kaikananö tö kili taö ma apanoi itö pina a wasisama piasalo ia mamotalöna Nabucodonosor löapalawi i töpönö kamani ulu kökö pewö söpalönö, itö nojana kamani pöa mamo joköa sotalöma. Itö nojana, pöka kasötawi a saina i kaikana söpasopö töna Babilonia tö ulina a sua sotalölöma.

Nabucodonosor, kamani löapalawi i töpö ina kipi töpönö sateje epi Babilonia tö ulina Juda tili töpö sulölöma, jikaliana nitö tösa pasiopö töna töpö pepalo opawi i töpö ta pasikölöma. Tö uli totokönoi itö uli taalö wani ipö pölata maike, Tiosö i sanöma töpönö itaja itö uli takölönoi i Exilio itö jilo kua.

Kamani sanöma töpönö wanisanatö tamaiaja, töpö wasisamanö töpö ju wani ipapa töpö sima pölö noia maike, Tiosö nö töpö taö mapo ma apama. Kamani sanöma töpöna Tiosö mamo löapalo sotionö i töpöna kama kai wösöwi i töpö sima sotioma. 70 inamatö jasupasoiaja satö uli totokönoi ia makö jua konasolö piasalo ina Tiosö kuma.

70 inamatö jasupaso noiaja, Persa töpö i kaikana Ciro nö, Babilonia töpö sölalönö Persa töpö kua nomöpasoma. Itaja Israel tili töpö liki Judio töpö jilo kua nomöpasoma, Babilonia tö ulina töpö ulu oso patanoi i töpö sateje epama. Polakapi ipi Judio töpö patasipönö Juda tö uli taö öpa soa jöto sisama.

Persa töpö kaikanamo lotete epö maike, sanöma töpö ote taö öpawi töpö kuoma. Ciro liki Persa töpö i kaikanatö kupalonö, Juda tö ulina ai Judio tilitö ju ko pi topa apa könaja a jua konasolö pökö ina a kuma. ¡Tiosö na japalotawi ia sai pata ta topa koköpö töna sitipa tota naiköma! Inatö kuanö, töpö ju wani ipö pölata töpö julasolönoi itöna 70 inamatö jasupasoiaja, polakapi ipi Jerusalen tö ulinamö Juda töpö jua konasolöma.

Jerusalen tö ulina sanöma töpö waloa kokönö Tiosö na japalotawi ia sai pata ta topa koki, itö uli pewö jokola koki inatö tama koma. I töpöna ai tiko töpö kaikanamo soa pölata maike, Tiosö nö tö uli totokönoi ia töpö kua kokönö Tiosö na japalotawi ia saina töpö pi mönajapalo kotioma.