۲۴- يُوحَنَّا يِعَمِّدْ اليَسُوع

يُوحَنَّا چان إبِن زَكَرِيَّا و أَلِیصَابَات و مِن كُبَر، صار نبي. هو چان يِعيش بِلْدّوه، و أكْلَه چان العَسَل واليِرَّاد، و مَلَابسِه چانن مِن صوف ليِمِل.

وَایدِین مِن لنَاس چانو إيُون لِلدوّه مكان لچان بي يُوحَنَّا خاطِر يِشوفُونِه و يِسمِعون كلامه. هو چان يِحچِيلهُم مِن كلام الله و يِگِلهُم: «يَا نَاسْ تُوبوا، تریٰ مَلَکُوت الله جِريب.»

أكثَر لناس إللي چانو يِسمعون كلام يُوحَنَّا تَابُو، و هو عَمِدْهُم بِلماي. بس أكثَر لشيوخ لدينيه إللي رَاحوا لِيُوحَنَّا مَاعتَرَفوا بِذُنُوبهُم و مَاتَابُو.

يُوحَنَّا إللي يِعَمِّدْ لنَاس بِلماي چان يگول لِشِيوخ لدينيه: «يَا حَيَايِه بِسمُومها إنتم! تُوبُو و غَيرَو أعمَالكُم. تریٰ كِل شِجرِه إللي ماتِنطِي ثَمَر زِين، الله يِگُصْهَا و یعَگُطْهَا بِلنَار.» يُوحَنَّا كِمِل قُصَص لِأنبياء إللي چانو گايلين: «شوف، أني أوَدي شخص لِذي يِحمِل كلامي گَبْلِك إنتَ، خاطر يِفُك طِريجِك و يِسِهِلهِ.»

بَعضَ إشيوخ لدينيه سِئلوا يُوحَنَّا: «أنتِ لمَسيِح؟» يُوحَنَّا جَاوبهُم: «أنا مو لمَسِيح، بس يِجِي واحِد مِن بَعدِي إللي مَقَامِه وايد أعلیٰ مني. هِلگِد مَقَامِه عَالي إللي أنا حتیٰ مو كِفو أشِد حَبِل قَندَرتِه.»

يوم لثَاني، اليَسُوع إيَّه يِم يُوحَنَّا المَعْمَدَانْ خاطر يِتْعَمَّدْ بِلمَاي. يُوحَنَّا بس شاف اليَسُوع گال: «هذا هو شخص لذي شبه لخُروف الضَحيِه و يِشيل ذِنُوب لِدنيِه كلها.»

يُوحَنَّا المَعْمَدَانْ گِل اليَسُوع: «أنا مو گِدهِا إللي أعَمْدِك. أنت لذي لازم تِعَمِّدنِي.» بس اليَسُوع گال: «يَا يُوحَنَّا أنت عَمِدنِي و هذا هُو لِصَح.» و هِچَي صَار الي يُوحَنَّا عَمَّدْ اليَسُوع رغم إنو اليَسُوع ما چان مِرتِكِب أي ذَنِب و خَطيِه.

اليَسُوع بعد ماتْعَمَّد و طَلَع مِن لمَاي، روح الله نِزِل عليه شِبِه لحَمَامِه و گِعَد علیٰ چِتفِه و بلبكان وصل صوت الرَب مِن لسِمِّه يگول: «هذا هو أبني إللي أحِبِه و فَرحَان بِوجُودِه.»

الله چان گايِل لِيُوحَنَّا: «الرُّوحِ القُدُس يِنزِل علیٰ شخص إللي إنت إتْعَمْدِه و ذاك لشخص يكون إبنِ الرَب.» الله وَاحِد. مِن يُوحَنَّا عَمَّدْ اليَسُوع، هم سِمَع صوت الرَب، و هم شَاف إبنِ الرَب وهم شاف إشلون رُّوحِ القُدُس إبشِکِل لحَمَامِه نِزِل من لسِمِّه.