17. ୧୭. ଦାଉଦ ବେରଙ୍ଗ୍ ଈଶ୍ପର୍ନା ନିୟମ୍
ଶାଉଲ ଇସ୍ରାଏଲ୍ ଦେଶ୍ ନା ପର୍ତୁମ୍ ରାଜା ଡେଙ୍ଗ୍ ଡିଗା, ମାଇ ଜୁଜୁସା ଡେଙ୍ଗ୍ ମାରି ସୁନ୍ଦର୍ ଡିଗା, ମିରିକି ରେମଲେ ମନ୍ ବିତ୍ରେ ମାମାଗ୍ ଡେଙ୍ଗା। ଶାଉଲ ରାଜା ଇସ୍ରାଏଲ୍ ବାଗ୍ବ ସାସନ୍ ଡେଡେମ୍ନା ପର୍ତୁମ୍ ଅଇଜା ବରସ୍ ପାଲାଇ ମିଣ୍ଡା ବାନି ରାଜା ଡିଗା। ମାତର୍ ଆତିନେ ମାଇ ମିଣ୍ଡା କରାପ୍ ବାଇ ଡେଙ୍ଗ୍ ଇଗା ଜାକି ଈଶ୍ପର୍ ନା କାତା ମୋମାନ୍ବାର୍ ଡେଙ୍ଗା, ଆତିନେ ଈଶ୍ପର୍ ମୁୟଙ୍ଗ୍ ଆପାଲ୍ ରେମ ବାଚ୍ଲ ଜାକି ମିସିଙ୍ଗ୍ ମାଇବ ରାଜା ଡ଼େନ୍ତା।
ଈଶ୍ପର୍ ଦାଉଦ ଅମିନା ମିଣ୍ଡା ଆଇଁଗେର୍ ରେମ ଇସ୍ରାଏଲ୍ଦେଶ୍ ପାଲାଇ ବାଚ୍ଲ୍ ମାରି ଆମାଇ ଶାଉଲ ନା ତୁର୍ଗୁ ମିସିଙ୍ଗ୍ ରାଜା ଡେଡେମ୍ ପାଲାଇ ତିଆର୍ ଡ଼େମ। ଦାଉଦ ମିଣ୍ଡା ବେଥ୍ଲେହେମ୍ ଉଙ୍ଗମ୍ନା ମେଣ୍ଡା ଚରାଇବାର୍ ରେମ୍ ଡିଗା। ଅଇଜା ବେଲା, ଉଣ୍ଡୋଇ ମାଇନ୍ ବା ଆମେଣ୍ଡାଲେ ଚରାଇବାର୍ ଡେଙ୍ଗା, ମୁଇ ସିଂହ ମାରି ଗିମେସଙ୍ଗ୍ ଜାଗ୍ଲସେ ସସବ୍ ବେଲା ଦାଉଦ ଆଉମ୍ବାର୍ ସିଅଁ ମାରି ଗିମେସଙ୍ଗ୍ ଅଡ଼ାବ ସୁସୁଙ୍ଗ୍ ଡେଙ୍ଗ।। ମାଇ ମିଣ୍ଡା ଗୁବ୍ସୁ ମାରି ଦରମ୍ ବାଇ ରେମ୍ ଡିଗା। ମାଇ ଇଶ୍ପର୍ ବାଗ୍ବ ବିସ୍ବାସ୍ ମାରି କାତା ମାନ୍ବାର୍ ଡେଙ୍ଗା।
ଉଣ୍ଡୋଇଲ ଦାଉଦ ଇଁଗେର୍ ଡିଗା, ଗଲିୟାତ୍ ଅମିନା ମିଣ୍ଡା ଜବର୍ ମୁନା ରାକଷ୍ ବାଇ୍ ରେମ ବେରଙ୍ଗ୍ ଯୁଜ୍ ଡ଼େମ। ଗଲିୟାତ୍ ଜବର୍ ବାନିବାଇ ସଇନିକ୍ ଡିଗା ମାରି ମାଇ ଜବର୍ ବପୁ ମାରି ତିନ୍ ମିନିର ସୁଗ ଡେଙ୍ଗା ଡିଗା! ‘ମାତର୍ ଈଶ୍ପର୍,ଆଦାଉଦ ଆଗଲିୟାତ୍ ଅଡାବ୍ବାର୍ ସା ମାରି ଆଇସ୍ରାଏଲ ଦେଶ୍ ରକିୟା ଡେଡେମ୍ ସା ସାଇଜ ଡ଼େମ। ଗିତିନ୍ ତୁର୍ଗୁ ଦାଉଦ ଇସ୍ରାଏଲନା ଶତ୍ରୁଲେନ୍ ବାଗ୍ବ ଜବର୍ ପର୍ ଜିତ୍ଗା। ଦାଉଦ ମିଣ୍ଡା ମୁନାବାଇ ସଇନିକ୍ ଡେଙ୍ଗା, ଇଶ୍ରାଏଲ୍ ଆସୈନିକଲେ ଜବର୍ ଜୁଜ୍ ବ ୱାରୁଙ୍ଗା ରେମଲେ ଆମାଇ ଜବର୍ ସାଇଜ ଡ଼େମ।
ରେମଲେ ଆଦାଉଦ୍ ଅକନ୍ ଆଲାଦ୍ ଡେଡେମ୍ ଡ଼େଙ୍ଗା ଜେ। ରାଜା ଶାଉଲ ଗିତିନ୍ ସା ଆମାଇ ଜବର୍ ଆଂକାର୍ ଡ଼େମ, ମାରି ଶାଉଲ ଆମାଇ ଅଡାବ୍ବାର୍ ପାଲାଇ ମନ୍ ଡେଡେମ୍ ଡେଙ୍ଗା, ଗିତିସା ଦାଉଦ ଶାଉଲ ନାନେ ମାରି ସଇନିକ୍ଲେ ନାନେ ତିପାକ୍ ବାର୍ ସା ମରୁଭୁମି ବ ଡୁଙ୍ଗା। ମିସିଙ୍ଗ୍ ଶାଉଲ୍ ମାରି ମାଇନା ସଇନିକ୍ଲେ ଆଦାଉଦ କଜ୍ବାର୍ ଡେଙ୍ଗା, ଶାଉଲ ମୁଇ ପାଟ୍ନା ଭିତ୍ ରେ ଇଗା। ଦାଉଦ ଗିତିନ୍ ପାଟ୍ନା ବିତ୍ରେ ତିବାଗ୍ ସେଡିଗା, ମାତର୍ ଶାଉଲ ଆମାଇ ଜୁଜୁ ଆଗଙ୍ଗା। ଦାଉଦ ମାଇନା ତେଙ୍ଗୁ-ତେଙ୍ଗୁ ଇଗ୍ସେ ମାଇନ୍ ସକାନା ଇତି ଗଡ଼ସୁଙ୍ଗ। ଆତିନେ ଶାଉଲ ପାଟ୍ନା ନାନେ ତୁର୍ କୁନ୍ ତୁର୍ଗୁ, ଦାଉଦ ଆତିନ୍ ସକାନା ଗଣ୍ଡାରା ଜୁଜୁ ପାଲାଇ ଆଉଲି ଡେଙ୍ଗା, କନ୍ସା ଶାଉଲ ମାଗଡିଗା ଜେ ଦାଉଦ ରାଜା ଡେଡେମ୍ ପାଲାଇ ଆମାଇ ଅଡାବ ସୁସୁଁଙ୍ଗ୍ସା ମନ୍ ଆଡ଼େମ୍ ତ।
ଅଇଜା ବେଲା, ଶାଉଲ ଯୁଜ୍ ବ ‘ଗ’ ଇଗା, ମାରି ଦାଉଦ ଇସ୍ରାଏଲ୍ନା ରାଜା ଡେଙ୍ଗା। ମାଇ ମିଣ୍ଡା ବାନି ବାଇ ରାଜା ଡିଗା, ମାରି ରେମଲେ ଆମାଇ ଆଲାଦ ଡେଡେମ୍ ଡେଙ୍ଗା। ଈଶ୍ପର୍ ଆଦାଉଦ ଆଶିର୍ବାଦ୍ ବେଡ଼ ମାରି ଆମାଇ ଅଡମ। ଦାଉଦ ଜବର୍ ଜୁଜ୍ ଡ଼େମ ମାରି ଈଶ୍ପର୍ ଆମାଇ ଇସ୍ରାଏଲ୍ନା ଆଶତ୍ରୁଲେ ଆରାଇବାର୍ ସା ସାଇଜ ଡ଼େମ। ଦାଉଦ ଆଯିରୁଶାଲମ୍ ଆରାୟସେ ଆତିନ୍ ମାଏନ୍ ରାଜ୍ଦାନୀ ଡ଼େମ,ଆର୍କଣ୍ଡେ ମାଇ ଡିକୁଙ୍ଗା ଡେଙ୍ଗାମାରି ଶାସନ୍ ଡେଡେମ୍ ଡେଙ୍ଗା। ଦାଉଦ ୪୦ ବରଷ୍ ଜାକ ରାଜା ଡିଗା। ଗିତିନ୍ ବେଲା ଜାକ ଇସ୍ରାଏଲ ଦେଶ୍ ନା ରେମଲେ ଜବର୍ ବପୁ ଡେଙ୍ଗା ମାରି ସାକାର୍ ଡେଙ୍ଗା।
ଦାଉଦ ମୁଇଁ ଉଣ୍ଡି ଅରେଙ୍ଗ୍ବାର୍ ସା ମନ୍ ଡେଡେମ୍ ଡେଙ୍ଗା, ଆରିକି ଗୁଲାଇ ଏସ୍ରାଏଲନା ରେମଲେ ଈଶ୍ପର୍ନା ପୁଜା ଡ଼େମସେ ଆତିନ୍ ନାମାସ୍ଲ କୁନ୍ ସେସେବ୍ ଗଙ୍ଗ୍ତା। ଆର ୪୦୦ ବରଷ୍ ସଗ୍ସେ, ରେମଲେ ମୋଶା ଅରେଙ୍ଗ କୁନ୍ ବେଦିବ ମାଏ ନାମାସ୍ କୁନ୍ ସେସେବ୍ ଡେଙ୍ଗା ମାରି ଈଶ୍ପର୍ନା ପୁଜାଡେଡେମ୍ ଡେଙ୍ଗା।
ମାତର୍ ନାଥନ୍ ଅମିନା ମୁଇ ବାବବାଦି ଡିଗା। ଆଦାଉଦ କନ୍ ସୁସୁ ପାଲାଇ ଈଶ୍ପର୍ ଆମାଇ ବେଟାୟ,’ ନ ଜବର୍ ଜୁଜ୍ ବ ଜୁଜ୍ ଡ଼େମତ୍ନ, ଗିତିନ୍ସା ନ ନିଙ୍ଗ୍ ପାଲାଇ କନ୍ ମନ୍ଦିର୍ ତିଆର୍ ଆଡେମ୍ତନ। ନନ୍ ଗୁ ଆକନା ତିଆର ଡେମ୍ତ। ମାତର୍ ମାରିମୁସ ନିଙ୍ଗ୍ ଆନ ଜବର୍ ଆଶିର୍ ବାଦ୍ ଡେମ୍ ତିଙ୍ଗ୍। ନନ୍ କୁଲ୍ ନାନେ ମିଣ୍ଡା ନିଙ୍ଗ୍ ନା ରେମଲେନ୍ ବାଗ୍ବ ଗୁଲାଇ ଦିନ୍ ପାଲାଇ ଶାସନ୍ ଡେମ୍ତ। “ଦାଉଦ ନା ସାମୁଇ ଆକା କୁଲ୍ ଜାକି ଗୁଲାଇ ଦିନ୍ ଶାସନ୍ ଡେଡେମ୍ ଗଙ୍ଗ୍ ତା,କିସ୍ଟ। ଡେଙ୍ଗାନି ଈଶ୍ପର୍ନା ବାଚ୍ଲ କୁନ୍ ଜା ଦର୍ତନି ନା ଆରେମଲେ ମାଏନା ପାପ୍ ନାନେ ରକିୟା ଡେମ୍ତ।
ଉଣ୍ଡୋୟଲ ଦାଉଦ୍ ନାଥନ୍ ନା କବର୍ ଅଙ୍ଗ, ମାଇ ଆଈଶ୍ପର୍ ଦନ୍ୟବାଦ୍ ବେଡ ମାରି ଆମାଇ ସାର୍ଦା ଡ଼େମ। ଈଶ୍ପର୍ ଆମାଇ ସନ୍ମାନ୍ ଡେଡେମ୍ ଡେଙ୍ଗା, ମାରି ଆମାଇ ଜବର୍ ଆଷିର୍ବାଦ୍ ବେବେ ଡେଙ୍ଗା। ଈଶ୍ପର୍ କନ୍ଗୁଲାଇ କାମ୍ ଉଣ୍ଡୋଇ ଡେମ୍ତ ଗିତିନ୍ ଦାଉଦ୍ ମାଗ ଆଡିତା। ମାଏ ଅଇ ମାଗ୍ତ ଜେ କିସ୍ଟ ସାସାଗ୍ ନା ଆଗ୍ତୁ ଆଇସ୍ରାଏଲ୍ ନା ରେମଲେ ଜବର୍ ବେଲା ୧୦୦୦ ବରଷ୍ ଜାଗ୍ବାର୍ ଡ଼ିତା।
ଦାଉଦ ଜବର୍ ବରଷ୍ ଜାକ ଆମାଏନ୍ ରେମଲେ ଦରମ୍ ସୁଗ ଶାସନ୍ ଡ଼େମ। ମାଇ ଆଈଶ୍ପର୍ ବିସ୍ବାସ୍ ସୁଗ ମାନ୍ଲ, ମାରି ଈଶ୍ପର୍ ଆମାଇ ଆଶିର୍ବାଦ୍ ଡ଼େମ। ଅଇତିନ୍ସା ମାଏନ୍ ତୁର୍ଗୁନ୍ ବରଷ୍ ବ ମାଏ ଈଶ୍ପର୍ ବ ଜବର୍ ପାପ୍ ଡ଼େମ। ମିସିଙ୍ଗ୍, ଦାଉଦ ରାଜା ମାଇନ୍ ଡାଣ୍ଡ୍ ନାନେ ଏରୁଙ୍ଗସ ସୁନ୍ଦର୍ ଡିକୁନ୍ ମୁଇ ଆସେଲାନେ କୁମାବାର୍ନା ଜୁଲ। ମାଇ ଆମାଇ ମାଗଆଡିତା, ମାତର୍ ମାଇ ମାମାଗ୍ ଗଙ୍ଗା ଜେ ମାଇନା ଅମି ବେଥ୍ଶେବା।
ମିସିଙ୍ଗ୍, ଦାଉଦ ରାଜା ମାଇନ୍ ଡାଣ୍ଡ୍ ନାନେ ଏରୁଙ୍ଗସ ସୁନ୍ଦର୍ ଡିକୁନ୍ ମୁଇ ଆସେଲାନେ କୁମାବାର୍ନା ଜୁଲ। ମାଇ ଆମାଇ ମାଗଆଡିତା, ମାତର୍ ମାଇ ମାମାଗ୍ ଗଙ୍ଗା ଜେ ମାଇନା ଅମି ବେଥ୍ଶେବା।
ମାଇନାନେ ସୁଲୁଙ୍ଗ୍ ଇନା ବାଦୁଲ, ଦାଉଦ ଆମାଇ ମାଇନ୍ବ ୱାରୁଙ୍ଗ୍ ପାଲାଇ ବେଟାୟ। ମାରି ମାଇ ବେରଙ୍ଗ୍ ଲେମସେ ଆମାଇ ଡିଅବ ବେଟାୟ। ଇତି ବେଲା ତୁର୍ଗୁ, ବେଥ୍ଶେବା ଆଦାଉଦ ମୁଇ ଚିଟିବ ଲେକ୍ଲସେ ବେଟାୟ,ଜେ ମାଇ ଗାଗ୍ଡେ ଡିତା।
ଉରିୟ ଜାକି ବେଥ୍ଶେବାନା ଉମ୍ପର୍ ଡିଗା। ମାଇ ଦାଉଦ ରାଜା ନା ଗୁଲାଇ ସଇନିକ୍ଲେନ୍ ନାନେ ମିଣ୍ଡା ବାନିବାଇ ସଇନିକ୍ ଡିଗା। ମାଇ ଗିତିନ୍ ବେଲା ଜୁଜ୍ ଡେଡେମ୍ ପାଲଇ୍ ତୁର୍ ଇଡିଗା, ଦାଉଦ ଆଉରିୟ ଜୁଜ୍ବ ଡିକୁ ପାଲାଇ ଆମାଇନା କୁନି ୱାୟ। ମାତର୍ ଏନ୍ତୁ ସଇନିକ୍ଲେ ଜୁଜ୍ବ ଡିକୁନ୍ଲ ଉରିୟଡିଅବ ଈଇ ପାଲାଇ ମନାଡ଼େମ। ଆତିନ୍ ଦାଉଦ ଆଉରିୟ ମାରିମୁସ ଯୁଜ୍ବ ବେଟାୟ, ମାରି ସଇନିକ୍ଲେନ୍ବ ଆମାଇ ଆରିକଣ୍ଡେ ଶତ୍ରୁଲେ ବପୁବାଇ ଡିଗା ଆମାଏ ଅଡାବ ସୁସୁଙ୍ଗ୍ ସା ସୁନଡିଗା। ଡିକନ୍ ଆକା ଡେଙ୍ଗା, ମାରି ଉରିୟ ଜୁଜ୍ ଡେଡେମ୍ବ ‘ଗ’ ଇଗା।
ଜୁଜ୍ ବ ଉରିୟ ଗ’ଇକୁନ୍ ତୁର୍ଗୁ,ଦାଉଦ ରାଜା ଆବେଥ୍ଶେବା ବିବା ଡ଼େମ। ତୁର୍ଗୁ ଆଦାଉଦ ନା “ଗୁ’ ଜନମ୍ ବେଡ। ଆର୍ ନା ଦାଉଦ୍ ଡ଼େମ ଗିତିନସା ଈଶ୍ପର୍ ଜବର୍ ରିସାଗ୍ ଡ଼େଙ୍ଗ୍ଡ଼ିଗ, ଆତିନେ ଈଶ୍ପର୍ ଆନାଥନ ବାବବାଦି ଆଦାଉଦ କନ୍ ସୁସୁ ପାଲାଇ୍ ବେଟାୟ ମାଇ ଡ଼େମକୁନ୍ ପାପ୍ ଅଇ ଜା କାରାପ ଡିଗା। ଦାଉଦ ମାଇନା ପାପ୍ ନାନେ ମନ୍ ବଦ୍ ଲାୟ ମରି ଈଶ୍ପର୍ ଆମାଇ କ୍ଷମା ବେଡ଼। ମାଇନ୍ ନା ଏନ୍ତୁ ଜୀବନ, କଷ୍ଟ ବେଲା ଲସା ଈଶ୍ପର୍ନା କାତା ମାନଲ ମାରି ଈଶ୍ପର୍ ବ ମାଇନ୍ ତୁର୍ ଗୁ ଇଗା।
ମାତର୍ ଦାଉଦ ନା ଗୁ “ଗ’ଇଗା। ଡିକନ୍ ସୁଗ ଈଶ୍ପର୍ ଆଦାଉଦ ଡଣ୍ଡ୍ ବେଡ। ଦାଉଦ ‘ଗଗ’ଇ ଜାକ, ମାଇନ୍ ଡିଅନ୍ରେମ୍ନା ଅଇଜାରେମଲେ ଦାଉଦ ବେରଂ କିରମର ଡ଼େମ, ସା ଦାଉଦ ଜବର୍ ବପୁ ଆରାୟ। ମାତର୍ ଈଶ୍ପର୍ ବିସ୍ବାସ୍ ଡିଗା ମାରି ଅତିନ୍ସା ଆଦାଉଦ୍ ମା ପର୍ମାନ୍ ଡ଼େମଡିଗା ଗିତିନ୍ ଡ଼େମ,ଆନ୍ଲୋମାରି ଦାଉଦ ଆମାଇ ନିନ୍ଦା ଡ଼େମଡିଗା ଅୟତୁଙ୍ଗ୍ ସା ମାଇ ମାଇନା ସେନ୍ ତା।ତୁର୍ଗୁ,ଦାଉଦ ମାରି ବାଥ୍ଶେବା ନା ମାର୍ମୁଇ ଗୁ ଡିଗା,ମାଏ ମାଇନା ଅମି ସଲମନ୍ ବୁଅଁ।
ବାଇବଲ୍ନା ମୁଈ ଉସାରାମ୍ :୧ ଶାମୁଜେଲ ୧୦;୧୫-୧୯;୨୪;୩୧ ;୨ ଶାମୁଜେଲ ୫;୭;୧୧-୧୨
Free to use, adapt, and share under an open license (CC BY-SA 4.0).