18. ୧୮. ପାଲ୍ ପାଲ୍ ରାଜି
ଦାଉଦ ରାଜା ୪୦ ବରଷ୍ ଶାସନ୍ ଡ଼େମ। ଆତିନେ ମାଇ “ଗ’ଇଗା, ମାରି ମାଇନା “ଗୁ’ ସଲମନ୍ ଇସ୍ରାଏଲ୍ ରାଜି ବ ଶାସନ୍ ଡେଡେମ୍ ମୁଲାୟ। ଈଶ୍ପର୍ ଶଲମନ୍ ବେରଙ୍ଗ୍ ଅଁୟ ମାରି ଆମାଇ ପାଚାର୍ଲ ଜେ ନମା ମନ୍ ଡ଼େମନନି ଗିତିନ୍ ଈଶ୍ପର୍ ନନ୍ ପାଲାଇ ଡେମ୍ତ। ଶଲମନ୍ ଲୁଡ଼ ଡିଗା ଜେ, ଈଶ୍ପର୍ ଆମାଇ ଜବର୍ ବୁଦିରେମ୍ ଡେମେ। କନା ଆଈଶ୍ପର୍ ମନ୍କେ ଇଗା, ଗିତିନ୍ ସା ମାଇ ଆସଲମନ୍ ଦର୍ତନିବ ନା ଗୁଲାଇ ନାଣ୍ଡେ ବୁଦିବାଇ ରେମ ଡ଼େମ। ଶଲମନ୍ ଜବର୍ ମାମାଲେ ଶିକ୍ ଗା ମାରି ଜବର୍ ବୁଦିଗ୍ସେ ଶାସନ୍ ଡେଡେମ୍ ରେମ୍ ଡିଗା। ଈଶ୍ପର୍ ସା ଆମାଇ ଜବର୍ ସାକାର୍ ଅଡ଼େମ।
ଯିରୁଶାଲମ୍ ରାଜିବ ସଲମନ୍ ମାଇନ୍ ଉଣ୍ଡି ଅରେଙ୍ଗ, ଆର୍ ନା ମାଇନ୍ ‘ବା’ ଦାଉଦ ଅରେଙ୍ଗ୍ତିଙ୍ଗ୍ ଡସେ ମନ୍ଡ଼େମ ଡିଗା ମାରି ଗୁଲାଇ ସାମାନ୍ଲେ ରୁଣ୍ଡାୟ ଡିଗା। ରେମଲେ ଚାମ୍ଡାନା ବାଦୁଲ୍ ମନ୍ଦିର୍ବ ଅଇକା ଈଶ୍ପର୍ନା ପୁଜାଡ଼େମ ମାରି ନାମାସ୍ଲୋସେ ଆମାଇ ଅଡାବ ବେଡ। ମାରି ଈଶ୍ପର୍ ଗିତିନ୍ ମନ୍ଦିର୍ବ ‘ସା’କେଟ୍ଲ ଡିଗା,ମାରି ଈଶ୍ପର୍ ମାଏଲେ ବେରଙ୍ଗ୍ ବାସା ଡେଙ୍ଗା।
ମାତର୍ ଶଲମନ୍ ପାଲ୍ଦେଶ୍ନା ଆସେଲାନେଲେ ବଲ୍ବାବାଙ୍ଗ୍ ଡେଙ୍ଗା। ମାଇ ଜବର୍ ଆସେଲାନେ ବିବାଡ଼େମସେ ଈଶ୍ପର୍ ନା କାତା ଆମନ୍ ତା, ମାଏଲେ ୧୦୦୦ଟା ସୁଗ। କନ୍ ସେଲାନେନ୍ ନାନେ ଅଇଜା ପାଲ୍ ଦେଶ୍ନାନେ ସାଗ୍ସେ ମାଏନା ଆଦେବ୍ତାଲେ ମିସ୍ତେ ରୁଁଙ୍ଗସେ ମାଏ ନା ପୁଜା ଡେଡେମ୍ ଡେଙ୍ଗା। ଅୟଜାବେଲେ ଶଲମନ ଡକ୍ରାଗ୍ ଡିଗା, ମାଇ ଆମାଏନ୍ ଆଦେବ୍ତାଲସା ପୁଜା ଡ଼େମ ଡିଗା।
ଈଶ୍ପର୍ ଶଲମନ୍ ବାଗ୍ବ ଜବର୍ ରିସା ଡେଙ୍ଗା। ମାଇ ସୁନତା ଜେ ଆଇସ୍ରାଏଲ୍ ଦେଶ୍ ଦୁଇବାଗ୍ ଡ଼େମସେ ଈଶ୍ପର୍ ଆମାଇ୍ ଡଣ୍ଡ୍ବେତ, ଶଲମନ୍ ‘ଗ’ଇକୁନ୍ ତୁର୍ଗୁ ମାଇ କନ୍ ଡେମ୍ତ।
ଈଶ୍ପର୍ ସଲମନ୍ ବାଗ୍ବ ଜବର୍ ରିସା ଡେଙ୍ଗା। ମାଇ ସୁନତା ଜେ ଆଇସ୍ରାଏଲ୍ ଦେଶ୍ ଦୁଇବାଗ୍ ଡ଼େମସେ ଈଶ୍ପର୍ ଆମାଇ୍ ଡଣ୍ଡ୍ବେତ, ଶଲମନ୍ ‘ଗ’ଇକୁନ୍ ତୁର୍ଗୁ, ମାଇନା ଗୁ ରେହବମ୍ ରାଜା ଡେଙ୍ଗା। ଇସ୍ରାଏଲ୍ ଦେଶ୍ନା ଗୁଲାଇ ରେମ ସାମୁଇବ ଡେଙ୍ଗ୍ ସେ ଆରେହବମ୍ ମାଏନା ରାଜା ସୁଗ ବାଚ୍ଲ। ମାଏଲେ ରେହୋବୟାମ୍ ବ ଇଗ୍ସେ ରିପୁଟ୍ ଡ଼େମ ଜେ ଶଲମନ୍ ଆମାଏ ଜବର୍ କସ୍ଟ ବାଇ ପାଇଟିଲେ ଅଡେମ୍ୱାର୍ ଡେଙ୍ଗା ମାରି ଜବର୍ ସିସ୍ତୁ ରୁରୁଙ୍ଗ୍ ଡେଙ୍ଗା, ଆମାଏ ଉନାପାଇଟି ଡେଡେମ୍ସା ଆରେହୋବୟମ୍ ଗୁଆର୍ ଲ।
ମାତର୍ ରେହବାମ ଆମାଏ ବୁଦି ମୋଡିକୁନ୍ ସୁଗ ସୁନ,। ମାଇ ସୁନ, “ପେ ସୁନ ପେନି ନିଙ୍ଗ୍ ନା ‘ବା’ ସଲମନ୍ ଆପେ କସ୍ଟବାଇ ପାଇଟି ଅଡ଼େମ।,ମାତର୍ ନିଙ୍ଗ୍ ଆପେ ମାଇ ନାନେ ଜବର୍ ପାଇଟି ଡେମ୍ତିଙ୍ଗ୍, ମାରି ନିଙ୍ଗ୍ ମାଇ ନାନେ ଜବର୍ କସ୍ଟ ବେତିଙ୍ଗ୍।
ଉଣ୍ଡୋଇଲ ରେମଲେ କନ୍ ଅଙ୍ଗ,ମାଏ ବିତ୍ରେ ଜବର୍ ରେମ ମାଇନ୍ ବେରଙ୍ଗ୍ କିରମର ଡ଼େମ । ଦଶ୍ଟା କୁଲ୍ରେମଲେ ଆମାଇ ଅନ୍ତୁରସେ ଡୁଙ୍ଗା ; ଏନ୍ତୁଗ୍ ଉମ୍ବାର କୁଲ୍ନା ରେମଲେ ମାଇନ୍ ବେରଙ୍ଗ୍ ଡିଗା, କନ୍ ଉମ୍ବାର୍କୁଲ୍ନା ଆତରେ ଯିହୁଦା ରାଜିନ୍ ରେମଲେ ଡସେ ସୁନଡିଗା।
ପାଲ୍ଦଶ୍ଟା କୁଲ୍ନା ରେମଲେ ଜାରବିୟାମ୍ ଅମିନା ମିଣ୍ଡା ରେମ ମାଏନା ରାଜା ଡ଼େମ। ଗିତିନ୍ କୁଲ୍ ଗୁଲଇ ବାସାକ୍ ଦିଗ୍ ବାରି ଡିଗା,ମାଏଲେ ଆତରେ ଇସ୍ରାଏଲ ରାଜି ଡସେ ୱାୟ।
ଜାରବିୟାମ୍ ରାଜା ଆଈଶ୍ପର୍ ବିରଦ୍ ଡ଼େମ, ମାରି ଆରେମଲେ ପାପ୍ ଅଡ଼େମ, ମାଇ ମାଏନ୍ ରେମଲେ ପୁଜା ଡେଡେମ୍ ପାଲାଇ ଉମ୍ବାର ମୁର୍ତି ଅରେଙ୍ଗ। ମାଏ ମାରି ଯିହୁଦା ରାଜି ନା ଯିରୁଶାଲମ୍ ବ ‘ଇ’ସେ, ମନ୍ଦିର୍ବ ମାରି ଆଈଶ୍ପର୍ ପୁଜା ଡେଡେମ୍ ସା ଆଇତା।
ଯିହୁଦା ମାରି ଇସ୍ରାଏଲ ରାଜି ଶତ୍ରୁ ଡେଙ୍ଗା, ମାରି ମାଏନ୍ ବିତ୍ରେ ଜୁଜ୍ ଡେମ୍।
ଇସ୍ରାଏଲ୍ ଦେଶ୍ନା ତିମେବାଇ ରାଜିବ ଗୁଲାଇ ରାଜାଲେ କାରାପ୍ବାଇ ଡିଗା। କନ୍ ରାଜାଲେ ନାନେ ଏନ୍ତୁ ପାଲ୍ ଇସ୍ରାଏଲ୍ ନା ରେମଲେ ମାଏନ୍ ଟାନ୍ବ ରାଜା ଡେଡେମ୍ ପାଲାଇ ମନ୍ ଡେଡେମ୍ ଡେଙ୍ଗା, ଆଇ ଆମାଏ ଅଡ଼ାବ ସୁଙ୍ଗ।
ଗୁଲାଇ ରାଜାଲେ ମାରି ଇସ୍ରାଏଲ୍ରାଜି ନା ଜବର୍ ରେମଲେ ମୁର୍ତି ପୁଜା ଡ଼େମ। ଉଣ୍ଡୟ ମାଏଲେ କନା ଡ଼େମ,ଜବର୍ ପର୍ ବେସ୍ୟାଲେ ବେରଙ୍ଗ୍ ଲେମ ଡେଙ୍ଗା ମାରି ଉଣ୍ଡଇ ଉଣ୍ଡଇ ଆଗୁଲାଇନେ ମୁର୍ତିବଲେ ସେବ ବେବେ ଡେଙ୍ଗା।
ଯିହୁଦା ଦେଶ୍ନା ରାଜାଲେ ଦାଉଦ୍ ନା କୁଲ୍ ରେମ୍ ଡିଗା। କନ୍ ରାଜାଲେନ୍ ବିତ୍ରେ ଅଇଜା ବାନିବାଇ ରେମ ଡିଗା ଜା କି ଦରମ୍ ସୁଗ ଶାସନ୍ ଡେଡେମ୍ ଡେଙ୍ଗା, ମାରି ଈଶ୍ପର୍ ନା ପୁଜା ଡ଼େମ। ମାତର୍ ଯିହୁଦା ନା ଜବର୍ ରାଜା କାରାପ୍ବାଇ ଡିଗା। ମାଏ କାରାପ୍ ଶାସନ୍ ଡ଼େମ, ମାରି ମାଏ ପଟ୍ ପୁଜା ଡ଼େମ। କନ୍ ରାଜାଲେନ୍ ନାନେ ଅଇଜା ତରୟନା ଆ“ଗୁ’ଲେ ମିସ୍ ବାଇ ଦେବ୍ତାଲେନ୍ ବ ଅଡାବ ସୁସୁଙ୍ଗ୍ ଡେଙ୍ଗା। ମାରି ଯିହୁଦା ଦେଶ୍ନା ଜବର୍ ରେମଲେ ସା ଈଶ୍ପର୍ନା ଦାଇବ ଣ୍ଡ୍ରିମ୍ ଡେଙ୍ଗା ମାରି ପାଲ୍ ଦେବ୍ତାଲେନ୍ ପୁଜା ଡ଼େମ।
ବାଇବଲ୍ନା ମୁଈ ଉସାରାମ୍ ୧ ରାଜାବଳି ୧-୬; ୧୧-୧୨.
Free to use, adapt, and share under an open license (CC BY-SA 4.0).