19. ୧୯. ବାବବାଦିଲେ
ଈଶ୍ପର୍ ଗୁଲାଇ ବେଲା ଇସ୍ରାଏଲ୍ରେମଲେ ବ ବାବବାଦି ବେଟାଇ ବାର୍ ଡେଙ୍ଗା। ବାବବାଦିଲେ ଈଶ୍ପର୍ ନାନେ କବର୍ ଅଙ୍ଗ ମାରି ଆତିନେ ମାଏନ୍ ଆରେମଲେ ସୁନଡିଗା।
ଉଣ୍ଡୋଇ ଆହାବ ଇସ୍ରାଏଲ ରାଜି ବାଗ୍ବ ରାଜା ଡ଼େଙ୍ଗା ଗିତିନ୍ଲୋ ଏଲିୟ ମିଣ୍ଡା ବାବବାଦି ଡିଗା, ଆହାବ୍ ମିଣ୍ଡା କାରାପ୍ ବାଇ ରେମ ଡିଗା। ମାଇ ଆରେଲେ ବାଲ୍ ଅମିନା ମୁୟଙ୍ଗ୍ ଆମିଚ୍ ଦେବତା ପୁଜା ଡେଡେମ୍ ପାଲାଇ ଚେସ୍ଟା ଡ଼େମଡିଗା। ଗିତିନ୍ସା ଏଲିୟ ଆଆହାବ ରାଜା ସୁନ ଡିଗା ଜେ ଈଶ୍ପର୍ ଆରେମଲେ ଡଣ୍ଡ ବେବେସା ଇଗାନି। ମାଇ ଆମାଇ ସୁନଡିଗା, “ଇସ୍ରାଏଲ୍ରାଜିବ ନିଙ୍ଗ୍ ଉଣ୍ଡୟଲ ଜାକ ମାର୍ ମୁସ ଅସୁନ୍ ତିଙ୍ଗ୍ ଅଇତିନ୍ ଜାକ ଡାଗ୍ ମାରି ହଁସ୍ ଡାଗ୍ ଆଲକ୍ ତା।” କନା ଆଆହାବ ଅକନ୍ କିଜ୍ରା ଡ଼େମ ଜେ ମାଇ ଆଏଲିୟ ଅଡାବ୍ବାର୍ ସା ଜଜ୍ନା ଡ଼େମ।
ଆତିନେ ଈଶ୍ପର୍ ଆଏଲିୟ ଆହାବ ରାଜା ନାନେ ତିପାଗ୍ ବାର୍ ପାଲାଇ ମରୁଭୁମିବ ଇ ପାଲାଇ ସୁନ, ଏଲିୟ ମୁଇ ଜଜର୍ ଡାଗ୍ ନା ମରୁଭୁମିବ ଇସେଡିଗା ଆରିକି ଈଶ୍ପର୍ ଆମାଇ ଆଦେଶ୍ ବେଡ ଡିଗା। ଦିନ୍କେ ଉଞୁର୍ ମାରି ଗୁଲାଇ ମିଣ୍ଡି ପିରିଲେ ଆଏଲିୟ ରୁଟି ମାରି ସେଲି ରୁଙ୍ଗ ବେବେ ଡେଙ୍ଗା।କନ୍ ବେଲା, ଆହାବ ରାଜା ମାରି ମାଇନ୍ ସଇନିକ୍ଲେ ଆଏଲିୟ କଜ୍ ବାର୍ ଡେଙ୍ଗା,ମାତର୍ ମାଏ ଆମାଇ ଆବାମ୍ତା।
ମାସାଡନା ଡାଗ୍ ଗୁର ଆଡିତା,ଅଇଜା ବେଲା ତୁର୍ଗୁ ଜଜର୍ ଡାଗ୍ ଉଁସର ଇଗା। ଆତିନେ ଏଲିୟ ମୁଇ ଲଗେ ଡିକୁନ୍ ପାଲ୍ ଦେଶ୍ ବ ଇଗା। ଗିତିନ୍ ଦେଶ୍ବ ମିଣ୍ଡା ଗରିବ୍ ବାଇ ରାଣ୍ଡି ମାରି ମାଇନ୍ ଗୁ ଡିକୁ ଡେଙ୍ଗା। ତାସ୍ ବାସ୍ଲେ ଡେଙ୍ଗ୍ ଆଡିତା ସା ମାଏନା ସୁସୁମ୍ ପାଲାଇ କାଦି ଡମଇଡିଗା। ମାତର୍ ଗିତିନ୍ସା, ଇଁଙ୍ଗେର୍ ମୁଇ ଏଲିୟନା ଜତନ୍ ରୁରୁଙ୍ଗ୍ ଡେଙ୍ଗା ଈଶ୍ପର୍ ଆମାଇ ମାରି ଆମାଇନ୍ ଗୁ କାଦି ମିଲାବେଡ଼। ମାଇନା ଅଟା ଡିକୁନ୍ ପାତ୍ଲି ମାରି ମାଇନା ସୁଉ ଡାବା ଉଣ୍ଡଇସା ଆଡମ୍ତ। ଗୁଲାଇ ମର୍ଡି ବେଲା ମାଏନା କାଦି ଡିଗା। ଏଲିୟ ତିନ୍ବରସ୍ ସଗ୍ସେ ଆର ଡିଗା।
ତିନ୍ ବରଷ୍ ଛମାସ୍ ନା ତୁର୍ଗୁ, ଈଶ୍ପର୍ ଆ ଏଲିୟ ସୁନ ଡିଗା ଜେ, ମାଇ ମାରି ମୁସ ଡାଗ୍ ଅଗୁର୍ ତ। ମାଇ ଆଏଲିୟ ଇଁସ୍ରାଏଲ୍ ରାଜିବ ଲେଉଟ୍ସେ ଆଆହାବ୍ ରାଜା ବେରଙ୍ଗ୍ ଅଁୟ ପାଲାଇ ସୁନ ଡିଗା। ଆତିନେ ଏଲିୟ ଆହାବ୍ ରାଜା କଣ୍ଡେ ଇଗା। ଉଣ୍ଡୋଇଲ ଆହାବ୍ ରାଜା ଆମାଇ ଯୁଲସେ ସୁନ, “ନ ଅଇରାନ୍ ଡେଡେମ୍ ରେମ୍! ଏଲିୟ ଆମାଇ ସୁନ, ସତୟସା ନ ଆକା ଅଇରାନ୍ ଡେଡେମ୍ ରେମ୍! ନ ଆ’ଯିହୋବା’ ଅନ୍ତୁର୍ ତ ନ।ମାଇ ସତ୍ ଈଶ୍ପର୍, ମାତର୍ ନ ଆବାଲ୍ ଦେବ୍ତା ପୁଜା ଡ଼େମନନ। ଅଇ ନ ଇସ୍ରାଏଲ୍ ରାଜିନା ଆଗୁଲାଇରେମ କାର୍ମିଲ୍ କୁଣ୍ଡାବ ରୁରୁଙ୍ଗ୍ ଡିତା।”
ଗିତିନ୍ସା ଇଶ୍ରାଏଲ୍ ରାଜିନା ଗୁଲାଇ ରେମ କର୍ମିଲ୍ କୁଣ୍ଡାବ ଇଡିଗା। ଜାଜାଲେ ବାଲ୍ ଦେବ୍ ତା ନା ପୁଜାରିଲେ ଡିଗା ମାଏଲେ ସା ସାଗ। କନେଲେ ବାଲ୍ନା ବାବବାଦି ଡିଗା। ମାଏନ୍ ବିତ୍ରେ ୪୫୦ ରେମ ଡିଗା।ଏଲିୟ ଆରେମଲେ ସୁନ,”ନ ଅଇଜା କାଲ୍ ଜାକ ଡିକନ୍ ଡେଡେମ୍ ଗଙ୍ଗ୍ତ୍ ପେ? ଜଦି ଯିହୋବା ଈଶ୍ପର୍, ଆମାଇ ପୁଜା ଡ଼େମ, ମାତର୍ ବାଲ୍ ଜଦି ଈଶ୍ପର୍, ମାଇନ୍ ପୁଜା ଡେମ୍!”
ଆତିନେ ଏଲିୟ ଆବାଲ୍ ନା ବାବବାଦି ଲେ ସୁନଡିଗା,“ ଆ ଷଣ୍ଡ ଗୋଇ ଅଡାବ୍, ଆସେଲି ଗନ୍ଦାଗନ୍ଦା ଡ଼େମସୁଙ୍ଗ୍,ମାରି ଆକନା ସେବସେ ବେବେ ପାଲାଇ ବେଦି ବ ବୁଙ୍ଗ୍, ମାତର୍ ସୁଙ୍ଗ ଆଅଡଲ। ନିଙ୍ଗ୍ ତୁର୍ଗୁ ଲନା ଡିତିନ୍ ଡେମ୍ତିଙ୍ଗ୍, ମାରି ନିଙ୍ଗ୍ ଆସେଲି ମୁୟଙ୍ଗ୍ ପାଲ୍ ବେଦିବ ବୁଙ୍ଗ୍ତିଙ୍ଗ୍। ମାଇନ୍ ତୁର୍ଗୁ ଜଦିଈଶ୍ପର୍ ବେଦିବସୁଁଙ୍ଗ ବେଟାଇତ, ଡ଼ିତିନ୍ଲ ନ ମଗ୍ତନ ଜେ ମାଇ ସତ୍ଈଶ୍ପର୍।” ଗିତିନ୍ ସା ବାଲ୍ନା ବାବବାଦିଲେ ମୁୟଙ୍ଗ୍ ନାମାସ୍ଲସେ ବେବେପାଲାଇ ତିଆର୍ ଡ଼େମଡିଗା, ମାତର୍ ସୁଁଙ୍ଗ ଅଡଲ ଆଡିତା।
ଆତିନେ ବାଲ୍ ଦେବ୍ତାନା ବାବବାଦିଲେ ଆବାଲ୍ ବ ପାର୍ତନା ଡ଼େମ, “ଅ ବାଲ୍ ଦେବ୍ତା ନେନେ କାତା ଅଙ୍ଗ୍”! ଗୁଲାଇ ଦିନ୍ ମାଏ ପାର୍ତନା ଡ଼େମ ମାରି ଆଉଲି ଡେଙ୍ଗା ମାରିଲନା ଉନ୍ସୁ ବେରଙ୍ଗ୍ ତରେ ଅଗଗା, ମାତର୍ ବାଲ୍ ମାସା ଆସୁନ୍ତ, ମାରି ମାଇ ମାସା ସୁଁଙ୍ଗ ଆବେଟାଇତ।
ବାଲ୍ ଦେବ୍ତା ନା ବାବବାଦିଲେ ଗୁଲାଇ ଦିନ୍ ଆବାଲ୍ ପାର୍ତନା ଡ଼େମ। ତୁର୍ଗୁ ପାର୍ତନା ଡେଡେମ୍ ବନ୍ଦ୍ ଡ଼େମ। ଆତିନେ ଏଲିୟ ଇଶ୍ପର୍ ପାଲାଇ ମୁଇ ପାଲ୍ ବେଦିବ ଷଣ୍ଡ୍ ଗଇ ନା ସେଲି ବୁଙ୍ଗ। ଆତିନେ,୧୨ ଙ୍କୁଇଁ ନା ଡାଗ୍ ସେବକୁନ୍ ବାଗ୍ବ କିବ୍ ଉଣ୍ଡୟଲ ଜାକ ସେଲି, ସୁଙ୍ଗ, ମାରି ବେଦି ସାର୍ ବେର୍ ତି ଡିକୁନ୍ ତୁବୁ ମିରି ଆଡାଗ୍ ଡାଗ୍ ତା।
ଗିତିନ୍ ତୁର୍ଗୁ ଏଲିୟ ପାର୍ତନା ଡ଼େମ, “ଅବ୍ରାହାମ୍, ଇସାକ୍ ମାରି ଜାକୁବ୍ ନା ଈଶ୍ପର୍, ଯିହବା, ନ ଇସ୍ରାଏଲ୍ନା ଈଶ୍ପର୍ ମାରି ନିଙ୍ଗ୍ ନନା ସେବକ୍ କନ୍ ଆନେ ଅଇକା ଅଜୁଲ ବେ। ଆନିଙ୍ଗ୍ ସୁଁ ଜେ ଜାନ୍ ପାଲାଇ କନ୍ ରେମଲେ ମାଗ୍ ତ ଜେ ନ ଆକା ସତ୍ ଈଶ୍ପର୍।”
ଚଟ୍ନା ବାଦଲ୍ ନାନେ ସୁଁଅ ଡଗା। କନ୍ ବେଦି ଚାର୍ବେତି ଡିକୁନ୍ ସେଲି, ସୁଁଅ, ବିରେ ମାରି ଚାର୍ବେର୍ତି ଡିକୁନ୍ ଆତୁବୁ ଅଗେବ ବେଡ଼। ଉଣ୍ଡୋଇଲ ରେମଲେ କନ୍ ଜୁଲ, ମାଏ ତୁବୁଗ୍ବ ଉମ୍ତାଡି ଡେଙ୍ଗସେ ଲଗା, ମାରି ସୁନ “ଯିହବା ଆକା ଈଶ୍ପର୍ ଯିହବା ଆକା ଈଶ୍ପର୍।”
ଗିତିନ୍ ତୁର୍ଗୁ ଏଲିୟ ସୁନ,“ବାଲ୍ଦେବ୍ତା ନା ଆ ଜାସା ବାବବାଦିଲେ ପିସଲ୍ସେ ଡୁଡୁଙ୍ଗ୍ ପାଲାଇ ଆବେଡ!” ଗିତିନ୍ସା ରେମଲେ ବାଲ୍ ନା ଆବାବବାଦିଲେ ସବସେ ମାରି ମାଏଲେ ବାଇରି ରୁଙ୍ଗ ସେ ଆମାଏଲେ ଅଡାବ।
ଗିତିନ୍ ତୁର୍ଗୁଏଲିୟ ଆଆହାବ ସୁନ,“ଡିଅବ ଡୁଙ୍ଗା, ମାସାଡନା ଡାଗ୍ ସାଗାନି”। ଚଟ୍ନା ବାଦଲ୍ କାଲିଆ ଡେଡେମ୍ ମୁଲାୟ, ମାରି ଜବର୍ ଡାଗ୍ ଡୁର। ଯିହୋବା ଆମର୍ଡି ଅଡମ ସୁଁଅଡିଗା। କନା ଅମାଗ୍ତ ଜେ ମାଇ ସତ୍ ଈଶ୍ପର୍।
ଉଣ୍ଡୋଇଲ ଏଲିୟ ମାଇନା କାମ୍ ଅଡ଼ମ, ଈଶ୍ପର୍ ଇଲିଶାୟ ଅମିନା ମିଣ୍ଡାରେମ ମାଇନ୍ ବାବବାଦି ଡେଡେଙ୍ଗ ପାଲାଇ ବାଚ୍ଲ। ଈଶ୍ପର୍ ଇଲିଶାୟନ୍ ସା ଜବର୍ ରାକ୍ତିନା କାମ୍ଲେ ଡ଼େମ। ମାଇନା ବେରଙ୍ଗ୍ ମୁଇ ରାକ୍ତି ନା କାମ୍ ଡେଙ୍ଗ୍ ଡିଗା। ମାଇ ମୁଇ ଶତ୍ରୁ ସେନାପତି ଡିଗା, ମାତର୍ ଆମାଇ କୁସ୍ଟ ରୋଗ୍ ଡେଙ୍ଗ୍ଡିଗା। ମାଇ ଇଲିଶାୟନା କାତା ଅଙ୍ଗ, ଗିତିନ୍ସା ମାଇ ଇଗ୍ସେ ଆମାଇ ବାନି ଡେଡେଙ୍ଗ୍ ପାଲାଇ ଆଇଲିଶାୟ ସୁନ। ଇଲିଶାୟ ଆନାମାନ୍ ଯର୍ଦନ୍ କିଣ୍ଡାବ ସାତ୍ଥର୍ ବୁଡ଼ବାର୍ ପାଲାଇ ସୁନ।
ନାମାନ୍ ରିସା ଡେଙ୍ଗ୍ଡିଗା। ମାଇ କନା ଡେମ ଆଡିତା ମାସାଡନା କନା ଆମାଇ ବିସ୍ବାସ୍ ଆଡେଙ୍କୁନ୍ ସୁଗ ଲାଗ୍ଗା। ମାତର୍ ତୁର୍ଗୁ ମାଇ ମାଇନା ମନ୍ ବାଦ୍ଲାୟସେ। ଯର୍ଦନ୍ବ ଇଗ୍ସେ ମାଇ ସାତ୍ଥର୍ ବୁଡ଼୍ଗା। ମାଇ ଅଇଜାବେଲା ଡଡମ୍ଲ ଡାଗ୍ବ ବୁଡ଼୍ସେ ତୁର୍ଗା ଅଇତିନ୍ଲୋ ମାଇନା କୁସ୍ଟ ରୋଗ୍ ଗୁଲାଇ ବାନିଡେଙ୍ଗା, ଈଶ୍ପର୍ ଆମାଇ ବାନି ଡ଼େମ।
ଇସ୍ରାଏଲ୍ ରେମଲେନ୍ ବ ଈଶ୍ପର୍ ମାର୍ମୁସ ପାଲ୍ ଜବର୍ ଆବାବବାଦିଲେ ବେଟାୟ। ମାଏ ଆଗୁଲାଇ ରେମ ପଟ୍ ପୂଜା ଡେଡେମ୍ ନା ମନାଡେଡେମ୍ ପାଲାଇ ସୁନ। କନ୍ ବାଦୁଲ୍ ଆରେମଲେ ମାଏନ୍ ମାଏନ୍ ବିତ୍ ରେ ଦରମ୍ ମାରି ଆଲାଦ୍ ଡେଡେମ୍ ବାନି। କାରାପ୍ କାମ୍ ବନ୍ଦ ଡେଡେମ୍ ପାଲାଇ୍ ମାଇ ଈଶ୍ପର୍ ନା କାତା ମାନ୍ ବାର୍ ପାଲାଇ୍ ବା ବାଜିଲେ ଅରେମଲେ ଚେଟାୟ ବେଡ଼। ଜଦି ରେମଲେ କନା ଆଡେମ୍ ତ ଡନା ଈଶ୍ପର୍ ଆମାଏ ପାପ୍ ସା ଦଷ୍ ସବସେ ନିଆଇ ଡେମ୍ ତ, ମାରି ଆମାଏ ଡଣ୍ଡ୍ ବେତ।
ଜବର୍ ବେଲା ରେମଲେ ଈଶ୍ପର୍ନା କାତା ମାନ୍ବାର୍ ଆଡ଼େନ୍ତା। ମାଏ ଚନେକ୍ ଚନେକ୍ ବାବବାଦିଲେ ବେରଙ୍ଗ୍ କାରାପ୍ ବେବାର୍ ଡ଼େମ ମାରି ଉଣ୍ଡୋଇ ଉଣ୍ଡୋଇ ବେଲା ଆବାବବାଦିଲେ ଅଡାବ୍ ସୁଙ୍ଗ। ମିସିଙ୍ଗ୍ ଆଯିରିମିୟ ବାବବାଦି ମୁଇ ଉନ୍ସର୍ କୁନ୍ କୁଇସାଲ୍ ବ ରାପୁଡ଼, ମାରି ଆମାଇ ମାଇ ଗଗଇ ପାଲାଇ ଅନ୍ତୁର ବେଡ଼। ଗିତିନ୍ କୁଇଁସାଲ ବ ଡିକୁନ୍ କାଦବ ବୁଡ଼ ଇଗା। ମାତର୍ ମାଇନ୍ ବାଗ୍ବ ରାଜାନା ଆଲାଦ୍ ମନ୍ ସାଗା, ମାରି ଯିରିମିୟ ଗଗୟ୍ନା ଆଗ୍ତୁ ଆମାଇ କୁଇଁସାଲ୍ ନାନେ ଅତୁର ରୁରୁଙ୍ଗ୍ ପାଲାଇ ମାଇ ଆମାଇନା ଦାସିଲେ ଆଦେଶ୍ ବେଡ।
ଆବାବବାଦିଲେ ରେମଲେ ଘୁର୍ ନା ଡେଡେମ୍ ଡେଙ୍ଗ୍ନା ଲନା ବାବବାଦିଲେ ଇଶ୍ପର୍ ପାଲାଇ୍ ସୁନ୍ ସୁ ନା ବନ୍ଦ ଆଡେମ୍ତ। ମାଏ ଆରେମଲେ ଅମାଗ ବେଡ଼ ଜେ ଜଦି ମାଏଲେ ପାପ ନାନେ ମନ୍ ଆବଦ୍ ଲାଇତ ଡ଼ିତିନ୍ଲ ଈଶ୍ପର୍ ଆମାଏ ବୁଡ଼ାୟ ସୁଙ୍ଗ୍ ତ। ମାଏଲେ ଆରେମଲେ ଗିତିନ୍ ଲ ନା ଅମାଗ ବେଡ଼ ଜେ ପର୍ମାନ୍ ଡ଼େମକୁନ୍ସା ଆ କିସ୍ଟ ମାଏନ୍ ବ ବେଟାୟ୍ତ।
ବାଇବଲ୍ନା ମୁଈ ଉସାରାମ୍: ୧ ରାଜାବଳି ୧୬-୧୮;୨ ରାଜାବଳି ୫;ଯିରିମିୟ ୩୮।
Free to use, adapt, and share under an open license (CC BY-SA 4.0).