20. ୨୦. ଅତୁଗ୍ ସେ ଇନା ମାରି ସାସାଗ୍ନା
ଇସ୍ରାଏଲ୍ ରାଜି ମାରି ଯିହୁଦା ରାଜି ଉମ୍ବାର ଦେଶ୍ ଈଶ୍ପର୍ ବ ପାପ୍ ଡ଼େମଡିଗା। ମାଏ ସିନାଇ ବ ଈଶ୍ପର୍ ବେରଙ୍ଗ୍ ଡ଼େମକୁନ୍ ନିଅମ୍ ଅପୁରୁଗ ଡିଗା। ଈଶ୍ପର୍ ମାଇନା ଆବାବବାଦିଲେ ପାପ୍ ଡେକୁନ୍ ଅନୁତାପ୍ ଡେଡେମ୍ ସା ମାରି ଆମାଏ ମାର୍ମୁସ ପୁଜା ଡେଡେମ୍ସା ଏତାୟ ବେବେ ପାଲାଇ ବେଟାୟ ଡିଗା, ମାତର୍ ମାଏ ମାନ୍ବାର୍ ସା ମନା ଡ଼େମ।
ଆତିନେ ଈଶ୍ପର୍ ଆଉମ୍ବାର୍ ରାଜିନା ମାଏନା ଆଶତ୍ରୁଲେ ବୁଡାୟ ସୁସୁଙ୍ଗ୍ ପାଲାଇ ଆଦେଶ୍ ବେଡ଼ସେ,ଡଣ୍ଡ୍ ବେଡ଼। ଅଶୁର ମୁଇ ପାଲ ଦେଶ୍ ଡିଗା ଆର୍ନା କି ଜବର୍ ବପୁବାଇ ଡେଙ୍ଗା। ମାରି ଅଶୁରିୟ ଦେଶ୍ନା ରେମଲେ ପାଲ୍ ଦେଶ୍ବ ଜବର୍ ନିଷ୍ଟୁର୍ ଡିକୁନ୍ରେମଲେ ସୁଗ ଡିଗା। ମାଏ ଆଇସ୍ରାଏଲ୍ରାଜି ବୁଡାୟ ସୁସୁଙ୍ଗ୍ ପାଲାଇ ସାଗା। ମାରି ଅଶୁରିୟଲେ ଇସ୍ରାଏଲ୍ ରାଜିନା ଆରେମଲେ ଜବର୍ ଅଡାବ ସୁଙ୍ଗଡିଗା। ମାଏ ମନ୍ ଡ଼େମକୁନ୍ ଗୁଲାଇ ଜିନିସ୍ ରୁଙ୍ଗଇଡିଗା ମାରି ଗିତିନ୍ ଦେଶ୍ନା ଜବର୍ ବାଗ୍ ଅଗେବ ସୁଙ୍ଗ।
ଅଶୁରିୟନା ଗୁଲାଇ ନେତାଲେ, ସାକାର୍ରେମ୍ ମାରି ଦାମ୍ବାଇ ଜିନିସ୍ ତିଆର୍ ଡେଡେମ୍ ଗଗଙ୍ଗ ଡ଼େଙ୍ଗା। ମାଏ ଆମାଏଲେ ଅଶୁରିୟବ ରୁଙ୍ଗ୍ ଡିଗା। ଇସ୍ରାଏଲ୍ନା ଜବର୍ ଗରିବ୍ ରେମଲେ ଅଇଜା ଇସ୍ରାଏଲ୍ ଦେଶ୍ବ ଡିଗା।
ମାଇନ୍ ତୁର୍ଗୁ ଅଶୁରିୟବନ୍ ରେମଲେ ପାଲ୍ ଦେଶ୍ନା ଆରେମଲେ କନ୍ ଦେଶ୍ବ ଡିକୁପାଲାଇ ରୁଁଅ। ପାଲ୍ଦେଶ୍ନା ରେମଲେ ଉଙ୍ଗମ୍ଲେ ଗୁଲାଇ ମାରି ମୁସ ତିଆର୍ ଡ଼େମ। ମାଏ ଆର ଅନ୍ତୁର କୁନ୍ ଆଇସ୍ରାଏଲିୟଲେ ମାଏନ୍ ମାଏନ୍ ବେରଙ୍ଗ୍ ବିବା ଡ଼େମ। କନ୍ ରେମଲେନ୍ ଆକୁଲ୍ ଶମିରଣୀୟ ଡସେ ସୁଁସୁଡେଙ୍ଗା।
ଯିହୁଦି ରାଜିନା ରେମଲେ ଜୁଲଜେ, ଈଶ୍ପର୍ ଇସ୍ରାଏଲ୍ ରାଜିନା ରେମଲେ ମିରି ବିସ୍ବାସ୍ ଡ଼େମ ଆଡିତା, ମାରି ମାନ୍ ଲ ଆଡ଼ିତା ଗିତିନ୍ ସା ଆମାଏ ଡଣ୍ଡ୍ ବେଡ଼। ମାତର୍ ମାଏ କିଣାନିୟଲେନା ଆଦେବ୍ତା ବେରଙ୍ଗ୍ ଆମୁର୍ତିଲେ ପୁଜା ଡ଼େମ। ଈଶ୍ପର୍ ଆବାବବାଦିଲେ ଅମାଗବେବେ ପାଲାଇ ବେଟାୟ, ମାତର୍ ମାଏ ଅଁଙ୍ଗ୍ ସା ମନାଡ଼େମ।
ଅଶ୍ୱରିୟ ଦେଶ୍ନା ରେମଲେ ଆଇସ୍ରାଏଲ୍ରାଜି ବୁଡା ସୁଙ୍ଗକୁନ୍ ୧୦୦ ବରଷ୍ ତୁର୍ଗୁ, ଈଶ୍ପର୍ ବାବିଲିୟନା ରାଜା ଆନବୁଖଦ୍ନିସର୍, ଯିହୁଦା ରାଜି ବାଗ୍ବ ଜୁଜ୍ ଡେଡେମ୍ ସା ବେଟାୟ। ବାବିଲ୍ ମୁଇ ବପୁବାଇ ଦେଶ୍ ଡିଗା।ମାରି ଯିହୁଦା ରାଜିନା ରାଜା ନବୁଖଦ୍ନିସର୍ ନା ଗତିରେମ୍ ଡେଡେମ୍ସା ରାଜି ଡେଙ୍ଗ୍ଡିଗା ମାରି ଆମାଇ ବରଷ୍କେ ବରଷ୍ ଜବର୍ ଡାବୁ ବେବେସା ରାଜି ଡେଙ୍ଗା।
ମାତର୍ ଅଇଜା ବରଷ୍ ତୁର୍ଗୁ,ଯିୟୁଦାନା ରାଜା ମାରି ବାବିଲ୍ ଦେଶ୍ ବେରଙ୍ଗ୍ ବିରଦ୍ ଡ଼େମ। ଗିତିନ୍ସା ବାବିଲନିୟ ରେମଲେ ଲେଉଟ୍ ସାଗା ମାରି ମାଇ ଯିହୁଦା ଦେଶ୍ ବାଗ୍ବ ଜାଗ୍ଲସେ ଜୁଜ୍ ଡ଼େମ। ମାଏଲେ ଆଜିରୁଶାଲାମ୍ ସହର୍ ଚାଡାୟ ମାରି ଆମନ୍ଦିର୍ ବୁଡାସୁଙ୍ଗ ମାରି ସହର୍ ମାରି ଉଣ୍ଡିନା ଦନ୍ଦଲତ୍ ଗୁଲାଇ ଚାଡାୟରୁଙ୍ଗା।
ଯିହୁଦା ଦେଶ୍ନା ଆରାଜା ଡଣ୍ଡ୍ ବେବେସା ନବୁକଦ୍ନିସର୍ ନା ସଇନିକ୍ଲେ ରାଜାନା ଆଗୁଲେଇନେ ସାର୍ମ ଆଗ୍ତୁ ଅଡାବସୁଁଙ୍ଗ। ମାରି ମାଇନ୍ ତୁର୍ଗୁ ଆମାଇ କାନା ଡ଼େମ। କନଙ୍ଗ୍ନା ତୁର୍ଗୁ ମାଏଲେ ଆରାଜା ରୁଙ୍ଗ ଇଗା।ଗିତିନ୍ ସା ମାଇ ବାବିଲ୍ ଦେଶ୍ନା ଜଇଲ୍ବ ଗଇଗା।
ନବୁଖଦ୍ନିସର୍ ରାଜା ମାରି ମାଇନା ସଇନିକ୍ଲେ ଯିହୁଦା ରାଜିନା ଆଗୁଲାଇ ରେମ ବାବିଲ୍ ଦେଶ୍ବ ରୁଙ୍ଗ ଇଗା। ମାତ୍ରମ୍ ଆଗରିବ୍ରେମ୍ ତାସ୍ ଡେଡେମ୍ ପାଲାଇ ଅନ୍ତୁରବେଡ଼। କନ୍ କାଲ୍ ବେଲା, ଉଣ୍ଡୋଇଲ ଈଶ୍ପର୍ନା ଆରେମଲେ ପର୍ମାନ୍ ଡ଼େମକୁନ୍ ଦେଶ୍ ଅନ୍ତୁର୍ବାର୍ସା ବାଇଦ ଡ଼େଙ୍ଗା, ଆମାଏ ଅତୁଗ୍ ସେ ଇନା ଡସେ ସୁନ୍ତ।
ମାରି ଈଶ୍ପର୍ ଆରେମଲେ ମାଏନ୍ ପାପ୍ ସା ଆମାଏ ପାଲ୍ ଦେଶ୍ବ ରୁଙ୍ଗ୍ସେ ଡଣ୍ଡ୍ବେଡ଼, ଅଇତିନ୍ସା ମାଇ ଆମାଏଲେ ବେଡ଼କୁନ୍ ପର୍ମାନ୍ ସା ଆବାନାତା। ଈଶ୍ପର୍ ମାଇନା ରେମଲେନ୍ ବାଗ୍ବ ବାନି ଜୁଜୁ ଡେଙ୍ଗା ମାରି ମାଏନା ବାବବାଦିଲେନ୍ ବ ମାଏଲେ ବେରଙ୍ଗ୍ ଅଁୟ ଡେଙ୍ଗା। ମାଇ ପର୍ମାନ୍ ଡ଼େମତା ଜେ, ୭୦ ବରଷ୍ ତୁର୍ଗୁ, ମାଏଲେ ମାରିମୁସ ପର୍ମାନ୍ ଡ଼େମକୁନ୍ ଦେଶ୍ବ ସାତା।
୭୦ ବରଷ୍ ତୁର୍ଗୁ ପାରସ୍ୟ ଦେଶ୍ନା ରାଜା ସାଇରସ୍ ଆବାବିଲନିୟ ଦେଶ୍ ଆରାୟ। ଗିତିନ୍ସା ଅଇଜା ବାବିଲ୍ ରାଜି ନାନେ ପାରସ୍ୟ ରାଜି ଜବର୍ ଦେଶ୍ ବାଗ୍ବ ଶାସନ୍ ଡ଼େମ। ଇସ୍ରାଏଲନା ଆରେମଲେ ଯିହୁଦି ରେମଡ଼ସେ ସୁଁସୁ ଡେଙ୍ଗା। ମାଏନ୍ ବିତ୍ରେ ଜବର୍ ରେମ, ବାବିଲ୍ ଦେଶ୍ ବ ମାଏନା ଗୁଲାଇ୍ ଜିବନ୍ କାଟ୍ଲ । ଏନ୍ତୁ ଇତି ଡକ୍ରା ରେମ ଆକା ଯିହୁଦିନା ଆଯିହୁଦା ଦେଶ୍ ଏତାୟ।
ପାରସ୍ୟ ଦେଶ୍ନା ରେମଲେ ଜବର୍ ବପୁ ବାଇ ଡିଗା, ମାତର୍ ମାଏ ଆରାୟ ଡିକୁନ୍ ରେମଲେନ୍ ବାଗ୍ବ ଆଲାଦ୍ ଡ଼େମ। ମାତର୍ ସାଇରସ୍ ପାରସ୍ୟ ଦେଶ୍ନା ରାଜା ଡେଙ୍ଗ୍ କୁନ୍ ଉନାଦିନ୍ ତୁର୍ଗୁ, ମାଇ ମୁଇ ଆଦେଶ୍ ବେଡ଼ ଜେ। ଯିହୁଦା ଦେଶ୍ ଇପାଲାଇ ମନ୍ ଡେମନା, ଜାସା ଯିହୁଦି ରେମ୍ ପାରସ୍ୟ ଦେଶ୍ ଅନ୍ତୁରସେ ଯିହୁଦା ଦେଶ୍ବ ଇଗଙ୍ଗ୍ତା। ଆତିନେ ମାଇ ଆମାଏ ଆମନ୍ଦିର୍ ମାରିମୁସ ତିଆର୍ ଡେଡେମ୍ ପାଲାଇ ଡାବୁ ବେଡ଼ । ଗିତିନ୍ସା ୭୦ ବରଷ୍ ତରୁଗୁ ଅତୁଗ୍ ସେ ଡିକୁନ୍, ଯିହୁଦିଲେନା ମୁଇ ପାର୍ତି ଯିହୁଦା ସହର୍ ନା ଯିରୁଶାଲେମ୍ ବ ସାଗା।
ଉଣ୍ଡୋଇଲ ରେମଲେ ଜିରୁଶାଲମ୍ବ କେଟ୍ଗା, ମାଏ ଉଣ୍ଡି ମାରି ଉଙ୍ଗମ୍ନା କତି ମାର୍ମୁସ ଅରେଙ୍ଗ। ପାରସ୍ୟଲେ ମାଏନ୍ ବାଗ୍ବ ସା ଅଇତିନ୍ ଜାକ ଶାସନ୍ ଡ଼େମ, ମାତର୍ ମାରିମୁସ ଯିହୁଦି ରେମଲେ ପର୍ମାନ୍ ଡ଼େମକୁନ୍ ଦେଶ୍ ବ ଡିଗ୍ସେ ଗିତିନ୍ ମନ୍ଦିର୍ବ ପୁଜା ଡେଡେମ୍ ଡେଙ୍ଗା।
ବାଇବଲ୍ନା ମୁଈ ଉସାରାମ୍ : ୨ ରାଜାବଳି ୧୭:୨୪-୨୫;୨ ବଂଶାବଳି ୩୬ ; ଏଜ୍ରା ୧-୧୦;ନିହିମିୟା ୧-୧୩
Free to use, adapt, and share under an open license (CC BY-SA 4.0).