21. ୨୧. ଈଶ୍ପର୍ ଆକିସ୍ଟ ପର୍ମାନ୍ ଡେମ୍ତ
ଉଣ୍ଡୋଇଲ ଈଶ୍ପର୍ ଆଦର୍ତନି ତିଆର୍ ଡ଼େମ,ମାଇ ମାଗଡିଗା ଜେ ଇତିବେଲା ତୁର୍ଗୁ ଆକିସ୍ଟ ବେଟାୟ୍ତ। ମାଇ ହବା ମାରି ଆଦମ୍ କନା ଡେମ୍ତ ଡସେ ପର୍ମାନ୍ ଡ଼େମ ଅବାନା କୁଲ୍ ନାନେ ମିଣ୍ଡା ଜନମ୍ ଡ଼େନ୍ତା ଜାକି ବୁବୁନା ଆବବ୍ ଅବାର୍ତାଗ ବେତ। ଆହବା ନାଡ଼ବାର୍ ପାଲାଇ୍ ସ ଇତାନ୍ ବୁବୁଗ୍ ସୁଗ ତିନାଗା। ଈଶ୍ପର୍ ସୁନ୍ ସୁନା ଅର୍ତ ଡେଙ୍ଗା ଜେ, କିସ୍ଟ ଆସଇତାନ୍ ଏକ୍ଦମ୍ ଆରାଇତ।
ଈଶ୍ପର୍ ଆଅବ୍ରାହାମ୍ ପର୍ମାନ୍ ଡ଼େମଡିଗା ଜେ, ମାଇନ୍ ସା ଦର୍ତନି ନା ଆଗୁଲାଇ କୁଟୁମ୍ ଆଷିର୍ବାଦ୍ ବାଙ୍ଗ୍ତା। ସାସାବ୍ ବେଲା ଆକିସ୍ଟ ବେଟାୟସେ ଈଶ୍ପର୍ନା କନ୍ ପର୍ମାନ୍ ଗୁଲାଇ ଡେମ୍ତ। ଈଶ୍ପର୍ ଆତିନ୍ ପର୍ମାନ୍ ଡ଼େମକୁନ୍ ଇତିବେଲା ଆକିସ୍ଟ ବେଟାଇବାର୍ଲୋ ଗିତିନ୍ ଅଡମ୍ତ। କିସ୍ଟ ଦର୍ତନିବ ଡିକୁନ୍ ଆଗୁଲାଇ କୁଲ୍ ନା ରେମଲେ ମାଏନ୍ ନା ପାପ୍ ନାନେ ରକ୍ଷା ଡେମ୍ତ।
ଈଶ୍ପର୍ ଆମୋଶା ପର୍ମାନ୍ ଡ଼େମଡିଗା ଜେ, ଆଗ୍ତୁ ମାଇ ମାଇନା ସୁଗ ମାର୍ମୁଇ ବାବବାଦି ବେଟାଇତ। କନ୍ ବାବବାଦି କିସ୍ଟ ଡ଼େନ୍ତା।ଡିକନ୍ ସୁଗ,ଈଶ୍ପର୍ ମାରିମୁସ ପର୍ମାନ୍ ଡ଼େମ ଜେ ମାଇ ଆକିସ୍ଟ ବେଟାଇତ।
ଈଶ୍ପର୍ ଆଦାଉଦ ରାଜା ପର୍ମାନ୍ ଡ଼େମ ଡିଗା ଜେ, ମାଇନା ମୁଇ କୁଲ୍ କିସ୍ଟ ଡ଼େନ୍ତା। ମାଇ ରାଜା ଡ଼େନ୍ତା ମାରି ଈଶ୍ପର୍ନା ରେମଲେନ୍ ବାଗ୍ବ ଗୁଲାଇ ଦିନ୍ ପାଲାଇ ଶାସନ୍ ଡେମ୍ତ।
ଈଶ୍ପର୍ ଯିରିମିୟ ବାବବାଦି ବେରଙ୍ଗ୍ କାତା ଡେଙ୍ଗା,ମାରି ଆମାଇ ସୁନଡିଗା ଜେ, ମାଇ ମିସିଙ୍ଗ୍,ମୁଇ ତିମେ ନିୟମ୍ ଡେମ୍ତ। ଗିତିନ୍ ତିମେ ନିୟମ୍ ଈଶ୍ପର୍ ଇସ୍ରାଏଲ୍ ବେରଙ୍ଗ୍ ସାଇନା ଦେଶ୍ବ ଡ଼େମକୁନ୍, ବାଇର୍ବାଇ ନିୟମ୍ ସୁଗ ଆଡ଼େନ୍ତା।ଉଣ୍ଡୋଇଲ ମାଇ ରେମଲେ ବେରଙ୍ଗ୍ ମାଇନା ତିମେ ନିୟମ୍ ଡେମ୍ତ, ମାଇ ଆମାଏ ତରୋଇନା ସୁଗ ମାମାଗ୍ ପାଲାଇ ରେମେଲେ ଆମାଇ ମାଗ୍ତ। ଗୁଲାଇରେମ ଆମାଇ ବଲ୍ ବାଙ୍ଗ୍ତା,ମାରି ମାଇନା ନିୟମ୍ଲେ ମାନ୍ବାର୍ସା ମନ୍ ଡେମ୍ତ। ଈଶ୍ପର୍ ସୁନତା ଜେ କନ୍ ମାଏନ୍ ମନ୍ବ ମାଇନା ନିୟମ୍ ଲେକ୍ଲ କୁନ୍ସୁଗ ଡ଼େନ୍ତା। ମାଏ ମାଇନା ରେମ ଡ଼େନ୍ତା,ମାରି ଈଶ୍ପର୍ ମାଏନା ପାପ୍ଲେ ଗୁଲାଇ୍ କେମା ଡେମ୍ତ। କିସ୍ଟ ମାଏନ୍ ବେରଙ୍ଗ୍ ତିମେ ନିୟମ୍ ଡେମ୍ତ।
ଈଶ୍ପର୍ନ ବାବବାଦିଲେ କନା ସା ସୁନତା ଜେ, କିସ୍ଟ ମିଣ୍ତା ବାବବାଦି, ମିଣ୍ଡା ପୁଜାରି, ମାରି ମିଣ୍ଡା ରାଜା ଡ଼େନ୍ତା। ଆର୍ନା ରେମ ଈଶ୍ପର୍ ନାନେ କାତା ଅଙ୍ଗ୍ତ ମାରି ଗିନା ଆରେମଲେ ସୁନ ବୁଲ୍ତ ମାଇ ଆକା ବାବବାଦି। ଈଶ୍ପର୍ ପାଟାଇବାରସା ପର୍ମାନ୍ ଡ଼େମଡିକୁନ୍ କିସ୍ଟ ମିଣ୍ଡା ବାନିବାଇ ବାବବାଦି ଡ଼େନ୍ତା।ଗିତିନ୍ କିସ୍ଟ, ଈଶ୍ପର୍ନା କବର୍ ବାନିସୁଗ ଅଙ୍ଗ୍ତ, ବାନିସୁଗବୁଜାଇତ,ମାରି ଆମାଏନ୍ ରେମଲେ ଗୁଲାଇ ବାନିସୁଗ କାତା ଶିକ୍ୟା ବେତ।
ଇସ୍ରାଏଲ୍ନା ପୁଜାରିଲେ ରେମଲେ ପାଲାଇ ଈଶ୍ପର୍ବ ନାମାସ୍ବାର୍ ଡେଙ୍ଗା। ରେମଲେନ୍ ପାପ୍ ନା ଡଣ୍ଡ୍ ଗିତିନ୍ ଟାନ୍ବ ନାମାସ୍ଲ କୁନ୍ଲେ ବେବେ ଡେଙ୍ଗା। ପୁଜାରିଲେ ସା ରେମଲେ ପାଲାଇ ଈଶ୍ପର୍ବ ପାର୍ତନା ଡ଼େମ। ମାସା ଡନା, କିସ୍ଟ ମିଣ୍ଡା ଦରମ୍ବାଇ ମୁନା ପୁଜାରି ଡ଼େନ୍ତା, ଜାକି ଆତରଇ ଈଶ୍ପର୍ ପାଲାଇ ମୁଇ ନାମାସ୍ଲ କୁନ୍ ସୁଗ ସରପ୍ଲ ବେଡ। ଗିତିନ୍ ଡେଙ୍ଗାନି, ମାଇ ନାନେ ଉଣ୍ଡଇ ସା ପାପ୍ ଆଡ଼ିତା, ମାରି ଉଣ୍ଡୋଇଲ ଆତରେ ଅସେବ୍ ତା, ପାପ୍ କେମା ପାଲାଇ୍ ମାରି ମାସା ସେସେବ୍ ପାଲାଇ୍ ଦରକାର୍ ଆଡ଼େନ୍ତା।
ରାଜାଲେ ମାରି ମୁନା ରେମଲେନ୍ କୁଲ୍ ବାଗ୍ବ ଶାସନ୍ ଡେମ୍ତ, ଉଣ୍ଡଇ ଉଣ୍ଡଇ ମାଏ ବୁଲ୍ ଡେମ୍ତ। ରାଜା ଦାଉଦ୍ନା ଅଁ ଇସ୍ରାଏଲ୍ ରେମଲେନ୍ ବାଗ୍ବ ଶାସନ୍ ଡ଼େମ। ମାତର୍ ଦାଉଦ କୁଲ୍ନା କିସ୍ଟ ଗୁଲାଇ ଦର୍ତନି ବାଗ୍ବ ଶାସନ୍ ଡେମ୍ତ, ମାରି ମାଇ ଗୁଲାଇ ଦିନ୍ ପାଲାଇ ଶାସନ୍ ଡେମ୍ତ। ମାରି ମାଇ ବାନି ଶାସନ୍ ଡେମ୍ତ ମାରି ଠିକ୍ ନିଷ୍ପତି ରୁଙ୍ଗ୍ତା।
ଈଶ୍ପର୍ନା ବାବବାଦିଲେ କିସ୍ଟନା ଅମିବ ଜବର୍ କାତା ସୁନଡିଗା। ବୁଜା ସେ, ମଲାଖି ସୁନଡିଗା ଜେ କିସ୍ଟ ଶାସନ୍ ଡେଡେମ୍ନା ଆଗ୍ତୁ ମାର୍ ମିଣ୍ଡା ବାବବାଦି ସାତା। ଗିତିନ୍ ବାବବାଦିଲେ ଜବର୍ ମୁକିଆ ବାଇ ଡ଼େନ୍ତା। ମାରିଲନା ବାବବାଦି ଯିଶାଇୟ ଲେକ୍ଲତା ଜେ କିସ୍ଟ ମୁଇ ସେଲାନ୍ବଇ ନାନେ ଜନମ୍ ଡ଼େନ୍ତା। ମିରି ମୀଖା ବାବବାଦି ସୁନ ଡିଗା, ଜେ ବେଥ୍ଲିହିମ୍ ସହର୍ବ କିସ୍ଟ ଜନମ୍ ଡ଼େନ୍ତା।
ବାବବାଦି ଯିଶାଇୟ ସୁନ ଡିଗା ଜେ କିସ୍ଟ ଗାଲିଲି ଅଙ୍ଗମ୍ବ ଡିତା। କିସ୍ଟ ଜବର୍ ଦୁକ୍ବ ଡିକୁନ୍ ଆରେମଲେ ଶାନ୍ତି ଅଡେମ୍ତ ଇଁଆ ଡେଙ୍ଗ୍ କୁନ୍ ସୁଗ ତୁମ ସୁନ୍ତ। ଆବନ୍ଦିଲେ ସା ମୁକ୍ତି ଡେମ୍ତ। ମାଇ ଆରଗିଲେ ଲନା ନିମାନ୍ ଡେମ୍ତ ମାରି ଜାଜାଲେ କି ବୟ୍ରା, କନା, କନ୍ଦା ମାରି ଆଚଟାଲେ ଲନା ବାନି ଡେମ୍ତ।
ଯିଶାୟ ବାବବାଦି କନ୍ସା ସୁନ ଜେ, ରେମଲେ ଆକିସ୍ ଟ ଗୁର୍ନା ଡେମ୍ତ ମାରି ଆସପ୍ତ। ପାଲ୍ ବାବବାଦିଲେ ସୁନ ଡିଗା ଜେ କିସ୍ଟ ନା ସାଙ୍ଗ୍ ମାଇନା ବିରୁଦ୍ ବ ଇତା। ମାରି କନ ଡେଡେମ୍ ପାଲାଇ ମାଏନ୍ ସାଙ୍ଗ୍ ୩୦ ଟା ରୁପା ଡାବୁ ମାଏନ୍ ନାଣ୍ଡେ ବାମ୍ ତା। ମାରିସା ପାଲ୍ ବାବବାଦିଲେ ସୁନ, ଆକିସ୍ଟ ଲେମଲେ ଅଡ଼ାବ ସୁନ୍ତ, ମାରି ମାଏନା ସକା ପାଲାଇ ଚିଟି କେଲ୍ ମାଙ୍ଗତା।
କିସ୍ଟ ମିରି ବଡେଙ୍ଗ୍ସେତା ଗଇତା ଗିଟିନ୍ କାତା ବାବବାଦିଲେ ସୁନତା। ଯିଶାଇୟ ବାବବାଦି ଭବିଷ୍ୟତ୍ ନା କାତା ସୁନ ଡିଗା ଜେ ରେମଲେ କିସ୍ ଟନା ବାଗ୍ବ ବୁଇତୁର୍ ତ, କିଜାଇତ ମାରି ବୁଗ୍ତ। ରେମଲେ ବୁସ୍ ତ ମାରି ମାଇ ଜବର୍ କଷ୍ଟ ସେ ମାରି ଜବର୍ ଦୁକା ଡେ ଡେଙ୍ଗ୍ ସେ ଗୋଇତା, ମାରି ମାଇ ମାସା ବୁଲ୍ ଡ଼େମ ଆଡ଼ିତା।
ବାବବାଦିଲେ କନ୍ସା ସୁନ, କିସ୍ଟ ମାସା ପାପ୍ ଆଡେମ୍ତ। ମାଇ ବାନିବଇ ରେମ ଡ଼େନ୍ତା। ମାତର୍ ମାଇ ଗୋଇତା ମାସାଡନା ରେମଲେନା ପାପ୍ ପାଲାଇ୍ ଈଶ୍ପର୍ ଆମାଏ ଡଣ୍ଡ୍ ବେତ। ଉଣ୍ଡୋଇଲ ମାଇ ଗୋଇତା, ରେମଲେ ଈଶ୍ପର୍ ବେରଙ୍ଗ୍ ଶାନ୍ତି ଡିକୁ ଗଙ୍ଗ୍ତା। କନ୍ ପାଲାଇ୍, ଈଶ୍ପର୍ନା ଯଜ୍ନା ବ, ଆକିସ୍ଟ ନା ଗଗୟ୍ସା ଡିଗା।
ବାବବାଦିଲେ କନ୍ ଲନା ସୁନ ଜେ ଆକିସ୍ଟ ଗୋଇକୁନ୍ ନାନେ ଅମୁରାଗ୍ତ। କନ୍ ଅମାକ୍ତ ଜେ ଯୀଶୁ ନା ଗୋଇକୁନ୍ ମାରି ମାର୍ମୁସ ବୁରନା ତିମେ ବାଇ ନିୟମ୍ ଡେଡେମ୍ ପାଲାଇ୍ ଈଶ୍ପର୍ନା ଯଜ୍ନା ଡିଗା, ଆତିନେ ମାଇ ମାଇନ୍ ବିରୁଦ୍ବ ପାପ୍ ଡ଼େମକୁନ୍ ଆରେମଲେ ରକ୍ଷା ଡେଡେମ୍ ଗଙ୍ଗ୍ତା।
ଈଶ୍ପର୍ ଆ ବାବବାଦିଲେ କିସ୍ଟ ନା ଜବର୍ କାତା ଅମାଗ ମାତର୍ କନ୍ ବାବବାଦିଲେ ଡିକୁନ୍ ବେଲା କିସ୍ଟ ସା ଆଡିତା। ୪୦୦ ନାନେ ଜବର୍ ବରଷ୍ ତୁର୍ଗୁ କନ୍ ବବିସତ୍ ନା କାତା ଗୁଲାଇ ଡ଼ଡ଼ମ୍ଲ କନ୍ ବିଷ୍ୟତ୍ନା କାତା ବେଡ଼ ଡିଗା ଜେ,ସମାନ୍ ବେଲା ଈଶ୍ପର୍ ଆକିସ୍ଟ ଦର୍ତନିବ ବେଟାୟ।
ବାଇବଲ୍ନା ମୁଈ ଉସାରାମ୍:ଆଦି ୩: ୧୫; ୧୨:୧-୩; ଦ୍ୱିତୀୟ ବିବରଣ ୧୮:୧୫; ୨ଶାମୁୟେଲ ୭; ଯିରିମିୟ ୩୧; ଯିଶାଇୟ ୫୯:୧୬; ଦାନିୟେଲ ୭; ମଲାଖି ୪:୫ ଯିଶାଇୟ ୭:୧୪; ମୀଖା ୫:୨; ଯିଶାଇୟ ୯:୧-୭; ୩୫:୩-୫; ୬୧; ୫୩; ଗୀତସଂହିତା ୨୨:୧୮; ୩୫:୧୮; ୬୯:୪; ଯିଖରିୟ ୧୧:୧୨-୧୩; ଯିଶାଇୟ ୫୦:୬; ଗୀତସଂହିତା ୧୬:୧୦-୧୧
Free to use, adapt, and share under an open license (CC BY-SA 4.0).