22. ୨୨. ଯୋହନ୍ ନା ଜନମ୍
ଆଗ୍ତୁ ଈଶ୍ପର୍ ମାଇନା ଆବାବବାଦିଲେ ବେରଙ୍ଗ୍ ଅଁୟ ଡେଙ୍ଗା, ଜାନ୍ ସା କି ମାଏ ମାଇନା ରେମଲେ ବେରଙ୍ଗ ଅଁୟ ଗଙ୍ଗ୍ତା । ଗିତିନ୍ ତୁର୍ଗୁ ୪୦୦ ବରଷ୍ ସିମ୍ରା ଡେଙ୍ଗସେ ଡ଼ିଗା, ଆର୍କି ମାଇ ଇଁଗେର୍ ରେମଲେ ବେରଙ୍ଗ୍ ଅଁୟ ସା ଆଡ଼େନ୍ତା। ଗିତିନ୍ ତୁର୍ଗୁ ଈଶ୍ପର୍ ଜିଖରିୟ ଅମିନା ମିଣ୍ଡା ପୁଜାରି ବ ମୁୟଙ୍ଗ୍ ଦୁତ୍ ବେଟାୟ। ଜିଖରିୟ ମାରି ମାଇନା କୁନି ଏଲିଜାବେଥ୍ ଆଈଶ୍ପର୍ ମାନ୍ଲସେ ଡିଗା। ମାଏ ଜବର୍ ଡକ୍ରା ଡକ୍ରି ଡେଙ୍ଗ୍ ଡିଗା, ମାରି ମୁଇ ସା ‘ଅଁଅଁ’ଡେଙ୍ଗ୍ ଆଡିତା
ସରଗ୍ନା ଦୁତ୍ ଆଜିଖରିୟ ସୁନ,“ନ ନା କୁନି ମୁଇ ଅଁଅଁ ବାମ୍ତା। ପେ ଆମାଇ ଯୋହନ୍ ଅମି ବେତ ପେ। ଈଶ୍ପର୍ ଆମାଇ ପବିତ୍ର ଆତ୍ମାବେରଙ୍ଗ୍ ସାଏଗ୍ ସେ ଡେମ୍ତ, ମାରି ଯୋହନ୍ ଆରେମଲେ ଆକିସ୍ଟ ବିସ୍ବାସ୍ ଡେଡେମ୍ ସା ତିଆର୍ ଡେମ୍ତ।” ଜିଖରିୟ ସୁନ, ନିଙ୍ଗ୍ ମାରି ନିଙ୍ଗ୍ ନା କୁନିନା ଅଁଅଁ ଅଗ୍ନା ବୟସ୍ ଡୁଙ୍ଗାନି। ନିଙ୍ଗ୍ ଆନ ମିରି ମାଗ୍ତିଙ୍ଗ୍ ନ ଆନିଙ୍ଗ୍ ସତ୍ ସୁନତ୍ ନ ଡସେ?”
ଆଜିଖରିୟ ସରଗ୍ନା ଦୁତ୍ ଉତର୍ ବେଡ,“କନ୍ ନିମାନ୍ କାତା ସୁସୁଁ ପାଲାଇ ଆନିଙ୍ଗ୍ ଈଶ୍ପର୍ ବେଟାୟ ଡିଗା। ମାସାଡନା ନ ଆନିଙ୍ଗ୍ ବିସ୍ବାସ୍ ଆଡେମ୍ତ ନ, ଉଣ୍ଡୋଇଲ ଜାକ ଗୁ ଜନମ୍ ମଡେଡେମ୍ ପନ୍ତେକ୍ ନ କନ୍ଦା ଡେଙ୍ଗ୍ସେ ଡିତ୍ନ।” ଚଟ୍ ନା, ଜିଖରିୟ ମାସା ଅଁୟ ଆଗଙ୍ଗା। ଗିତିନ୍ ତୁର୍ଗୁ ଦୁତ୍ ଆଜିଖରିୟ ଅନ୍ତୁର ସେ ଡୁଙ୍ଗା। କନ୍ ତୁର୍ଗୁ ଜିଖରିୟ ଡିଅବ ସାଗା, ମାରି ମାଇନା କୁନି ଟମ୍ଡା ଉଁପ ଅନ୍ତୁର।
ଉଣ୍ଡୋଇଲ ଏଲିଜାବେଥ୍ ଟମ୍ଡା ପ ଅନ୍ତୁରସେ ଛଅ ମାସ୍ ଡେଙ୍ଗା, ଗିତିନ୍ ଦୁତ୍ ଏଲିଜାବେଥ୍ ନା କୁଲ୍ରେମ୍ ବ ଅଜୁଗା, ଜାନ୍ ଅମି ମରିୟମ୍।ମାଇ ମିଣ୍ଡା ସେଲାଙ୍ଗ୍ ଡିଗା, ମାରି ଯୋଷେଫ ଅମିନା ମିଣ୍ଡା ମୁଇ ରେମ ବିବା ଡେଡେମ୍ ସା ଲୁଡ଼ ଡିଗା। ଦୁତ୍ ଆମାଇ ସୁନ, ନ ଟମ୍ଡା ପ ଅନ୍ତୁରସେ ମୁଇ ଗୁ ଜନମ୍ ଡେମ୍ତନ। ମାରି ପେ ଗିତିନ୍ ଗୁ ନା ଅମି ଯୀଶୁ ବେତ ପେ। ମାଇ ଗୁଲାଇ ରେମ ନା ବାଗ୍ବ ମୁନା ଡ଼େନ୍ତା,ମାରି ମାଇ ଈଶ୍ପର୍ ନା ଅ ଅଁ ଡ଼େନ୍ତା ମାରି ଶାସନ୍ ଡେମ୍ତ।
ମରିୟମ୍ ସୁନ,“ ନିଙ୍ଗ୍ ଡିଅ ସବଆଡିତିଙ୍ଗ୍ କନା ମିରି ଡ଼େନ୍ତା?” ସରଗ୍ ନା ଦୁତ୍ ବୁଜାୟସେ ସୁନ,“ପବିତ୍ର ଆତ୍ମାନନ୍ ବ ସାତା, ମାରି ଈଶ୍ପର୍ ନା ବପୁ ନନ୍ କଣ୍ଡେ ସାତା। ଗିତିନ୍ ସା ଡାଉ ଗୁ ପବିତ୍ର ଡ଼େନ୍ତା, ମାରି ମାଇ ଈଶ୍ପର୍ ନା ଗୁ ଡ଼େନ୍ତା” ସରଗ୍ ନା ଦୁତ୍ ମା ସୁନ ଡିଗା ଗିତିନା ମରିୟମ୍ ବିସ୍ବାସ୍ ଡ଼େମ।
କନ୍ ଡେଙ୍ଗ୍କୁନ୍ ତୁର୍ଗୁ, ମରିୟମ୍ ଆଏଲିଜାବେଥ୍ ଜୁଜୁଇଗା। ମରିୟମ୍ ଆମାଇ ଜୁଆର୍ ବେଟ୍ ଡେଙ୍ଗ୍କୁନ୍ଲ, ଏଲିଜାବେଥ୍ ନା ସୁଲଇ ବ ଡିକୁନ୍ ଗୁ ଡଗାକୁନ୍ ସୁଗ ଡେଙ୍ଗା। ଈଶ୍ପର୍ ମାଏ ପାଲାଇ ମାମା ଡ଼େମ ଡିଗା, ଗିତିନ୍ ସେଲାନେ ପା ମୁଇ ବ ମିସ୍ ସେ ସାର୍ଦା ଡ଼େମ। ମରିୟମ୍ ତିନ୍ ମାସ୍ ପାଲାଇ ଆଏଲିସାବେଥ୍ ନା କୁଲମ୍ ରେମ ଡିଗ୍ ସେ, ତୁର୍ଗୁ ମରିୟମ୍ ମାଏନା ଡିଅବ ସାଗା। .
କନ୍ ତୁର୍ଗୁ ଏଲିସାବେଥ୍ ଆମାଇନା ଗୁ ଜନମ୍ ବେଡ। ଦୁତ୍ନା ଆଦେଶ୍ ସୁଗ, ଜିଖରିୟ ମାରି ଏଲିଜାବେଥ୍ ଆତିନ୍ ଗୁ ଯୋହନ୍ ଅମି ବେଡ। ଗିତିନ୍ ତୁର୍ଗୁ ଜିଖରିୟ ନା କନ୍ଦାକୁନ୍ ତୁମ ରୁଇଗା ସା ଅଁୟ ଗଙ୍ଗା।ଜିଖରିୟ ସୁନ, “ଆଈଶ୍ପର୍ ସାର୍ଦା ଡ଼େମ, ମାସାଡନା ମାଇ ତରୋଇନା ଆରେମଲେ ସାଇଜ ପାଲାଇ ମନେ ପାକାୟ! ନ, ନିଙ୍ଗ୍ ନା ଗୁ ଗୁଲାଇନାନେ ମୁନା ଈଶ୍ପର୍ନା ମୁନା ବାବବାଦି ଡ଼େନ୍ତା। ପେ ଆରେମଲେ ସୁନ୍ତପେ ଜେ ମାଏ ମିରି ମାଏନା ପାପ୍ ପାଲାଇ କେମା ବାବାଙ୍ଗ୍ ଗଙ୍ଗ୍ତା”।
ବାଇବଲ୍ନା ମୁଈ ଉସାରାମ୍ :ଲୁକ ୧
Free to use, adapt, and share under an open license (CC BY-SA 4.0).