45. ୪୫. ସ୍ତିପାନ୍ ମାରି ଫିଲିପ୍
ସ୍ତିପାନ୍ ଅମିନା ମିଣ୍ଡା ରେମ ଯୀଶୁନ୍ ଆଗ୍ତୁ ଗୁଡାଙ୍ଗ୍ ଗାର୍ ଇରେମ୍ ନାନେ ମିଣ୍ଡା ନେତା ଡିଗା। ଗୁଲାଇରେମ ଆମାଇ ସନ୍ ମାନ୍ ଡେଡେମ୍ ଡେଙ୍ଗା।ମାଇ ଗୁଲାଇ ପବିତ୍ର ଆତ୍ମାମାରି ବୁଦି ବ ବର୍ଇଡିଗା।ସ୍ତିପାନ୍ ଜବର୍ ରାଗ୍ତିଗ୍ନା କାମ୍ଲେ ଡ଼େମ। ମାଇନା ଶିକିଆ ବ ଜବର୍ ରେମ ଯୀଶୁନ୍ ବ ବିସ୍ବାସ୍ ଡ଼େମ। ଉଣ୍ଡୋଇଲ ମାଇ ଆମାଏଲେ ଯୀଶୁନ୍ ବାଗ୍ବ ବିସାସ୍ ଡେଡେମ୍ ପାଲାଇ ଶିକିଆ ବେଡ ଅଇତିନ୍ବେଲା ଜବର୍ ରେମ ଆମାଇ ବିସାସ୍ ଡ଼େମ।
ମିସିଙ୍ଗ୍,ଉଣ୍ତଇଲ ସ୍ତିଫାନ୍ ଯୀଶୂନା ନା ବିଷୟ ବ ଶିକିଆ ବେବେଡେଙ୍ଗା,ଗିତିନ୍ଲ ଯୀଶୁନ୍ବ ବିସ୍ବାସ୍ ଡେଡେମ୍ ଡ଼େମକୁନା ଆଇଜା ଯିହୁଦୀଲେ ସ୍ତିଫାନ୍ ବେରଙ୍ଗ୍ ଆର୍ନା ଅରିମ୍ନା କାତା ଡେଡେମ୍ ଲାଗ୍ଗା। ମାଏଲେ ଜବର୍ ରିସା ଡେଙ୍ଗା,ମାରି ସ୍ତିଫାନ୍ନା ବିଷୟ ଆଦରମ୍ ନେତାଲେ ମିଚ୍ ସୁନ। ମାଏଲେ ସୁନ “ନେଲେ ଆମାଇ ମୋ୍ଶା ମାରି ଈଶ୍ପର୍ନା ବିରୁଦ୍ ନା କାତା ସୁସୁ ନା ଅଁଙ୍ଗତ୍ନେ !”ଗିତିନ୍ସା ଦରମ୍ନେତାଲେ ଆସ୍ତିଫାନ୍ ତୁଲ ମାରି ମୁନା ବବାଜିଲେ ମାରି ଯିହୁଦିଲେନ୍ ନେତା କଣ୍ଡେ ଆମାଇ ରୁଙ୍ଗ। ଆର ଜବର୍ ମିଚ୍ ସାକି ବେବେରେମ୍ ସାଗ୍ସେ ସ୍ତିଫାନ୍ନା କାତା ମିଚ୍ ସୁନ।
ମୁନା ପୁଜାରି ଆସ୍ତିଫାନ୍ ପାଚାର୍ଲ,“କନ୍ରେମଲେ ନନା ବିଷୟ ବ ସତ୍ ସୁନନିକି?” ଆମୁନାପୁଜାରି ଉତର୍ ବେବ ପାଲାଇ ସ୍ତିଫାନ୍ ଜବର୍ କାତା ସୁସୁ ପାଲାଇ ଆରାମ୍ ଡ଼େମ। ମାଇ ସୁନ ଜେ,ଅବ୍ରାହମ୍ ନାନେ ଯୀଶୁନା ବେଲା ଜାକ ଈଶ୍ପର୍ ଇସ୍ରାଏଲ୍ ନା ରେମ ଲେନ୍ ପାଲାଇ ଜବର୍ ରାଗ୍ତିଗ୍ ନା କାମ୍ ଡ଼େମ ତା। ମାତର୍ ରେମଲେ ଗୁଲାଇ ବେଲା ଈଶ୍ପର୍ ନା ମ ମାନ୍ ବାର୍ ଆଡ଼େନ୍ତା। ସ୍ତିଫାନ୍ ସୁନ, “ପେଲେ ଈଶ୍ପର୍ନା ବିରୁଦ୍ ଡେଡେମ୍ ରେମ୍ ମରି ଆଟୁଆ ମନ୍ବାଇ ରେମଲେ। ପେ ଗୁଲାଇଲ ଆପବିତ୍ର ଆତ୍ମାଅନ୍ତୁରତ୍ପେ, ମିରିକି ନାଇନା ଆନିଦାଦିଲେ ଗୁଲାଇ ବେଲା ଆଈଶ୍ପର୍ ଅନ୍ତୁର ଡିଗା ମାରି ଗୁଲାଇ ମାଏନ୍ ଆ ବାବବାଦିଲେ ଅଗଇସ ଡିଗା।ମାତର୍ ପେ ମାଏଲେ ନାନେ ଜବର୍ କାରାପ୍ କାମ୍ ଡ଼େମପେ !ପେ ଆକିସ୍ଟ ଅଗଇସପେ।
ଉଣ୍ଡୋଇଲ ଦର୍ନେତାଲେ କନ ଅଁଙ୍ଗ,ମାଏଲେ ଅକନ୍ ରିସାଡେଙ୍ଗା ଜେ ମାଏଲେ ମାଏନ ଆଲୁନ୍ତୁରତାପ୍ ଲ ସଗ୍ସେ ଜବର୍ ଆଉଲି ଡେଙ୍ଗା। ମାଏଲେ ଆସ୍ତିଫାନ୍ ଉଙ୍ଗମ୍ ବାଇରି ଜିକ୍ଲ ରୁଙ୍ଗା ମାରି ଆ ମାଏ ଅଗୋଇ ପାଲାଇ ବିରେ ରାପୁଡ।
ସ୍ତିପାନ୍ ଗଗଇ ବେଲା ଜବର୍ ଆଉଲ ଡେଙ୍ଗା ମାରି ସୁନ, “ଅଯୀଶୁ,ଆନିଙ୍ଗ୍ନା ଜିବନ୍ ସବ୍।” ମାଇନା ତୁର୍ଗୁ ମାଇ ମାଣ୍ତି ଟେକ୍ଲସେ ମାର୍ମୁସ ଆଉଲିଗ୍ସେ ସୁନ, “ହ ଈଶ୍ପର୍,କନା ପାପ୍ ମାଏଲେ ନା ବିରୁଦ୍ ବ ଆଏଜ୍ଲ। ମାଇନା ତୁର୍ଗୁ ମାଇ ଗଇଗା।
ଗିତିନ୍ଦିନ୍,ଯୀରୁଶାଲାମ୍ ବ ଡିକୁନ୍ ରେମଲେ ଯୀ୍ଶୁନା ଆଇରେମ୍ଲେ ଦୁକ୍ ଡେଡେମ୍ ପାଲାଇ ଆରାମ୍ ଡ଼େମ,ଗିତିନ୍ସା ବିସ୍ସିଲେ ପାଲ ପାଲ ଟାନ୍ବ ଉର ଇଗା। ମାରି କନା ଗୁଲାଇ ଡେଙ୍କୁନ୍ ସା, ଲନା ମାଏ ଆର୍ନା ଆର୍ନା ଟାନ୍ବଲେ ଇଗା ଆତା ଯୀଶୁନା ବିଷୟଲେ ଗୁଲାଇ ପର୍ଚାର୍ ଡେଡେମ୍ ଆରାମ୍ ଡ଼େମ।
ଫିଲିପ୍ ଅମିନା ମିଣ୍ଡା ଯୀଶୁନା ଶିଷ୍ ଡିଗା। ଦୁକ୍ ନିନ୍ଦା ଡେଙ୍ଗ୍ନା ଲନା ଯିରୁଶାଲାମ୍ ନାନି ପାଲ୍ବିସ୍ବାସିଲେନ୍ ସୁଗ ମାଇ ଲନା ଡୁଙ୍ଗ୍ ଡିଗା। ମାଇ ଶମରିୟାବ ଇସେ ଆତା ଯୀଶୁନାକାତା ଆରେମଲେ ପର୍ଚାର୍ ଡ଼େମ।ଜବର୍ ରେମ ମାଇନ୍ବ ବିସ୍ବାସ୍ ଡ଼େମସେ ମାରି ରକିଆ ବାଙ୍ଗା। ମିସିଙ୍ଗ୍,ଈଶ୍ପର୍ ନା ମିଣ୍ଡା ଦୁତ୍ ଫିଲିପ୍ କଣ୍ଡେ ସାଗ୍ସେ ମରୁଭୁମିବ ଲକୁନ୍ ମୁଇ ଗାରି ବେଡସେ ଇପାଲାଇ ସୁନ। ଫିଲିପ୍ପ ଆରୋଇଗା। ମାଇ ଉଣ୍ଡୋଇଲ ଗିତିନ୍ ଗାରି ବେଡସେ ଇଡେଙ୍ଗା,ଫିଲିପ୍ ଆମିଣ୍ଡା ରଥ୍ବ ଇନା ଜୁଲ। ଗିନ୍ରେମ ଇଥିଓପିଆ ଦେଶ୍ନା ମିଣ୍ଡା ମୁନା ବାଇ ଚାକ୍ରି ଡେଡେମ୍ରେମ୍ ଡିଗା। ଗିତିନ୍ ରେମବ ଇସେ ମାଇନ୍ ବେରଙ୍ଗ୍ ଅଁଇ ପାଲାଇ ପବିତ୍ର ଆତ୍ମାଆଫିଲିପ୍ ସୁନ।
ଫିଲିପ୍ ଉଣ୍ଡୋଇଲ ଗିତିନ୍ ରଥ୍ କଣ୍ଡେ କେଟ୍ଗା, ଗିତିନ୍ ଇଥିଓପିଆ ରେମ ଯିଶାଇୟ ବାବବାଦିନା ବହିନାନେ ପାଟ୍ ପଡ଼୍ ବାର୍ ଅଙ୍ଗ। ଗିତିନ୍ ରେମ ଯିଶାଇୟ ବାବବାଦି ମାମା ଲେକ୍ଲ ଡିଗା,ମାଇ ପଢ଼ବାର୍ ଡେଙ୍ଗା“ମାଏଲେ ମେଣ୍ଡା ସୁଗ ଆମାଇ ଅଡାବ୍ବାର୍ସା ଆଗ୍ତୁ ରୁଙ୍ଗୋଇଗା,ମାରି ଚୁପ୍ ଡେଙ୍ଗ୍କୁନ୍ ମେଣ୍ଡା ସୁଗ ମାଇ ତରୋଇନା ତମ୍ନା ଆରୁଗ୍ତ। ମାଏଲେ ଆମାଇ କାରାପ୍ ବେବାର୍ ଡ଼େମ ମାରି ଆମାଇ ଆଲାଦ୍ ଆଡେମ୍ତ। ମାଏଲେ ମାଇ ନାନେ ମାଇନା ଜିବନ୍ ରୁଙ୍ଗା।”
ଫିଲିପ୍ପ ଆତିନ୍ ଇଥିଓପିଆ ଆରେମ ପାଚାର୍ଲ, “ନ ମା ପାଟ୍ ପଢ୍ ନନି ଗିତିନ୍ ବୁଜ୍ ନନି କି ?” ଗିତିନ୍ ଇଥିଓପିଆନା ରେମ ଉତର୍ ବେଡ,“ଆଣ୍ଡା, ଜାସା ଆନିଙ୍ଗ୍ ବାନିଡ଼େମ ଆସୁନନା ଅଇତିନ୍ ଜାକ ନିଙ୍ଗ୍ ବାନିଡ଼େମ ଆବୁଜ୍ ତିଙ୍ଗ୍। ଆଲାଦ୍ ଡ଼େମସେ ସାବା ମାରି ନିଙ୍ଗ୍ବ ଲେସା। ଯିଶାଇୟ ମା ତରୋଇନା କାତା କି ମାରି ଜାନ୍ କାତା କନ୍ ଲେକ୍ଲତା ?”
ଫିଲିପ୍ ରଥ୍ବ ଇସେ ଲେଗା। ଗିତିନ୍ ତୁରଗୁ ମାଇ ଇଥିଓପିଆରେମ୍ ସୁନ,“ ଜେ ଯିଶାଇୟ ଯୀଶୁନା କାତା ଲେକ୍ଲଡିଗା। ଫିଲିପ୍ ବହିନା ପାଲ୍ ଶାସ୍ ତର୍ ନା ପଦ୍ଲେ ଲନା ବୁଜାୟବେଡ଼। ଡିକନ୍ ସଗ,ଫିଲିପ୍ ଯୀଶୁନା କାତାଲେ ବାନି କବର୍ ଆମାଇ ସୁନ।
ଉଣ୍ଡୋଇଲ ଫିଲିପ୍ ମାରି ଇଥିଓପିଅ ଇଡେଙ୍ଗା,ମାଏ ମୁଇ ବନ୍ଦ କଣ୍ଡେ ସାଗ।ଇଥିଓପିଅ ରେମ ସୁନ, “ଜୁ! ଆକା ଇତି ଡାଗ୍ ଡିତା! ନିଙ୍ଗ୍ ଡୁବନ୍ ରୁରୁଙ୍ଗ୍ ଗଙ୍ଗ୍ତିଙ୍ଗ୍ କି ?” ମାରି ମାଇ ମାଇନା ଆରଥ୍ ଚାଲାଇ ବାର୍ ଆରେମ ରଥ୍ ତେବାଇବାର୍ ପାଲାଇ ସୁନ। ଆତିନେ ମାଏ ଜର୍ସେ ଡାଗ୍ ଗାରି ଇଗା,ମାରି ଫିଲିପ୍ ଆତିନ୍ ଇଥିଓପିଅରେମ୍ ଡୁବନ୍ ବେଡ।
ମାଏଲେ ଡାଗ୍ ନାନେ ତୁର୍ସେ ସାକୁନ୍ ତୁର୍ଗୁ। ପବିତ୍ର ଆତ୍ମାଆଫିଲିପ୍ ମାର୍ ମୁଇ ଟାନ୍ ବ ରୁଙ୍ଗୋଇଗା ଆର ମାଇ ଯୀଶୁନା ବିଷୟ ଅରେମଲେ ପର୍ ଚାର୍ ଡେଡେମ୍ ନା ସୁସୁଅଁ ଡେଙ୍ଗା
ଇଥିଓପିଆ ମାଇନା ଡିଅ ବ ଇଗା,ମାଇ ସାର୍ଦା ଡିଗା ମାସାଡନା ମାଇ ଷସଆଯୀଶୁ ମାଗ।
ବାଇବଲ୍ନା ମୁଇ ଉସାରାମ୍ :ପ୍ରେରିତ ୬:୮-୮:୫;୨୬-୪୦; ୪ ୬.
Free to use, adapt, and share under an open license (CC BY-SA 4.0).