46. ୪୬. ଶାଉଲ ଯୀଶୁନା ମିଣ୍ଡା ଗୁଡ଼ାଙ୍ଗ୍ ବ ଇରେମ୍ ଡେଙ୍ଗା
ଶାଉଲ୍ ଡସେ ମୁଇ ରେମ ଡିଗା ଜାକି ଯୀଶୁନ୍ ବ ବିସ୍ବାସ ଡେଡେମ୍ ଆଡ଼େନ୍ତା। ଉଣ୍ତୋଇଲ ମାଇ ଙ୍ଗେର୍ ଡିଗା ଆସ୍ତିପାନ୍ ଆଡ଼ାବାର୍ ରେମ୍ ଲେନା ଆସକାଲେ ଜାଗ୍ଲ ଡିଗା। ମାରସୁଇ ବେଲା ମାଇ ଆବିବାସ ଡେଡେମ୍ ରେମଲେ ଦୁକ୍ କଷ୍ଟ ବେଡ଼। ମାଇ ଆ ଉମ୍ବାର ସେଲାନେ ଙ୍ଗେରେଲେ, ଜାଲେ ଯୀଶୁନ ବ ବିଶାସ୍ ଡେଡେମ୍ ଡେଙ୍ଗା ଆମାଏ ସମ୍ବ ପାଲାଇ ମାରି ଜଇଲ୍ ଡେଡେମ୍ ପାଲ ଯୀରୁଶାଲାମନା ଡିଅ ଡିଅ ବ ଇଗା। ଆଶାଉଲ୍ ଦମ୍ମେସକ ଙ୍ଗମ୍ବ ଇପାଲାଇ ମୁନାପୁଜାରି ଆଦେଶ୍ ବେଡ। ଆର ଡିକୁନ୍ ଯୀଶୁନ ତୁର୍ଗୁ ଆଉରିଙ୍ଗ୍ ରେମ୍ଲେ ସବସେ ଯୀରୁଶାଲାମ୍ ବ ରୁରୁଙ୍ଗ୍ ପାଲାଇ ଆମାଏ ମାଇ ସୁନ।
ଗିତିନ୍ ସା ଶାଉଲ୍ ଦମ୍ମେସକ ବ ଇ ପାଲାଇ ଆରାମ୍ ଡ଼େମ। ଗିତିନ୍ ସହର୍ ବ କେଟ୍ବାର୍ ନା ଇତି ବେଲା ଆଗ୍ତୁ ମୁୟଙ୍ଗ୍ ତାରା ବାଇ ମାଏନା ଚାର୍ବେର୍ତି ତାରାଗ୍ ଇଗା ମାରି ମାଇ ତୁବୁଗ୍ବ ଲଗ୍ଇଗା। ଜା ମିଣ୍ତା କନା ସୁସୁ ନା ଶାଉଲ୍ ଅଙ୍ଗ୍,“ଶାଉଲ୍ ! ପେ ମାପାଲାଇ ଦୁକ୍ ବେଡ଼ ପେନି?”ଶାଉଲ୍ ପାଚାର୍ଲ, “ଈଶ୍ପର୍ ନ ଜା ?”ଯୀଶୁ ଉତର୍ ବେଡ “ନିଙ୍ଗ୍ ଯୀଶୁ। ପେ ଆନିଙ୍ଗ୍ ଦୁକ୍ ବେଡ଼ପେନି!”
ଶାଉଲ୍ ଉଡ୍ଇଲ୍ ତଗ୍ଡା ଗା ମାଇ ମାସା, ଜୁଜୁ ଆଙ୍ଗଙ୍ଗା। ମାଏନ୍ ସାଙ୍ଗ୍ଲେ ଆମାଇ ଦମ୍ମେସ୍କ ବ ଉରିଙ୍ଗୋ ରୁଙ୍ଗା । ଶାଉଲ୍ ତିନ୍ ଦିନ୍ ଜାକ ମା ସା ଆସୁମ୍ ତୋ କି ଆଉତ ।
ହନନିୟ ଅମିନା ମୁଇ ଶିଷ୍ ଦମ୍ମେସକ୍ ବ ଡିକୁଡେଙ୍ଗା। ଈଶ୍ପର୍ ଆମାଇ ସୁନ୍, “ ଶାଉଲ ଡିକୁନ୍ ଡିଅ ବ ୟା। ମାଇନ୍ ବାଗବ୍ ତିତିବୁଙ୍ଗ୍ ମିରିକି ମାଇ ଜୁଜୁ ଗଙ୍ଗ୍ ତା।” ମାତର୍ ନହନିୟ ସୁନ, “ଈଶ୍ପର୍,କନ୍ ରେମ୍ ମିରି ଆବିଶାସ୍ ଡେଡେମ୍ ଦୁକ୍ ଡ଼େମତା ଗିତିସା ନିଙ୍ଗ୍ ମାଗ ଡିଙ୍ଗ୍।” ଈଶ୍ପର୍ ଆମାଇ ଉତର୍ ବେଡ, “ ୟା! ଯିହୁଦୀ ମାରି ପାଲ୍ ମରେମ୍ ଜାତୀ ଲେନ୍ବ ନୀଙ୍ଗନା ଅମି ସୁଁସୁଁ ପାଲାଇ ନିଙ୍ଗ୍ ଆମାଇ ବାଚଲତିଙ୍ଗ୍ । ମାଇ ନିଙ୍ଗ୍ନା ଅମି ପାଲାଇ ଜବର୍ ଦୁଖ୍ କଷ୍ଟ ବାଙ୍ଗ୍ତା।
ଗିତିନ୍ ସା ହନନିୟ ଶାଉଲ୍ ଡିକୁନ୍ ଡିଅବ ଇଗା,ମାଇନ୍ ବାଗ୍ବ ତରୋଇନା ତିତି ବୁଙ୍ଗ ମାରି ସୁନ “ନ ଆକା ସାକୁନ୍ ବେଲା ଆର୍ନା ଯୀଶୁ ଆନ ଦର୍ସନ୍ ବେଡତା,ମାଇ ଆନିଙ୍ଗ୍ ନନ୍କଣ୍ଡେ ବେଟାୟତା ମିରିକି ନ ତରୋଇନା ମ ଜୁଜୁନା ବପୁ ବାବାଙ୍ଗ୍ ଗଙ୍ଗ୍ତନ,ମାରି ପବିତ୍ର ଆତ୍ମାବ ବର୍ଇତ୍ନ।ଶାଉଲ୍ ଦାପେ ଦାପ୍ରେ ମ ଜୁଜୁନ୍ ବପୁ ପାଲାଇ ଜୁଜୁଗଙ୍ଗା, ମାରି ହନନିୟ ଆମାଇ ଡିବନ୍ ବେଡ।ମାଇନ୍ ତୁର୍ଗୁ ଶାଉଲ ଇତି କିୟାଙ୍ଗ୍ ସୁମ ମାରି ବପୁ ବାବାଙ୍ଗ୍ ଗଙ୍ଗା
ଚଟ୍ନା ଶାଉଲ ଦମେସକ୍ବ ଡିକୁନ୍ ଯିହୁଦୀଲେନ୍ କଣ୍ଡେ କନ୍ ପର୍ଚାର୍ ଡେଡେମ୍ ସା ଆରାମ୍ ଡ଼େମ “ଯୀଶୁ ଆକା ଈଶ୍ପର୍ନା ଗୁ!ଜା ରେମ ଆବିସ୍ବାସିଲେ ବୁଡାଇବାର୍ ପାଲାଇ ଚେସ୍ଟା ଡେଡେମ୍ ଡେଙ୍ଗା ମାରି ମାଇ ଜେ ଅଇ ଯୀଶୁନ୍ବ ବିସ୍ବାସ୍ ଡେମ୍ତ ମାଇ କାତା ବ ଯୀହୁଦିଲେ କାବା ଡେଙ୍ଗା।ଶାଉଲ ଯିହୁଦିଲେ ବେରଙ୍ଗ୍ ସେ କିରମର ଡ଼େମସେ ପର୍ମାନ୍ ଡ଼େମ ଜେ ଯୀଶୁ ଆକା କିସ୍ଟ।
ଜବର୍ ଦିନ୍ ତୁର୍ଗୁ,ଆଶାଉଲ ଅଡାବ୍ବାର୍ ପାଲାଇ ଯିହୁଦିଲେ ଯଜନା ଡ଼େମ।ମାଏଲେ ଆମାଇ ଅଡାବ୍ବାର୍ ପାଲାଇ ଉଙ୍ଗ୍ମବ ଗାଗାଇନା ଗାରିବଲେ ଜାଗ୍ବାର୍ ପାଲାଇ ଆରେମଲେ ବେଟାୟ।ମାତର୍ ଶାଉଲ୍ ଗୁନ୍ ଯଜନା ଡ଼େମକୁନ୍ କାତା ଅଅଁଙ୍ଗ୍ ଗଙ୍ଗା,ମାରି ଆତିନେ ପିସଲ୍ ସେ ଇପାଲାଇ ମାଇନା ସଙ୍ଗ୍ ରେମ ସାଇଜ ଡ଼େମ।ମୁଇ ମିଣ୍ଡିଲ ମାଏଲେ ମୁଇ ଟାକ୍ଲାବ ଆମାଇ କାନ୍ତ୍ନା ବାଗ୍ବ ନାନେ ଜଗ୍ତ ଅଜର ବେଡ।ଶାଉଲ ଦମେସକ୍ ନାନେ ପିସଲ୍ସେ ଇକୁନ୍ ତୁର୍ଗୁ ମାଇ ଯୀଶୁନା କାତା ପର୍ଚାର୍ ଡେଡେମ୍ ମୁଲାୟ।
ମାଇନା ତୁର୍ଗୁ,ଶାଉଲ ଶିଷ୍ଲେ ବେରଙ୍ଗ ବେଟ୍ ଡେଡେଙ୍ଗ୍ ପାଲାଇ ଯିରୁଶାଲାମ୍ବ ଇଗା,ମାତର୍ ମାଏଲେ ଆମାଇ ବୁତୁଙ୍ଗ୍ ଡେଙ୍ଗା। ତୁର୍ଗୁ ବର୍ଣ୍ଣବା ଅମିନା ମିଣ୍ଡା ବିସ୍ବାସି ଶିଷ୍ଲେ କଣ୍ଡେ ଆଶାଉଲ ରୁଙ୍ଗା। ମାଇ ଆମାଏଲେ ସୁନ ଜେ ଶାଉଲ ମିରିକି ଦମେସକ୍ବ ଶକ୍ତିଗ୍ ସେ ପର୍ଚାର୍ ଡେଡେମ୍ ଡେଙ୍ଗା। ମାଇନା ତୁର୍ଗୁ,ଶିଷ୍ଲେ ଆଶାଉଲ ବିସ୍ବାସ୍ ଡ଼େମ।
ଆର୍ନା ବିସ୍ବାସିଲେ ଦୁକ୍ କସ୍ଟ ବାଙ୍ଗ୍ସେ ଯିରୁଶାଲାମ୍ ଅନ୍ତୁର ସେ ଡୁଙ୍ଗ୍ ଡିଗା, ମାଏଲେ ଆନ୍ତିୟକିଆ ଜାକ ଇସେ ଯୀଶୁନା କାତା ପର୍ଚାର୍ ଡେଡେମ୍ ଲାଗ୍ଗା। ଆନ୍ତିୟକିଆ ବ ଡିକୁନ୍ ଜବର୍ ରେମଲେ ଯିହୁଦୀରେମ୍ ଆଡିତା,ମାତର୍ ପର୍ତୁମ୍ ତର୍ ପାଲାଇ ମାଏନ୍ ବିତ୍ରେ ଜବର୍ ବିସ୍ବାସି ଡେଙ୍ଗା। ବର୍ଣ୍ଣବା ମାରି ଶାଉଲ୍ ଆର ଡିକୁନ୍ ତିମେ ବିସ୍ବାସ୍ ରେମ୍ ଯୀଶୁନା କାତା ଜବର୍ ଶିକ୍ଆ ବେବେ ପାଲାଇ ମାରି ଆମଣ୍ଡଲି ଡାଟାମ୍ ଡେଡେମ୍ ପାଲାଇ ଇଗା। ଆନ୍ତିୟକିଆ ମଣ୍ଡଲିବ ଡିକୁନ୍ ଆବିସ୍ବାସିଲେ ପର୍ତୁମ୍ “କିସ୍ଟାନ୍ନି” ଡସେ ସୁନ।।
ମିସିଙ୍ଗ୍,ଆନ୍ତିୟକିଆ ମଣ୍ଡଲିବ ଡିକୁନ୍ କିସ୍ଟାନ୍ଲେ ଆଙ୍ଗ୍ଡାଗ୍ ପାର୍ତନା ଡେଡେମ୍ ଡେଙ୍ଗା। ପବିତ୍ର ଆତ୍ମା ଆମାଏଲେ ସୁନ,“ ବର୍ଣ୍ଣବା ମାରି ଆଶାଉଲ ଆର୍ନା କାମ୍ ପାଲାଇ ନିଙ୍ଗ୍ ବାଚ୍ଲ ତିଙ୍ଗ୍ ଗିତିନ୍ ପାଲାଇ ଆମାଏଲେ ନିଙ୍ଗ୍ ପାଲାଇ ପାଲ୍ ଡେମ୍।” ଗିନ୍ସା ଅନ୍ତିୟକିଆ ମଣ୍ଡଲିବ ବର୍ଣ୍ଣବା ମାରି ଶାଉଲ ପାଲାଇ ପାର୍ତନା ଡ଼େମସେ ମାଏନ୍ ବାଗ୍ବ ସରପ୍ଲ ବେଡ। ମାଇନା ତୁର୍ଗୁ ଆଏଲେ ଜବର୍ ଟାନ୍ବ ଲେ ଯୀଶୁନା କାତା ବାନି କବର୍ ପର୍ଚାର୍ ଡେଡେମ୍ ପାଲାଇ ଆମାଏ ବେଟାୟ। ବର୍ଣ୍ଣବା ମାରି ଶାଉଲ୍ ପାଲ୍ ପାଲ୍ ଜାତିନା ଆରେମଲେ ଶିକ୍ଆ ବେବେ ମୁଲାୟ ମାରି ଜବର୍ ରେମ ଈଶ୍ପର୍ବ ବିସ୍ବାସ୍ ଡେଡେମ୍ ପାଲାଇ ଆରାମ୍ ଡ଼େମ।
ବାଇବଲର ଏକ କାହାଣୀ:ପ୍ରେରିତ ୮:୩; ୯:୧-୩୧; ୧୧:୧୯-୨୬; ୧୩:୧-୩୪୭
Free to use, adapt, and share under an open license (CC BY-SA 4.0).