29. ૨૯. દયા વોગર્યા ચાકરુ દાખલો

એક દિહ પિત્તરુહુ ઇસુલે ફુચ્યો, “ઓ માલિક, માને પોતા પાવુહુલે કોતી વાર માફ કેરા જોજે જાંહા તોઅ માઅ વિરુધ પાપ કેહે? કાય સાત વારી લોગુ?” ઇસુહુ આખ્યો, “સાત વાર નાહ, પેન સાતુ સિત્તેર વખત!” ઈયા મારફતે, ઇસુ મતલબ હાય કા આપનેહે સાદા માફ કેરા જોજે. તાંહા ઇસુહુ એ વાર્તા આખી.

ઇસુહુ આખ્યો, “પરમેહેરુ રાજ્ય એક રાજા સમાન હાય જો પોતા ચાકરુ હિસાબ લાંઅ ઈચ્છા કેહે. તીયા એક ચાકર બેન લાખ વોર્ષા મોજરી એક મોડો કરજદાર આથો.”

પેન તોઅ ચાકર પોતા કોરજાલે ચુકવી નાય સેક્યો, ઈયા ખાતુરે રાજાહા આખ્યો, “ઈયા કોરજો ચુકવા ખાતુરે ઈયા આદમીલે આને ઈયા પરિવારુલે ચાકરુ રુપુમે વેચી ધ્યા.”

“તીયા ચાકારુહુ રાજા હુંબુર ઘુટણે પોળીને આખ્યો, ‘દયાકીને માઅ આરી ધીરજ રાખ, આને આંય પોતા કોરજો પુરી રકમ ચુકવી દેહે.’ રાજાહા ચાકરુપે દયા કેયી, ઈયા ખાતુરે તીયાહા તીયા બાદા કોરજા માફ કી દેદા આને તીયાલે જાંઅ દેદો.”

“પેન જાંહા તોઅ ચાકર રાજા પાહીને બારે ગીયો, તા તીયાલે તીયા એક આર્યો ચાકર મીલ્યો જો તીયા ચાર મોયના મોજરી કરજદાર આથો. તીયા ચાકરુહુ પોતા આર્યા ચાકરુલે તેયો આને આખ્યો, ‘તોઅ ટોપે માઅ કોરજો હાય માને આપી દેઅ!”

“તીયા આર્યા ચાકરુહુ ઘુટણે પોળીને આખ્યો, “ધીરજ રાખ, આને આંય પોતા કોરજા પુરી રકમ આપી દેહે.’ પેન ઈયા બદલે, તીયા ચાકરુહુ પોતા આર્યા ચાકરુલે જેલુમે ટાકી દેદો જાંવ લોગુ કા તોઅ તીયા કોરજો ચુકવી નાય દેઅ.”

“જો કાય વેલો તોઅ થોડાક બીજા ચાકરુહુ હેયો આને ખુબુજ પરેશાન વીયા. તે રાજા પાહી ગીયા આને તીયાલે બાદોજ આખ્યો.”

“રાજાહા તીયા ચાકરુલે હાદીને આખ્યો, ‘ઓ દુષ્ટ ચાકર! માયુહુ તોઅ કોરજો ઈયા ખાતુરે માફ કેલો કાહાકા તુયુહુ માને વિનંતી કેલી. તુલે બી તેહેકીજ કેરા જોજે.’ રાજા ઓતો ક્રોધિત વેલો કા તીયાહા તીયા દુષ્ટ દાસુલે જેલુમે ટાકાવી દેદો. જાંવ લોગુ કા તોઅ પોતા બાદો કોરજો ચુકવી નાય દેઅ.”

તાંહા ઇસુહુ આખ્યો, “માઅ હોરગામેને બોઠ્લો બાહકો તુમામેને દરેકુ આરી એહેકીજ કેરી કાદાચ તુમુહુ પોતા પાવુહુલે માફ નાહ કેતા.”