37. ઈસુ લાજરાલ મોઅલા માઅને પાછો જીવતો કોઅહે.

લાજર નાવા યોક માઅહું આતાં. ચ્યા બેન બોઅહ્યો આત્યો, જ્યેહે નાવ મરિયમ એને માર્થા આતાં. ચ્યે બોદે ઈસુ ખુબ હારે આર્યે આતે. યોક દિહી, કાદાય તેરું ઈસુલ આખ્યા કા લાજર બીમાર હેય. જોવે ઈસુ ઈ વોનાયો તે ચ્યાય આખ્યા, “ઈ બીમારી લાજરા મોઅના આરે સમાપ્ત નાંય ઓઅરી. બાકી, ઈ લોકહાન પોરમેહેરાલ આદર કોઅરાહાટી મોદાત કોઅરી.”

ઈસુય ચ્યા આર્યાહાવોય પ્રેમ કોઅતો આતો, બાકી જાં તો આતો, તાં ચ્યાય બેન દિહ્યા લોગું વાટ જોવી. ચ્યા બેન દિહ્યાપાછે, ચ્યાયે ચ્યા શિષ્યહાન આખ્યા, “ચાલા, પાછા યહુદિયામાય જાતા.” શિષ્યહાય જવાબ દેનો, “બાકી ઓ ગુરુ, આમી કોલહોક સમયા પેલ્લા તાંઅને લોક તુલ માઆય ટાકાં કોઅતા આતા!” ઈસુય આખ્યા, “આપહે આર્યો લાજર હુવી ગીઅલો હેય, એને માન ચ્યાલ ઉઠાડના હેય.”

ઈસુય શિષ્યહાન જવાબ દેનો, ઓ પ્રભુ, જો લાજર હુવી રીઅલો હેય, તે તો હારો ઓઅય જાય.” તોવે ઈસુય ચ્યાહાન સાફ રીતે આખી દેના, લાજર મોઅય ગીઅલો હેય. માન ખુશી હેય કા આંય તાં નાંય આતો, જેથી તુમા માયેવોય બોરહો કોઅય હોકે.”

જોવે ઈસુ લાજારા ગાવામાય પોઅચ્યો, તે લાજારાલ મોઈન પેલ્લાજ ચાર દિહી ઓઅય ચુકલા આતા. માર્થા ઇસુ આરે મિળાહાટી બાઆ યેની એને આખ્યા, “ઓ પ્રભુ, જો તું ઈહી રોતો તે મા બાહા નાંય મોઅતો. બાકી આંય બોરહો કોઅહું, કા જીં કાય તું પોરમેહેરાવોય માગે તીં તુલ દી.”

ઈસુય જવાબ દેનો, “પુનરુસ્થાન એને જીવન આંયજ હેય. જો કાદો માયેવોય બોરહો કોઅહે, જો તો મોઅય બી જાય તેબી જીવી. જો કાદો માયેવોય બોરહો કોઅહે, તે તો કોવેજ નાંય મોઅરી. કાય તું યાવોય બોરહો કોઅતીહી?” માર્થાય જવાબ દેનો, “ઓ પ્રભુ, આંય બોરહો કોઅહું કા તું પોરમેહેરા પોહો ખ્રિસ્ત હેય.”

તોવે મરીયા યેની, ચ્યે ઈસુ પાગે પોડીન આખ્યા, “ઓ પ્રભુ, જો તું ઈહી રોતો તે મા બાહા નાંય મોઅતો.” ઈસુય ચ્યેલ પૂછા, “તુમહાય લાજરાલ કેસ થોવલો હેય?” ચ્યાહાય ચ્યાલ આખ્યા, “કોબારેમાય. યે એને એઅય લે.” તોવે ઈસુ રોડાં લાગ્યો.

તી કોબાર યોક ગુફા આતી ચ્યે મુયાંહી યોક દોગાડ કોથલાડલો આતો. જોવે ઈસુ કોબારેપાય પોઅચ્યો તે ચ્યાય ચ્યાહાન આખ્યા, “દોગડો ઓટાવી દા.” બાકી માર્થાય આખ્યા, “ચ્યાલ મોઈન ચાર દિહી ઓઅય ચુક્યહા. ચ્યામાઅને ખારાબ વાસ યેતો ઓરી.”

ઈસુય જવાબ દેનો, “કાય માયે તુમહાન નાંય આખલાં કા જો તુમા માયેવોય બોરહો કોઅહા, તે પોરમેહેરા સામર્થ્ય એઅહા?” યાહાટી ચ્યાહાય દોગડો ઓટાવી દેનો.

તોવે ઈસુય ઉચે હોરગા એસે એઅયન આખ્યા, “ઓ આબા, મા વોનાય લાંહાટી આંય તો ધન્યવાદ કોઅતાહાવ. આંય જાઅહું કા તું સદા મા વોનાતોહો, બાકી માયે ઈહી ઉબલા યા બોદા લોકહા મોદાત કોઅરાહાટી આખ્યા, જેથી યા બોરહો કોએ કા તુંયે માન દોવાડલો હેય.” તોવે ઈસુય આવાજ દેનો, “ઓ લાજર, બાઆ નિંગી યે!”

છેલ્લે લાજર બાઆ નિંગી યેનો. તો આમી બી ફાડકાકોય વેટાળલો આતો, ઈસુય ચ્યાહાન આખ્યા, “યા ફાડકાલ કાડાં ચ્યાલ મોદાત કોઆ, એને ચ્યાલ છુટો કોઆ.” યા ચમત્કારા લીદે બોજ યહૂદીયાહાય ઈસુવોય બોરહો કોઅયો.

બાકી યહૂદીયાહા ધાર્મિક આગેવાન ઈસુ આરે ઈર્ષ્યા કોઅરા લાગ્યા, યાહાટી યોખઠા ઓઇન ઈસુલ એને લાજરાલ માઆય ટાકાંહાટી યુક્તિ કોઅરાં લાગ્યા.