41. પોરમેહેર ઈસુલ મોઅલા માઅને પાછો જીવતો કોઅહે.

સૈનિકાહાકોય ઈસુલ હુળીખાંબાવોય ચોડવી દેઅના પાછે, યહૂદી આગેવાનહાય પિલાતાલ આખ્યા, “ચ્યા જુઠા, ઈસુય આખલાં આતાં કા તો તીન દિહ્યા પાછે મોઅલામાઅને પાછો જીવી ઉઠી. કાદાલ તેરુ ઈ ખાત્રી કોઅરાહાટી કોબારે રાખવાળી કોઅરા પોડી કા ચ્યા શિષ્ય ચ્યા શરીર ચોરી લેય જાય. જો ચ્યા એહેકેન કોઅરી તે આખરી કા ચ્યા મોઅલામાઅને પાછો જીવી ઉઠલો હેય.”

પિલાતાય આખ્યા, “કોલહાક સૈનિકાહાલ લે જા, એને જેહેકેન તુમા કોઅય હોકા તેહેકેન કોબારે રાખવાળી કોઆ.” યાહાટી ચ્યાહાય ચ્યા કોબારે બાઅણા દોગડાવોય મુહર લાવી દેની. ચ્યાહાય ઈ ખાત્રી કોઅરાહાટી તાં સૈનિકાહાલ બી બોહાડી દેના કા કાદાંબી ચ્યા શરીર ચોરી નાંય હોકે.

ઈસુ મોઅના પાછે બીજો દિહી સાબ્બાથ દિહી આતો. કાદાંબી સાબ્બાથ દિહ્યા દિહી કામ નાંય કોઅય હોકતાં આતાં, યાહાટી ઈસુલ કાદોબી આર્યો કોબારેવોય નાંય યેનલો આતો. બાકી સાબ્બાથ દિહ્યા બીજે દિહી, જુનખ્યા, કોલહ્યોક થેએયો કોબારેવોય જાંહાટી તિયાર જાયો. ચ્યો ચ્યા શરીરાવોય આજુ મોસાલો લાવાં આત્યો.

ચ્યે થેએયેહે પોઅચના પેલ્લા, કોબારેવોય યોક મોઠો દોરતીકંપ જાયો. હોરગા માઅને યોક હોરગાદૂત યેયન જો કોબારેવોય દાકલો આતો તો દોગડો કોથલાડી દેનો, એને ચ્યાવોય બોહોય ગિયો. ઓ હોરગા દૂત ઉજવાડા હારકો ચોમકી રીઅલો આતો. કોબારેવોય સૈનિક આતા ચ્યાહાય ચ્યાલ દેખ્યો. ચ્યા ઓલા ગાબરાય ગીઅલા આતા કા મોઅલા હારકા જમીનીવોય પોડલા આતા.

જોવે ચ્યો થેએયો કોબારેવોય પોઅચ્યો તે ચ્યા હોરગા દુતાય ચ્યેહેન આખ્યા, “ગાબરાયા માં. ઈસુ ઈહીં નાંય હેય, તો મોઅલા માઅને પાછો જીવી ઉઠલો હેય, જેહેકેન ચ્યાયે આખલાં આતાં કા તો જીવી ઉઠી. કોબારેમાય હોદા એને એઆ.” ચ્યે થેએયેહે કોબારે આંદાર એને જાં ઈસુ શરીર થોવલાં આતાં, તાં હોદ્યા એને દેખ્યા કા ચ્યા શરીર તાં નાંય આતાં.

તોવે ચ્યા હોરગા દુતાય ચ્યે થેએયેહેલ આખ્યા, “જાયન ચ્યા શિષ્યહાલ આખા, ‘ઈસુ મોઅલા માઅને પાછો જીવી ઉઠલો હેય એને તો તુમહે પેલ્લા ગાલીલમાય જાય.’”

ચ્યો થેએયો નોવાય પામી ગિયો એને બોજ ખુશ ઓઅય ગિયો. ચ્યો શિષ્યહાન ઈ હારી ખોબાર આખાંહાટી દાહુંદી ગિયો.

જોવે ચ્યો થેએયો શિષ્યહાન હારી ખોબાર આખાંહાટી ચ્યો વાટેજ આત્યો, તે ઈસુ ચ્યેહેન મિળ્યો. ચ્યો ચ્યા પાગે પોડ્યો. તોવે ઈસુય આખ્યા, “ગાબરાયાહા મા. જાયન મા શિષ્યહાન ગાલીલમાય જાં આખા. ચ્યા તાં માન એઅરી.”