7. પોરમેહેર યાકુબાલ બોરકાત દેહે

જોવે ચ્યે પોહે મોઠે જાયે તે યાકુબાલ ગોઓ રોઅના હારાં લાગ્યા, બાકી એસાવાલ જોનાવરહા શિકાર કોઅના પોસંદ પોડ્યા. રિપકાય યાકુબા આરે સ્નેહ કોઅયા, બાકી ઈસાકાય એસાવાલ પ્રેમ કોઅયા.

યોક દિહી, જોવે એસાવ શિકાર કોઈન પાછો યેનો તે તો બોજ બુખો આતો. એસાવાય યાકુબાલ આખ્યા, “જી તુંયે રાંદહ્યા ચ્યામાઅને વાયજ ખાઅના માન દે.” યાકુબાય જોવાબ દેનો, “પેલ્લા માઆરે ઓ વાયદો કોઓં કા જેઠો પોહો ઓઅના લીદે બોદ્યો વસ્તુ તુલ મિળા જોજે, તીં બોદા તું માન દેહે.” છેલ્લે: એસાવાય ચ્યો બોદ્યો વસ્તુ દેઅના વાયદો કોઅયો. તોવે યાકુબાય ચ્યાલ વાયજ ખાઅના દેના.

ઈસાક એસવાલ બોરકાત દાં માગતો આતો. બાકી યા પેલ્લા કા ચ્યાયે એહેકેન કોઅયા, રિપકા એને યાકુબાય યાકુબાલ એસાવ ઓઅના ઢોંગ કોઈન ઈસાકાઆરે દોગો કોઅયો. ઈસાક ડાયો આતો એને આમી એઅય નાંય હોકતો આતો. યાહાટી યાકુબાય એસાવા ડોગલે પોવ્યે એને બોકડી ચામડાં ગોગીમાય એને આથહાં આરે વેટાળી લેદાં.

યાકુબ ઈસાકા પાહી ગિયો એને આખ્યા, “આંય એસાવ હેતાવ. આંય યાહાટી યેનહો કા તું માન બોરકાત દેય.” જોવે ઈસાકાય બોકડી વાળ ચાફલ્યા એને ડોગલાહાલ હુંગાડયા, તે ચ્યાય હોમજ્યા કા તો એસાવ હેય એને ચ્યાલ બોરકાત દેની.

એસાવાય યાકુબાઆરે ઈર્ષ્યા કોઅયી કાહાકા યાકુબાય ચ્યા પેલ્લા જેઠા પોહા ઓદિકાર એને આરેજ ચ્યા બોરકાત બી કાડી લેદલી આતી. છેલ્લે: એસાવાય ચ્યાહાં આબહો ઈસાકા મોઅના પાછે યાકુબાલ માઆય ટાકના યુક્તી કોઅયી.

બાકી રિપકાય એસાવા યુક્તી વોનાય લેદી. યાહાટી ચ્યે એને ઈસાકાય યાકુબાલ ચ્યાહા હોગવાડયાહાહાતે રાંહાટી બોજ દૂઉ દોવાડી દેનો.

યાકુબ બોજ વોરહે લોગું રિપકા હોગવાડયાહાહાતે રિયો. ચ્યે સમયે ચ્યાયે વોરાડ કોઅયા એને બારા પોહા એને યોક પોહી ઉત્પન્ન કોઅયે. પોરમેહેરાય ચ્યાલ બોજ માતલો બોનાડી દેનો.

વિહી વોરહા લોગું કનાનમાય ચ્યા ગોઅને દૂઉ રોઅના પાછે, યાકુબ ચ્યા પરિવાર, ચ્યા સેવક, એને ચ્યા જોનાવરહા બોદા ટોળહા આરે પાછો ફિર્યો.

યાકુબ યાહાટી બોજ ગાબરાય ગીઅલો કાહાકા ચ્યાય હોમજ્યા કા એસાવ આમી બી ચ્યાલ માઅય ટાકા માગહે. યાહાટી ચ્યાયે મિળની રુપામાય જોનાવરહા ટોળા એસાવાપાય લેય દોવાડ્યા. જ્યા સેવક ચ્યા ટોળા લીન ગીઅલા આતા ચ્યાહાય આખ્યા, “તો દાસ યાકુબ, યા જોનાવરહાન તુલ દાં માગહે. તો માહારીજ યેય રીઅલો હેય.”

બાકી એસાવ આમી યાકુબાલ નુકસાન નાંય પોચાડાં માગતો આતો. ચ્યા કોઅતા, તો ચ્યાલ યોકદા પાછી દેખીન બોજ ખુશ આતો. ચ્યા પાછે યાકુબ કનાન દેશામાય શાંતિકોય રિયો. પાછે ઈસાક મોઅય ગિયો એને યાકુબ એને એસાવાય ચ્યાલ દાટી દેનો. કરારા વાયદો જો પોરમેહેરાય અબ્રાહામાહાતે કોઅલો આતો તો આમી ઈસાકાવોઅને યાકુબાવોય યેય ગીઅલો આતો.