10. ୧୦- ଦସ୍ଗଟା ମହାମାରି
ମସା ଆରେ ହାରଣ ପାରଙ୍ଗ୍ ଆର୍ସେଲ୍ ସେୟର୍। ଆୟ୍ଲକ୍ ପକେର୍, ଇସ୍ରାଏଲ୍ଟେ ମାପ୍ରୁ ଇପାଡ୍ ପକେଣ୍ତ୍, ଆନେ ଲକୁଙ୍ଗ୍ ସାକାରି ସିୟୁର୍, ପାର ଆୟ୍ ଲକ୍ନେ ପାଟେଙ୍ଗ୍ ୱେନୁଟଣ୍ତ୍। ଇସ୍ରାଏଲ୍ଟେ ଲକୁଙ୍ଗ୍ ମୁକ୍ତି ସିଦାନ୍ ବାଦୁଲ୍ ନା, ଆୟ୍ ଲକୁଙ୍ଗ୍ ପେରିନ୍ କସ୍ଟ କାମେଲ୍ କେଗିଙ୍ଗ୍ ଜବର୍ଜସ୍ତି କେନର୍।
ଲକ୍ଗୁଲୁଙ୍ଗ୍ ମୁକ୍ତି କେଗିଙ୍ଗ୍ ପାର ମାନା କେଗିଙ୍ଗ୍ ନଣ୍ତ୍, ଆଦିଙ୍ଗ୍ ପାୟିଟ୍ ମାପ୍ରୁ ଦସ୍ଗଟା ବେର୍ବେର୍ଟେ ମହାମାରି, ମିଶର୍ତୁନ୍ ସୟ୍ତଣ୍ତ୍। ଇ ମହାମାରିଟୁକ୍ ମାପ୍ରୁ ପାରଙ୍ଗ୍ ତଟ୍କୁନଣ୍ତ୍ ଜେ ଅଣ୍ତ୍ ପାରଙ୍ଗ୍ ପେଲ୍ଟୁକ୍ ଆରେ ମିଶର୍ଟେ ପାଟିନ୍ ୱେନ୍ଦିଟ୍ଗିଲ୍ ପେଲ୍ଟୁକ୍ ପେରିନ୍ ସକ୍ତିସାଲି।
ମାପ୍ରୁ ନିଲ ପେରେଟ୍ଟେ ନିରିଙ୍ଗ୍ ନେତିର୍ କେୟିସିନଣ୍ତ୍, ମାତର୍ ଇ ଆରେକ୍ ପାର ଇସ୍ରାଏଲ୍ଟେ ଲକୁଙ୍ଗ୍ ସାକାରୁଟଣ୍ତ୍।
ମାପ୍ରୁ ମିଶର୍ ଦେସ୍ ତିନ୍ ପାଟିନ୍ ଦିଗାଲ୍ ପାଣ୍ଡାକେଲ୍ ସୟ୍ତଣ୍ତ୍। ପାଣ୍ଡାକେଲିଙ୍ଗ୍ ଦୁର୍ କେଗିଙ୍ଗ୍ ପାୟିଟ୍ ମସାଙ୍ଗ୍ ପାର ଅନୁରଦ୍ କେନଣ୍ତ୍। ମାତର୍ ପାଟିନ୍ ପାଣ୍ଡାକେଲ୍ ସାୟି ସେୟାନ୍ କୁଣ୍ତେଲ୍, ପାର ଅଣ୍ତୁନେ ଗର୍ବେଙ୍ଗ୍ କଟିନ୍ କେନଣ୍ତ୍ ଆରେ ଇସ୍ରାଏଲିୟଟେ ଲକୁଙ୍ଗ୍ ମିଶର୍ ଟୁକ୍ ସାକାରୁଟଣ୍ତ୍।
ଆଦିଙ୍ଗ୍ ମାପ୍ରୁ ଦୁଲି ୱାଡିନ୍ ପେନିଲ୍ ସୟତଣ୍ତ୍। ଆଦିଙ୍ଗ୍ କୁଣ୍ତେଲ୍ ଅଣ୍ତ୍ ପିଣ୍ଡାକେଲ୍ ସୟତଣ୍ତ୍। ପାର ମସା ଆରେ ହାରଣଙ୍ଗ୍ ଅର୍ଗି ପକେଣ୍ତ୍, ଜଦି ଆୟ୍ଲକ୍ ମହାମାରିଲିଙ୍ଗ୍ ବନ୍ଦ୍ କେଦାର୍, ଆଟେଲ୍ ଅଣ୍ତ୍ ଇସ୍ରାଏଲ୍ଟେ ଲକୁଙ୍ଗ୍ ମିଶର୍ ଟୁକ୍ ସେନିଙ୍ଗ୍ ଅଡ୍ତାର୍। ଏରେବେଲ୍ ମସା ପାର୍ତନା କେନଣ୍ତ୍, ଆୟ୍ ବେଲ୍ ମାପ୍ରୁ ପିଣ୍ଡାକେଲିଙ୍ଗ୍ ମିଶର୍ ଟୁକ୍ ଦୁର୍ କେନଣ୍ତ୍। ମାତର୍ ପାର ଅଣ୍ତୁନେ ଗର୍ବେଙ୍ଗ୍ କଟିନ୍ କେନଣ୍ତ୍ ଆରେ ଲକ୍ଗୁଲୁଙ୍ଗ୍ ସାକାରୁଟଣ୍ତ୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ପାଟିନ୍ ୱିଣ୍ଡ୍ଗିଲ୍ଟେ ପଶୁଲୁଙ୍ଗ୍ ଏରେଦ୍ କି ମିଶର୍ଟେ ଲକଗୁଲ୍ନେ ମାଟେୱ୍, କାୟ୍କିର୍ କେୟି ସାୟୁସି କାରେଣ୍ତ୍। ମାତର୍ ପାରନେ ଗର୍ବେ କଟିନ୍ ଏନେ, ଆରେ ଅଣ୍ତ୍ ଇସ୍ରାଏଲ୍ଟେ ଲକୁଙ୍ଗ୍ ସାକାରୁଟଣ୍ତ୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ମସାଙ୍ଗ୍ ପାରଙ୍ଗ୍ ଆର୍ସେଲ୍ ନିଡ୍ କାରିଙ୍ଗ୍ ପକେଣ୍ତ୍। ଏରେ ବେଲାଙ୍ଗ୍ ଅଣ୍ତ୍ କେନଣ୍ତ୍, ମିଶରିୟଟେ ଲକ୍ନେ ତଲ୍ ପୟତାନ୍ କସ୍ଟ ଏନେ ଆରେ ସୁଲୁସ୍କୁର୍ ପେସି ଗାୱେଲ୍ ଏନେୱ୍, ମାତର୍ ଇସ୍ରାଏଲ୍ଟେ ଲକୁଙ୍ଗ୍ ଏରୁଟେ। ମାପ୍ରୁ ପାରନେ ଗର୍ବେଙ୍ଗ୍ କଟିନ୍ କେନଣ୍ତ୍, ଆରେ ପାର ଇସ୍ରାଏଲ୍ଟେ ଲକୁଙ୍ଗ୍ ସାକାରୁଟଣ୍ତ୍।
ଆଦିଙ୍ଗ୍ କୁଣ୍ତେଲ୍, ମାପ୍ରୁ ଆଦିର୍ କାଣ୍ତ୍କିଲ୍ ନା ମିଶର୍ଟେ ପାଟିନ୍ ପସୁଲୁଙ୍ଗ୍,ଆରେ ଏଇର୍ ୱାଲ୍ତିନ୍ ସେୟର୍ ଆୟ୍ ଲକ୍ ସାନର୍। ପାର ମସା ଆରେ ହାରଣଙ୍ଗ୍ ଅର୍ଗେଣ୍ତ୍ ଆରେ ପକେଣ୍ତ୍, “ଆନ୍ ପାପ୍ କେୟିମାନ୍। ଇମ୍ ସେନିଙ୍ଗ୍ ଅଡ୍ତାର୍, ଆଦିଙ୍ଗ୍ ପାୟିଟ୍ ମସା ପାର୍ତନା କେନଣ୍ତ୍, ଆରେ ମଗୁଲ୍ଟୁକ୍ ଆଦିର୍ କାଣ୍ତ୍କିଲ୍ ଇଲିଙ୍ଗ୍ ବନ୍ଦ୍ ଏନେ।
ମାତର୍ ପାର ଆରେ ତରେକ୍ ପାପ୍ କେନଣ୍ତ୍ ଆରେ ଅଣ୍ତୁନେ ଗର୍ବେଙ୍ଗ୍ କଟିନ୍ କେନଣ୍ତ୍। ଅଣ୍ତ୍ ଇସ୍ରାଏଲ୍ଟେ ଲକୁଙ୍ଗ୍ ସେନିଙ୍ଗ୍ ପାୟିଟ୍ ମୁକ୍ତି ସିୟୁଟଣ୍ତ୍।
ଆଦିଙ୍ଗ୍ ପାୟିଟ୍ ମାପ୍ରୁ ଚିଟ୍କାଲିଙ୍ଗ୍ ସୟତଣ୍ତ୍ ଆରେ ମିଶର୍ ପାଟିନ୍ ଦିଗାଲ୍ ଏରିସେଣ୍ତେ। ଏରେ ତାସ୍ ଆଦିର୍ କାଣ୍ତ୍କିଲ୍ ନା ବିନସ୍ଟ ଏରା ମାଟେ ଆଦ୍ ପାଟିନ୍ ଚିଟ୍କାଲ୍ ନା ବିନସ୍ଟ ଏରିସେଣ୍ତେ।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ସିକାଟିଙ୍ଗ୍ ସୟ୍ତଣ୍ତ୍ ଆଦ୍ ତିନ୍ ଦିନ୍ ଆରେଙ୍ଗ୍ ମାଟେ। ଇଦ୍ ପେରିନ୍ ସିକାଟ୍ ମାଟେ ଜେ ମିଶର୍ଟେ ଲକ୍ ଆୟ୍ ଲକ୍ନେ ଉଲେଙ୍ଗ୍ ସାକାରିଙ୍ଗ୍ ଅଡାମାନ୍ ନର। ମାତର୍ ଏରେ ବାସେନ୍ ଇସ୍ରାଏଲ୍ଟେ ଲକ୍ ବାସେ ଏରିଙ୍ଗ୍ ନର ଆମାନ୍ ୱିଣ୍ତ୍ ମାଟେ।
ଇ ନଅଗଟା ମହାମାରି ଏଦାନ୍ କୁଣ୍ତେଲ୍ ମେନ୍ ପାର ଇସ୍ରାଏଲ୍ଟେ ଲକୁଙ୍ଗ୍ ସାକାରୁଟଣ୍ତ୍। ପାର ୱେନା ପାୟିଟ୍, ମାପ୍ରୁ ଉକୁଟ୍ ସାରାସାରିଟେ ମହାମାରି ସୟକୁଙ୍ଗ୍ ଜଜନା କେନଣ୍ତ୍। ଇଦ୍ ପାରନେ ମନୁଙ୍ଗ୍ ବାଦ୍ଲାତା।
ବାଇବଲ୍ଟେ ଉକୁଟ୍ କେରାଲ୍: ଜାତରା ୫-୧୦
Free to use, adapt, and share under an open license (CC BY-SA 4.0).