11. ୧୧- ନିସ୍ତାର୍ ପାରୁବ୍
ମାପ୍ରୁ ପାରଙ୍ଗ୍ ସତର୍କ କେୟି ପକେଣ୍ତ୍ ଜେ ଜଦି ଅଣ୍ତ୍ ଇସ୍ରାଏଲ୍ଟେ ଲକୁଙ୍ଗ୍ ସେନିଙ୍ଗ୍ ସିୟାକଡ୍, ଆଟେଲ୍ ଅଣ୍ତ୍ ଲକୁଙ୍ଗ୍ ଆରେ ପସୁଲୁଙ୍ଗ୍ ପାଟିନ୍ ପର୍ତୁମ୍ ଜନମ୍ ଏରଣ୍ତିଲିଙ୍ଗ୍ ଆଟି କାର୍ଦାଣ୍ତ୍। ପାର ଏରେବେଲାଙ୍ଗ୍ ଇ ପାଟେ ୱେଟଣ୍ତ୍ ବିସ୍ବାସ୍ କେୟୁଟଣ୍ତ୍ ଆରେ ମାପ୍ରୁନେ ଆଗିୟା ପାଲନ୍ କେଗିଙ୍ଗ୍ ମାନା କେନଣ୍ତ୍।
ଅଣ୍ତୁଙ୍ଗ୍ ପେଲ୍ ଏଇର୍ ବିସ୍ବାସ୍ କେନର୍ ମାପ୍ରୁ ଆୟ୍ ଲକୁଙ୍ଗ୍ ପର୍ତୁମ୍ ଜନମ୍ ଏରଣ୍ତି ପାଟିନ୍ ଲକୁଙ୍ଗ୍ ରକିୟା କେଗିଙ୍ଗ୍ ଉକୁଟ୍ ଉପାୟ୍ ଜଗାତଣ୍ତ୍। ପାଟିନ୍ ପରିବାରିଙ୍ଗ୍ ଉକୁଟ୍ ସୁକଲ୍ଟେ ମେଣ୍ତା ଆସ୍କି କାତିଙ୍ଗ୍ ପାରିଙ୍ଗ୍ ନେ।
ମାପ୍ରୁ ଇସ୍ରାଏଲ୍ଟେ ଲକୁଙ୍ଗ୍ ମେଣ୍ତାନେ ନେତିର୍ ଇନ୍ଦ୍ରି ଆୟ୍ ଲକ୍ନେ ଉଲେଟେ ଦୁୱାର୍ ବନ୍ଦ୍ତୁନ୍ ଚାରିବେଡ୍ତେନ୍ ମାରୁକୁଙ୍ଗ୍ ପକେଣ୍ତ୍, ଆରେ ସେପ୍ ସାଟି କେରିନ୍ ସୁପାଟେ ରୁଟି ଦାପ୍ରେନ୍ ତିନିଙ୍ଗ୍ ପକେଣ୍ତ୍। ଆୟ୍ ଲକ୍ ତିଞ୍ଜି ପଲ୍ଦାନ୍ କୁଣ୍ତେଲ୍ ମିଶରୁଙ୍ଗ୍ ସାକାରିଙ୍ଗ୍ ପାୟିଟ୍ ମେନ୍ ତିୟାର୍ ଏରିଙ୍ଗ୍ ଅଣ୍ତ୍ ପକେଣ୍ତ୍।
ମାପ୍ରୁ ଏରେ ୱାଡିନ୍ ଆୟ୍ଲକୁଙ୍ଗ୍ କେଗିଙ୍ଗ୍ ପାୟିଟ୍ ଆଗିୟା ସିମାଟଣ୍ତ୍ ଇସ୍ରାଏଲ୍ଟେ ଲକ୍ ପାଟିନ୍ କାମେଲ୍ କେନର୍। ନେଣ୍ତ୍ଗାପ୍ ସିକାଟ୍ ତିନ୍, ମାପ୍ରୁ ମିଶର୍ ଦିଗାଲ୍ ସେଞ୍ଜି ପର୍ତୁମ୍ ଜନମ୍ ଏରଣ୍ତିଲିଙ୍ଗ୍ ପାଟିନିଙ୍ଗ୍ ସାୟୁସି କାରେଣ୍ତ୍।
ଇସ୍ରାଏଲିୟ ଲକ୍ନେ ଉଲେକିଲ୍ ଦୁୱାର୍ ବନ୍ଦ୍ତୁନ୍ ଚାରିବେଡ୍ତେନ୍ ନେତିର୍ ଅୟ୍କି ମାଟେ, ଆଦିଙ୍ଗ୍ ମାପ୍ରୁ ଆୟ୍ ଉଲେକିଲିଙ୍ଗ୍ ସାକାରି ସିନଣ୍ତ୍। ଉଲେ ତାନିର୍ ପାଟିନ୍ ଲକ୍ ନିୟାରେନ୍ ମାଟର୍। ମେଣ୍ତାନେ ନେତିର୍ ପାୟିଟ୍ ଆୟ୍ ଲକ୍ ଉଦାର୍ ପାୟ୍ଏନର୍।
ମାତର୍ ମିଶରିୟତୁଲ୍ ମାପ୍ରୁଙ୍ଗ୍ ଆରେ ଅଣ୍ତୁନେ ଆଦେସ୍ଗିଲ୍ ବିସ୍ବାସ୍ କେୟୁଟର୍। ଆଦିଙ୍ଗ୍ ମାପ୍ରୁ ଆୟ୍ ଲକ୍ନେ ଉଲେକିଲିଙ୍ଗ୍ ସାକାରୁଟଣ୍ତ୍। ମାପ୍ରୁ ମିଶରିୟଟେ ପାଟିନିଙ୍ଗ୍ ପର୍ତୁମ୍ ଜନମ୍ ଏରଣ୍ତିଲିଙ୍ଗ୍ ବିନସ୍ଟ କେନଣ୍ତ୍।
ପାଟିନ୍ ମିଶରଟେ ପର୍ତୁମ୍ ଜନମ୍ ଏରଣ୍ତିଲ୍ ଆୟ୍ ଗଡ୍ ତୁନ୍ ସାୟିସେଣ୍ତେୱ୍, ଜୟିଲ୍ତିନ୍ ମାନଣ୍ତି ପାଟିନ୍ ପର୍ତୁମ୍ ଜନମ୍ ଏଦାନ୍ ଲକୁଙ୍ଗ୍ ପେଲ୍ଟୁକ୍ ପାରନେ ପର୍ତୁମ୍ ଜନମ୍ ଏରଣ୍ତି ପାଟିନ୍ ସାନର୍। ପେଙ୍ଗୁର୍ତୁଲ୍ ମିଶରିୟ ଲକ୍ନେ ପେରିନ୍ ଦୁକ୍ ପାୟିଟ୍ ଆଡି ଆଡି ରଦନ୍ କେନର୍।
ଆୟ୍ ନାର୍କାମ୍ ପାର ମସାଙ୍ଗ୍, ହାରଣଙ୍ଗ୍ ଅର୍ଗି ପକେଣ୍ତ୍, ଇସ୍ରାଏଲ୍ ଲକୁଙ୍ଗ୍ ପାତି ଦାପ୍ରେନ୍ ମିଶର୍ ସାକାରି ସେଣ୍ତୁର୍। ମିଶରିୟ ଲକ୍ମେନ୍ ଇସ୍ରାଏଲ୍ ଲକୁଙ୍ଗ୍ ଦାପ୍ରେନ୍ ମିଶର୍ ସାକାରି ସେନିଙ୍ଗ୍ ପାୟିଟ୍ ଅନୁରଦ୍ କେନର୍।
ବାଇବଲ୍ଟେ ଉକୁଟ୍ କେରାଲ୍: ଜାତରା ୧୧:୧-୧୨:୩୨
Free to use, adapt, and share under an open license (CC BY-SA 4.0).