12. ୧୨- ଇସ୍ରାଏଲ୍ତିଲ୍ ମିସର୍ଟୁକ୍ ମୁକ୍ତି
ମିଶର୍ ସାକାରି ସେୟାନ୍ ବେଲ୍ ଇସ୍ରାଏଲ୍ଟେ ଲକ୍ ପେରିନ୍ କିର୍ଦେ ଏନର୍। ଆୟ୍ଲକ୍ ଆରେ ଦାସ୍ ଏରି ମାନୁଟର୍। ଆରେ ଆୟ୍ଲକ୍ ଜିଦ୍ କେୟଣ୍ତି ଦେସ୍ତିନ୍ ସେନ୍ନର୍। ଇସ୍ରାଏଲ୍ଟେ ଲକ୍ ଏନାଦ୍ ପର୍ତର୍ ଆଦ୍ ମିଶରିୟଟେ ଲକ୍ ସିନର୍, ଇ ୱାଡିନ୍ କି ସୁନା ରୁପା ଆରେ ପେରିନ୍ ଦାମ୍ଟେ ଜିନିସ୍ଗିଲ୍ ସିନର୍। ୱେନ୍ ଦେସ୍ଟେ ଏଙ୍ଗୁର୍ତୁଲ୍ ମାପ୍ରୁଙ୍ଗ୍ ପେଲ୍ ବିସ୍ବାସ୍ କେନର୍ ଆୟ୍ ଲକ୍ ମିଶର୍ ସାକାର୍ଦାନ୍ ବେଲେନ୍ ଇସ୍ରାଏଲ୍ ଲକ୍ ନା ସେୟର୍।
ଦିନ୍ ବେଲ୍ ମାପ୍ରୁ ଆୟ୍ଲକୁଙ୍ଗ୍ ଉକୁଟ୍ ବେର୍ଟେ ମଗୁଲ୍ ସିତ୍ଲା ନା ଆୟ୍ଲକୁଙ୍ଗ୍ ପାୱ୍ କାଡାସି ଉଗୁଙ୍ଗ୍ନେ, ଆରେ ଆଦ୍ ନାର୍କାମ୍ ବେଲ୍ ଉଚାଟେ କିସ୍ଅଲା ୱିଣ୍ତ୍ ସିଗିଙ୍ଗ୍ ନେ। ମାପ୍ରୁ ଆୟ୍ଲକ୍ ନାଟ୍ ପାଟିନ୍ ବେଲ୍ ମାନ୍ ନଣ୍ତ୍ ଆରେ ଆୟ୍ଲକ୍ ସେୟାନ୍ ବେଲ୍ ଆୟ୍ଲକୁଙ୍ଗ୍ ପାୱ୍ କାଡାକିନେ। ଆୟ୍ଲକ୍ ଅଣ୍ତୁନେ କୁଣ୍ଡୁନି ସେନିଙ୍ଗ୍ ଲଡା ମାଟେ।
କାଣ୍ତେକ୍ ସମୟ କୁଣ୍ତେଲ୍, ପାର ଆରେ ଅଣ୍ତୁନେ ଲକ୍କୁଲ୍ ଆୟ୍ଲକ୍ ନେ ମନୁଙ୍ଗ୍ ପରିବର୍ତନ୍ କେନର୍ ଆରେ ଇସ୍ରାଏଲ୍ ଲକୁଙ୍ଗ୍ ଆୟ୍ଲକ୍ନେ ଦାସ୍ କେଗିଙ୍ଗ୍ ପାୟିଟ୍ ଆରେ ତରେକ୍ ଇଚା କେନର୍। ମାପ୍ରୁ ପାରଙ୍ଗ୍ ଜିଦଖର୍ କେୟୁତଣ୍ତ୍, ଏଟେନ୍ କି ଲକ୍ଗୁଲ୍ ଉକୁଟି ସତ୍ ମାପ୍ରୁ ଏଞ୍ଜି ପୁନୁଙ୍ଗ୍ ଅଡ୍ତାର୍, ଆରେ ବୁଜ୍ ଏଦାର୍ ଜେ ଅଣ୍ତ୍, ପର୍ବୁ ପାର ଆରେ ପାରନେ ୱେନ୍ଦିଟ୍ ଗିଲିଙ୍ଗ୍ ପେଲ୍ ଟୁକ୍ ପେରିନ୍ ସକ୍ତିମାନ୍।
ଆଦିଙ୍ଗ୍ ଆୟ୍ ଲକୁଙ୍ଗ୍ ଆରେତରେକ୍ ଦାସ୍ କେଗିଙ୍ଗ୍ ଇସ୍ରାଏଲ୍ ଲକୁଙ୍ଗ୍ କୁଣ୍ତୁନ୍ କୁଣ୍ତୁନ୍ ପାର ଆରେ ଅଣ୍ତୁନେ ସୟିନ୍ତିଲ୍ ସେୟର୍। ମିଶରିୟ ସୟିନ୍ତିଲିଙ୍ଗ୍ ୱାରଣ୍ଡି ଏରେବେଲାଙ୍ଗ୍ ଇସ୍ରାଏଲ୍ ତିଲ୍ ସୁଡେର୍, ଆୟ୍ଲକ୍ ନାର୍ସି ସେୟର୍ ଜେ ଆୟ୍ଲକ୍ ପାରନେ ସୟିନ୍ଦଲ୍ ଆରେ ଲହିତ୍ ପେରେଟ୍ ଦିଗାଲ୍ ଏଦେର୍। ଆୟ୍ଲକ୍ ପେରିନ୍ ନାର୍ସିଙ୍ଗ୍ ନର୍ ଆରେ ଆୟ୍ଲକ୍ ଆଉଲି ଏରି ପକେର୍ ଆମ୍ ଏନାଦିଙ୍ଗ୍ ମିଶର୍ ସାକାରେମ୍? ଆମ୍ ସାଗିଙ୍ଗ୍ ସେନିଦାମ୍।
ମସା ଇସ୍ରାଏଲ୍ଟେ ଲକୁଙ୍ଗ୍ ପକେଣ୍ତ୍, ନାରିସ୍ ମେର୍ ମାପ୍ରୁ ଇନେନ୍ ଇମ୍ଗୁଲୁଙ୍ଗ୍ ପାୟିଟ୍ ଜୁଦ୍ କେଦାଣ୍ତ୍ ଇମ୍ଗୁଲୁଙ୍ଗ୍ ରକିୟା କେଦାଣ୍ତ୍। ଆଦିଙ୍ଗ୍ କୁଣ୍ତେଲ୍ ମାପ୍ରୁ ମସାଙ୍ଗ୍ ପକେଣ୍ତ୍ ଲକ୍ଗୁଲୁଙ୍ଗ୍ ଲହିତ୍ ପେରେଟ୍ ଦିଗାଲ୍ ସେନିଙ୍ଗ୍ ପକ୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ମଗୁଲ୍ ମୁଣ୍ତେ ଉଇ ଇସ୍ରାଏଲ୍ ଆରେ ମିଶରିୟ ଲକୁଙ୍ଗ୍ କାକେଲ୍ ଇରେଣ୍ଡ୍ ଏଟେନ୍ କି ମିଶରିୟ ଲକ୍ଗୁଲ୍ ଇସ୍ରାଏଲ୍ ଲକୁଙ୍ଗ୍ ସୁଡୁଙ୍ଗ୍ ଅଡାର୍।
ମାପ୍ରୁ ମସାଙ୍ଗ୍ ଅଣ୍ତୁନେ କି ତେଟ୍ସି ସମ୍ଦୁରୁଟେ ନିରିଙ୍ଗ୍ ଦୁଇ ବାଗ୍ କେଗିଙ୍ଗ୍ ପକେଣ୍ତ୍। ଆଦିଙ୍ଗ୍ କୁଣ୍ତେଲ୍ ମାପ୍ରୁ ୱାଲ୍ ନା ସମ୍ଦୁର୍ତୁନ୍ ତାକୁସି ତିୟାନ୍ ପାକାତେଲ୍ ଆରେ ଦକ୍ଷିଣ ଦିଗାଲ୍ଟେ ନିରିଙ୍ଗ୍ ପେଲାତଣ୍ତ୍, ଏଟେନ୍ କି ସମ୍ଦୁର୍ ତୁନ୍ ଉକୁଟ୍ ରାସ୍ତା ଏନେ।
ଇସ୍ରାଏଲ୍ଟେ ଲକ୍ ସମ୍ଦୁର୍ ତାନିର୍ ୱାଟଣ୍ଡି ବାସେନ୍ ତାକି ସେୟର୍ ଆରେ ଆୟ୍ଲକ୍ନେ ପାଲି ଦିଗାଲ୍ ନିର୍ କୁର୍ ୱାଡିନ୍ ନିଲ୍ତେ।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ମଗୁଲୁଙ୍ଗ୍ ଆୟ୍ ବାସେଟୁକ୍ ପୟ୍ତାନ୍ ପାତିସେୟଣ୍ତ୍ ଏଟେନ୍ କି ଇସ୍ରାଏଲ୍ତିଲ୍ ୱେଟଣ୍ଡି ମିଶରିୟ ତୁଲ୍ ସୁଡୁଙ୍ଗ୍ ଅଡ୍ତାର୍। ମିଶରିୟତୁଲ୍ ଆୟ୍ଲକୁଙ୍ଗ୍ ସାରିକିଙ୍ଗ୍ ପାୟିଟ୍ ନିସ୍ପତି ଉନର୍।
ଆଦିଙ୍ଗ୍ ଆୟ୍ଲକ୍ ସମ୍ଦୁର୍ ତାନିର୍ ଏରଣ୍ତି ରାସ୍ତାନ୍ ସେଞ୍ଜି ଇସ୍ରାଏଲ୍ ଲକୁଙ୍ଗ୍ ସାରିକିନର୍, ମାତର୍ ମାପ୍ରୁ ମିଶରିୟଲକୁଙ୍ଗ୍ କସ୍ଟ ସିନଣ୍ତ୍ ଆରେ ଆୟ୍ ଲକ୍ନେ ରତ୍ଗୁଲୁଙ୍ଗ୍ ବଲାତଣ୍ତ୍। ଆୟ୍ଲକ୍ ଆଉଲି ଏରି ପକେର୍ ୱେଟୁର୍ ମାପ୍ରୁ ଇସ୍ରାଏଲ୍ଟେ ଲକୁଙ୍ଗ୍ ଦିଗାଲ୍ ଏରି ଜୁଦ୍ କେଗିଦାଣ୍ତ୍।
ଇସ୍ରାଏଲ୍ଟେ ଲକ୍ ସମ୍ଦୁର୍ ଆୟଟ୍ ପାକା ନିୟାରେନ୍ ଏଦ୍ଦାନ୍ କୁଣ୍ତେଲ୍ ମାପ୍ରୁ ମସାଙ୍ଗ୍ ଅଣ୍ତୁନେ ୱାଲିଙ୍ଗ୍ ଆରେ ତରେକ୍ କେଗିଙ୍ଗ୍ ପକେଣ୍ତ୍। ଆୟ୍ ବେଲାଙ୍ଗ୍ ଅଣ୍ତ୍ ମାପ୍ରୁନେ ବାଦିୟ ଏନଣ୍ତ୍, ନିର୍ ମିଶରିୟ ଲକୁଙ୍ଗ୍ ପୟ୍ତାନ୍ ଡାବା ଏରି ସେଣ୍ତେ ଆରେ ସମ୍ଦୁର୍ ଆଗାଡିଟେ ୱାଡିନ୍ ସମାନ୍ ଏରିସେଣ୍ତେ।
ଇସ୍ରାଏଲ୍ତିଲ୍ ଏରେବେଲ୍ ସୁଡେର୍ ମିଶରିୟ ତୁଲ୍ ସାୟିସେଞ୍ଜି ମାୟର୍, ଆୟ୍ଲକ୍ ମାପ୍ରୁଙ୍ଗ୍ ପେଲ୍ ବରସା କେନର୍ ଆରେ ମସା ମାପ୍ରୁନେ ଉକୁର୍ ଭାବବାଦି ଆଦ୍ ବିସ୍ବାସ୍ କେନର୍।
ଇସ୍ରାଏଲ୍ତିଲ୍ ପେରିନ୍ କିର୍ଦେ ଏନର୍ ଏନାଦିଙ୍ଗ୍ କି ଆୟ୍ଲକୁଙ୍ଗ୍ ସାଦାନ୍ ପେଲ୍ଟୁକ୍ ଆରେ ଦାସ୍ଟୁକ୍ ରକିୟା କେନଣ୍ତ୍, ମାତର୍ ଇଣ୍ତି ଆୟ୍ଲକ୍ ମାପ୍ରୁନେ ସେବା କେଗିଙ୍ଗ୍ ମୁକ୍ତ ମାଟର୍। ଇସ୍ରାଏଲ୍ତିଲ୍ ଆୟ୍ଲକ୍ନେ ପୁନେଦ୍ଟେ ନିୟମୁଙ୍ଗ୍ ପାଲନ୍ କେଗିଙ୍ଗ୍ ଆରେ ମାପ୍ରୁନେ ତୁତି କେଗିଙ୍ଗ୍ ପାୟିଟ୍ ପେଙ୍ଗିଟ୍ ପାଟେଲ୍ ପାରେର୍ ଏନାଦିଙ୍ଗ୍ କି ଅଣ୍ତ୍ ମିଶରିୟ ସୟିନ୍ଦଲ୍ଟୁକ୍ ଆୟ୍ଲକୁଙ୍ଗ୍ ରକିୟା କେୟିମାଟଣ୍ତ୍।
ମାପ୍ରୁ ଇସ୍ରାଏଲ୍ ଲକୁଙ୍ଗ୍ ମିଶରିୟଲକୁଙ୍ଗ୍ ପୟ୍ତାନ୍ ଏଟେନ୍ ଜୟ ସିନଣ୍ତ୍ ଆରେ ଆୟ୍ଲକୁଙ୍ଗ୍ ଦାସ୍ ଅବସ୍ତା ଟୁକ୍ ଏଟେନ୍ କି ଉଦାର୍ କେନଣ୍ତ୍, ଆଦ୍ ଏତାକିଙ୍ଗ୍ ପାୟିଟ୍ ଇସ୍ରାଏଲ୍ଟେ ଲକୁଙ୍ଗ୍ ନିସ୍ତାର୍ ପାରୁବ୍ କେଗିଙ୍ଗ୍ ଆଦେଶ୍ ସିନଣ୍ତ୍। ଆୟ୍ଲକ୍ ଉକୁଟ୍ ସୁକଲ୍ଟେ ମେଣ୍ତାପାପୁଙ୍ଗ୍ ବଲି ସିଦାନ୍ ପାୟିଟ୍ ସୁପାଟେ ରୁଟିନାଟ୍ ତିଞ୍ଜି କିର୍ଦେ କେୟି ପାଲନ୍ କେନର୍।
ବାଇବଲ୍ଟେ ଉକୁଟ୍ କେରାଲ୍: ଜାତରା ୧୨:୩୩-୧୫:୨୧
Free to use, adapt, and share under an open license (CC BY-SA 4.0).