13. ୧୩- ମାପ୍ରୁ ଇସ୍ରାଏଲ୍ଲକ୍ନା ନିୟମ୍
ମାପ୍ରୁ ଇସ୍ରାଏଲ୍ଲକୁଙ୍ଗ୍ ଲହିତ୍ ପେରେଟ୍ ସି ଆୟଟ୍ ପାକା କାରୁତାନ୍ କୁଣ୍ତେଲ୍, ଅଣ୍ତ୍ ଇକୁଟ୍ ମରୁବାସେ ସି କେରିନ୍ ସିନୟ୍ ପିଦିର୍ଟେ କପେଲ୍ ଏଦେର୍। ଇଦ୍ ଆୟ୍ କପେ ମାଟେ ଏରେମାନ୍ ମସା ପାନ୍ଦଣ୍ଡି ବୁଟା ସୁଡିମାଟଣ୍ତ୍। କପେ କିଡିନ୍ ଲକ୍ଗୁଲ୍ ଆୟ୍ଲକ୍ନେ ତମୁଲ୍ ତିୟାର୍ କେନର୍।
ମାପ୍ରୁ ମସାଙ୍ଗ୍ ଆରେ ଇସ୍ରାଏଲ୍ ଲକୁଙ୍ଗ୍ ପକେଣ୍ତ୍, “ଇମ୍ ଗୁଲ୍ ଜଦି ଆନେ ଆଦେସ୍ ପାଲନ୍ କେଦାର୍ ଆରେ ଆନେ ନିୟମୁଙ୍ଗ୍ ରକିୟା କେଦାର୍ ଆଟେଲ୍ ଇମ୍ଗୁଲ୍ ଆନେ ଦନ୍ ଆରେ ଜାଜକ୍ତୁଲ୍ନେ ଇକୁଟ୍ ରାଜାନେ କୁଲ୍ ଆରେ ଇକୁଟ୍ ପବିତ୍ର ଦେସ୍ ଏଦା।”
ତିନ୍ ଦିନ୍ କୁଣ୍ତେଲ୍, ଲକ୍ଗୁଲ୍ ନିଜେନିଙ୍ଗ୍ ଆତ୍ମାନାଟ୍ ତିୟାର୍ ଏଦାନ୍ କୁଣ୍ତେଲ୍, ମାପ୍ରୁ ମଗୁଲ୍ ପିଲୁସି ଜିଟ୍କି ଆରେ ପଗ୍ନା ଉକୁଟ୍ ପେରିନ୍ ଆଉଲି ସିନୟ୍ କପେ ପୟ୍ତାନ୍ ଇଡିଗି ୱାନଣ୍ତ୍। ମାତର୍ ମସାଙ୍ଗ୍ ଇ କପେ ପୟ୍ତାନ୍ ସେନିଙ୍ଗ୍ ଅନୁମତି ପାୟ୍ ଏନଣ୍ତ୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ଆୟ୍ଲକୁଙ୍ଗ୍ ଅଣ୍ତୁନେ ନିୟମ୍ ସିନଣ୍ତ୍, ଆନ୍ ଇମେ ମାପ୍ରୁ ପର୍ବୁ ଇ, ଏଇଣ୍ତ୍ ଇମ୍ଗୁଲୁଙ୍ଗ୍ ମିଶର୍ଟେ ଦାସ୍ ପେଲ୍ଟୁକ୍ ରକିୟା କେୟି ଇନ୍ଦ୍ରେଣ୍ତ୍ ଆରେ ୱେନ୍ ୱେନ୍ଦିସିଲିଙ୍ଗ୍ ଆରାଦାନା କେମେର୍।”
“ଏନାମେନ୍ ମୁର୍ତିଲ୍ ତିୟାର୍ କେମେର୍ ଆରେ ଆୱ୍ଗୁଲୁଙ୍ଗ୍ ଆରାଦନା କେମେର୍, ଏନାଦିଙ୍ଗ୍ କି ଆନ୍ ଗିଦ୍ରି ଏରାକ୍ ପର୍ବୁ। ଆନ୍ ପିଦିର୍ ଅସନ୍ମାନ୍ ୱାଡିନ୍ ଜାତା କେମେର୍। ବିସ୍ରାମ୍ ଦିନିଙ୍ଗ୍ ପବିତ୍ର ୱାଡିନ୍ ପାଲନ୍ କେୟୁର୍। ଚଅ ଦିନିଙ୍ଗ୍ ଇମେ ପାଟିନ୍ କାମେ କେୟୁର୍, ମାତର୍ ସାତ୍ ଦିନ୍ ସିରିସ୍ ଇମ୍ଗୁଲୁଙ୍ଗ୍ ପାୟିଟ୍ ବିସ୍ରାମ୍ ଦିନ୍ ଏଦା ଆରେ ଇମ୍ ଆନୁଙ୍ଗ୍ ଏତାପୁରାଟ୍।”
“ଇମ୍ ଆବା ଆରେ ଆୟାଙ୍ଗ୍ ସନ୍ମାନ୍ କେୟୁର୍। ନର୍ଅତିୟା କେମେର୍। ବେବିଚାର୍ କେମେର୍। ଚରାମେର୍। ମିଚ୍ ପକ୍ମେର୍। ଇମ୍ ପାଡାଟେ ଆୟାଲିଙ୍ଗ୍, ଆଦିନେ ଉଲେଙ୍ଗ୍ ଆରେ ପାଡାଟେ ୱେନ୍ ଦିନ୍ସୁଙ୍ଗ୍ ଏରେଦ୍ ଆୟ୍ଲକ୍ନେ, ଲାଲ୍ସା କେମେର୍।”
ଆଦିଙ୍ଗ୍ କୁଣ୍ତେଲ୍ ମାପ୍ରୁ ଜଡେକ୍ କାଣ୍ତ୍ ପାଟାଲ୍ତିନ୍ ଇ ଦସ୍ଗଟା ଆଦେସ୍ ଲେକାତଣ୍ତ୍ ଆରେ ମସାଙ୍ଗ୍ ସିନଣ୍ତ୍। ମାପ୍ରୁ ଆରେ ପେଙ୍ଗିଟ୍ ନିୟମ୍ ଆରେ ପାଟିନ୍ ବେଲ୍ ପାଲନ୍ କେଗିଙ୍ଗ୍ ସିନଣ୍ତ୍। ମାପ୍ରୁ ଜିଦ୍ କେୟି ପକେଣ୍ତ୍, ଜଦି ଲକ୍ଗୁଲ୍ ଇ ପାଟିନ୍ ବେବସ୍ତା ଆରେ ନିୟମ୍ ପାଲନ୍ କେଦାର୍, ଆଟେଲ୍ ଅଣ୍ତ୍ ଆୟ୍ଲକୁଙ୍ଗ୍ ଆସିର୍ବାଦ୍ କେଦାଣ୍ତ୍ ଆରେ ରକିୟା କେଦାଣ୍ତ୍। ଜଦି ଆୟ୍ଲକ୍ ଆୟ୍ଲକୁଙ୍ଗ୍ ମାନ୍ ଏରାର୍ କଡ୍, ଆଟେଲ୍ ମାପ୍ରୁ ଆୟ୍ଲକୁଙ୍ଗ୍ ଦଣ୍ତ୍ ସିଦାଣ୍ତ୍।
ମାପ୍ରୁ ଆରେତରେକ୍ ଇସ୍ରାଏଲ୍ ଲକୁଙ୍ଗ୍ ଉକୁଟ୍ ତମୁଟେ ନକ୍ସା ସିନଣ୍ଡ୍ ଏରେଦିଙ୍ଗ୍ ଆୟ୍ଲକ୍ କେକାର୍ ଏଞ୍ଜି ଅଣ୍ତ୍ ପକିମାଟଣ୍ତ୍। ଇଦିଙ୍ଗ୍ ସମାଗମ ତମୁ ପକୁଙ୍ଗ୍ନର୍, ଆରେ ଇମାନ୍ ଜଡେକ୍ ବାକ୍ରାଲ୍ ମାଟେୱ୍ ଏରେଦିଙ୍ଗ୍ ଉକୁଟ୍ ବେର୍ଟେ ପାର୍ଦା ପାୟ୍ସି ଏରିଙ୍ଗ୍ନେ। ମାତର୍ ବେର୍ଜାଜକ୍ ଇ ପାର୍ଦା କୁଣ୍ତେଲ୍ ପାକା ମାନଣ୍ତି ବାକ୍ରାନ୍ ସେନିଙ୍ଗ୍ ପାୟିଟ୍ ଅନୁମତି ପାୟ୍ଏରି ମାଟର୍, ଏନାଦିଙ୍ଗ୍ କି ମାପ୍ରୁ ଆମାନ୍ ମାନ୍ନଣ୍ତ୍।
ଏରେଲକ୍ ଲକ୍ ମାପ୍ରୁଙ୍ଗ୍ ବେବସ୍ତାଙ୍ଗ୍ ଅମାନିୟ ଏଗଡ୍ ଅଣ୍ତ୍ ମାପ୍ରୁନ୍ ଉଦେସ୍ରେନ୍ ଉକୁଟ୍ ବଲି ପାଇଟ୍ ପସୁଙ୍ଗ୍ ସମାଗମ ତମ୍ବକାକେଲ୍ ମାନଣ୍ତି ବେଦିକାକେଲ୍ ଇନ୍ଦିରିନର୍। ଉକୁର୍ ଜାଜକ୍ ପସୁଙ୍ଗ୍ କାତି ଆଦିଙ୍ଗ୍ ବେଦିନ୍ ସାଟିନଣ୍ତ୍। ବଲି ସିୟଣ୍ତି ପସୁନେ ନେତିର୍ ଅଣ୍ତୁନେ ପାପୁଙ୍ଗ୍ କେମା ସିଗିନେ, ଆରେ ଆୟ୍ଲକ୍ ମାପ୍ରୁନ୍ କାନୁଲ୍ତୁନ୍ ସୁସି ଏରିନଣ୍ତ୍। ମାପ୍ରୁ ମସାନେ ବାଇ ଆରନୁଙ୍ଗ୍ ଅଣ୍ତୁନେ କୁଲୁଙ୍ଗ୍ ଆଦିନେ ଜାଜକ୍ ଏରିଙ୍ଗ୍ ପାଇଟ୍ ଆସ୍କେଣ୍ତ୍।
ପାଟିନ୍ ଲକ୍ଗୁଲ୍ ମାପ୍ରୁ ଆୟ୍ଲକୁଙ୍ଗ୍ ସିୟଣ୍ତି ବେବସ୍ତାଲ୍ ପାଲନ୍ କେଗିଙ୍ଗ୍, ଆରେ ମାପ୍ରୁନେ ଉପାସନା କେଗିଙ୍ଗ୍ ପାଇଟ୍ ଆରେ ଅଣ୍ତୁନେ ନିୟାଟେ ଲକ୍ ଏରିଙ୍ଗ୍ ପାଇଟ୍ ଇସା କେନର୍। ମାତର୍ ଆୟ୍ଲକ୍ ମାପ୍ରୁନେ ଆଦେସ୍ ମାନ୍ଏରିଙ୍ଗ୍ ପାଇଟ୍ ପାର୍ମାନ୍ କେଇ କାଣ୍ତେକ୍ ବେଲାକୁଣ୍ତେଲ୍ ଆୟ୍ଲକ୍ ବୟାକାର୍ଟେ ପାପ୍ କେନର୍। ୧
ପେଙ୍ଗିର୍ ଦିନାମ୍ ଆରେକ୍ ମସା ମାପ୍ରୁନା ସିୟନ୍ କପେ ପୟିତାନ୍ ପାର୍କିନଣ୍ତ୍, ମସାଙ୍ଗ୍ ମାଣ୍ତିୱାଦାଣ୍ତ୍ ଏଞ୍ଜି କାସି କାସି ଲକ୍ଗୁଲ୍ ପାଣ୍ତିସେଞ୍ଜି ଦର୍ଜ ପାତୁଟର୍। ଆଦିଙ୍ଗ୍ ଆୟ୍ଲକ୍ ଆରନ୍କାକେଲ୍ଟୁକ୍ ସନା ଇନ୍ଦିରି ଆଦିନାଟ୍ ଆୟ୍ଲକୁଙ୍ଗ୍ ପାଇଟ୍ ଉକୁଟ୍ ମୁର୍ତି ତିୟାର୍ କେଗିଙ୍ଗ୍ ପକେର୍,
ଆରନ୍ ଆୟ୍ ସନାନାଟ୍ ଉକୁଟ୍ କନ୍ଦେପାପ୍ନେ ମୁର୍ତି ତିୟାର୍ କେନଣ୍ତ୍, ଲକ୍ଗୁଲ୍ ପେରିନ୍ ନିୟାନାଟ୍ ଆୟ୍ ମୁର୍ତିଙ୍ଗ୍ ୱାଟେ କେନର୍ ଆରେ ବଲି ଆନିଜ୍ତର୍, ଆୟ୍ଲକ୍ନେ ପାପ୍ ପାଇଟ୍ ଆୟ୍ଲକୁନ୍ ପେଲ୍ ମାପ୍ରୁ ପେରିନ୍ ରିସାଏନେ ଆରେ ଆୟ୍ଲକୁଙ୍ଗ୍ ବିନାସ୍ କେଗିଙ୍ଗ୍ ଇସାକେନେ।
ମାତର୍ ମସା ଆୟ୍ଲକୁଙ୍ଗ୍ ପାଇଟ୍ ପାର୍ତନା କେନଣ୍ତ୍, ଆରେ ମାପ୍ରୁ ଅଣ୍ତୁନେ ପାର୍ତନା ୱେଟେ ଆରେ ଆୟ୍ଲକୁଙ୍ଗ୍ ବିନସ୍ଟ କେୟୁଟେ। ମସା ଏସେବେଲ୍ କପେଟୁକ୍ ଇଡ୍ଗି ୱାନଣ୍ତ୍ ଆରେ ଆୟ୍ ମୁର୍ତିଙ୍ଗ୍ ସୁଡେଣ୍ତ୍, ଅଣ୍ତ୍ ପେରିନ୍ ରିସା ଏନଣ୍ତ୍ ଜେ ମାପ୍ରୁ ଏରେ କାଣ୍ତ୍ଟେ ପାଟାନ୍ ଦସ୍ଗଟା ଆଦେସ୍ଗିଲ୍ ଲେକାସି ମାଟଣ୍ଡ୍ ମସା ଆଦିଙ୍ଗ୍ କାରି ସୁନ୍ ସୁନା କେନଣ୍ତ୍।
ଆମାଟୁକ୍ ମସା ଆୟ୍ ମୁର୍ତିଙ୍ଗ୍ କୁର୍କି ସୁନ୍ ସୁନା କେୟିକାରେଣ୍ତ୍, ଆରେ ଆୟ୍ ସନାଙ୍ଗ୍ ନିର୍ତିନ୍ କାରିସିନଣ୍ତ୍ ଆରେ ଲକ୍ଗୁଲୁଙ୍ଗ୍ ଆୟ୍ ନିର୍ ଉନୁଙ୍ଗ୍ ସିନଣ୍ତ୍। ମାପ୍ରୁ ଲକ୍ଗୁଲୁଙ୍ଗ୍ ପେଲ୍ ମଆମାରି ସୟ୍ତଣ୍ତ୍ ଆରେ ଆୟ୍ ମଆମାରିନା ପେଙ୍ଗୁର୍ତୁଲ୍ଲକ୍ ସାୟିସେୟର୍। ମସା ଏରେ ପର୍ତୁମ୍ଟେ କାଣ୍ତ୍ ପାଟାଙ୍ଗ୍ ପୁନ୍ସି ମାଟଣ୍ତ୍ ଆଦିନ୍ ବାଦୁଲ୍ନା ଅଣ୍ତ୍ ଉକୁଟ୍ ପୁନେଦ୍ଟେ କାଣ୍ତ୍ପାଟାନ୍ ଦସ୍ଗଟା ଆଦେସ୍ଗିଲ୍ ଲେକାତଣ୍ତ୍।
ଆଦିନ୍ କୁଣ୍ତେଲ୍ ଅଣ୍ତ୍ ଆରେତରେକ୍ ଆୟ୍ କପେଲ୍ ଆନ୍ଜେଣ୍ତ୍ ଆରେ ମାପ୍ରୁନ୍ ପେଲ୍, ଲକ୍ଗୁଲୁଙ୍ଗ୍ କେମା ସିଗିଙ୍ଗ୍ ପାଇଟ୍ ପାର୍ତନା କେନଣ୍ତ୍, ମାପ୍ରୁ ମସାନେ ପାର୍ତନା ୱେଞ୍ଜି ଆୟ୍ ଲକୁଙ୍ଗ୍ କେମା ସିନଣ୍ତ୍। ମସା କପେଲ୍ଟୁକ୍ ପୁନେଦ୍ଟେ ଦସ୍ଗଟା କାଣ୍ଡ୍ ପାଟାନ୍ ଦସ୍ଗଟା ଆଦେସ୍ଗିଲ୍ନା ଇଡ୍ଗି ୱାନଣ୍ତ୍, ଆଦିନ୍ କୁଣ୍ତେଲ୍ ମାପ୍ରୁ ସିୟନ୍ କପେଲ୍ଟୁକ୍ ଜିଦ୍ଟେ ଦେସ୍ ଦିଗାଲ୍ ଇସ୍ରାଏଲ୍ ଲକ୍ଗୁଲୁଙ୍ଗ୍ କାଡାସି ଉନଣ୍ତ୍।
ବାଇବଲ୍ଟେ ଉକୁଟ୍ କେରାଲା: ଜାତରା ୧୯-୩୪
Free to use, adapt, and share under an open license (CC BY-SA 4.0).