14. ୧୪- ଇସ୍ରାଏଲ୍ତିଲ୍ ମରୁବାସେନ୍ ମେୟ୍କଣ୍ଡି
ମାପ୍ରୁ ଇସ୍ରାଏଲ୍ଲକ୍ନା ନିୟମ୍ଗୁଲ୍, ଅଣ୍ତ ଆୟଲକୁଙ୍ଗ୍ ଅଣ୍ତୁନାଟ୍ ଜିଦ୍ଟେ ଉକୁଟ୍ ବାଗ୍ ପାଲନ୍ କେଗିଙ୍ଗ୍ ଇସା କେଗିନଣ୍ତ୍, ପକ୍ଦାନ୍ ଦାପ୍ରେନ୍ ଆୟ୍ଲକ୍ ସିୟନ୍ କପେଲ୍ଟୁକ୍ ପେତର୍, ମାପ୍ରୁ ଆୟ୍ଲକୁଙ୍ଗ୍ ଜିଦ୍ଟେ ଦେସ୍ ଦିଗାଲ୍ କାଡାସି ଉଗୁଙ୍ଗ୍ ଆରାମ୍ କେନଣ୍ତ୍, ଏରେ ଦେସିଙ୍ଗ୍ କି କିନାନ୍ ଏଞ୍ଜି ପକୁନର୍। ମଗୁଲ୍ ଆୟ୍ଲକୁଙ୍ଗ୍ ଆଗାଡି ଆଗାଡି କିନାନ୍ ଦେସ୍ ଦିଗାଲ୍ ସେନିନେ ଆରେ ଆୟ୍ଲକ୍ ଆଦିନ୍ କୁଣ୍ତୁନ୍ କୁଣ୍ତୁନ୍ ସେନିନର୍।
ମାପ୍ରୁ ଅବ୍ରାମୁଙ୍ଗ୍ ଆରେ ଇସାକିଙ୍ଗ୍, ଜାକୁବଙ୍ଗ୍ ଜିଦ୍ କେଇମାଟେ, ଅଣ୍ତ୍ ଜିଦ୍ କେୟଣ୍ତି ଦେସ୍ ଆୟ୍ଲକ୍ନେ କୁଲୁଙ୍ଗ୍ ସିଦାଣ୍ତ୍, ମାତର୍ ଆଟେଲ୍ ଆୟ୍ବାସେନ୍ ପେଙ୍ଗିଟ୍ ଲକ୍ଗୁଲ୍ନେ ଦଲ୍ ବାସେ ଏରିମାଟର୍। ଆୟ୍ଲକୁଙ୍ଗ୍ କିନାନିୟ ଏଞ୍ଜି ପକୁନର୍, କିନାନ୍ଟେ ଲକ୍ ମାପ୍ରୁଙ୍ଗ୍ ଉପାସନା କେୟାମାନର୍ କି ଆଦିନେ ଆଗିୟା ମାନ୍ ଏରାମାନର୍, ଆୟ୍ଲକ୍ ୱେନ୍ ୱେନ୍ଦିଲିଙ୍ଗ୍ ଉପାସନା କେଗିନର୍ ଆରେ ପେଙ୍ଗିଟ୍ ଉୟାଟେ କାମେଲ୍ କେଗିନର୍।
ମାପ୍ରୁ ଇସ୍ରାଏଲ୍ ଲକୁଙ୍ଗ୍ ପକେଣ୍ତ୍, ଜିଦ୍ଟେ ଦେସ୍ତିନ୍ ଇମ୍ଗୁଲ୍ ପାଟିନ୍ କିଣାନିୟ ପେଲ୍ଟୁକ୍ ତ୍ରାହି ପାୟ୍ଏରିଙ୍ଗ୍ ଦର୍କାର୍। ଆୟ୍ଲକ୍ନା ସାନ୍ତି ଗଡାମେର୍ ଆରେ ଆୟ୍ଲକୁଙ୍ଗ୍ ଅଦୁର୍ ଏର୍ମେର୍। ଇମ୍ଗୁଲ୍ ଆୟ୍ ପାଟିନ୍ ଲକ୍ନେ ମୁର୍ତିଲିଙ୍ଗ୍ ପୁରାପୁରୁନ୍ ବିନସ୍ଟ କେୟୁର୍। ଜଦି ଇମ୍ଗୁଲ୍ ଆନେ ଆଦେସ୍ ମାନ୍ଏରାର୍, ଆନ୍ ବଦଲ୍ରେନ୍ ଇମ୍ଗୁଲ୍ ଆୟ୍ଲକ୍ନେ ତିୟାର୍ କେୟ୍ଣ୍ତି ମୁର୍ତିଲିଙ୍ଗ୍ ଉପାସନା କେମେର୍।
ଇସ୍ରାଏଲ୍ତିଲ୍ ଏରେବେଲାଙ୍ଗ୍ କିଣାନିୟ ଲକୁଙ୍ଗ୍ ପେଲ୍ ଏଦେର୍, ଏରେବେଲାଙ୍ଗ୍ ମସା ପାଟିନ୍ ଜାତିଟେ ଉକୁର୍ ଉକୁର୍ କେୟି ବାର ପୁରୁସ ଲକୁଙ୍ଗ୍ ଆସ୍କେଣ୍ତ୍। ଅଣ୍ତ୍ ଲକୁଙ୍ଗ୍ ଆୟ୍ ଦେସ୍ତିନ୍ ସେଞ୍ଜି ଆଦ୍ ସୁଡୁଙ୍ଗ୍ ପାୟିଟ୍ ଏଟେନ୍ ଆଦ୍ ପାକିପାକି ସୁଡି ୱାରିଙ୍ଗ୍ ପାୟିଟ୍ ପକିମାଟଣ୍ତ୍। କିଣାନିୟତୁଲ୍ ପେରିନ୍ ସକ୍ତିଟେ ଲକ୍ ଏନ୍ଗଡ୍ ମେନ୍ ଆୟ୍ ଲକ୍ ପେରିନ୍ ଦୁର୍ବଲ୍ଟେ ଲକ୍ ମାଟର୍ ଆଦ୍ ମେନ୍ ନିୟା ସୁଡୁଙ୍ଗ୍ ପାୟିଟ୍ ଆୟ୍ଲକୁଙ୍ଗ୍ ପକିମାଟଣ୍ତ୍।
ଆୟ୍ ବାରଲକ୍ କିଣାନ୍ ପାଟିନ୍ ଦିଗାଲ୍ ଚାଲିସ୍ ଦିନ୍ ଆରେଙ୍ଗ୍ ମେୟ୍କି ୱାନର୍। ଆୟ୍ଲକ୍ ଲକ୍ଗୁଲୁଙ୍ଗ୍ ପକେର୍ ଆୟ୍ ଦେସ୍ ପେରିନ୍ ନିୟାଟେ ଆରେ ଆମାନ୍ ପେରିନ୍ ପଲ୍ ମାଲ୍ ଏଦା ମାତର୍ ଆମାନ୍ ସୁଡିୱାଦାନ୍ ଲକୁଙ୍ଗ୍ ତାନିର୍ଟୁକ୍ ଦସ୍ଲକ୍ ପକେର୍ ଆମାଟେ ଗଡ୍ଗୁଲ୍ ପେରିନ୍ ବେର୍ବେର୍ଟେ ଆରେ ଆମାଟେ ଲକ୍ଗୁଲ୍ ପେରିନ୍ ଡେଙ୍ଗା ଡେଙ୍ଗାଟେ ଲକ୍। ଜଦି ଆମ୍ ଆୟ୍ଲକୁଙ୍ଗ୍ ଆଟ୍ଦାମ୍, ଆୟ୍ଲକ୍ ନିଚୟ୍ ଆମ୍ଗୁଲୁଙ୍ଗ୍ ଆରାସି କେରିନ୍ ଆମ୍ଗୁଲୁଙ୍ଗ୍ ୱାଟ୍ତେନ୍ ଆଟ୍ତାର୍।
ଆମାଟୁକ୍ ଆୟ୍ ଇରୁଲ୍ ଗୁପ୍ତ ସର୍କୁଲ୍ କାଲେବ୍ ଆରେ ଜିୟସୁୟ ପକେର୍, ଇଦ୍ ସତ୍ ଜେ କିନାନ୍ଟେ ଲକ୍ଗୁଲ୍ ପେରିନ୍ ଡେଙ୍ଗ୍ ଆରେ ସକ୍ତିଟେ ଲକ୍, ମାତର୍ ଆମ୍ ଆୟ୍ଲକୁଙ୍ଗ୍ ନିସୟ୍ ଆରାତାମ୍, ମାପ୍ରୁ ଆମ୍ଗୁଲ୍ ପାଙ୍ଗିଟ୍ ଏରି ଜୁଦ୍ କେଦା।
ମାତର୍ ଲକ୍ଗୁଲ୍ କାଲେବ୍ ଆରେ ଜିୟସୁୟଙ୍ଗ୍ ପାଟେ ୱେନୁଟର୍। ଆୟ୍ଲକ୍ ମସାଙ୍ଗ୍ ଆରେ ଆରନୁଙ୍ଗ୍ ପେଲ୍ ପେରିନ୍ ରିସାଏରି ପକେର୍ ଇମ୍ ଏନାଦିଙ୍ଗ୍ ଆମ୍ଗୁଲୁଙ୍ଗ୍ ଇୱାଡିଟେ ବୟକାର୍ଟେ ବାସେନ୍ ଇନ୍ଦିରିମାର୍? ଆମ୍ ଜୁଦ୍ ବାସେନ୍ ସାଦାନ୍ ପେଲ୍ଟୁକ୍ ମିସର୍ତୁନ୍ ମାନ୍ଗଡ୍ ବଲ୍ ମାଟେମେନ୍ ଆରେ ଆମ୍ଗୁଲ୍ନେ ଆୟାସିଲ୍ ଆରେ ସିଣ୍ତିଲ୍ ମାସିଲ୍ ଦାସି ଏରିମାଟର୍ମେନ୍। ଲକ୍ଗୁଲ୍ ଆୟ୍ଲକୁଙ୍ଗ୍ ପାଇଟ୍ ୱେନ୍ ଉକୁର୍ ଲକୁଙ୍ଗ୍ ନେତା ଆସ୍କିଙ୍ଗ୍ ଇସା କେନର୍ ଏଟେନ୍କି ଆରେତରେକ୍ ମିସର୍ତୁନ୍ ଉଗୁଙ୍ଗ୍ ଅଡ୍ତାଣ୍ତ୍।
ମାପ୍ରୁ ପେରିନ୍ ରିସାଏନେ ଆରେ ସମାଗମ ତମ୍ବୁନ୍ ୱାନେ, ମାପ୍ରୁ ପକେଣ୍ତ୍ ଇମ୍ଗୁଲ୍ ଆନ୍ ବିରଦ୍ନା ଉୟାଟେ ପାର୍କିମାର୍, ଆଦିଙ୍ଗ୍ ପାଇଟ୍ ପାଟିନ୍ଲକ୍ଗୁଲ୍ ମରୁବାସେନ୍ ପାୱ୍ ବାନାଏଦାନ୍ ୱାଡିନ୍ ମେଇକ୍ଦାର୍। ଜିୟସୁୟ ଆରେ କାଲେବ୍ବୁଙ୍ଗ୍ ସାକାରି ପାଟିନ୍ଲକ୍ କଡେ ବାରିସ୍ଟୁକ୍ ପୟିତାଟେଲକ୍ ପାଟିନ୍ ଆମାନ୍ ସାଦାର୍ ଆରେ ଆୟ୍ଲକ୍ ଜିଦ୍ଟେ ଦେସ୍ତିନ୍ ନାନିଙ୍ଗ୍ ଅଡାର୍।
ଲକ୍ଗୁଲ୍ ଆଟେଲ୍ ଇଦ୍ ୱେଟର୍, ଆଟେଲ୍ ଆୟ୍ଲକ୍ ପାପ୍ କେଇମାର୍ ଆଦିଙ୍ଗ୍ ପାଇଟ୍ ଦୁକ୍ କେନର୍, ଆୟ୍ଲକ୍ ନିଜେଟେ କାଣ୍ତାଲ୍ ପାତି କିନାନ୍ତିନ୍ ମାନ୍ ଲକ୍ଗୁଲୁଙ୍ଗ୍ ଆଟିଙ୍ଗ୍ ପାଇଟ୍ ପେତର୍। ମସା ଆୟ୍ଲକୁଙ୍ଗ୍ ସେନିଙ୍ଗ୍ ମାନା ପାଇର୍ ମାନା କେନଣ୍ତ୍ ମାତର୍ ମାପ୍ରୁ ଆୟ୍ଲକ୍ନା ମାନାମାଟେ, ମାତର୍ ଆୟ୍ଲକ୍ ଅଣ୍ତୁନେ ପାଟେଙ୍ଗ୍ ୱେନୁଟର୍।
ମାପ୍ରୁ ଆୟ୍ ଜୁଦ୍ ବାସେନ୍ ଆୟ୍ଲକ୍ନା ସେନୁଟେ, ଆଦିଙ୍ଗ୍ ଆୟ୍ଲକ୍ଗୁଲ୍ ଆର୍ଏନର୍ ଆରେ ଆୟ୍ଲକୁଙ୍ଗ ପେଲ୍ଟୁକ୍ ଏଙ୍ଗୁର୍ତୁଲ୍ ବିନାସ୍ ଏନର୍, ଆମାଟୁକ୍ ଇସ୍ରାଏଲ୍ ଲକ୍ କିନାନ୍ଟୁକ୍ ମାଣ୍ତି ମରୁବାସେନ୍ ସାଲିସ୍ ବାରିସ୍ ଆରେକ୍ ମେୟ୍କେର୍।
ଇସ୍ରାଏଲ୍ଟେ ଲକ୍ଗୁଲ୍ ମରୁବାସେନ୍ ମେଇକ୍ଦାନ୍ ସାଲିସ୍ ବାରିସ୍ ମାପ୍ରୁ ଆୟ୍ଲକୁଙ୍ଗ୍ ପାଟିନ୍ ବିସୟ୍ ଜାଗାସି ସିନେ, ମାନା ପିଦିର୍ଟେ ସର୍ଗେଟେ କାଦି ସିନେ, ଆରେ ଆୟ୍ଲକ୍ ବାସେଏରଣ୍ତି ବାସେନ୍ ଗାଦି ଗାଦି ତୁମେ ତିତେଲ୍ ସୟ୍ତେ, ଏଟେନ୍ କି ଆୟ୍ଲକୁଙ୍ଗ୍ ପାଇଟ୍ ସେପୁଲ୍ ତିନିଙ୍ଗ୍ ଅଡ୍ତାର୍, ଇ ବେଲେନ୍ ମାପ୍ରୁ ଆୟ୍ଲକୁଙ୍ଗ୍ ନୁଡୁଙ୍ଗ୍ ବସ୍ତର୍ ଆରେ ପାଦ୍ଟେ ପଣ୍ତୟ୍ଗୁଲ୍ ଜିର୍ଏରିଙ୍ଗ୍ ସିୟୁଟଣ୍ତ୍।
ମାପ୍ରୁ ଇ ୱାଡିନ୍ କାବା କାମେନା କାଣ୍ତ୍ଟୁକ୍ ଆୟ୍ଲକୁଙ୍ଗ୍ ପାଇଟ୍ ନିର୍ ସିନଣ୍ତ୍। ମାତର୍ ଇ ପାଟିନ୍ କାମେ ସୁଡି ଇସ୍ରାଏଲ୍ଟେ ଲକ୍ଗୁଲ୍ ମାପ୍ରୁଙ୍ଗ୍ ଆରେ ମସାଙ୍ଗ୍ ବିରଦ୍ନା ମନେନ୍ ମନେନ୍ ଉଡାତର୍, ଇ ୱାଡିନ୍ ଏତାଲିନ୍ମେନ୍ ମାପ୍ରୁ ଅବ୍ରାମ୍, ଇସାକ୍ ଆରେ ଜାକୁବଙ୍ଗ୍ ନାଟ୍ କେୟଣ୍ତି ଜିଦିଙ୍ଗ୍ ସପଲ୍ କେନଣ୍ତ୍।
ଆୟ୍ବେଲ୍ ଲକ୍ଗୁଲୁଙ୍ଗ୍ ନିର୍ ତଣ୍ତୁଟେ, ମାପ୍ରୁ ମସାଙ୍ଗ୍ ପକେଟେ ଆୟ୍କାଣ୍ତିଙ୍ଗ୍ ପକ୍ ଆଟେଲ୍ ନିର୍ପେତା, ମାତର୍ ମସା କାଣ୍ତିଙ୍ଗ୍ ପାଟେ ବାଦୁଲ୍ନା ଦୁଇତର୍ କାନ୍ୱେନା ଆଟ୍ତାଲିନ୍ ପାଟିନ୍ ଲକୁଙ୍ଗ୍ କାକେଲ୍ ମାପ୍ରୁଙ୍ଗ୍ ଅସନ୍ମାନ୍ କେନଣ୍ତ୍, ପାଟିନ୍ ଲକ୍ ଏରେୱାଡିନ୍ ନିର୍ ଉନୁଙ୍ଗ୍ ଅଡ୍ତାର୍ ଆୟ୍ୱାଡିନ୍ ନିର୍ପେସି ୱାନେ, ମାତର୍ ମସାଙ୍ଗ୍ ପୟିତାନ୍ ମାପ୍ରୁ ରିସା ଏରିମାଟେ ଆରେ ଆଦ୍ ପକେଟେ ଜିଦ୍ଟେ ଦେସ୍ତିନ୍ ନାନିଙ୍ଗ୍ ଅଡାଟ୍।
ଇସ୍ରାଏଲ୍ ଲକ୍ ସାଲିସ୍ ବାରିସ୍ ମରୁବାସେନ୍ ମେଇକ୍ଦାନ୍ କୁଣ୍ତେଲ୍, ମାପ୍ରୁଙ୍ଗ୍ ବିରଦ୍ନା ଉୟାଟେ ପାଟେଲ୍ ପକିମାଟର୍, ଆୟ୍ପାଟିନ୍ ଲକ୍ ସାନର୍, ଆରେ ମାପ୍ରୁ ଆରେତରେକ୍ ପର୍ତିଗିୟା ଦେସ୍ଟେ ମରୁବାସେନ୍ ଆୟ୍ଲକୁଙ୍ଗ୍ ପାତି ସେଞ୍ଜିମାଟଣ୍ତ୍, ମସା ପେରିନ୍ ମୁତାକ୍ ଏରିସେଞ୍ଜି ମାଟଣ୍ତ୍, ଆଦିଙ୍ଗ୍ ଲକ୍ଗୁଲୁଙ୍ଗ୍ ପାୱ୍ କାଡାକିଙ୍ଗ୍ ପାଇଟ୍ ଅଣ୍ତୁଙ୍ଗ୍ ସାୟ୍ଜ କେଗିଙ୍ଗ୍ ପାଇଟ୍ ଅଣ୍ତ୍ ଜିୟସୁୟଙ୍ଗ୍ ଆସ୍କେଣ୍ତ୍, ମାପ୍ରୁ ମସାଙ୍ଗ୍ ଆରେକୁଟ୍ ପର୍ତିଗିୟା କେନଣ୍ତ୍, ଅଣ୍ତ୍ ମାସାନ୍ ୱାଡିନ୍ ଆରେକୁର୍ ବାବବାଦିଙ୍ଗ୍ ସୟତାଣ୍ତ୍।
ଆମାଟୁକ୍ ମସାଙ୍ଗ୍ ମାପ୍ରୁ ଉକୁଟ୍ କପେଲ୍ ପୟିତାନ୍ ସକୁଙ୍ଗ୍ ପକେଣ୍ତ୍, ଏଟେନ୍ କି ଅଣ୍ତ୍ ଆମାଟୁକ୍ ପର୍ତିଗିୟା କେୟଣ୍ତି ଦେସ୍ସୁଡୁଙ୍ଗ୍ ଅଡ୍ତାଣ୍ତ୍। ମସା ପର୍ତିଗିୟା ଦେସ୍ ସୁଡୁଙ୍ଗ୍, ମାତର୍ ଅଣ୍ତ୍ ଆମାନ୍ ନାନିଙ୍ଗ୍ ମାପ୍ରୁ ଅନୁମତି ସିୟୁଟେ, ଆମାନ୍ ମସା ସାନଣ୍ତ୍, ଆରେ ଇସ୍ରାଏଲ୍ ଲକ୍ ତିରିସ୍ ଦିନ୍ ଅଣ୍ତୁଙ୍ଗ୍ ପାଇଟ୍ ଆଡେର୍, ଜିଅସୁୟ ଆୟ୍ଲକ୍ନେ ପୁନେଦ୍ଟେ ନେତା ଏନଣ୍ତ୍, ଜିଅସୁୟ ଉକୁର୍ ନିୟାଟେ ନେତା ମାଟଣ୍ତ୍, ମାତର୍ ଅଣ୍ତ୍ ମାପ୍ରୁନ୍ ପେଲ୍ ଆସା ଇରିନଣ୍ତ୍ ଆରେ ଅଣ୍ତୁନେ ଆଦେସ୍ ମାନ୍ଏରିନଣ୍ତ୍।
ବାଇବଲ୍ଟେ ଉକୁଟ୍ କେରାଲା: ଜାତରା ୧୬-୧୭; ଗନନା ୧୦-୧୪; ୨୦; ୨୭; ଦୁତିୟ ବିବରନି ୩୪
Free to use, adapt, and share under an open license (CC BY-SA 4.0).