15. ୧୫- ଜିଦ୍ଟେ ଦେସ୍ କିନାନ୍
ଆମାଟୁକ୍ ଜିଦ୍ଟେ ଦେସ୍ କିନାନ୍ତିନ୍ ଇସ୍ରାଏଲ୍ଟେ ଲକ୍ଗୁଲ୍ ନାନିଙ୍ଗ୍ ଉକୁଟ୍ ବେଲାମାଟେ, ବେର୍ଟେ ପାସିରି ଡେୱାଟେ କିନାନ୍ଟେ ଗଡ୍ ଜିରିଅଙ୍ଗ୍ ସୁଡି ୱାରିଙ୍ଗ୍ ପାଇଟ୍ ଜିଅସୁୟ ଇରୁଲ୍ ଗୁପ୍ତ ସର୍କୁଲୁଙ୍ଗ୍ ସୟତଣ୍ତ୍, ଆୟ୍ଗଡ୍ତୁନ୍ ରାଆବ୍ ପିଦିର୍ଟେ ଅକାଲ୍ ବେସିୟା ଆସ୍ମାଲ୍ ମାଟେ, ଆଦ୍ ଆୟ୍ ଗୁପ୍ତ ସର୍କୁଲୁଙ୍ଗ୍ ପାକୁସି ଆୟ୍ଲକୁଙ୍ଗ୍ ୱେନ୍ ପାଙ୍ଗିଟ୍ ସେନିଙ୍ଗ୍ ପାଇଟ୍ ସାୟ୍ଜ କେନେ। ଆଦ୍ ଇ ୱାଡିନ୍ କେନେ, ମାତର୍ ମାପ୍ରୁନ୍ ପେଲ୍ ବିସ୍ବାସ୍ କେନେ, ଆୟ୍ଲକ୍ ଏଟେନ୍ ରାଆବୁଙ୍ଗ୍ ଆରେ ଆଦିନେ ପରିବାରିଙ୍ଗ୍ ସୁରକିୟା କେଦାର୍। ଇସ୍ରାଏଲ୍ ଲକ୍ ଏରେବେଲ୍ ଜିରିୟଙ୍ଗ୍ ବିନସ୍ଟ କେଗିଙ୍ଗ୍ ଏଞ୍ଜି ଜିଦ୍ କେନର୍।
ଇସ୍ରାଏଲ୍ ଲକ୍ ଜିଦ୍ଟେ ଦେସ୍ତିନ୍ ସେନିଙ୍ଗ୍ ପାୟିଟ୍ ଜର୍ଦନ୍ ପେରେଟ୍ କାରିକିଙ୍ଗ୍ ପାରେଟେ। ମାପ୍ରୁ ଜିଅସିୟ୍ଙ୍ଗ୍ ପକେଣ୍ତ୍ ଯାଜକ୍ତୁଲ୍ ପର୍ତୁମ୍ ସେନ୍କାର୍। ଯାଜକ୍ତୁଲ୍ ଏରେବେଲ୍ ଜର୍ଦନ୍ ପେରେଟ୍ତିନ୍ ସେନିଙ୍ଗ୍ ଆରାମ୍ କେନର୍, ଆୟ୍ବେଲେନ୍ ପୟ୍ତାନ୍ ମାନଣ୍ତି ନିର୍ ୱାରିଙ୍ଗ୍ ବନ୍ଦ୍ ଏନେ ଏଟେନ୍କି ଇସ୍ରାଏଲ୍ତିଲ୍ ୱାଟଣ୍ଡି ବାସେନ୍ ତାକିତାକି ଜର୍ଦନ୍ ପେରେଟ୍ କାର୍ତାର୍।
ଲକ୍ଗୁଲ୍ ଯର୍ଦନ୍ ପେରେଟ୍ କାର୍ତାନ୍ କୁଣ୍ତେଲ୍, ସକ୍ତିସାଲି ଗଡ୍ ଯିରିୟଙ୍ଗ୍ ଏଟେନ୍ ଆଟିଙ୍ଗ୍ ଏଦା ଆଦ୍ ମାପ୍ରୁ ଯିହସିୟଙ୍ଗ୍ ପକିମାଟଣ୍ତ୍। ଲକ୍ଗୁଲ୍ ମାପ୍ରୁନେ ଆଦେସ୍ ମାନ୍ଏନର୍। ମାପ୍ରୁ ଏଟେନ୍ ପକିମାଟଣ୍ତ୍, ଆପାଡି ସନିୟ୍ତୁଲ୍ ଆରେ ଯାଜକ୍ତୁଲ୍ ଦିନିଙ୍ଗ୍ ତରେକ୍ ଇ ୱାଡିନ୍ ସଅ ଦିନ୍ ଯିରିୟ ଗଡ୍ ଚାରିବେଡ୍ତେନ୍ ମେୟ୍କେର୍।
ଆଦିଙ୍ଗ୍ କୁଣ୍ତେଲ୍ ସାତ୍ ଦିନ୍ ସିରିସ୍, ଇସ୍ରାଏଲ୍ତିଲ୍ ସାତ୍ ତର୍ ମେୟ୍କେର୍। ଏସେବେଲ୍ ଆୟ୍ଲକ୍ ଗଡ୍ ଚାରିବେଡ୍ତେନ୍ ଶେସ୍ତର୍ ପାୟିଟ୍ ମେୟ୍କେର୍, ଆୟ୍ବେଲ୍ ସନିୟତୁଲ୍ ଜୟ୍ଟେ ଆୱ୍ଲି କେନର୍ ଆରେ ଯାଜକ୍ତୁଲ୍ ବାକା ଉନ୍ଦେର୍।
ଆଟେଲ୍ ଜିରିୟଟେ ପାସ୍ରି ମେଲ୍ଗି ବାସ୍ଲା ଏରି ଇଲେଟେ, ମାପ୍ରୁନେ ଆଦେସ୍ ଅନୁସାରେନ୍ ଇସ୍ରାଏଲ୍ ଲକ୍ଗୁଲ୍ ଗଡ୍ଟେ ପାଟିନ୍ ଦିନ୍ସୁଲ୍ ବିନସ୍ଟ କେନର୍। ଆୟ୍ଲକ୍ ମାତର୍ ରାଆବ୍ ଆରେ ଆଦିନେ ପରିବାରିଙ୍ଗ୍ ରକିୟା କେନର୍, ଆୟ୍ଲକ୍ ଇସ୍ରାଏଲ୍ତିନ୍ ମିସ୍ଏନର୍। କିନାନ୍ତିନ୍ ମାନ୍ ୱେନ୍ଲକ୍ଗୁଲ୍ ଇ ପାଟେ ୱେଟର୍ ଇସ୍ରାଏଲ୍ଲକ୍ଗୁଲ୍ ଜିରିୟଙ୍ଗ୍ ବିନାସ୍ କେଇମାର୍, ଆୟ୍ଲକ୍ ନାର୍ସିସେୟର୍ ଜେ ଇସ୍ରାଏଲ୍ଲକ୍ ଆୟ୍ଲକୁଙ୍ଗ୍ମେନ୍ ବିନାସ୍କେଦାର୍।
କିନାନ୍ଟେ ଏରେମେନ୍ ଲକ୍ଦଲ୍ ନା ମିସ୍ଏରିଙ୍ଗ୍ ମାନା ପାୟିଟ୍ ମାପ୍ରୁ ଇସ୍ରାଏଲ୍ ଲକୁଙ୍ଗ୍ ଆଦେସ୍ ସିୟିମାଟଣ୍ତ୍। ମାତର୍ ଗିବିୟନ୍ ପିଦିର୍ଟଣ୍ତ୍ ଉକୁର୍ କିନାନିୟ ଲକ୍ଦଲ୍ ଜିହସିୟଙ୍ଗ୍ ମିଚ୍ ପକେର୍ ଜେ ଆୟ୍ଲକ୍ କିନାନ୍ଟେ ପେରାଦୁରିନ୍ ମାନଣ୍ତି ବାସେଟୁକ୍ ୱାରିମାୟାର୍। ଆୟ୍ଲକ୍ ଜିହସିୟଙ୍ଗ୍ ଆୟ୍ଲକ୍ ନାଟ୍ ସାନ୍ତିନା ମାନିଙ୍ଗ୍ ପକେର୍।
ଗିବିୟନ୍ତୁଲ୍ ଏରେମାଟୁକ୍ ୱାରିମାଟର୍ ଆଦ୍ ଜିହସିୟ ଆରେ ଇସ୍ରାଏଲ୍ତିଲ୍ ମାପ୍ରୁଙ୍ଗ୍ ପାଚାର୍ ପୁଟର୍। ଆଦିଙ୍ଗ୍ ଜିହସିୟ ଆୟ୍ଲକ୍ ନା ସାନ୍ତି କେନଣ୍ତ୍। ଗିବିୟନ୍ଟେ ଲକ୍ ଆମୁଙ୍ଗ୍ ନାଡାସି ମାର୍ ଏଞ୍ଜି ଏସେବେଲ୍ ପୁଟର୍ ଆଟେଲ୍ ଆୟ୍ଲକ୍ ରିସା ଏନର୍, ମାତର୍ ଆୟ୍ଲକ୍ ଆୟ୍ଲକ୍ ନା କେୟଣ୍ତି ସାନ୍ତିଟେ ନିୟମ୍ ରକିୟା କେୟିମାଟର୍ ଏନାଦିଙ୍ଗ୍ କି ଇଦ୍ ମାପ୍ରୁନେ ଆଦେସ୍ ମାଟେ। କାଣ୍ତେକ୍ ବେଲା କୁଣ୍ତେଲ୍, କିନାନ୍ତିନ୍ ମାନଣ୍ତି ଅମରିୟ ପିଦିର୍ଟେ ୱେନ୍ ଉକୁଟ୍ ଲକ୍ଦଲ୍ଟେ ରାଜାତିଲ୍ ୱେନିଙ୍ଗ୍ ଅଡ୍ତର୍ ଜେ ଆୟ୍ଲକ୍ ଇସ୍ରାଏଲ୍ ଲକ୍ ନା ସାନ୍ତିଟେ ନିୟମ୍ କେୟି ମାୟାର୍, ଆଦିଙ୍ଗ୍ ଆୟ୍ଲକ୍ ଆୟ୍ଲକ୍ନେ ସନିୟ୍ଦଲୁଙ୍ଗ୍ ରୁଣ୍ତାସି କେରିନ୍ ବେର୍ଟେ ଦଲ୍ କେନର୍ ଆରେ ଗିବିୟନୁଙ୍ଗ୍ ଆଟେର୍। ଗିବିୟନ୍ଟେ ଲକ୍ ଜିହସିୟଙ୍ଗ୍ କାକେଲ୍ ସାହିଜ ପାୟିଟ୍ ଉକୁଟ୍ କାବୁର୍ ପକି ସୟ୍ତର୍।
ଆଦିଙ୍ଗ୍ ଜିହସିୟ ଇସ୍ରାଏଲ୍ଟେ ସନିୟଦଲୁଙ୍ଗ୍ ଉକୁଟ୍ ପେଲ୍ କେନଣ୍ତ୍ ଗିବିୟନ୍ଲକୁଙ୍ଗ୍ ଆର୍ସେଲ୍ ଏଦିଙ୍ଗ୍ ପାୟିଟ୍ ସାରା ରାତି ତାକେର୍। ଆଡ୍ତଲି ଆୟ୍ଲକ୍ ଅମରିୟ ସନିୟଦଲୁଙ୍ଗ୍ କାବା କେୟି ଆୟ୍ଲକୁଙ୍ଗ୍ ଆଟେର୍।
ମାପ୍ରୁ ଆୟ୍ସିରିସ୍ ଇସ୍ରାଏଲ୍ଲକୁଙ୍ଗ୍ ପାୟିଟ୍ ଜୁଦ୍ କେନଣ୍ତ୍। ଅଣ୍ତ୍ ଅମରିୟ ସନିୟଦଲୁଙ୍ଗ୍ କାବା କେୟି କେରିନ୍ ଆଦିର୍ କାଣ୍ତ୍କିଲ୍ ସୟ୍ତଣ୍ତ୍ ଇଦ୍ ପେଙ୍ଗୁର୍ତୁଲୁଙ୍ଗ୍ ଅମରିୟ ଲକ୍ନେ ଜିୱେଙ୍ଗ୍ ଉନେୱେ୍।
ମାପ୍ରୁ ମଗୁଲ୍ଟେ ୱେଲେଙ୍ଗ୍ ଉକୁଟ୍ ପେଲ୍ ଅଟ୍କାସି ଇରେଣ୍ତ୍ ଏଟେନ୍ କି ଇସ୍ରାଏଲ୍ ଲକ୍ ପେରିନ୍ ବେଲା ଆରେକ୍ ଅମରିୟ ଲକୁଙ୍ଗ୍ ଆଟିଙ୍ଗ୍ ଅଡ୍ତାର୍। ଆୟ୍ସିରିସ୍ ମାପ୍ରୁ ଇସ୍ରାଏଲ୍ ପାୟିଟ୍ ବେର୍ଟେ ବିଜୟ ପାୟ୍ଏନଣ୍ତ୍।
ମାପ୍ରୁ ଇ ପାଟିନ୍ ସନିୟଦଲୁଙ୍ଗ୍ ଆରାସି ପଲ୍ଦାନ୍ କୁଣ୍ତେଲ୍, ଆରେମେନ୍ ପେଙ୍ଗିଟ୍ କିନାନ୍ଟେ ଲକ୍ଦଲ୍ ଇସ୍ରାଏଲ୍ ଲକୁଙ୍ଗ୍ ଆଟିଙ୍ଗ୍ ପାୟିଟ୍ ଉକୁଟ୍ ପେଲ୍ ଏନର୍। ଜିହସିୟ ଆରେ ଇସ୍ରାଏଲ୍ ଲକ୍ ଆୟ୍ଲକୁଙ୍ଗ୍ ଆଟେର୍ ଆରେ ବିନସ୍ଟ କେନର୍।
ଇ ଜୁଦ୍ କୁଣ୍ତେଲ୍, ମାପ୍ରୁ ଇସ୍ରାଏଲ୍ଟେ ପାଟିନ୍ ଗସ୍ଟିଙ୍ଗ୍ ଜିଦ୍ଟେ ଦେସ୍ତିନ୍ ନିଜେ ନିଜେଟେ ବାଗ୍ ଅନୁସାରେନ୍ ଆୟ୍ଲକୁଙ୍ଗ୍ ସିନଣ୍ତ୍। ଇଦିଙ୍ଗ୍ କୁଣ୍ତେଲ୍ ମାପ୍ରୁ ଇସ୍ରାଏଲ୍ଟେ ସାନ୍ଦି ଆରେସେଲ୍ ମାନଣ୍ତି ପାଟିନ୍ ଦେସ୍ତିନ୍ ସାନ୍ତି ସିନଣ୍ତ୍।
ଜିହସିୟ ଏରେବେଲ୍ ମୁତାକ୍ ଏନଣ୍ତ୍, ଅଣ୍ତ୍ ଇସ୍ରାଏଲ୍ଟେ ପାଟିନ୍ ଲକୁଙ୍ଗ୍ ଉକୁଟ୍ ପେଲ୍ ଅର୍ଗେଣ୍ତ୍। ଆଦିଙ୍ଗ୍ କୁଣ୍ତେଲ୍ ମାପ୍ରୁ ଇସ୍ରାଏଲ୍ ଲକ୍ନା ସିନୟ୍ କପେଲ୍ ଏରେ ନିୟମ୍ କେୟିମାଟଣ୍ତ୍ ଆୟ୍ ନିୟମ୍ ଆୟ୍ଲକୁଙ୍ଗ୍ ବାଦିୟତା ମାନ୍ଏରିଙ୍ଗ୍ ପାୟିଟ୍ ଆୟ୍ଲକୁଙ୍ଗ୍ ଏତାସି ସିନଣ୍ତ୍। ଲକ୍ଗୁଲ୍ ମାପ୍ରୁଙ୍ଗ୍ ପେଲ୍ ବିସ୍ବାସ୍ରେନ୍ ମାନିଙ୍ଗ୍ ଆରେ ନିୟମ୍ଗୁଲୁଙ୍ଗ୍ ପାଲନ୍ କେଗିଙ୍ଗ୍ ପାୟିଟ୍ ଆଦେସ୍ ସିନଣ୍ତ୍।
ବାଇବଲ୍ଟେ ଉକୁଟ୍ କେରାଲ୍: ଜିଅସୁୟ ୧-୨୪
Free to use, adapt, and share under an open license (CC BY-SA 4.0).