16. ୧୬- ଇସ୍ରାଏଲିଙ୍ଗ୍ ଉଦାର୍ କେଦାନ୍ ଲକ୍
ଜିଅସୁୟ ସାଦାନ୍ କୁଣ୍ତେଲ୍, ଇସ୍ରାଏଲ୍ଲକ୍ଗୁଲ୍ ମାପ୍ରୁଙ୍ଗ୍ ବାନାଏରି ସେୟର୍ ଆରେ ଆୟ୍ଲକ୍ ବାକି କିନାନ୍ଲକୁଙ୍ଗ୍ ସାର୍ପୁଟର୍ କି ମାପ୍ରୁନେ ବେବସ୍ତାଙ୍ଗ୍ ପାଲନ୍ କେୟୁଟର୍। ଇସ୍ରାଏଲ୍ ଲକ୍ ସତ୍ମାପ୍ରୁଙ୍ଗ୍ ଉପାସନା କେଗିଙ୍ଗ୍ ସାକାରି କିନାନ୍ଟେ ୱେନ୍ଦିସିଲିଙ୍ଗ୍ ଉପାସନା କେଗିଙ୍ଗ୍ ଉଣ୍ତେର୍। ଇସ୍ରାଏଲ୍ ଲକ୍ନେ ଏନାମେନ୍ ରାଜା ମାନୁଟଣ୍ତ୍, ଆଦିଙ୍ଗ୍ ପାଟିନ୍ଲକ୍ ଆୟ୍ ଲକ୍ନେ କାନୁଲ୍ତୁନ୍ ଏନାଦ୍ ନିୟା ତଣ୍ତେଟେ ଆଦ୍ ଆୟ୍ଲକ୍ କେନର୍।
ଆମାଟୁକ୍ ଇସ୍ରାଏଲ୍ ଲକ୍ ମାପ୍ରୁଙ୍ଗ୍ ସାକାରି ତାକିଙ୍ଗ୍ ଉଣ୍ତେର୍, ଆଦିଙ୍ଗ୍ ମାପ୍ରୁ ସତ୍ରୁକିଲିଙ୍ଗ୍ ଆନୁମତି ସିତାଲିନ୍ ଆୟ୍ଲକୁଙ୍ଗ୍ ଆରାସି ପେରିନ୍ ଦଣ୍ତ୍ ସିନର୍। ଆୟ୍ ସତ୍ରୁକୁଲ୍ ଇସ୍ରାଏଲ୍ ଲକ୍ନେ ପେଙ୍ଗିଟ୍ ଦିନ୍ସୁଲ୍ ସାଡାସି ଉନର୍, ଆୟ୍ଲକ୍ନେ ଦନ୍ସମ୍ପତି ପାଟିନ୍ ବିନାସ୍ କେନର୍, ଆରେ ଆୟ୍ଲକୁଙ୍ଗ୍ ପେଲ୍ଟୁକ୍ ପେଙ୍ଗୁର୍ ତୁଲୁଙ୍ଗ୍ ଆଟିକାରେର୍। ପେରିନ୍ ବାରିସ୍ ଆରେକ୍ ମାପ୍ରୁନ୍ ଆଦେସ୍ ମାନ୍ଏରା ଏରି ଆୟ୍ଲକ୍ନେ ସତ୍ରୁକୁଲୁଙ୍ଗ୍ ପେଲ୍ଟୁକ୍ ଡଣ୍ତ୍ ପାୟ୍ଏରି ଇସ୍ରାଏଲ୍ ଲକ୍ଗୁଲ୍ ଆନୁତାପ୍ କେନର୍ ଆରେ ଆୟ୍ଲକୁଙ୍ଗ୍ ଉଦାର୍ କେଗିଙ୍ଗ୍ ପାଇଟ୍ ମାପ୍ରୁନ୍ ପେଲ୍ ପାର୍ତନା କେନର୍।
ଆଦିଙ୍ଗ୍ କୁଣ୍ତେଲ୍ ମାପ୍ରୁ ଆୟ୍ଲକୁଙ୍ଗ୍ ଉକୁର୍ ଉଦାର୍ କେୟାକିଙ୍ଗ୍ ଜାଗାତଣ୍ତ୍ ଅଣ୍ତ୍ ଆୟ୍ଲକୁଙ୍ଗ୍ ଆୟ୍ଲକ୍ନେ ସତ୍ରୁପେଲ୍ଟୁକ୍ ରକିୟା କେନଣ୍ତ୍ ଆରେ ଦେସ୍ତିନ୍ ସାନ୍ତି ଇନ୍ଦ୍ରେଣ୍ତ୍। ମାତର୍ ଆଦିଙ୍ଗ୍ କୁଣ୍ତେଲ୍ ଲକ୍ଗୁଲ୍ ମାପ୍ରୁଙ୍ଗ୍ ବାନାଏରି ସେୟର୍, ଆରେତରେକ୍ ମୁର୍ତିଙ୍ଗ୍ ୱାଟେ କେଗିଙ୍ଗ୍ ଆରାମ୍ କେନର୍। ଆଦିଙ୍ଗ୍ ମାପ୍ରୁ କାକେଲ୍ଟେ ସତ୍ରୁ ମିଦିୟାନ୍ ଲକ୍ଗୁଲୁଙ୍ଗ୍ ଆୟ୍ଲକୁଙ୍ଗ୍ ଆରାକିଙ୍ଗ୍ ସିନଣ୍ତ୍।
ମିଦିୟାନ୍ ଲକ୍ ସାତ୍ ବାରିସ୍ ଆରେକ୍ ଇସ୍ରାଏଲ୍ଟେ ତାସ୍ ଉନର୍। ଇସ୍ରାଏଲ୍ ଲକ୍ ପେରିନ୍ ନାର୍ସେର୍, ମିଦିୟାନ୍ଲକ୍ ଏଟେନ୍ କି ଆୟ୍ଲକୁଙ୍ଗ୍ କାଣ୍ତିକିଙ୍ଗ୍ ଅଡାର୍, ଆଦିଙ୍ଗ୍ ପାୟିଟ୍ ଆୟ୍ଲକ୍ ପାର୍ଗିଲ୍ ତାନିର୍ ପାକେର୍। ଆଦିଙ୍ଗ୍ କୁଣ୍ତେଲ୍ ଆୟ୍ଲକୁଙ୍ଗ୍ ଉଦାର୍ କେଗିଙ୍ଗ୍ ପାୟିଟ୍ ଆୟ୍ଲକ୍ନେ ମାପ୍ରୁଙ୍ଗ୍ ଅର୍ଗେର୍।
ଦିନେକ୍, ଗିଦିୟନ୍ ପିଦିର୍ଟଣ୍ତ୍ ଇସ୍ରାଏଲ୍ତିନ୍ ୱାର୍ସିଲ୍ ୱିର୍ସିଙ୍ଗ୍ ନଣ୍ତ୍ ଏଟେନ୍ କି ଆଦ୍ ମିଦିୟନ୍ଲକ୍ ଉଗୁଙ୍ଗ୍ ଅଡାର୍। ପର୍ବୁନେ ଦୁତ୍ ଗିଦିୟନୁଙ୍ଗ୍ ଆରେସେଲ୍ ୱାରି ପକେଣ୍ଡ୍ ସକ୍ତିସାଲି ଜଦା, ମାପ୍ରୁ ଇନ୍ ନା ମାୟାଣ୍ତ୍। ସେନ୍ ଆରେ ଇସ୍ରାଏଲିଙ୍ଗ୍ ମିଦିୟାନ୍ଲକୁଙ୍ଗ୍ ପେଲ୍ଟୁକ୍ ରକିୟା କେ।
ଉକୁଟ୍ ମୁର୍ତିଙ୍ଗ୍ ଉସର୍ଗ କେଗିଙ୍ଗ୍ ପାୟିଟ୍ ଜଗିୟ ବେଦି ଗିଦିୟନୁଙ୍ଗ୍ ଆବାଙ୍ଗ୍ ପେଲ୍ ମାଟେ। ଆୟ୍ ଜଗିୟ ବେଦିଙ୍ଗ୍ ମୁକାମୁକା କେଗିଙ୍ଗ୍ ମାପ୍ରୁ ଗିଦିୟନୁଙ୍ଗ୍ ପକେଣ୍ତ୍। ମାତର୍ ଗିଦିୟନ୍ ଲକ୍ଗୁଲୁଙ୍ଗ୍ ନାର୍ସେଣ୍ତ୍, ଆଦିଙ୍ଗ୍ ଅଣ୍ତ୍ ସିକାଟ୍ ଏଦାନ୍ ଆରେକ୍ କାତଣ୍ତ୍। ଆଦିଙ୍ଗ୍ ଅଣ୍ତ୍ ଆୟ୍ ଜଗିୟ ବେଦିଙ୍ଗ୍ ମୁକାମୁକା କେୟି ପୁନ୍ସି କାରେଣ୍ତ୍ ଆରେ ଚୁନ୍ ଚୁନା କେୟି କାରେଣ୍ତ୍। ମୁର୍ତି କାକେଲ୍ ଏରେ ଜଗିୟ ବେଦି ମାଟେ ଆୟ୍ ଜଗିୟ ବେଦି କାକେଲ୍ ଅଣ୍ତ୍ ମାପ୍ରୁଙ୍ଗ୍ ପାୟିଟ୍ ପୁନେଦ୍ଟେ ଜଗିୟ ବେଦି କେନଣ୍ତ୍ ଆରେ ମାପ୍ରୁଙ୍ଗ୍ ପାୟିଟ୍ ବଲି ଉସର୍ଗ କେନଣ୍ତ୍।
ଆରେକୁଟ୍ ଆଡ୍ତଲ୍ ଲକ୍ଗୁଲ୍ ସୁଡେର୍ ଜେ ଏଇର୍ କି ଆୟ୍ ଜଗିୟ ବେଦିଙ୍ଗ୍ ସାରୁସି କେରିନ୍ ପୁନ୍ସି ବିନସ୍ଟ କେୟିମାର୍, ଆରେ ଆୟ୍ଲକ୍ ପେରିନ୍ ରିସା ଏନର୍। ଆୟ୍ଲକ୍ ଗିଦିୟନ୍ନେ ଉଲେନ୍ ସେୟର୍ ଅଣ୍ତୁଙ୍ଗ୍ ୱାଟ୍ତେନ୍ ଆଟିଙ୍ଗ୍ ପାୟିଟ୍, ମାତର୍ ଗିଦିୟନ୍ନେ ତାମ୍ବା ପକେଣ୍ତ୍ ଇମ୍ଗୁଲ୍ ଏନାଦିଙ୍ଗ୍ ଇମ୍ ୱେନ୍ଦିଟିଙ୍ଗ୍ ସାଇଜ କେଗିଙ୍ଗ୍ ଚେସ୍ଟା କେଗିଦାର୍। ଜଦି ଅଣ୍ତ୍ ଉକୁର୍ ମାପ୍ରୁ ଆଟେକଡ୍, ଅଣ୍ତ୍ ନିଜେନିଙ୍ଗ୍ ରକିୟା କେକାଣ୍ତ୍। ଅଣ୍ତ୍ ଇ ପାଟେ ପକ୍ତାଲିନ୍ ଲକ୍ଗୁଲ୍ ଗିଦିୟନୁଙ୍ଗ୍ ଆଟୁଟର୍।
ଆଦିଙ୍ଗ୍ କୁଣ୍ତେଲ୍ ମିଦିୟାନ୍ଲକ୍ ଇସ୍ରାଏଲ୍ ଲକୁଙ୍ଗ୍ ପେଲ୍ଟୁକ୍ ଚରି କେଗିଙ୍ଗ୍ ପାୟିଟ୍ ଆରେତରେକ୍ ୱାନର୍। ଆୟ୍ଲକ୍ ପେଙ୍ଗୁର୍ତୁଲ୍ ମାଟର୍ ଜେ ଆୟ୍ଲକୁଙ୍ଗ୍ ଏଜାକିଙ୍ଗ୍ ଏରା ମାନ୍ନେ। ଆୟ୍ଲକ୍ ନା ଜୁଦ୍ କେଗିଙ୍ଗ୍ ପାୟିଟ୍ ଗିଦିୟନ୍ ଇସ୍ରାଏଲ୍ ଲକୁଙ୍ଗ୍ ଉକୁଟ୍ ପେଲ୍ କେନଣ୍ତ୍। ମାପ୍ରୁ ଜେ ଇସ୍ରାଏଲିଙ୍ଗ୍ ଉଦାର୍ କେଗିଙ୍ଗ୍ ଅଣ୍ତୁଙ୍ଗ୍ ବେବହାର୍ କେଗିଦାଣ୍ତ୍, ଇ ବିସୟରେନ୍ ପୁନୁଙ୍ଗ୍ ପାୟିଟ୍ ଗିଦିୟନ୍ ମାପ୍ରୁଙ୍ଗ୍ ପେଲ୍ଟୁକ୍ ଜଡେକ୍ ଚିନ୍ ପର୍ତଣ୍ତ୍।
ପର୍ତୁମ୍ଟେ ଚିନ୍ ୱାଡିନ୍, ଗିଦିୟନ୍ ବାସେନ୍ ଉକୁଟ୍ ମେଣ୍ତା ପାପ୍ନେ ତଲ୍ ତାଟେଣ୍ତ୍ ଆରେ ମାପ୍ରୁଙ୍ଗ୍ କର୍ଗୁନେଲ୍ କାକର୍ ବାସେ ପୟ୍ତାନ୍ କାରାଏଙ୍ଗ୍ ଆୟ୍ ତଲ୍ ପୟତାନ୍ କାରିଙ୍ଗ୍ ପକେଣ୍ତ୍। ମାପ୍ରୁ ଆପାଡି କେନଣ୍ତ୍। ଆରେକୁଟ୍ ନାର୍କାମ୍, ଅଣ୍ତ୍ ମାପ୍ରୁଙ୍ଗ୍ ପକେଣ୍ତ୍ ବାସେ ପଦି ମାକା ମାତର୍ ତଲ୍ ୱାଟି ମାକା। ମାପ୍ରୁ ଆଦ୍ ମେନ୍ କେନଣ୍ତ୍। ଇ ଜଡେକ୍ ଚିନ୍କିଲ୍ ଗିଦିୟନୁଙ୍ଗ୍ ନିଚୟ ଭାବ୍ରେନ୍ ସି ଏନେ ଜେ ଇସ୍ରାଏଲ୍ ଲକ୍ଗୁଲ୍ ମିଦିୟାନ୍ଲକୁଙ୍ଗ୍ ପେଲ୍ଟୁକ୍ ଉଦାର୍ କେଗିଙ୍ଗ୍ ପାୟିଟ୍ ମାପ୍ରୁ ବେବହାର୍ କେଦା। ୦
୩୨,୦୦୦ ଇସ୍ରାଏଲ୍ ସନିୟତୁଲ୍ ଗିଦିୟନୁଙ୍ଗ୍ ଆର୍ସେଲ୍ ୱାନର୍, ମାତର୍ ମାପ୍ରୁ ପକେଣ୍ତ୍ ଜେ ଇଦ୍ ମେନ୍ ପେରିନ୍ ମାୟାର୍। ଆଦିଙ୍ଗ୍ ଏରେଲକ୍ ଜୁଦ୍ କେଗିଙ୍ଗ୍ ନାର୍ସାକର୍ ମାଟର୍ ଇ ୱାଡିନ୍ ୨୨,୦୦୦ ଲକୁଙ୍ଗ୍ ଅଣ୍ତ୍ ଉଲେନ୍ ସୟ୍ସି ସିନଣ୍ତ୍। ମାପ୍ରୁ ଗିଦିୟନୁଙ୍ଗ୍ ପକେଣ୍ତ୍ ଜେ ଇ ସକିୟା ମେନ୍ ପେରିନ୍। ଆଦିଙ୍ଗ୍ ଗିଦିୟନ୍ ୩୦୦ ଲକୁଙ୍ଗ୍ ଇରି ପାଟିନ୍ ଲକୁଙ୍ଗ୍ ଉଲେନ୍ ସୟ୍ସି ସିନଣ୍ତ୍।
ଆୟ୍ ନାର୍କାମ୍ ମାପ୍ରୁ ଗିଦିୟନୁଙ୍ଗ୍ ପକେଣ୍ତ୍, “ମିଦିୟନ୍ ଲକ୍ନେ ଉଲେ ସାନ୍ଦ୍କିଲ୍ ଆର୍ସେଲ୍ ସେନ୍ ଆରେ ଏରେବେଲ୍ ଆୟ୍ଲକ୍ନେ ପାର୍କଣ୍ତି ଇନ୍ ୱେୟାଟ୍, ଇନ୍ ଆରେ ନାର୍ସାଟ୍।” ଆଦିଙ୍ଗ୍ ଆୟ୍ ନାର୍କାମ୍, ଗିଦିୟନ୍ ଆୟ୍ ଉଲେ ସାନ୍ଦ୍କିଲ୍ ଆର୍ସେଲ୍ ସେୟଣ୍ତ୍। ଆରେ ଉକୁର୍ ମିଦିୟାନ୍ ସନିୟ ସୁଡ଼ଣ୍ତି କିର୍କାଲ୍ ବିସୟ୍ରେନ୍ ଅଣ୍ତୁନେ ସାଙ୍ଗଙ୍ଗ୍ ପକଣ୍ତି ୱେଟଣ୍ତ୍। ଅଣ୍ତୁନେ ସାଙ୍ଗ ପକେଣ୍ତ୍ ଇ ଅରତ୍ ଏରିଦା ଗିଦିୟନ୍ନେ ସନିୟ ମିଦିୟାନ୍ ସନିୟଲକୁଙ୍ଗ୍ ଆରାତାର୍। ଗିଦିୟନ୍ ଏରେବେଲ୍ ଇ ପାଟେ ୱେଟଣ୍ତ୍, ଅଣ୍ତ୍ ମାପ୍ରୁନେ ଉପାସନା କେନଣ୍ତ୍।
ଆଟେଲ୍ ଗିଦିୟନ୍ ଆୟ୍ଲକ୍ନେ ସନିୟଲକୁନ୍ କାକେଲ୍ ମାଣ୍ତିସେଞ୍ଜି ପାଟିନ୍ ଲକୁଙ୍ଗ୍ ଉକୁଟ୍ ଲାକାନ୍ ବାକା, ଆରେ ଉକୁଟ୍ଲାକାନ୍ ତୁକୁଡ୍ନାଟ୍ ତିୟାର୍ ଏରଣ୍ତି ବଡ୍ନାଲ୍ ଆରେ ଉକୁଟ୍ କିସ୍ ଅଲାଲ୍ ସିନଣ୍ତ୍, ମିଦିୟନ୍ଟେ ସନିୟଲକ୍ ଏରେମାନ୍ ଅଡିମାଟର୍ ଆୟ୍ଲକ୍ ଆୟ୍ ସାନ୍ଦ୍କିଲ୍ ସାରିବେଡ୍ଟେନ୍ ବେଡାତର୍, ଗିଦିୟନ୍ନେ ୩୦୦ ସନିୟ୍ଲକ୍ ଏରେ ତୁକୁଡ୍ନାଟ୍ ତିୟାର୍ଏରଣ୍ତି ବଡ୍ନାଲ୍ନାଟ୍ ଆୟ୍ଲକ୍ନେ କିସ୍ ଅଲାଲ୍ ଇରେର୍ ଏଟେନ୍କି ମିଦିୟନ୍ ଲକ୍ଗୁଲ୍ ଆୟ୍ କିସ୍ ଅଲାଲ୍ ୱିଣ୍ତ୍ନାଟ୍ ଆୟ୍ଲକୁଙ୍ଗ୍ ସୁଡୁଙ୍ଗ୍ ଅଡାର୍।
ଆଦିଙ୍ଗ୍ କୁଣ୍ତେଲ୍, ଗିଦିୟନ୍ନେ ପାଟିନ୍ ସନିୟଦଲ୍ ମିସ୍ଏରି ଆୟ୍ଲକ୍ନେ ବଡ୍ନାଲ୍ ଅଟ୍ତର୍,ଆଦିଙ୍ଗ୍ ବଡ୍ନାଲ୍ଟେ ପାଟିନ୍ ହଠାତ୍ରେନ୍ କିସ୍ ତଣ୍ତେଟେ। ଆୟ୍ଲକ୍ ପାତଣ୍ଡି ବାକାଲ୍ ଉନ୍ଦେର୍ ଆରେ ପେରିନ୍ ଆଉଲିନାଟ୍ ପକେର୍, “ପର୍ବୁ ଆରେ ଗିଦିୟନୁଙ୍ଗ୍ ପାୟିଟ୍ ଉକୁଟ୍ କାଣ୍ତା!”
ମାପ୍ରୁ ମିଦିୟନ୍ ଲକ୍ଗୁଲ୍ନେ ଗର୍ବେନ୍ ସିଣ୍ତ୍, ଆଟେଲ୍ ଆୟ୍ଲକ୍ ନିଜେନ୍ ନିଜେନ୍ ଆଟା ଆଟିଏରି ସାନର୍। ସାଙ୍ଗେନ୍ ସାଙ୍ଗେନ୍ ବାକିମାନ୍ ଇସ୍ରାଏଲ୍ ଲକ୍ଗୁଲୁଙ୍ଗ୍ ଆୟ୍ଲକ୍ନେ ଉଲେଟୁକ୍ ପେପ୍ସି ମିଦିୟାନ୍ ଲକୁଙ୍ଗ୍ ସାରିକିଙ୍ଗ୍ ସାୟ୍ଜ କେଗିଙ୍ଗ୍ ପକେର୍, ଆୟ୍ଲକ୍ ପେଙ୍ଗୁର୍ତୁଲୁଙ୍ଗ୍ ୱାଟ୍ତେନ୍ ଆଟେର୍ ଆରେ ବାକିଲକୁଙ୍ଗ୍ ଇସ୍ରାଏଲ୍ ଦେସ୍ଟୁକ୍ ୱେନେଲ୍ ସାର୍ସି ଉନର୍। ଆୟ୍ସିରିସ୍ ଏକ୍ ଲକିୟ କଡେଅଜାର୍ ୧,୨୦,୦୦୦ ମିଦିୟନ୍ ଲକ୍ ସାନର୍। ମାପ୍ରୁ ଇସ୍ରାଏଲ୍ ଲକ୍ଗୁଲୁଙ୍ଗ୍ ଉଦାର୍ କେନଣ୍ତ୍।
ଲକ୍ଗୁଲ୍ ଗିଦିୟନ୍ନୁଙ୍ଗ୍ ଆୟ୍ଲକ୍ନେ ରାଜା କେଗିଙ୍ଗ୍ ଇସା କେନର୍, ଲକ୍ଗୁଲ୍ ଆୟ୍ୱାଡିନ୍ କେଗିଙ୍ଗ୍ ପାଇଟ୍ ଗିଦିୟନ୍ନୁଙ୍ଗ୍ ଅନୁମତି ସିୟୁଟର୍, ମାତର୍ ମିଦିୟନ୍ ଲକୁନ୍ ପେଲ୍ଟୁକ୍ ଆୟ୍ଲକ୍ ଏରେପାଟିନ୍ ସନାଟେ ୱାତ୍କିଲ୍ ଉୟିମାଟର୍, ଆୱ୍ପାଟିନ୍ ପର୍ତର୍, ଲକ୍ଗୁଲ୍ ଗିଦିୟନ୍ନୁଙ୍ଗ୍ ପେରିନ୍ ସନା ସିନର୍।
ଆଦିଙ୍ଗ୍ କୁଣ୍ତେଲ୍ ବେର୍ଜାଜକ୍ ଜଗ୍ଡା ଏରଣ୍ତି ସକା ୱାଟ୍ଟେ ଉକୁଟ୍ ଗିଦିୟନ୍ ସନା ନା ବେବହାର୍ କେୟି ସକା ତିୟାର୍ କେନଣ୍ତ୍। ମାତର୍ ଇଦିଙ୍ଗ୍ ଉକୁଟ୍ ମୁର୍ତି ୱାଡିନ୍ ଲକ୍ଗୁଲ୍ ୱାଟେ କେଗିଙ୍ଗ୍ ଉଣ୍ତେର୍। ଆଦିଙ୍ଗ୍ ମାପ୍ରୁ ଆରେତରେକ୍ ଆୟ୍ଲକୁଙ୍ଗ୍ ଡଣ୍ତ୍ ସିନଣ୍ତ୍, ଏନାଦିଙ୍ଗ୍ କି ଇସ୍ରାଏଲ୍ ୱାଟେ କେଗିନର୍। ଆୟ୍ଲକୁଙ୍ଗ୍ ଆରାକିଙ୍ଗ୍ ପାୟିଟ୍ ମାପ୍ରୁ ଆୟ୍ଲକୁଙ୍ଗ୍ ଅନୁମତି ସିନଣ୍ତ୍। ଆୟ୍ଲକ୍ କୁଣ୍ତେଲ୍ ଆରେତରେକ୍ ମାପ୍ରୁଙ୍ଗ୍ ପେଲ୍ ସାଇଜ ପାୟିଟ୍ ପାର୍ତନା କେନର୍, ଆରେ ମାପ୍ରୁ ଆୟ୍ଲକୁଙ୍ଗ୍ ପାୟିଟ୍ ଉକୁର୍ ଉଦାର୍କର୍ତାଙ୍ଗ୍ ସୟ୍ତଣ୍ତ୍।
ଇ ଗଟ୍ନାଲ୍ ପେଙ୍ଗିଟ୍ ତର୍ ଆରେତରେକ୍ ଏନେ : ଇସ୍ରାଏଲ୍ଲକ୍ ପାପ୍ କେନର୍, ମାପ୍ରୁ ଆୟ୍ଲକୁଙ୍ଗ୍ ଡଣ୍ତ୍ ସିଗିଙ୍ଗ୍ ନଣ୍ତ୍, ଆଦିଙ୍ଗ୍ କୁଣ୍ତେଲ୍ ଆୟ୍ଲକ୍ ଅନୁତାପ୍ କେଗିଙ୍ଗ୍ ନର୍ ଆରେ ଆୟ୍ଲକୁଙ୍ଗ୍ ଉଦାର୍ କେଗିଙ୍ଗ୍ ପାୟିଟ୍ ମାପ୍ରୁ ଉକୁର୍ ଉଦାର୍ କର୍ତାଙ୍ଗ୍ ସୟୁକିନଣ୍ତ୍। ପେଙ୍ଗିଟ୍ ବରସ୍ ପାତି ମାପ୍ରୁ ପେଙ୍ଗୁର୍ତୁଲ୍ ଉଦାର୍କର୍ତାଲକ୍ ସୟ୍ତଣ୍ତ୍, ଏରେଲକ୍ ଇସ୍ରାଏଲ୍ ଲକୁଙ୍ଗ୍ ଆୟ୍ଲକ୍ନେ ସତ୍ରୁପେଲ୍ଟୁକ୍ ରକିୟା କେଗିଙ୍ଗ୍ ନର୍।
କୁଣ୍ତେଲ୍, ପାଟିନ୍ ଦେସ୍ତିନ୍ ଏରେ ୱାଡିନ୍ ରାଜା ମାଟର୍ ଆୟ୍ ୱାଡିନ୍ ରାଜା ମାନିଙ୍ଗ୍ ପାୟିଟ୍ ଲକ୍ଗୁଲ୍ ମାପ୍ରୁଙ୍ଗ୍ ପେଲ୍ ପାର୍ତନା କେନର୍। ଆୟ୍ଲକ୍ ଇ ୱାଡିନ୍ ଉକୁର୍ ରାଜାଙ୍ଗ୍ ଇଚା କେନର୍ ଜେ ଏଇର୍ ବେର୍ଟଣ୍ତ୍, ସକ୍ତି ସାଲି ଆରେ ଅଣ୍ତ୍ ଆମୁଙ୍ଗ୍ ଜୁଦ୍ ପାୟିଟ୍ ପାୱ୍ କାଡାସି ଉଦାଣ୍ତ୍। ମାପ୍ରୁ ଇ ଅନୁରଦଙ୍ଗ୍ ଇଚା କେୟୁଟଣ୍ତ୍, ମାତର୍ ଆୟ୍ଲକ୍ ଇ ୱାଡିନ୍ ଚାୟ୍ଏନର୍ ଆୟ୍ୱାଡିନ୍ ଉକୁର୍ ରାଜା ସିନଣ୍ତ୍।
ବାଇବଲ୍ଟେ ଉକୁଟ୍ କେରାଲ୍: ବିଚାର୍କର୍ତା ୧-୩; ୬-୮
Free to use, adapt, and share under an open license (CC BY-SA 4.0).