17. ୧୭- ମାପ୍ରୁ ଦାଉଦ୍ନା କେୟଣ୍ଡି ନିୟମ୍
ସାଉଲ୍ ଇସ୍ରାଏଲ୍ଟେ ପର୍ତୁମ୍ ରାଜା ମାଟଣ୍ତ୍। ଅଣ୍ତ୍ ଡେଙ୍ଗା ଆରେ ସୁନ୍ଦର୍ ମାଟଣ୍ତ୍,ଏଟେନ୍ କି ରାଜାଙ୍ଗ୍ ସୁଡିମାଟର୍। ପର୍ତୁମ୍ ଅଲପ୍ ବରସ୍ ପାୟିଟ୍ ସାଉଲ୍ ଉକୁର୍ ନିୟାଟେ ରାଜା ମାଟଣ୍ତ୍ ଏସେବେଲ୍ ଅଣ୍ତ୍ ଇସ୍ରାଏଲ୍ ପୟ୍ତାନ୍ ସାସନ୍ କେନଣ୍ତ୍। ମାତର୍ ଆଦ୍ କୁଣ୍ତେଲ୍ ଅଣ୍ତ୍ ଉକୁର୍ ଦୁସ୍ଟ ଲକ୍ ଏନଣ୍ତ୍, ଅଣ୍ତ୍ ମାପ୍ରୁନେ ଆଦେସ୍ ମାନ୍ଏରୁଟଣ୍ତ୍, ଆଦିଙ୍ଗ୍ ମାପ୍ରୁ ଉକୁର୍ ୱେନ୍ ଲକୁଙ୍ଗ୍ ଆସ୍କେଣ୍ତ୍ ଅଣ୍ତ୍ ଦିନେକ୍ ଅଣ୍ତୁନେ ବାସେନ୍ ରାଜା ଏନଣ୍ତ୍।
ସାଉଲୁଙ୍ଗ୍ କୁଣ୍ତେଲ୍ ମାପ୍ରୁ ଉକୁର୍ ଇଲେଣ୍ତିଙ୍ଗ୍ ଇସ୍ରାଏଲ୍ଟେ ରାଜା ଏରିଙ୍ଗ୍ ପାୟିଟ୍ ଆସ୍କେଣ୍ତ୍। ବେଥଲିହିମ୍ ଗଡ୍ଟୁକ୍ ୱାରାକ୍ ଦାଉଦ୍ ମେଣ୍ତାକଲାକ୍ ମାଟଣ୍ତ୍। ୱେନ୍ ୱେନ୍ ବେଲାଙ୍ଗ୍ ଅଣ୍ତ୍ ଏସେବେଲ୍ ତାମ୍ବାନେ ମେଣ୍ତାଲ୍ କାକିଙ୍ଗ୍ ନଣ୍ତ୍, ଆସେବେଲ୍ ଦାଉଦ୍ ଅଣ୍ତୁନେ ମେଣ୍ତାଲିଙ୍ଗ୍ କାସିଙ୍ଗ୍ ୱାରଣ୍ଡି ଉକୁଟ୍ ଡୁର୍କା ଆରେ ଉକୁଟ୍ ବାଲୁଙ୍ଗ୍ ୱାଟ୍ତେନ୍ ଆଟିମାଟଣ୍ତ୍। ଦାଉଦ୍ ଉକୁର୍ ନମ୍ର ଆରେ ଦରମ୍ଟଣ୍ଡ୍ ମାଟଣ୍ତ୍ ଅଣ୍ତ୍ ମାପ୍ରୁଙ୍ଗ୍ ପେଲ୍ ବିସ୍ବାସ୍ କେୟି ଅଣ୍ତୁନେ ଆଦେସ୍ ମାନ୍ଏରିଙ୍ଗ୍ ନଣ୍ତ୍।
ଦାଉଦ୍ ଉକୁର୍ ସନିୟ ଆରେ ନେତା ଏନଣ୍ତ୍। ଏସେବେଲ୍ ଅଣ୍ତ୍ ଇଲେଣ୍ତ୍ ମାଟଣ୍ତ୍, ଅଣ୍ତ୍ ଗଲିୟାତ୍ ପିଦିର୍ଟଣ୍ତ୍ ଉକୁର୍ ବେର୍ଟେ ଲକ୍ ନା ଜୁଦ୍ କେୟି ମାଟଣ୍ତ୍। ଗଲିୟାତ୍ ଉକୁର୍ ବେର୍ଟେ ନେତା ସକ୍ତିସାଲି ଟଣ୍ତ୍, ବେସି ବେର୍ଟଣ୍ତ୍ ଜଦା ସନିୟ ଅଣ୍ତ୍ ପାକାପାକି ତିନ୍ ମିଟର୍ ଉଚା ମାଟଣ୍ତ୍। ମାତର୍ ମାପ୍ରୁ ଗଲିୟାତିଙ୍ଗ୍ ୱାଟ୍ତେନ୍ ଆଟି ଇସ୍ରାଏଲ୍ଲକୁଙ୍ଗ୍ ଉଦାର୍ କେଗିଙ୍ଗ୍ ପାୟିଟ୍ ଦାଉଦୁଙ୍ଗ୍ ସାଇଜ କେୟିମାଟଣ୍ତ୍। ଆଦିଙ୍ଗ୍ କୁଣ୍ତେଲ୍, ଦାଉଦ୍ ଇସ୍ରାଏଲ୍ଟେ ସତ୍ରୁଲକୁଙ୍ଗ୍ ପେଲ୍ଟୁକ୍ ପେଙ୍ଗିଟ୍ ତର୍ ବିଜୟ ଏରିମାଟଣ୍ତ୍, ଆଦିଙ୍ଗ୍ ପାୟିଟ୍ ଲକ୍ଗୁଲ୍ ଅଣ୍ତୁନେ ପର୍ସଙ୍ଗ୍ସା କେନର୍।
ଦାଉଦୁଙ୍ଗ୍ ଲକ୍ଗୁଲ୍ ପେରିନ୍ ଲାଡ୍ କେନର୍ ମାତର୍ ସାଉଲ୍ ଲକ୍ଗୁଲ୍ନେ ଲାଡିଙ୍ଗ୍ ସୁଡୁଙ୍ଗ୍ ଅଡୁଟଣ୍ତ୍। ସାଉଲ୍ ପେଙ୍ଗିଟ୍ ତର ଦାଉଦୁଙ୍ଗ୍ ଆଟିଙ୍ଗ୍ ଚେସ୍ଟା କେନଣ୍ତ୍, ଆଦିଙ୍ଗ୍ ଦାଉଦ୍ ସାଉଲ୍ ପେଲ୍ଟୁକ୍ ପାକେଣ୍ତ୍। ଦିନେକ୍, ଦାଉଦୁଙ୍ଗ୍ ଆଟିଙ୍ଗ୍ ପାୟିଟ୍ ସାଉଲ୍ ଅଣ୍ତୁଙ୍ଗ୍ କାଣ୍ଡିକିନଣ୍ତ୍। ସାଉଲ୍ ଆୟ୍ ବରା ତାନିର୍ ସେୟଣ୍ତ୍ ଏରେମାନ୍ କି ଦାଉଦ୍ ସାଉଲୁଙ୍ଗ୍ ପେଲ୍ଟୁକ୍ ପାକିଙ୍ଗ୍ ନଣ୍ତ୍, ମାତର୍ ସାଉଲ୍ ଅଣ୍ତୁଙ୍ଗ୍ ସୁଡୁଙ୍ଗ୍ ଅଡୁଟଣ୍ତ୍। ଦାଉଦ୍ ଇଣ୍ତି ସାଉଲୁଙ୍ଗ୍ ଆର୍ସେଲ୍ ମାନ୍ନଣ୍ତ୍ ଆରେ ଅଣ୍ତ୍ ଅଣ୍ତୁଙ୍ଗ୍ ୱାଟ୍ତେନ୍ ଆଟିଙ୍ଗ୍ ଅଡ୍ତଣ୍ତ୍ ମେନ୍, ମାତର୍ ଅଣ୍ତ୍ ଆଦ୍ କେୟୁ ଟଣ୍ତ୍। ମାତର୍ ଦାଉଦ୍ ସାଉଲୁଙ୍ଗ୍ ପାର୍ମାନ୍ କେଗିଙ୍ଗ୍ ପାୟିଟ୍ ସାଉଲ୍ନେ ସେନ୍ଦ୍ରାଟେ କାଣ୍ତେକ୍ କୁଏଣ୍ତ୍ ଆଟେଲ୍ ଅଣ୍ତ୍ ରାଜା ଏରିଙ୍ଗ୍ ପାଇଟ୍ ଆଣ୍ତୁଙ୍ଗ୍ ୱାଟ୍ତେନ୍ ଆଟୁଟଣ୍ତ୍।
ଆଦିଙ୍ଗ୍ କୁଣ୍ତେଲ୍, ସାଉଲ ଜୁଦ୍ତୁନ୍ ସାୟି ସେୟଣ୍ତ୍, ଆରେ ଦାଉଦ୍ ଇସ୍ରାଏଲ୍ଟେ ରାଜା ଏନଣ୍ତ୍। ଅଣ୍ତ୍ ଉକୁର୍ ନିୟାଟେ ରାଜା ମାଟଣ୍ତ୍, ଆରେ ଲକ୍ଗୁଲ୍ ଅଣ୍ତୁଙ୍ଗ୍ ଲାଡ୍ କେଗିଙ୍ଗ୍ନର୍। ମାପ୍ରୁ ଦାଉଦୁଙ୍ଗ୍ ଆସିର୍ବାଦ୍ କେନଣ୍ତ୍ ଆରେ ସପଲ୍ କେନଣ୍ତ୍। ଦାଉଦ୍ ପେଙ୍ଗିଟ୍ତର୍ ଜୁଦ୍ କେୟିମାଟଣ୍ତ୍ ଆରେ ମାପ୍ରୁ ଇସ୍ରାଏଲ୍ଟେ ସତ୍ରୁଲକୁଙ୍ଗ୍ ପେଲ୍ଟୁକ୍ ପରାଜୟ୍ କେଗିଙ୍ଗ୍ ପାୟିଟ୍ ଅଣ୍ତୁଙ୍ଗ୍ ସାଇଜ କେନଣ୍ତ୍। ଦାଉଦ୍ ଜିରୁସାଲାମୁଙ୍ଗ୍ ଜୟ୍ କେନଣ୍ତ୍ ଆରେ ଆଦିଙ୍ଗ୍ ଅଣ୍ତୁନେ ରାଜଦାନି ଗଡ୍ କେନଣ୍ତ୍। ଦାଉଦ୍ ସାସନ୍ କେଦାନ୍ ବେଲ୍, ଇସ୍ରାଏଲ୍ ସକ୍ତିସାଲି ଆରେ ଦନସାଲି ଏନଣ୍ତ୍।
ଦାଉଦ୍ ଉକୁଟ୍ ମନ୍ଦିର୍ ତିୟାର୍ କେଗିଙ୍ଗ୍ ଇଚା କେନଣ୍ତ୍, ଆମାନ୍ ପାଟିନ୍ ଇସ୍ରାଏଲ୍ ଲକ୍ ମାପ୍ରୁନେ ଉପାସନା କେଗିଙ୍ଗ୍ ଅଡ୍ତାର୍ ଆରେ ଅଣ୍ତୁନ୍ ଉଦେସ୍ରେନ୍ ବଲି ଉସର୍ଗ କେଗିଙ୍ଗ୍ ଅଡ୍ତାର୍। ୪୦୦ ବାରିସ୍ ପାତି, ଲକ୍ଗୁଲ୍ ମାପ୍ରୁନେ ଉପାସନା କେଗିଙ୍ଗ୍ ନର୍ ଆରେ ମସା ତିୟାର୍ କେୟଣ୍ତି ସମାଗମ ତମୁନ୍ ବଲି ଉସର୍ଗ କେଗିନର୍।
ମାତର୍ ମାପ୍ରୁ ନାତନ୍ ଭବିସତ୍ବକ୍ତାଙ୍ଗ୍ ଦାଉଦୁଙ୍ଗ୍ ଆର୍ସେଲ୍ ପକି ସୟତଣ୍ତ୍, ଇନ୍ ଜୁଦ୍ଟେ ଉକୁର୍ ନର୍ଲକ୍, ଆଦିଙ୍ଗ୍ ପାୟିଟ୍ ଇନ୍ ଆନୁଙ୍ଗ୍ ପାୟିଟ୍ ମନ୍ଦିର୍ ତିୟାର୍ କେମେନ୍। ଇନେ ସେପାଲ୍ ଆଦ୍ ତିୟାର୍ କେଦାଣ୍ତ୍।“ ମାତର୍ ଆନ୍ ଇନୁଙ୍ଗ୍ ପେରିନ୍ ଆସିର୍ବାଦ୍ କେଦାନ୍। ଇନେ କୁଲ୍ ତାନିର୍ଟୁକ୍ ଉକୁର୍ ଆନ୍ ଲକ୍ଗୁଲୁଙ୍ଗ୍ ପୟତାନ୍ ରାଜା ୱାଡିନ୍ ସବୁଦିନ୍ ପାୟିଟ୍ ସାସନ୍ କେଦାଣ୍ତ୍!, ସବୁଦିନ୍ ସାସନ୍ କେଗିଙ୍ଗ୍ ଅଡ୍ପାକ୍ ଦାଉଦ୍ନେ ଉକ୍ଟି କୁଲ୍ ଏରିଦା କିସ୍ଟ। କିସ୍ଟ ମାପ୍ରୁ ଆସ୍କାକ୍ ଏଇଣ୍ତ୍ କି ଜଗତ୍ଟେ ଲକ୍ଗୁଲୁଙ୍ଗ୍ ଆୟ୍ଲକ୍ନେ ପାଟିନ୍ ପାପ୍ଟୁକ୍ ରକିୟା କେଦାଣ୍ତ୍।
ଏସେବେଲ୍ ଦାଉଦ୍ ଇ ପାଟିନ୍ ବାକିୟ ୱେଟଣ୍ତ୍, ଅଣ୍ତ୍ ସାଙ୍ଗେ ସାଙ୍ଗେନ୍ ମାପ୍ରୁଙ୍ଗ୍ ଦନିୟବାଦ୍ କେନଣ୍ତ୍ ଆରେ ଅଣ୍ତୁନେ ପର୍ସଙ୍ଗ୍ସା କେନଣ୍ତ୍ ଏନାଦିଙ୍ଗ୍ କି ଦାଉଦୁଙ୍ଗ୍ ଇ ମହାନ୍ ସନ୍ମାନ୍ ଆରେ ପେଙ୍ଗିଟ୍ ଆସିର୍ବାଦ୍ ସିଗିଙ୍ଗ୍ ପାୟିଟ୍ ଜିଦ୍ କେୟିମାଟଣ୍ତ୍। ମାପ୍ରୁ ଏରେବେଲାଙ୍ଗ୍ ଇ ପାଟିନ୍ ବିସୟ କେଦାଣ୍ତ୍ ଆଦ୍ ଦାଉଦ୍ ପୁନା ମାଟଣ୍ତ୍। ମାତର୍ ଇ ୱାଡିନ୍ ଏନେ, ଇସ୍ରାଏଲ୍ ଲକୁଙ୍ଗ୍ କିସ୍ଟ ୱାରିଙ୍ଗ୍ ପାୟିଟ୍ ୧୦୦୦ ବରସ୍ କାକିଙ୍ଗ୍ ପାରିମାଟେ।
ପେଙ୍ଗିଟ୍ ବରସ୍ ପାତି ଦାଉଦ୍ ନିୟାୟ୍ ଆରେ ବିସ୍ବାସ୍ ନା ସାସନ୍ କେନଣ୍ତ୍ ଆରେ ମାପ୍ରୁ ଅଣ୍ତୁଙ୍ଗ୍ ଆସିର୍ବାଦ୍ କେନଣ୍ତ୍। ମାତର୍, ଅଣ୍ତୁନେ ଜିୱେନ୍ ସାରାସାରିବେଲ୍ ଅଣ୍ଡ୍ ମାପ୍ରୁଙ୍ଗ୍ ବିରଦ୍ରେନ୍ ପେରିନ୍ ବେର୍ଟେ ପାପ୍ କେନଣ୍ତ୍।
ଦିନେକ୍, ଏସେବେଲ୍ ଦାଉଦ୍ନେ ସନିୟତୁଲ୍ ପାଟିନ୍ଲକ୍ ଜୁଦ୍ କେଗିଙ୍ଗ୍ ପାୟିଟ୍ ଉଲେଟେ ଦୁରିନ୍ ମାଟର୍, ଅଣ୍ତ୍ ଅଣ୍ତୁନେ ରାଜ୍ମହଲ୍ ବାହାରେନ୍ ସୁଡେଣ୍ତ୍ ଜେ ଅକାଲ୍ ସୁନ୍ଦର୍ଟେ ଆସ୍ମାଲ୍ ନିର୍ ମୁୟୁଦା। ଆୟ୍ ଆସ୍ମାଲ୍ନେ ପିଦିର୍ ବେତ୍ସିବା ମାଟେ।
ଅଣ୍ତ୍ କାନୁଲ୍ ନା ସୁଡି ଦାଉଦ୍ ଆଦିଙ୍ଗ୍ ଇନ୍ଦ୍ରିଙ୍ଗ୍ ପାୟିଟ୍ ଉକୁର୍ ଲକୁଙ୍ଗ୍ ସୟତଣ୍ତ୍। ଅଣ୍ତ୍ ଆଦିନା ଦାରି କେନଣ୍ତ୍ ଆରେ ଆଦିଙ୍ଗ୍ ଆଦିନେ ଉଲେନ୍ ସୟସି ସିନଣ୍ତ୍। ଏଙ୍ଗିର୍ ଦିନାମ୍ କୁଣ୍ତେଲ୍ ବେତ୍ସିବା ଦାଉଦୁଙ୍ଗ୍ ପକି ସୟ୍ତେ ଜେ ଆଦ୍ ଅଙ୍ଗେନ୍ ମାୟା।
ଉରିୟ ପିଦିର୍ ଟଣ୍ତ୍ ଉକୁର୍ ଲକ୍ ଦାଉଦ୍ନେ ସନିୟଲକୁଙ୍ଗ୍ ତାନିର୍ ଟୁକ୍ ଉକୁର୍ ନିୟାଟଣ୍ତ୍ ମାଟଣ୍ତ୍, ବେତ୍ସିବାନେ ମାଗିଣ୍ତ୍ ମାଟଣ୍ତ୍। ଦାଉଦ୍ ଊରିୟଙ୍ଗ୍ ଜୁଦ୍ଟୁକ୍ ଅର୍ଗି ଅଣ୍ତୁନେ ଆୟାଲିଙ୍ଗ୍ ଆର୍ସେଲ୍ ସେନିଙ୍ଗ୍ ପାୟିଟ୍ ପକେଣ୍ତ୍। ମାତର୍ ୱେନ୍ ସନିୟତୁଲ୍ ଜୁଦ୍ତୁନ୍ ମାନ୍ବେଲ୍ ଉରିୟ ଉଲେନ୍ ସେନିଙ୍ଗ୍ ପାୟିଟ୍ ମାନା କେନଣ୍ତ୍। ଆଦିଙ୍ଗ୍ ଦାଉଦ୍ ଉରିୟଙ୍ଗ୍ ଆରେତରେକ୍ ଜୁଦ୍ତୁନ୍ ସୟତଣ୍ତ୍ ଆରେ ସନିୟଦଲ୍ଟେ ମୁକିୟଙ୍ଗ୍ ପକିସୟତଣ୍ତ୍ ଜେ ଆୟ୍ ଉରିୟଙ୍ଗ୍ ଇ ୱାଡ଼଼ିଟେ ବାସେନ୍ ଇରୁର୍ ଏରେମାନ୍ ସତ୍ରୁଲକ୍ ପେରିନ୍ ଜଦା ମାୟାର୍ ଏଟେନ୍ କି ଉରିୟ ସତ୍ରୁଲକୁଙ୍ଗ୍ ପେଲ୍ଟୁକ୍ ବିନାସ୍ ଏଦାଣ୍ତ୍।
ଊରିୟଙ୍ଗ୍ ବିନାସ୍ କେଦାନ୍ କୁଣ୍ତେଲ୍, ଦାଉଦ୍ ବେତ୍ସିବାଙ୍ଗ୍ ଅଦୁର୍ ଏନଣ୍ତ୍। କୁଣ୍ତେଲ୍, ଆଦ୍ ଦାଉଦ୍ନେ ସେପାଲିଙ୍ଗ୍ ଜନମ୍ ସିନେ। ଦାଉଦ୍ ଏନାଦ୍ କେୟିମାଟଣ୍ତ୍ ଆଦିଙ୍ଗ୍ ପାୟିଟ୍ ମାପ୍ରୁ ପେରିନ୍ ରିସା ଏନଣ୍ତ୍, ଆଦିଙ୍ଗ୍ ଅଣ୍ତ୍ ଅଣ୍ତୁଙ୍ଗ୍ ଆର୍ସେଲ୍ ନାତନ୍ ବବିସତ୍ବକ୍ତାଙ୍ଗ୍ ସୟ୍ସି ଅଣ୍ତୁନେ ପାପ୍ ଏଟେନ୍ ଉୟା ମାଟେ ଆଦ୍ ୱେଣ୍ଡୁତଣ୍ତ୍। ଦାଉଦ୍ ଅଣ୍ତୁନେ ପାପ୍ ପାୟିଟ୍ ଅନୁତାପ୍ କେନଣ୍ତ୍ ଆରେ ମାପ୍ରୁ ଅଣ୍ତୁଙ୍ଗ୍ କେମା ସିନଣ୍ତ୍। ଦାଉଦ୍ ଅଣ୍ତୁନେ ଜିୱେନ୍, ଇ ୱାଡିନ୍ ଅଣ୍ତୁନେ କସ୍ଟ ବେଲ୍ମେନ୍ ମାପ୍ରୁଙ୍ଗ୍ ପେଲ୍ ତାକେଣ୍ତ୍ ଆରେ ଅଣ୍ତୁନେ ଆଦେସ୍ ମାନ୍ ଏନଣ୍ତ୍।
ମାତର୍ ଦାଉଦ୍ନେ ପାପ୍ଟେ ଡଣ୍ତ୍ ପାୟିଟ୍ ଅଣ୍ତୁନେ ସେପାଲ୍ ସାୟିସେୟଣ୍ତ୍। ଦାଉଦ୍ନେ ଜିୱେନ୍ ତାମ୍ ପରିବାର୍ତିନ୍ ପାଟିନ୍ ବେଲ୍ କିର ସିଲିକିନେ, ଆରେ ଦାଉଦ୍ନେ ସକ୍ତି ପେରିନ୍ ଦୁର୍ବଲ୍ ଏରିସେଞ୍ଜି ମାଟେ। ଦାଉଦ୍ ମାପ୍ରୁଙ୍ଗ୍ ପେଲ୍ ଆଦେସ୍ ମାନ୍ ଏରାମାନ୍ ନଣ୍ତ୍, ଆରେ ମେନ୍ ମାପ୍ରୁ ଜିଦ୍ଗିଲିଙ୍ଗ୍ ରକିୟା କେଗିଙ୍ଗ୍ ପାୟିଟ୍ ବିସ୍ବାସ୍ ମାଟଣ୍ତ୍। କୁଣ୍ତେଲ୍ ଦାଉଦ୍ ଆରେ ବେତ୍ସିବାଙ୍ଗ୍ ପେଲ୍ଟୁକ୍ ଆରେତରେକ୍ ଉକୁର୍ ସେପାଲ୍ ଜନମ୍ ଏନଣ୍ତ୍, ଆରେ ଆୟ୍ଲକ୍ ଅଣ୍ତୁଙ୍ଗ୍ ସଲମନ୍ ପିଦିର୍ ଇରେର୍।
ବାଇବଲ୍ଟେ ଉକୁଟ୍ କେରାଲ୍: ୧-ସାମୁ ୧୦; ୧୫-୧୯; ୨୪;୩୧; ୨-ସାମୁ ୫; ୭; ୧୧-୧୨
Free to use, adapt, and share under an open license (CC BY-SA 4.0).