18. ୧୮- ଇସ୍ରାଏଲ୍ ଦୁଇ ବାଗ୍ ଏରଣ୍ଡି
ପେଙ୍ଗିଟ୍ ବରସ୍ କୁଣ୍ତେଲ୍ ଦାଉଦ୍ ସାୟିସେୟଣ୍ତ୍, ଆରେ ଅଣ୍ତୁଙ୍ଗ୍ ସେପାଲ୍ ସଲମନ୍ ଇସ୍ରାଏଲ୍ ପୟତାନ୍ ସାସନ୍ କେଗିଙ୍ଗ୍ ଆରାମ୍ କେନଣ୍ତ୍। ମାପ୍ରୁ ସଲମନୁଙ୍ଗ୍ ଏରେ ବିସୟ୍ ପେରିନ୍ ଇଚା କେଗିଦାଣ୍ତ୍ ଆଦ୍ ପାଚାର୍ତଣ୍ତ୍। ଏସେବେଲ୍ ସଲମନ୍ ବୁଦି ପାୟିଟ୍ ପାର୍ତନା କେନଣ୍ତ୍, ମାପ୍ରୁ ଆମାଟୁକ୍ କିର୍ଦେ ଏରିମାଟଣ୍ତ୍ ଆରେ ଅଣ୍ତୁଙ୍ଗ୍ ପୁର୍ତିଟେ ପାଟିନ୍ ପେଲ୍ଟୁକ୍ ପେରିନ୍ ଗିୟାନି କେନଣ୍ତ୍। ସଲମନ୍ ପେଙ୍ଗିଟ୍ ବିସୟ୍ ମାୟ୍ରେଣ୍ତ୍ ଆରେ ଅଣ୍ତ୍ ଉକୁର୍ ପେରିନ୍ ଗିୟାନ୍ବାନ୍ ବିଚାର୍କର୍ତା ଏନଣ୍ତ୍। ଆରେମେନ୍ ମାପ୍ରୁ ଅଣ୍ତୁଙ୍ଗ୍ ପେରିନ୍ ଦନି କେନଣ୍ତ୍।
ଜିରୁସାଲାମ୍ତୁନ୍, ସଲମନ୍ ମନ୍ଦିର୍ ତିୟାର୍ କେନଣ୍ତ୍ ଏରେଦ୍ ତାମ୍ବା ଜଜ୍ନା କେୟିମାଟଣ୍ତ୍ ଆରେ ଦିନ୍ସୁଲ୍ କାଣ୍ତ୍ସି ଇରେର୍। ଲକ୍ଗୁଲ୍ ମାପ୍ରୁନେ ଉପାସନା ଆରେ ନେୟ୍ବେଦିୟ ଉସର୍ଗ ସମାଗମ ତମ୍ବୁନ୍ କେଦାନ୍ ବାଦୁଲ୍ରେନ୍ ମନ୍ଦିର୍ତିନ୍ କେଗିଙ୍ଗ୍ ଉଣ୍ତେର୍। ମାପ୍ରୁ ୱାନଣ୍ତ୍ ଆରେ ମନ୍ଦିର୍ତିନ୍ ମାଟଣ୍ତ୍, ଆରେ ଅଣ୍ତ୍ ଲକ୍ଗୁଲ୍ ନା ବାସେ ଏନଣ୍ତ୍।
ମାତର୍ ସଲମନ୍ ୱେନ୍ ଦେସ୍ଟେ ଆୟାସିଲିଙ୍ଗ୍ ଲାଡ୍ କେନଣ୍ତ୍। ଅଣ୍ତ୍ ୧୦୦୦ ବିଦେସ୍ଟେ ଆସ୍ମାସ୍କିଲିଙ୍ଗ୍ ଅଦୁର୍ ଏରି ମାପ୍ରୁନେ ଆଦେସ୍ ମାନ୍ ଏରୁଟଣ୍ତ୍। ଇ ଆସ୍ମାସ୍କିଲିଙ୍ଗ୍ ପେଲ୍ଟୁକ୍ ପେଙ୍ଗିଟ୍ ୱେନ୍ ଦେସ୍ଟୁକ୍ ୱାରି ମାଟେୱ୍ ଆରେ ଆୱୁନା ଆୱୁନେ ୱେନ୍ଦିସିଲିଙ୍ଗ୍ ଇନ୍ଦ୍ରି ମାଟେୱ୍ ଆରେ ନିତ୍ରେନ୍ ଆୱ୍ଗୁଲୁଙ୍ଗ୍ ଉପାସନା କେଗିଙ୍ଗ୍ ନେୱ୍। ସଲମନ୍ ଏରେବେଲ୍ ମୁତାକ୍ ଏନଣ୍ତ୍, ଅଣ୍ତ୍ ମେନ୍ ଆୱ୍ଗୁଲ୍ ନା ୱେନ୍ଦିସିଲିଙ୍ଗ୍ ଉପାସନା କେନଣ୍ତ୍।
ମାପ୍ରୁ ସଲମନୁଙ୍ଗ୍ ରିସା ଏନଣ୍ତ୍ ଆରେ ସଲମନ୍ନେ ଅବିସ୍ବାସ୍ଟେ ଡଣ୍ତ୍ ପାୟିଟ୍ ସଲ୍ମନ୍ନେ ସାଦାନ୍ କୁଣ୍ତେଲ୍ ଅଣ୍ତ୍ ଇସ୍ରାଏଲ୍ ଦେସିଙ୍ଗ୍ ଦୁୟ୍ ବାଗ୍ଟେ ରାଜି କେଗିଙ୍ଗ୍ ପାୟିଟ୍ ନିସ୍ପତି ଉନଣ୍ତ୍।
ସଲମନ୍ ସାଦାନ୍ କୁଣ୍ତେଲ୍, ଅଣ୍ତୁନେ ସେପାଲ୍ ରିହବିୟାମ୍ ରାଜା ଏନଣ୍ତ୍। ରିହବିୟାମ୍ ଉକୁର୍ ଦୁସ୍ଟ ଲକ୍ ମାଟଣ୍ତ୍। ଇସ୍ରାଏଲ୍ ଦେସ୍ଟେ ପାଟିନ୍ ଲକ୍ଗୁଲ୍ ଉକୁଟ୍ ପେଲ୍ ଏରି ଅଣ୍ତୁଙ୍ଗ୍ ଉକୁଟ୍ ରାଜା କେନର୍। ଆୟ୍ଲକ୍ ରିହବିୟାମୁଙ୍ଗ୍ ପେରିନ୍ ଅବିଜଗ୍ କେୟି ପକେର୍ ଜେ ସଲମନ୍ ଆୟ୍ଲକୁଙ୍ଗ୍ କସ୍ଟ କାମେଲ୍ କେଗିଙ୍ଗ୍ ଆରେ ପେରିନ୍ ସିସ୍ତୁ ସିଗିଙ୍ଗ୍ ପାରିଙ୍ଗ୍ନେ।
ରିହବିୟାମ୍ ଆୟ୍ଲକୁଙ୍ଗ୍ ଗିଦ୍ରିଏରି ଉତର୍ ସିନଣ୍ତ୍, ଇମ୍ଗୁଲ୍ ଏତାକିଦାର୍ ଆମ୍ବା ସଲମନ୍ ଇମ୍ଗୁଲୁଙ୍ଗ୍ କସ୍ଟ କାମେଲ୍ କେଗିଙ୍ଗ୍ ଇରିଙ୍ଗ୍ ନଣ୍ତ୍, ମାତର୍ ଅଣ୍ତୁଙ୍ଗ୍ ପେଲ୍ଟୁକ୍ ଆନ୍ ଆରେ ପେରିନ୍ କସ୍ଟ କାମେଲ୍ କେଗିଙ୍ଗ୍ ସିଦାନ୍, ଆରେ ଅଣ୍ତୁଙ୍ଗ୍ ପେଲ୍ଟୁକ୍ ପେରିନ୍ ଆନ୍ ଇମ୍ଗୁଲୁଙ୍ଗ୍ ଡଣ୍ତ୍ ସିଦାନ୍।
ଇସ୍ରାଏଲ୍ ଦେସ୍ଟେ ଦସ୍ଗଟା ଗସ୍ଟିଟେଲକ୍ ରିହବିୟାମ୍ ବିରଦ୍ରେନ୍ ସେୟର୍। ମାତର୍ ଜଡେକ୍ ଗସ୍ଟିଟେ ଲକ୍ ଅଣ୍ତୁଙ୍ଗ୍ ପେଲ୍ ବିସ୍ବାସ୍ ମାଟର୍। ଇ ଜଡେକ୍ ଗସ୍ଟି ଜିଉଦାଟେ ରାଜି ଏନେ।
ଇସ୍ରାଏଲ୍ ଦେସ୍ଟେ ୱେନ୍ ଦସ୍ଗଟା ଜାତି ରିହବିୟାମ୍ନେ ବିରଦ୍ରେନ୍ ସେୟର୍ ଆରେ ଜାରବିୟାମ୍ ପିଦିର୍ଟଣ୍ତ୍ ଉକୁର୍ ଲକୁଙ୍ଗ୍ ଆୟ୍ଲକ୍ନେ ରାଜା ଏରିଙ୍ଗ୍ ପାୟିଟ୍ ଆସ୍କେର୍। ଆୟ୍ଲକ୍ ଉତର୍ ଦିଗାଲ୍ ଆୟ୍ଲକ୍ନେ ରାଜି ଗଡାତର୍ ଆରେ ଆୱ୍ଗୁଲୁଙ୍ଗ୍ ଇସ୍ରାଏଲ୍ ରାଜି ଆରେ ପର୍ଦେସ୍ ଏଞ୍ଜି ପକେର୍।
ଜାରବିୟାମ୍ ମାପ୍ରୁନେ ବିରଦ୍ରେନ୍ ସେୟଣ୍ତ୍ ଆରେ ଲକ୍ଗୁଲୁଙ୍ଗ୍ ପାପ୍ କେୟୁତଣ୍ତ୍। ଜିଉଦା ରାଜିନ୍ ମାନଣ୍ତି ମନ୍ଦିରତିନ୍ ମାପ୍ରୁନେ ଉପାସନା କେଦାନ୍ ବାଦୁଲ୍ରେନ୍ ଅଣ୍ତ୍ ମୁର୍ତି ୱାଟେ କେଗିଙ୍ଗ୍ ପାୟିଟ୍ ଅଣ୍ତୁନେ ଲକ୍ଗୁଲୁଙ୍ଗ୍ ପାୟିଟ୍ ଜଡେକ୍ ମୁର୍ତି ତିୟାର୍ କେନଣ୍ତ୍।
ଜିଉଦା ରାଜି ଆରେ ଇସ୍ରାଏଲ୍ ରାଜି ସତ୍ରୁ ମାଣ୍ତି ସେୟର୍ ଆରେ ପେଙ୍ଗିଟ୍ ତର୍ ନିଜେନିଜେନିଙ୍ଗ୍ ବିରଦ୍ରେନ୍ ଜୁଦ୍ କେଗିଙ୍ଗ୍ ନର୍।
ପୁନେଦ୍ଟେ ରାଜିନ୍ ଇସ୍ରାଏଲ୍ତିନ୍ ପାଟିନ୍ ରାଜା ଲକ୍ ଦୁସ୍ଟ ମାଟର୍। ଇ ପାଟିନ୍ ରାଜାଲକୁଙ୍ଗ୍ ତାନିର୍ଟୁକ୍ ପେଙ୍ଗୁର୍ତୁଲ୍ ରାଜାକିଲ୍ ୱେନ୍ ଇସ୍ରାଏଲ୍ ଲକୁଙ୍ଗ୍ ପେଲ୍ଟୁକ୍ ସାନର୍। ଏଇର୍ ଆୟ୍ଲକ୍ନେ ବାସେନ୍ ରାଜା ଏରିଙ୍ଗ୍ ଇଚା କେନର୍।
ପାଟିନ୍ ରାଜାଲକ୍ ଆରେ ଇସ୍ରାଏଲ୍ ରାଜିଟେ ପାଟିନ୍ ଲକ୍ ମୁର୍ତି ୱାଟେ କେଗିନର୍। ଆୟ୍ଲକ୍ନେ ମୁର୍ତି ୱାଟେନ୍ ପେରିନ୍ ବେଲା ଆରେକ୍ ବେବିଚାର୍ ଆରେ ଇ ୱାଡିନ୍ ନିନିଟେ ସିଣ୍ତିଲ୍ ମାସିଲିଙ୍ଗ୍ ବଲି ସିଗିଙ୍ଗ୍ ନର୍।
ଜିଉଦାଟେ ରାଜାକିଲ୍ ଦାଉଦ୍ନେ କୁଲ୍ଟେ ଲକ୍ ମାଟର୍। ଇ ପାଟିନ୍ ରାଜାକିଲିଙ୍ଗ୍ ପେଲ୍ଟୁକ୍ ପେଙ୍ଗୁର୍ତୁଲ୍ ନିୟାଟେ ଲକ୍ ମାଟର୍,ଏରେ ଲକ୍ କି ନିୟାୟ ବାବ୍ରେନ୍ ସାସନ୍ କେଗିଙ୍ଗ୍ ନର୍ ଆରେ ମାପ୍ରୁନେ ଉପାସନା କେଗିନର୍। ମାତର୍ ଜିଉଦାଟେ ପେଙ୍ଗୁର୍ତୁଲ୍ ରାଜାଲକ୍ ଦୁସ୍ଟ ଆରେ ଉୟାଟେ ଲକ୍ ମାଟର୍ ଆରେ ଆୟ୍ଲକ୍ ମୁର୍ତି ୱାଟେ କେଗିଙ୍ଗ୍ ନର୍। ଏଙ୍ଗୁର୍ତୁଲ୍ ରାଜାକିଲ୍ ଇ ୱାଡିନ୍ କି ଆୟ୍ଲକ୍ନେ ସିଣ୍ତିଲ୍ ମାସିଲିଙ୍ଗ୍ ଉୟାଟେ ୱେନ୍ଦିଟ୍ଗିଲିଙ୍ଗ୍ ବଲି ସିଗିଙ୍ଗ୍ ନର୍। ଜିଉଦାଟେ ଅଦେକ୍ ଲକ୍ଗୁଲ୍ ମାପ୍ରୁନେ ବିରଦ୍ରେନ୍ ସେୟର୍ ଆରେ ୱେନ୍ ୱେନ୍ଦିଟ୍ଗିଲିଙ୍ଗ୍ ଉପାସନା କେନର୍।
ବାଇବଲ୍ଟେ ଉକୁଟ୍ କେରାଲ୍: ୧-ରାଜା ୧-୬; ୧୧-୧୨
Free to use, adapt, and share under an open license (CC BY-SA 4.0).