19. ୧୯- ମାପ୍ରୁନେ ବାବବାଦିତିଲ୍
ଇସ୍ରାଏଲ୍ ଲକ୍ନେ ଇତିହାସ୍ରେନ୍, ମାପ୍ରୁ ଆୟ୍ଲକ୍ନେ ଆର୍ସେଲ୍ ଭାବବାଦିତିଲିଙ୍ଗ୍ ସୟ୍ତଣ୍ତ୍। ଭାବବାଦିତିଲ୍ ମାପ୍ରୁନେ ପାଟେ ୱେଞ୍ଜି ଆଦିଙ୍ଗ୍ କୁଣ୍ତେଲ୍ ମାପ୍ରୁନେ ପାଟେ ଲକୁଙ୍ଗ୍ ୱେଣ୍ତୁକିନର୍।
ଆହବ୍ ଏରେବେଲ୍ ଇସ୍ରାଏଲ୍ ରାଜିନ୍ ରାଜା ମାଟଣ୍ତ୍ ଆସେବେଲ୍ ଏଲିୟ ଉକୁର୍ ଭାବବାଦି ମାଟଣ୍ତ୍। ଆହବ୍ ଉକୁର୍ ଦୁସ୍ଟ ଲକ୍ ମାଟଣ୍ତ୍, ବାଲ୍ ପିଦିର୍ଟେ ଉକୁଟ୍ ଉୟାଟେ ୱେନ୍ଦିଟିଙ୍ଗ୍ ୱାଟେ କେଗିଙ୍ଗ୍ ପାୟିଟ୍ ଲକ୍ଗୁଲୁଙ୍ଗ୍ ପକୁଙ୍ଗ୍ ନଣ୍ତ୍। ଏଲିୟ ଆହବୁଙ୍ଗ୍ ପକେଣ୍ତ୍, “ଆନ୍ ପକା ଆରେକ୍ ଇସ୍ରାଏଲ୍ତିନ୍ ଏସେଲ୍ ମେନ୍ ୱାଇନ୍ ୱାରା।” ଆଦିଙ୍ଗ୍ ପାୟିଟ୍ ଆହବ୍ ପେରିନ୍ ରିସା ଏନଣ୍ତ୍।
ଏଲିୟଙ୍ଗ୍ ୱାଟ୍ତେନ୍ ଆଟିଙ୍ଗ୍ ପାୟିଟ୍ ଇଚା କେୟାକ୍ ଆହବୁଙ୍ଗ୍ ପେଲ୍ଟୁକ୍ ନିଜେନିଙ୍ଗ୍ ପାକିଙ୍ଗ୍ ପାୟିଟ୍ ଉକୁଟ୍ ପାଜ୍ରା ଆର୍ସେଲ୍ ମାନଣ୍ତି ଚିମ୍ରା ବାସେନ୍ ପାକିଙ୍ଗ୍ ପାୟିଟ୍ ମାପ୍ରୁ ଏଲିୟଙ୍ଗ୍ ପକେଣ୍ତ୍। ନିତ୍ରେନ୍ ଆଡ୍ତଲ୍ ଆରେ ସିର୍ତାଲ୍ବେଲେନେ ତିତେଲ୍ ରୁଟି ଆରେ ସେପୁଲ୍ ଇନ୍ଦ୍ରି ସିଗିଙ୍ଗ୍ନେୱ୍। ଆହବ୍ ଆରେ ଅଣ୍ତୁନେ ସନିୟତୁଲ୍ ଏଲିୟଙ୍ଗ୍ କାଣ୍ତ୍ତର୍, ମାତର୍ ଆୟ୍ଲକ୍ ଅଣ୍ତୁଙ୍ଗ୍ କାଣ୍ତିକିଙ୍ଗ୍ ଅଡୁଟର୍। ମର୍ଡି ପେରିନ୍ ଏନେ ଜେ ପାଜ୍ରା ନିର୍ ଦିରେନ୍ ଦିରେନ୍ ୱାଟି ସେଣ୍ତେ।
ଆଦିଙ୍ଗ୍ ଏଲିୟ ଉକୁଟ୍ ଆର୍ସେଲ୍ଟେ ଦେସ୍ତିନ୍ ସେୟଣ୍ତ୍। ମର୍ଡି ଏତାଲିନ୍ ଆୟ୍ ଦେସ୍ଟେ ଅକାଲ୍ ରାଣ୍ତି ଆସ୍ମାଲ୍ ଆରେ ଆଦିନେ ସେପାଲ୍ନେ କାଦି ପଲିସେଞ୍ଜି ମାଟେ। ଏନାଦିଙ୍ଗ୍ କି ୱାଇନ୍ ୱାରା ପାୟିଟ୍ ମର୍ଡି ଏରିମାଟେ ମାତର୍ ଆୟ୍ଲକ୍ ଏଲିୟନେ ଜତନ୍ ଉନର୍, ଆରେ ମାପ୍ରୁ ଆୟ୍ଲକୁଙ୍ଗ୍ କାଦି ସିନଣ୍ତ୍ ଏଟେନ୍ କି ଆୟ୍ଲକ୍ନେ ଅଟା ଇରଣ୍ଡି ଜାଗା ଆରେ ନେୟ୍ ଇରଣ୍ତି ଡାବା ଏସେଲ୍ ପଲାମାଟେ। ଆୟ୍ ମର୍ଡି ବେଲ୍ ମେନ୍ ଆୟ୍ଲକ୍ନେ କାଦି ମାଟେ। ଏଲିୟ ଆମାନ୍ ପେଙ୍ଗିଟ୍ ବରସ୍ ମାଟଣ୍ତ୍।
ତିନ୍ ବରସ୍ ସଅ ମାସ୍ କୁଣ୍ତେଲ୍, ମାପ୍ରୁ ଏଲିୟଙ୍ଗ୍ ଇସ୍ରାଏଲ୍ ଦେସ୍ତିନ୍ ସେନିଙ୍ଗ୍ ପାୟିଟ୍ ପକେଣ୍ତ୍, ଆରେ ଆହବୁଙ୍ଗ୍ ପକେଣ୍ତ୍ ଜେ ଅଣ୍ତ୍ ଆରେତରେକ୍ ୱାଇନ୍ ସୟୁକୁଙ୍ଗ୍ ଇଚା କେଗିଦାଣ୍ତ୍। ଏସେବେଲ୍ ଆହବ୍ ଏଲିୟଙ୍ଗ୍ ସୁଡେଣ୍ତ୍, ଅଣ୍ତ୍ ପକେଣ୍ତ୍, “ଇଦ୍ ଇନେ ଏନା ସମସିୟା ସୁସ୍ଟି କେୟାକ୍!” ଏଲିୟ ଅଣ୍ତୁଙ୍ଗ୍ ଉତର୍ ସିନଣ୍ତ୍, “ଇନ୍ ସମସିୟା ସୁସ୍ଟି କେୟାକ୍! ଇନ୍ ସତ୍ ମାପ୍ରୁ ପର୍ବୁଙ୍ଗ୍ ସାକାରି ସିମାଟ୍ ଆରେ ବାଲ୍ ୱେନ୍ଦିଟିଙ୍ଗ୍ ଉପାସନା କେଗିଦାଟ୍। ଇସ୍ରାଏଲ୍ ରାଜିଟେ ପାଟିନ୍ ଲକୁଙ୍ଗ୍ କର୍ମିଲ୍ କପେଲ୍ ଇନ୍ଦ୍ରେ।
୪୫୦ ବାଲ୍ ୱେନ୍ଦିଟ୍ନେ ଭବିସତ୍ ବକ୍ତାତିଲ୍ ଆରେ ଇସ୍ରାଏଲ୍ ରାଜିଟେ ପାଟିନ୍ ଲକ୍ କର୍ମିଲ୍ କପେଲ୍ ୱାନର୍। ଏଲିୟ ଲକୁଙ୍ଗ୍ ପକେଣ୍ତ୍, “ଇମ୍ଗୁଲ୍ ଏଙ୍ଗିର୍ଦିନାମ୍ ଇମେ ମନୁଙ୍ଗ୍ ବାଦ୍ଲାସି ତାକ୍ତାର୍? ଜଦି ପର୍ବୁ ମାପ୍ରୁ ଏରିସେୟ୍ଦାଣ୍ଡ୍, ଆଟେକଡ୍ ଅଣ୍ତୁନେ ସେବା କେୟୁର୍, ଜଦି ବାଲ୍ ୱେନ୍ଦିଟ୍ନେ ମାପ୍ରୁ ଆଟେକଡ୍ ଅଣ୍ତୁନେ ସେବା କେୟୁର୍।
ଆଦିଙ୍ଗ୍ କୁଣ୍ତେଲ୍ ଏଲିୟ ବାଲ୍ ଭାବବାଦିତିଲିଙ୍ଗ୍ ପକେଣ୍ତ୍, ଉକୁଟ୍ କନ୍ଦେ କାତୁର୍ ଆରେ ଆଦିଙ୍ଗ୍ ବଲି ପାୟିଟ୍ ତିୟାର୍ କେୟୁର୍, ମାତର୍ ଇମାନ୍ କିସ୍ ପାନ୍ଦୁମେର୍। ଆନ୍ ମେନ୍ ଆଦ୍ କେଦାନ୍। ଏରେ ମାପ୍ରୁ କିସ୍ନା ପାରିକ୍ଦାଣ୍ତ୍ ଅଣ୍ତ୍ ସତ୍ ମାପ୍ରୁ ଏଦାଣ୍ତ୍।” ଆଦିଙ୍ଗ୍ ବାଲ୍ ଭବିସତ୍ ବକ୍ତାତିଲ୍ ଉକୁଟ୍ ବଲି ସିୟଣ୍ତି ଜଗିୟବେଦି ତିୟାର୍ କେନର୍ ମାତର୍ ଆମାନ୍ କିସ୍ ତୁୟୁଟର୍।
ଆଦିଙ୍ଗ୍ କୁଣ୍ତେଲ୍ ବାଲ୍ ଭବିସତ୍ବକ୍ତାତିଲ୍ ବାଲ୍ ୱେନ୍ଦିଟିଙ୍ଗ୍ ପାର୍ତନା କେନର୍ “ବାଲ୍, ଆମେ ପାର୍ତନା ୱେନ୍!” ପୁରା ଦିନ୍ ଆୟ୍ଲକ୍ ପାର୍ତନା କେନର୍ ଆରେ ପେରିନ୍ ଆଉଲି ଏନର୍ ଆରେ ନିଜେନ୍ ନିଜେନିଙ୍ଗ୍ କାଣ୍ତାଲ୍ ନା କାତି ଏନର୍, ମାତର୍ ଏନାମେନ୍ ଉତର୍ ତଣ୍ତୁଟେ।
ସିର୍ତାବେଲାଙ୍ଗ୍, ଏଲିୟ ମାପ୍ରୁଙ୍ଗ୍ କାକେଲ୍ ଉକୁଟ୍ ବଲି ତିୟାର୍ କେନଣ୍ତ୍। ଆମାଟୁକ୍ ଅଣ୍ତ୍ ଲକୁଙ୍ଗ୍ ପକେଣ୍ତ୍, ଜଗିୟବେଦିଟେ ସେପୁଲ୍ ଆରେ କାଡ୍ସିଲ୍ଟେ ଜଗିୟବେଦି ଚାରିବେଡ୍ତେନ୍ ବାସେ ପୁରା ପଦ୍ଦାନ୍ ଆରେକ୍ ବାର ଗଟା ବେର୍ ବେର୍ଟେ ନକିଲ୍ତିନ୍ ନିର୍ ଉଇ ସରୁକୁଙ୍ଗ୍ ପକେଣ୍ତ୍।
ଆଦିଙ୍ଗ୍ କୁଣ୍ତେଲ୍ ଏଲିୟ ପାର୍ତନା କେନଣ୍ତ୍, “ଏ ଅବ୍ରାମ୍, ଇସାକ୍ ଆରେ ଜାକୁବନେ ମାପ୍ରୁ ପର୍ବୁ, ଇନେନ୍ ଆମୁଙ୍ଗ୍ ତଟୁପ୍ ଜେ ଇନ୍ ଇସ୍ରାଏଲ୍ଟେ ମାପ୍ରୁ ଆରେ ଆନ୍ ଇନେ ଦାସ୍। ଆନିଙ୍ଗ୍ ଉତର୍ ଇନ୍ଦେ ଏଟେନ୍ କି ଇ ପାଟିନ୍ ଲକ୍ ପୁୟାର୍ ଜେ ଇନ୍ ସତ୍ ମାପ୍ରୁ।”
ଆମାଟୁକ୍, ଆକାସ୍ଟେ କିସ୍ ଇଲି ଜଗିୟବେଦିନ୍ ମାନଣ୍ତି ସେପୁଲ୍, କାଡ୍ସିଲ୍, କାଣ୍ତ୍କିଲ୍ ଦୁଲି ଇ ୱାଡିନ୍ ଜଗିୟବେଦି ଚାରିବେଡ୍ତେଟେ ନିରିଙ୍ଗ୍ ପାଟିନ୍ କାରୁୱ୍ସି କାରେଣ୍ତ୍। ଲକ୍ଗୁଲ୍ ଏସେବେଲ୍ ଇଦ୍ ସୁଡେର୍, ଆୟ୍ଲକ୍ ବାସେନ୍ ଉମ୍ତାଡ୍ ଏରି ପକେର୍, “ ପର୍ବୁ ଇ ମାପ୍ରୁ! ପର୍ବୁ ଇ ମାପ୍ରୁ!”
ଆଦିଙ୍ଗ୍ କୁଣ୍ତେଲ୍ ଏଲିୟ ପକେଣ୍ତ୍, “ବାଲ୍ ୱେନ୍ଦିଟ୍ଟେ ଏରେମେନ୍ ଭବିସତ୍ବକ୍ତା ଲକୁଙ୍ଗ୍ ସେନିଙ୍ଗ୍ ସିମେର୍!” ଆଦିଙ୍ଗ୍ ଲକ୍ଗୁଲ୍ ବାଲ୍ ୱେନ୍ଦିଟ୍ନେ ଭବିସତ୍ ବକ୍ତାଲକୁଙ୍ଗ୍ ପାତି ଆୟ୍ଲକୁଙ୍ଗ୍ ୱାଟ୍ତେନ୍ ଆଟେର୍।
ଆଦିଙ୍ଗ୍ କୁଣ୍ତେଲ୍ ଏଲିୟ ଆହବୁଙ୍ଗ୍ ପକେଣ୍ତ୍, “ଗଡ୍ତୁନ୍ ଦାପ୍ରେନ୍ ମାଣ୍ତିସେନ୍, ଏନାଦିଙ୍ଗ୍ କି ୱାଇନ୍ ୱାରିଦା।” ଦାପ୍ରେନ୍ ଆକାସ୍ ସିର୍ଙ୍ଗାଟ୍ ଏରିଙ୍ଗ୍ ଉଣ୍ତେଟେ ଆରେ ବେସି ୱାଇନ୍ ୱାନେ। ଜିହବା ମର୍ଡିଙ୍ଗ୍ ସେସ୍ କେୟି ପଲିମାଟଣ୍ତ୍ ଆରେ ଅଣ୍ତ୍ ଜେ ସତ୍ ମାପ୍ରୁ ଆଦ୍ ଅଣ୍ତ୍ ପର୍ମାନ୍ କେନଣ୍ତ୍।
ଏଲିୟନେ ବେଲା କୁଣ୍ତେଲ୍, ମାପ୍ରୁ ଇଲିସାୟ ପିଦିର୍ଟେ ଉକୁର୍ ଲକୁଙ୍ଗ୍ ଅଣ୍ତୁନେ ଭାବବାଦି ଏରିଙ୍ଗ୍ ପାୟିଟ୍ ଆସ୍କେଣ୍ତ୍। ମାପ୍ରୁ ଇଲିସାୟଙ୍ଗ୍ ପେଲ୍ଟୁକ୍ ପେଙ୍ଗିଟ୍ କାବା କାମେଲ୍ କେନଣ୍ତ୍। ନାମାନଙ୍ଗ୍ ପେଲ୍ ଉକୁଟ୍ କାବା କାମେ ଗଟ୍ଏରି ମାଟେ, ଅଣ୍ତ୍ ଉକୁର୍ ସତ୍ରୁ ସେନାପତି ମାଟଣ୍ତ୍, ଅଣ୍ତୁଙ୍ଗ୍ ଚର୍ମ ରଗ୍ ଏରିମାଟେ। ଅଣ୍ତ୍ ଇଲିସାୟନେ ବିସୟ୍ରେନ୍ ୱେଞ୍ଜି ମାଟଣ୍ତ୍ ଆଦିଙ୍ଗ୍ ଅଣ୍ତ୍ ସେଞ୍ଜି ଅଣ୍ତୁଙ୍ଗ୍ ସୁସ୍ତ କେଗିଙ୍ଗ୍ ପାୟିଟ୍ ଇଲିସାୟଙ୍ଗ୍ ପକେଣ୍ତ୍। ଇଲିସାୟ ନାମାନୁଙ୍ଗ୍ ଜର୍ଦନ୍ ପେରେଟ୍ତିନ୍ ସାତ୍ ତର୍ ମୁଲ୍ଗୁଙ୍ଗ୍ ପକେଣ୍ତ୍।
ପର୍ତୁମ୍ ନାମାନ୍ ରିସା ଏରିମାଟଣ୍ତ୍ ମାତର୍ ଇଦ୍ କେୟାଣ୍ତ୍ ଇଦୁ ମୁର୍କତା ୱାଡିନ୍ ପେତେ। ମାତର୍ ଆୟ୍ବେଲ୍ ଅଣ୍ତ୍ ଅଣ୍ତୁନେ ମନ୍ ବାଦ୍ଲାସି ଜର୍ତନ୍ ପେରେଟ୍ତିନ୍ ନିଜେନ୍ ଅଣ୍ତ୍ ସାତ୍ ତର୍ ମୁଲ୍ଗେଣ୍ତ୍। ଅଣ୍ତ୍ ଏସେବେଲ୍ ନିର୍ଟୁକ୍ ପେସି ୱାନଣ୍ତ୍ ଆୟ୍ବେଲ୍ ଅଣ୍ତୁନେ ଚର୍ମ ରଗ୍ ସୁସ୍ତ ଏନେ। ମାପ୍ରୁ ଅଣ୍ତୁଙ୍ଗ୍ ସୁସ୍ତ କେନଣ୍ତ୍।
ମାପ୍ରୁ ଆରେତରେକ୍ ୱେନ୍ ଭାବବାଦିତିଲିଙ୍ଗ୍ ସୟ୍ସିମାଟଣ୍ତ୍। ଆୟ୍ଲକ୍ ପାଟିନ୍ ଲକୁଙ୍ଗ୍ ମୁର୍ତି ୱାଟେ ବନ୍ଦ୍ କେଗିଙ୍ଗ୍ ପାୟିଟ୍ ପକେର୍ ଆରେ ୱେନ୍ ଲକୁଙ୍ଗ୍ ନିୟାୟ ଆରେ ଦୟା ତଟୁକୁଙ୍ଗ୍ ପକିମାଟର୍। ଭାବବାଦିତିଲ୍ ଲକ୍ଗୁଲୁଙ୍ଗ୍ ଜାଗର୍ତା କେୟି ପକେର୍ ଜେ ଜଦି ଆୟ୍ଲକ୍ ଉୟା କାମେଲ୍ କେଗିଙ୍ଗ୍ ବନ୍ଦ୍ କେୟାର୍ ଆରେ ମାପ୍ରୁନେ ଆଦେସ୍ ମାନ୍ଏରାର୍ ଆଟେଲ୍ ମାପ୍ରୁ ଆୟ୍ଲକୁଙ୍ଗ୍ ଦସି ଏଞ୍ଜି ବିସାର୍ କେଦାଣ୍ଡ୍ ଆରେ ଆୟ୍ଲକୁଙ୍ଗ୍ ଡଣ୍ତ୍ ସିଦାଣ୍ଡ୍।
ପେରିନ୍ ତର୍ ଲକ୍ଗୁଲ୍ ମାପ୍ରୁନେ ଆଦେସ୍ ମାନ୍ଏରୁଟର୍। ଆୟ୍ଲକ୍ ପେଙ୍ଗିଟ୍ ସମୟ୍ରେନ୍ ଭାବବାଦିତିଲ୍ ନା ଉୟା ବେବହାର୍ କେଗିଙ୍ଗ୍ନର୍ ଆରେ ଏସେବେଲ୍ ଇ ୱାଡିନ୍ ଆୟ୍ଲକୁଙ୍ଗ୍ ୱାଟ୍ତେନ୍ ଆଟିଙ୍ଗ୍ନର୍। ତରେକ୍, ଜିରିମିୟ ଭାବବାଦିଙ୍ଗ୍ ଉକୁଟ୍ ୱାଟଣ୍ଡି କୁୟ୍କାଲ୍ତିନ୍ କାରିସି ମାଟର୍ ଆରେ ଅଣ୍ତୁଙ୍ଗ୍ ସାଗିଙ୍ଗ୍ ପାୟିଟ୍ ଅଣ୍ତୁଙ୍ଗ୍ ଆମାନ୍ ଉକୁରୁଙ୍ଗ୍ ସାକାରି ମାଟର୍। ଆୟ୍ କୁୟ୍କାଲ୍ ତାନିର୍ ମାନଣ୍ତି କାଦନ୍ ମୁଲ୍ଗି ସେଞ୍ଜିମାଟଣ୍ତ୍, ମାତର୍ ରାଜା ଅଣ୍ତୁଙ୍ଗ୍ ପାୟିଟ୍ ଦୟା ୱାନେ ଆରେ ଜିରିମିୟ ସାଦାନ୍ ଆଗାଡି ଅଣ୍ତୁଙ୍ଗ୍ କୁୟ୍କାଲ୍ଟୁକ୍ ପୟେନ୍ ପେପ୍ସି ଇନ୍ଦ୍ରି ଅଣ୍ତ୍ ଅଣ୍ତୁନେ ଦାସ୍ଲକୁଙ୍ଗ୍ ଆଦେସ୍ ସିନଣ୍ତ୍।
ଭାବବାଦିତିଲିଙ୍ଗ୍ ଲକ୍ଗୁଲ୍ ଗୁର୍ନା କେଗଡ୍ ମେନ୍ ଆୟ୍ଲକ୍ ମାପ୍ରୁ ନେ ପାଟେ ପକୁଙ୍ଗ୍ ଉଣ୍ତେର୍। ଆୟ୍ଲକ୍ ଲକ୍ଗୁଲୁଙ୍ଗ୍ ଜାଗର୍ତା କେୟି ପକେର୍ ଜେ ଜଦି ଆୟ୍ଲକ୍ ଅନୁତାପ୍ କେୟାକଡ୍ ମାପ୍ରୁ ଆୟ୍ଲକୁଙ୍ଗ୍ ବିନସ୍ଟ କେଦାଣ୍ତ୍। ମାପ୍ରୁନେ ପେରିତ୍ କିସ୍ଟ ଜେ ୱାଦାଣ୍ତ୍ ଆୟ୍ ଜିଦ୍ ବିସୟରେନ୍ ଆୟ୍ଲକ୍ ଲକ୍ଗୁଲୁଙ୍ଗ୍ ଏତାସି ସି ମାଟର୍।
ବାଇବଲ୍ଟେ ଉକୁଟ୍ କେରାଲ୍: ୧-ରାଜା ୧୬-୧୮; ୨-ରାଜା ୫; ଜିରିମି ୩୮
Free to use, adapt, and share under an open license (CC BY-SA 4.0).