20. ୨୦- ଇସ୍ରାଏଲ୍ତିଲ୍ ୱେନ୍ ଦେସ୍ତିନ୍ ପାଲାରି ଆରେ ମାଣ୍ଡି ୱାରଣ୍ଡି
ଇସ୍ରାଏଲ୍ ରାଜି ଆରେ ଜିଉଦା ରାଜି ମାପ୍ରୁନେ ବିରଦ୍ରେନ୍ ପାପ୍ କେନର୍। ମାପ୍ରୁ ସିନୟ୍ କପେଲ୍ ଆୟ୍ଲକ୍ନା ଏରେ ନିୟମ୍ କେୟି ମାଟଣ୍ତ୍, ଆୟ୍ଲକ୍ ଆୟ୍ ନିୟମୁଙ୍ଗ୍ ବାଦ୍ଲାସି କାରେର୍। ଲକ୍ଗୁଲ୍ ଏଟେନ୍ ଅନୁତାପ୍ କେଦାର୍ ଆରେ ଆରେତରେକ୍ ଅଣ୍ତୁନେ ଉପାସନା କେଦାର୍ ଆଦିଙ୍ଗ୍ ପାୟିଟ୍ ମାପ୍ରୁ ଆୟ୍ଲକ୍ନେ ଭାବବାଦିତିଲିଙ୍ଗ୍ ସୟ୍ସି ଜାଗ୍ରତା କେୟୁତଣ୍ତ୍, ମାତର୍ ଆୟ୍ଲକ୍ ଆଦ୍ ପାଲନ୍ କେଗିଙ୍ଗ୍ ମାନା କେନର୍।
ଆଦିଙ୍ଗ୍ ମାପ୍ରୁ ଆର୍ସେଲ୍ଟେ ରାଜିଲିଙ୍ଗ୍ ଆୟ୍ଲକ୍ନେ ସତ୍ରୁଲକ୍ନା ବିନସ୍ଟ ଏରିଙ୍ଗ୍ ପାୟିଟ୍ ଅନୁମତି ସିନଣ୍ତ୍। ଉକୁଟ୍ ସକ୍ତିସାଲି ଆରେ ନିର୍ଦୟି ଦେସ୍ ଆସିରିୟ ସାମ୍ରାଜ ଇସ୍ରାଏଲ୍ ରାଜିଙ୍ଗ୍ ବିନସ୍ଟ କେନେୱ୍। ଇସ୍ରାଏଲ୍ତିନ୍ ମାନଣ୍ତି ପେଙ୍ଗୁର୍ତୁଲୁଙ୍ଗ୍ ଆସିରିୟତିଲ୍ ୱାଟ୍ତେନ୍ ଆଟେର୍, ମୁଲିକାଟେ ଦିନ୍ସୁଲ୍ ପାତି ସେୟର୍, ଆରେ ଦେସ୍ଟେ ଅଦା ବାଗିଙ୍ଗ୍ କାରୁୱ୍ସି କାରେର୍।
ଆସିରିୟତିଲ୍ ଦନି ଲକୁଙ୍ଗ୍, ଦକ୍ଷତା ମାନ୍ ଲକୁଙ୍ଗ୍ ଇ ୱାଡିନ୍ ପାଟିନ୍ ନେତାଲକୁଙ୍ଗ୍ ଉକୁଟ୍ ପେଲ୍ କେନର୍ ଆରେ ଆୟ୍ଲକୁଙ୍ଗ୍ ପାତି ଆସିରିୟ ସେୟର୍। ମାତର୍ ପେରିନ୍ ଗରିବ୍ ଇସ୍ରାଏଲ୍ତିଲ୍ ଏରେଲକୁଙ୍ଗ୍ ୱାଟ୍ତେନ୍ ଆଟାରିମାଟର୍ ଆୟ୍ଲକ୍ ଇ ଇସ୍ରାଏଲ୍ ରାଜିନ୍ ମାଞ୍ଜିସେୟର୍।
ଆଦିଙ୍ଗ୍ କୁଣ୍ତେଲ୍ ଆସିରିୟତୁଲ୍ ବିଦେସିୟ ଲକୁଙ୍ଗ୍ ଆୟ୍ଲକ୍ନେ ଦେସ୍ତିନ୍ ବାସେ ଏରିଙ୍ଗ୍ ପାୟିଟ୍ ଇନ୍ଦ୍ରେର୍ ଏରେମାନ୍ ଇସ୍ରାଏଲ୍ ରାଜି ମାଟେ। ବିଦେସିୟତୁଲ୍ ବିନସ୍ଟ ଏରିସେନଣ୍ତି ଗଡ୍ଗୁଲ୍ ଆରେତରେକ୍ ତିୟାର୍ କେନର୍ ଆରେ ଇସ୍ରାଏଲ୍ ଲକୁଙ୍ଗ୍ ଅଦୁର୍ ଏନର୍ ଏରେଲକ୍ ଆମାନ୍ ମାଞ୍ଜିସେଞ୍ଜି ମାଟର୍। ଏରେ ଇସ୍ରାଏଲ୍ ଜାତି ବିଦେସିୟଲକୁଙ୍ଗ୍ ଅଦୁର୍ ଏରିମାଟର୍ ଆୟ୍ଲକୁଙ୍ଗ୍ ସମିରନିୟ ପକୁଙ୍ଗ୍ ନର୍।
ଜିଉଦା ରାଜିଟେ ଲକ୍ଗୁଲ୍ ସୁଡେର୍ ଜେ ଇସ୍ରାଏଲ୍ ରାଜିଟେ ଲକ୍ ମାପ୍ରୁଙ୍ଗ୍ ବିସ୍ବାସ୍ କେୟା ପାୟିଟ୍ ଆରେ ଆଦେସ୍ ମାନ୍ଏରା ପାୟିଟ୍ ମାପ୍ରୁ ଆୟ୍ଲକୁଙ୍ଗ୍ ଡଣ୍ତ୍ ସିମାଟଣ୍ତ୍। ମାତର୍ ଆୟ୍ଲକ୍ କିନାନିୟ ମୁର୍ତିଲିଙ୍ଗ୍ ୱାଟେ କେୟି ମୁର୍ତିଲିଙ୍ଗ୍ ଉପାସନା କେନର୍। ଆୟ୍ଲକୁଙ୍ଗ୍ ଜାଗ୍ରତା କେଗିଙ୍ଗ୍ ପାୟିଟ୍ ମାପ୍ରୁ ଭାବବାଦିତିଲିଙ୍ଗ୍ ସୟ୍ତଣ୍ତ୍, ମାତର୍ ଆୟ୍ଲକ୍ ୱେନିଙ୍ଗ୍ ପାୟିଟ୍ ମାନା କେନର୍।
ଆସିରିୟତିଲ୍ ଇସ୍ରାଏଲ୍ ରାଜିଙ୍ଗ୍ ବିନସ୍ଟ କେୟଣ୍ତି ୧୦୦ ବରସ୍ କୁଣ୍ତେଲ୍, ମାପ୍ରୁ ବାବିଲ୍ଟେ ରାଜା ନବୁଖଦ୍ନିସ୍ରୁଙ୍ଗ୍ ଜିଉଦା ରାଜି ଆଟିଙ୍ଗ୍ ପାୟିଟ୍ ସୟ୍ତଣ୍ତ୍। ବାବିଲନ୍ ଉକୁଟ୍ ସକ୍ତିସାଲି ସାମ୍ରାଜ ମାଟେ। ଜିଉଦାଟେ ରାଜା ନବୁଖଦ୍ନିସ୍ରୁଙ୍ଗ୍ ଦାସ୍ ଏରିଙ୍ଗ୍ ପାୟିଟ୍ ସହମତି ସିନର୍ ଆରେ ପାଟିନ୍ ବରସ୍ ପେଙ୍ଗିଟ୍ ଦିନ୍ସୁଲ୍ ସିନର୍।
ମାତର୍ ଅଲପ୍ ବରସ୍ କୁଣ୍ତେଲ୍, ଜିଉଦାଟେ ରାଜା ବାବିଲନ୍ ବିରଦ୍ରେନ୍ ସେୟର୍। ଆଦିଙ୍ଗ୍, ବାବିଲନ୍ତୁଲ୍ ମାଣ୍ତିୱାରି ଜିଉଦା ରାଜିଙ୍ଗ୍ ଆଟିଙ୍ଗ୍ ଉଣ୍ତେର୍। ଆୟ୍ଲକ୍ ଜିରୁସାଲମ୍ ଗଡ୍ ଅଦିକାର୍ କେନର୍, ମନ୍ଦିରିଙ୍ଗ୍ ବିନସ୍ଟ କେନର୍, ଗଡ୍ ଆରେ ମନ୍ଦିର୍ଟେ ସୁନା ବାନା ପାତି ସେୟର୍।
ଉୟାକେଦାନ୍ ପାଇଟ୍ ଜିଉଦାଟେ ରାଜାଙ୍ଗ୍ ଦଣ୍ଡ୍ ସିଗିଙ୍ଗ୍ ପାଇଟ୍ ନବୁକଦ୍ନିସର୍ନେ ସନିୟଦଲ୍ ରାଜାନେ ସେପାକିଲିଙ୍ଗ୍ ମୁଆଟ୍ତିନ୍ ୱାଟ୍ତେନ୍ ଆଟେର୍ ଆରେ ଅଣ୍ତୁଙ୍ଗ୍ କାନା କେୟିକାରେର୍, ଆଦିନ୍ କିଣ୍ତେଲ୍ ଅଣ୍ତ୍ ଏଟେନ୍କି ବାବିଲ୍ଟେ ଜୟିଲ୍ ଉଲେନ୍ ସାଦାଣ୍ତ୍ ଆଦିଙ୍ଗ୍ ପାଇଟ୍ ଆୟ୍ଲକ୍ ଅଣ୍ତୁଙ୍ଗ୍ ବାବିଲ୍ତିନ୍ ପାତିସେୟ୍ର୍।
ନବୁକଦ୍ନିସର୍ ଆରେ ଅଣ୍ତୁନେ ସନିୟତୁଲ୍ ଜିଉଦାଟେ ପାଟିନ୍ ଲକୁଙ୍ଗ୍ ବାବିଲ୍ଲନ୍ତୁନ୍ ପାତିସେୟର୍ ଆରେ ୱିଣ୍ତ୍ଗିଲ୍ତିନ୍ କାମେ କେଗିଙ୍ଗ୍ କାକୁର୍ତି ଲକୁଙ୍ଗ୍ ଜିଉଦାନ୍ ସାକାରେର୍, ମାପ୍ରୁନ୍ ଲକୁଙ୍ଗ୍ ଜିଦ୍ଟେ ଦେସ୍ଟୁକ୍ ସକ୍ତି ତଟ୍ସି ପାତିସେଞ୍ଜି ମାଟର୍ ଟିକ୍ବେଲ୍ ପକିଏରିମା।
ଜଦି ପାପ୍ ପାୟିଟ୍ ମାପ୍ରୁ ଆୟ୍ଲକୁଙ୍ଗ୍ ନିଜେଟେ ଇଚାନା ୱେନ୍ ଦେସ୍ତିନ୍ ସୟ୍ତଣ୍ତ୍, ମାତର୍ ଅଣ୍ତ୍ ଆୟ୍ଲକୁଙ୍ଗ୍ ଆରେ ଅଣ୍ତୁନେ ଜିଦ୍ଗିଲିଙ୍ଗ୍ ବାନାଏରାଣ୍ତି ମାଟଣ୍ତ୍। ମାପ୍ରୁ ଅଣ୍ତୁନେ ଲକୁଙ୍ଗ୍ ପୟ୍ତାନ୍ ନଜର୍ ଇରିନଣ୍ତ୍ ଆରେ ଆୟ୍ଲକ୍ନେ ଭାବବାଦିତିଲ୍ନା ଆୟ୍ଲକୁଙ୍ଗ୍ ପାଟେ ପକୁଙ୍ଗ୍ ଉଣ୍ତେର୍। ଅଣ୍ତ୍ ଜିଦ୍ କେନଣ୍ତ୍ ଜେ, ସତୁରି ବରସ୍ କୁଣ୍ତେଲ୍ ଆୟ୍ଲକ୍ ଆରେତରେକ୍ ଆଦେସ୍ଟେ ଦେସ୍ତିନ୍ ମାଣ୍ତି ୱାଦାର୍।
ସତୁରି ବରସ୍ କୁଣ୍ତେଲ୍, ପାର୍ସିତିଲ୍ନେ ରାଜା ସାଇରସ୍ ବାବିଲନୁଙ୍ଗ୍ ଆରାତଣ୍ତ୍, ଆଦିଙ୍ଗ୍ ପାରାସ୍ ସାମ୍ରାଜ ବାବିଲନ୍ ସାମ୍ରାଜ ବାସେ ଉନର୍। ଇଣ୍ତି ଇସ୍ରାଏଲ୍ ଲକୁଙ୍ଗ୍ ଜିଉଦି ଏଞ୍ଜି ପକେର୍ ଆରେ ଆୟ୍ଲକ୍ ଆୟ୍ଲକ୍ନେ ଜିୱେ ସେୟାନ୍ ଆରେକ୍ ବାବିଲନ୍ତୁନ୍ ବାସେ ଏନର୍। ମାତର୍ ତାଏନିଲକ୍ ଜିଉଦି ମୁତାକର୍ ଜିଉଦା ରାଜିଙ୍ଗ୍ ଏତାତର୍।
ପାରସ୍ଟେ ଗଡ୍ ଡାଟ୍ନା ମାଟେ ମାତର୍ ଏରେଲକୁଙ୍ଗ ଜିନ୍ସିମାଟର୍ ଆମାଟୁକ୍ ଦୟାଟ୍ଲକ୍ ମାଟର୍, ସାଇରସ୍ ପାରସ୍ ରାଜା ଏଦାନ୍ କାଣ୍ତେକ୍ ବେଲାଙ୍ଗ୍, ଅଣ୍ତ୍ ଉକୁଟ୍ ଆଦେସ୍ ସିନଣ୍ତ୍ ଏଇଣ୍ତ୍ ପାରସ୍ ଦେସ୍ ସାକାରି ଜିଉଦା ଦେସ୍ତିନ୍ ମାଣ୍ତିସେନିଙ୍ଗ୍ ଇସା କେଦାଣ୍ତ୍ ଆୟ୍ଲକ୍ ଆମାନ୍ ମାଣ୍ତିସେନିଙ୍ଗ୍ ଅଡ୍ତାର୍, ଅଣ୍ତ୍ ଇ ୱାଡିନ୍ ମନ୍ଦିର୍ ତିୟାର୍କେଗିଙ୍ଗ୍ ପାଇଟ୍ ଡାବୁଲ୍ ସିନଣ୍ତ୍ ଆଦିଙ୍ଗ୍ ଇସାନା ସତୁରି ବାରିସ୍ ମାନ୍ କୁଣ୍ତେଲ୍, ଜିଉଦି ଲକ୍ନେ ଉକୁଟ୍ ନିନିଟେ ଦଲ୍ ଜିଉଦାନ୍ ମାନଣ୍ତି ଜିରୁସାଲାମ୍ ଗଡ୍ତୁନ୍ ମାଣ୍ତିସେୟର୍।
ଲକ୍ଗୁଲ୍ ଏରେବେଲାଙ୍ଗ୍ ଜିରୁସାଲାମ୍ ଏଦେର୍, ଆୟ୍ଲକ୍ ମନ୍ଦିର୍ ଆରେ ଗଡ୍ ଚାରିବେଡ୍ତେନ୍ ମାନଣ୍ତି ଆରେତରେକ୍ ପୁନେଦ୍ ତିୟାର୍ କେନର୍। ଜଦି ଆୟ୍ଲକ୍ ୱେନ୍ ଲକ୍ନା ସାସନ୍ ଏରିଙ୍ଗ୍ନର୍, ଆରେତରେକ୍ ଆୟ୍ଲକ୍ ଜିଦ୍ଟେ ଦେସ୍ତିନ୍ ବାସେ ଏନର୍ ଆରେ ମନ୍ଦିର୍ତିନ୍ ଉପାସନା କେନର୍।
ବାଇବଲ୍ଟେ ଉକୁଟ୍ କେରାଲ୍: ୨-ରାଜା ୧୭:୨୪-୨୫; ୨-ବଙ୍ଗ୍ସା ୩୬; ଏଜ୍ରା ୧-୧୦; ନିଇମି ୧-୧୦
Free to use, adapt, and share under an open license (CC BY-SA 4.0).