21. ୨୧- ମାପ୍ରୁ କିସ୍ଟଙ୍ଗ୍ ସୟ୍ପଣ୍ଡି
ଆରାମ୍ଟୁକ୍ ଇ ମାପ୍ରୁ କିସ୍ଟଙ୍ଗ୍ ପକୁଙ୍ଗ୍ ପାଇଟ୍ ଜଜ୍ନା କେନଣ୍ତ୍। କିସ୍ଟନେ ବିସୟ୍ରେନ୍ ପର୍ତୁମ୍ ଜିଦ୍ ଆଦମ୍ ଆରେ ହବାଙ୍ଗ୍ କାକେଲ୍ଟୁକ୍ ୱାରିମାଟେ। ମାପ୍ରୁ ଜିଦ୍ କେନଣ୍ତ୍ ଜେ ହବାଙ୍ଗ୍ କୁଲ୍ଟୁକ୍ ଉକୁର୍ ଜନମ୍ ଏଦାଣ୍ତ୍, ଅଣ୍ତ୍ ବାମ୍ନେ ତାଲିଙ୍ଗ୍ ଚୁନ୍ଚୁନା କେଦାଣ୍ତ୍। ହବାଙ୍ଗ୍ ଏରେ ବାମ୍ ପକିମାଟେ ଆଦ୍ ସୟ୍ତାନ୍ ମାଟେ। ଜିଦ୍ଟେ ଅରତ୍ ମାଟେ ଜେ କିସ୍ଟ ସୟ୍ତାନିଙ୍ଗ୍ ଆରାତାଣ୍ତ୍।
ମାପ୍ରୁ ଅବ୍ରାମୁଙ୍ଗ୍ ଜିଦ୍ କେୟି ପକେଣ୍ତ୍ ଜେ ଅଣ୍ତୁଙ୍ଗ୍ ପେଲ୍ଟୁକ୍ ପୁର୍ତିଟେ ପାଟିନ୍ ଲକ୍ଦଲ୍ ଆସିର୍ବାଦ୍ ପାଏ ଏଦାର୍। ଇ ଆସିର୍ବାଦ୍ ପୁରା ଏଦା। ଏସେବେଲ୍ କିସ୍ଟ ଭବିସତ୍ରେନ୍ ଦିନେକ୍ ୱାଦାଣ୍ତ୍। ପୁର୍ତିନ୍ ମାନଣ୍ତି ଲକ୍ଦଲ୍ ଉଦାର୍ ପାଏ ଏରିଙ୍ଗ୍ ପାଇଟ୍ ଅଣ୍ତ୍ ଇଦ୍ ସପଲ୍ କେଦାଣ୍ତ୍।
ମାପ୍ରୁ ମସାଙ୍ଗ୍ ପର୍ତିଗିୟା କେୟି ପକେଣ୍ତ୍ ଜେ ଭବିସତ୍ରେନ୍ ଅଣ୍ତ୍ ମସାଙ୍ଗ୍ ୱାଡିନ୍ ଉକୁର୍ ଭାବବାଦିଙ୍ଗ୍ ନିଡୁତାଣ୍ତ୍। କିସ୍ଟନେ ବିସୟ୍ରେନ୍ ଇଦ୍ ୱେନ୍ ଉକୁଟ୍ ପର୍ତିଗିୟା ଅଣ୍ତ୍ କୁଣ୍ତେଲ୍ ଏସେଲ୍ମେନ୍ ୱାଦାଣ୍ତ୍।
ମାପ୍ରୁ ରାଜା ଦାଉଦୁଙ୍ଗ୍ ପର୍ତିଗିୟା କେନଣ୍ତ୍ ଜେ ଅଣ୍ତୁନେ କୁଲ୍ଟୁକ୍ ଉକୁର୍ ମାପ୍ରୁନେ ଲକୁଙ୍ଗ୍ ପାଇଟ୍ ସବୁଦିନ୍ ପାଇଟ୍ ରାଜା ଏଦାଣ୍ତ୍। ଆଦ୍ ଇ ୱାଡିନ୍ ବୁଜାତେ ଜେ କିସ୍ଟ ରାଜା ଦାଉଦ୍ନେ କୁଲ୍ ପେଲ୍ଟୁକ୍ ଉକୁର୍ ଏଦାଣ୍ତ୍।
ଜିରିମିୟ ଭାବବାଦିନା ମାପ୍ରୁ ପର୍ତିଗିୟା କେନଣ୍ତ୍ ଜେ ଅଣ୍ତ୍ ଉକୁଟ୍ ପୁନେଦ୍ଟେ ନିୟମ୍ କେଦାଣ୍ତ୍, ମାତର୍ ମାପ୍ରୁ ଇସ୍ରାଏଲ୍ନା ସିନୟ କପେଲ୍ ଏରେ ନିୟମ୍ କେୟିମାଟଣ୍ତ୍ ଆୟ୍ ୱାଟ୍ଟେ ନିୟମ୍ ଏରା। ପୁନ୍ ନିୟମ୍ତୁନ୍, ମାପ୍ରୁ ଲକ୍ଗୁଲ୍ନେ ଗର୍ବେନ୍ ଆୟ୍ଲକ୍ନେ ବେବସ୍ତା ଲେକାତାଣ୍ତ୍, ଲକ୍ଗୁଲ୍ ଆୟ୍ଲକ୍ନେ ଜିୱେନ୍ ମାପ୍ରୁଙ୍ଗ୍ ପୁୟାର୍, ଆୟ୍ଲକ୍ ଅଣ୍ତୁନେ ଲକ୍ ଏଦାର୍ ଆରେ ମାପ୍ରୁ ଆୟ୍ଲକ୍ନେ ପାପୁଙ୍ଗ୍ କେମା କେଦାଣ୍ତ୍। କିସ୍ଟ ପୁନ୍ ନିୟମ୍ ଆରାମ୍ କେଦାଣ୍ତ୍।
ମାପ୍ରୁନେ ଭାବବାଦି ଆରେମେନ୍ ପକେଣ୍ତ୍ ଜେ କିସ୍ଟ ଉକୁର୍ ଭାବବାଦି, ଜାଜକ୍ ଆରେ ରାଜା ମେନ୍ ଏଦାଣ୍ତ୍। ଭାବବାଦି ଏରିଦାଣ୍ତ୍ ଆୟ୍ଲକ୍ ଏଇଣ୍ତ୍ କି ମାପ୍ରୁନେ ବାକିୟ ୱେଞ୍ଜି ଆୟ୍ ବାକିୟଙ୍ଗ୍ ଲକୁଙ୍ଗ୍ ପେଲ୍ ପକ୍ଦାର୍। ମାପ୍ରୁ ସୟୁକୁଙ୍ଗ୍ ପାୟିଟ୍ ଜିଦ୍ କେୟାକ୍ କିସ୍ଟ ଉକୁର୍ ନିୟାଟେ ଭାବବାଦି ଏଦାଣ୍ତ୍।
ଇସ୍ରାଏଲ୍ଟେ ଜାଜକ୍ତୁଲ୍ ମାପ୍ରୁଙ୍ଗ୍ କାକେଲ୍ ଲକ୍ଗୁଲ୍ ନା ଆୟ୍ଲକ୍ନେ ପାପ୍ଟେ ଡଣ୍ତ୍ ପାଇଟ୍ ବଲି ଉସର୍ଗ କେଗିଙ୍ଗ୍ ନର୍। ଜାଜକ୍ତୁଲ୍ ମେନ୍ ଲକୁଙ୍ଗ୍ ପାଇଟ୍ ମାପ୍ରୁଙ୍ଗ୍ କାକେଲ୍ ପାର୍ତନା କେଗିନର୍। ମସିହ ଏରିଦାଣ୍ତ୍ ନିୟାଟେ ବେର୍ଜାଜକ୍ ଅଣ୍ତ୍ ନିଜେନିଙ୍ଗ୍ ମାପ୍ରୁନେ ଉକୁଟ୍ ନିୟାଟେ ବଲି ଭାବ୍ରେନ୍ ଉସର୍ଗ କେଦାଣ୍ତ୍।
ଉକୁର୍ ରାଜା ଆୟ୍ ଲକ୍ ଏଇଣ୍ତ୍ କି ଉକୁଟ୍ ରାଜି ପୟ୍ତାନ୍ ସାସନ୍ କେୟାକ୍ ଆରେ ଅଣ୍ତୁନେ ଲକ୍ଗୁଲୁଙ୍ଗ୍ ବିଚାର୍ କେୟାକ୍। କିସ୍ଟ ଉକୁର୍ ନିୟାଟେ ରାଜା ଏଦାଣ୍ତ୍ ଅଣ୍ତ୍ ଅଣ୍ତୁନେ ପୁର୍ବେଟେ ଦାଦିଆନିତିଲ୍ ଦାଉଦ୍ନେ ସିଙ୍ଗାସନ୍ତୁନ୍ ଉଣ୍ତ୍ଦାଣ୍ତ୍। ଅଣ୍ତ୍ ସାରା ପୁର୍ତିଙ୍ଗ୍ ପାଟିନ୍ ଦିନ୍ ପାଇଟ୍ ସାସନ୍ କେଦାଣ୍ତ୍, ଆରେ ପାଟିନ୍ବେଲ୍ ନିୟାରେନ୍ ବିଚାର୍ କେଦାଣ୍ତ୍ ଆରେ ଟିକ୍ ନିସ୍ପତି ଉଦାଣ୍ତ୍।
ମାପ୍ରୁନେ ଭାବବାଦିତିଲ୍ ପେଙ୍ଗିଟ୍ ୱେନ୍ ବିସୟଗୁଲ୍ କିସ୍ଟନେ ବିସୟରେନ୍ ଭାବବାନି କେୟିମାଟର୍। ଭାବବାଦି ମଲାକି ଆଗାଡି ପକିମାଟଣ୍ତ୍ ଜେ ମସିହ ୱାଦାନ୍ ଆଗାଡି ଉକୁର୍ ବେର୍ଟେ ଭାବବାଦି ୱାଦାଣ୍ତ୍। ଭାବବାଦି ଜିସାଇୟ ଭାବବାନି କେୟିମାଟଣ୍ତ୍ ଜେ କିସ୍ଟ ଉକୁଟ୍ ଜୁବା ମାଲିଙ୍ଗ୍ ପେଲ୍ଟୁକ୍ ଜନମ୍ ଏଦାଣ୍ତ୍। ମିକା ଭାବବାଦି ପକେଣ୍ତ୍ ଜେ ଅଣ୍ତ୍ ବେତଲିହିମ୍ ଗଡ୍ତୁନ୍ ଜନମ୍ ଏଦାଣ୍ତ୍।
ଜିସାଇୟ ଭାବବାଦି ପକେଣ୍ତ୍ ଜେ କିସ୍ଟ ଗାଲିଲିତିନ୍ ବାସେ ଏଦାଣ୍ତ୍, ପୁନିସେନଣ୍ତି ଗର୍ବେଲିଙ୍ଗ୍ ସାନ୍ତନା ସିଦାଣ୍ତ୍ ଆରେ ବନ୍ଦିଲକୁଙ୍ଗ୍ ମୁକ୍ତି କେଦାଣ୍ତ୍। ଅଣ୍ତ୍ ଆରେମେନ୍ ଭାବବାନି କେୟି ପକେଣ୍ତ୍ ଜେ ଅଣ୍ତ୍ ରଗିଦୁକିଲକୁଙ୍ଗ୍ ଆରେ ଏରେଲକ୍ ୱେନିଙ୍ଗ୍ଅଡାର୍, ସୁଡୁଙ୍ଗ୍ ଅଡାର୍, ପକୁଙ୍ଗ୍ ଅଡାର୍, ତାକିଙ୍ଗ୍ ଅଡାର୍ ଆୟ୍ଲକୁଙ୍ଗ୍ ସୁସ୍ତ କେଦାଣ୍ତ୍।
ଭାବବାଦି ଜିସାଇୟ ମେନ୍ ଭାବବାନି ପର୍କାସ୍ କେୟି ପକେଣ୍ତ୍ ଜେ କିସ୍ଟଙ୍ଗ୍ ଗୁର୍ନା କେଦାର୍ ଆରେ ବିନା ଦସ୍ରେନ୍ ଡଣ୍ତ୍ ସିଦାର୍। ୱେନ୍ ଭାବବାଦିତିଲ୍ ଭାବବାନି ପର୍କାସ୍ କେୟି ପକେର୍ ଜେ ଏରେଲକ୍ କିସ୍ଟଙ୍ଗ୍ ୱାଟ୍ତେନ୍ ଆଟେର୍ ଆୟ୍ଲକ୍ ଅଣ୍ତୁନେ ବସ୍ତର୍ ଉୟି କୁଡ୍କୁଡି କେଦାର୍ ଆରେ ଉକୁର୍ ସାଙ୍ଗ ଅଣ୍ତୁଙ୍ଗ୍ ଅବିସ୍ୱାସ୍ କେନଣ୍ତ୍। ଜିକରିୟ ଭାବବାଦି ଭାବବାନି କେୟି ପକେଣ୍ତ୍ ଜେ କିସ୍ଟଙ୍ଗ୍ ବିସ୍ବାସ୍ଗାତ୍ କେଦାନ୍ ପାୟିଟ୍ ଆୟ୍ ସାଙ୍ଗଙ୍ଗ୍ ତିରିସ୍ ଗଟା ରୁପା ସିଦାର୍।
ଭାବବାଦିତିଲ୍ ଆରେମେନ୍ ପକିମାଟର୍ କିସ୍ଟ ଏରେୱାଡିନ୍ ସାଦାଣ୍ତ୍। ଜିଖରିୟ ଭାବବାନି କେୟି ପକେଣ୍ତ୍ ଜେ ଲକ୍ଗୁଲ୍ କିସ୍ଟଙ୍ଗ୍ ପୟ୍ତାନ୍ ନେଉଡ୍ ଉସ୍ଦାର୍, ଅଣ୍ତୁଙ୍ଗ୍ କସ୍ଟ କେଦାର୍, ଆରେ ଅଣ୍ତୁଙ୍ଗ୍ ଆଟ୍ଦାର୍ (ଗୁଡ୍ଦା, ଲାତ୍, ପାଟିଟେ)। ଆୟ୍ଲକ୍ ଅଣ୍ତୁଙ୍ଗ୍ ସିତ୍ଦାର୍ ଆରେ ଅଣ୍ତ୍ ପେରିନ୍ କାକୁର୍ତି ଏରି କସ୍ଟ ନା ସାଦାଣ୍ତ୍, ଆରେ ଅଣ୍ତ୍ ଏନାମେନ୍ ବୁଲ୍ କେୟା ମାଟଣ୍ତ୍।
ଭାବବାଦିତିଲ୍ ଆରେମେନ୍ ପକେର୍ ଜେ କିସ୍ଟ ସିଦ୍ ଏଦାଣ୍ତ୍ ଏଇର୍ନେ କି ଏନାମେନ୍ ପାପ୍ ମାନୁଟେ। ଅଣ୍ତ୍ ୱେନ୍ ଲକୁଙ୍ଗ୍ ପାୟିଟ୍ ପାପ୍ଟେ ଡଣ୍ତ୍ ପାଏ ଏରିଙ୍ଗ୍ ପାୟିଟ୍ ସାଦାଣ୍ତ୍। ଅଣ୍ତୁନେ ଡଣ୍ତ୍ ମାପ୍ରୁ ଆରେ ଲକୁଙ୍ଗ୍ ପେଲ୍ ସାନ୍ତି ଇନ୍ଦିର୍ଦାଣ୍ତ୍। ଇ କାରନ୍ ପାୟିଟ୍, କିସ୍ଟଙ୍ଗ୍ କୁର୍ସେନ୍ ସାୟୁକୁଙ୍ଗ୍ ପାୟିଟ୍ ମାପ୍ରୁନେ ଇଚା ମାଟେ।
ଭାବବାଦିତିଲ୍ ଭାବବାନି ପକେର୍ ଜେ କିସ୍ଟ ସାଦାଣ୍ତ୍ ଆରେ ମାପ୍ରୁ ଅଣ୍ତୁଙ୍ଗ୍ ସାଦାନ୍ ପେଲ୍ଟୁକ୍ ସିଡୁଦାଣ୍ତ୍। କିସ୍ଟନେ ସାୟ୍ଣ୍ତି ଆରେତରେକ୍ ଜିୱେ ଏଦାନ୍ ପାଇଟ୍ ପାପିତିଲିଙ୍ଗ୍ ଉଦାର୍ ପାୟ୍ଏରିଙ୍ଗ୍ ଆରେ ଉକୁଟ୍ ପୁନ୍ ନିୟମ୍ ଆରାମ୍ କେଗିଙ୍ଗ୍ ପାଇଟ୍ ମାପ୍ରୁ ଅଣ୍ତୁନେ ଜଜ୍ନାଙ୍ଗ୍ ସପଲ୍ କେଦାଣ୍ତ୍।
ମାପ୍ରୁ କିସ୍ଟନେ ବିସୟରେନ୍ ଭାବବାଦିତିଲିଙ୍ଗ୍ ପେଙ୍ଗିଟ୍ ବିସୟ୍ ପକେଣ୍ତ୍, ମାତର୍ କିସ୍ଟ ଇ ପାଟିନ୍ ଭାବବାଦିତିଲିଙ୍ଗ୍ ପେଲ୍ଟୁକ୍ ଉକୁର୍ମେନ୍ ୱାରାଣ୍ତି ମାଟଣ୍ତ୍। ଇ ପାଟିନ୍ ଭାବବାନିଲ୍ ସିୟଣ୍ତି ୪୦୦ ବାରିସ୍ ଅଦିକ୍ ଆଗାଡି, ଟିକ୍ ସମୟରେନ୍, ମାପ୍ରୁ ଜଗତ୍ତୁନ୍ କିସ୍ଟଙ୍ଗ୍ ସୟ୍ତଣ୍ତ୍।
ବାଇବଲ୍ଟେ ଉକୁଟ୍ କେରାଲ୍ ଆଦି ୩:୧୫; ୧୨:୧-୩; ଦୁତିୟ ବିବରନି ୧୮:୧୫; ୨ସାମିଏଲ୍୭; ଜିରିମିୟ୩୧; ଜିସାୟ ୫୯:୧୬; ଦାନିୟେଲ୍ ୭; ମଲାଖି ୪:୫, ଜିସାୟ ୭:୧୪; ମିକା ୫:୨; ଜିସାୟ ୯:୧-୭; ୩୫:୩-୫;୬୧; ୫୩; ଗୀତ ୨୨:୧୮; ୩୫:୧୮; ୬୯:୪; ଜିକରିୟ୧୧:୧୨-୧୩; ଜିସାୟ ୫୦:୬; ଗିତ ୧୬:୧୦-୧୧
Free to use, adapt, and share under an open license (CC BY-SA 4.0).