23. ୨୩- ଜିସୁନେ ଜନମ୍
ଜସେପ୍ ପିଦିର୍ଟଣ୍ତ୍ ଉକୁର୍ ଦରମ୍ ଲକ୍ମାଟଣ୍ତ୍ ଅଣ୍ତୁନା ମରିୟମ୍ମୁଙ୍ଗ୍ ଅଦୁର୍ ଏରିଙ୍ଗ୍ ପର୍ସି ମାଟର୍, ମରିୟମ୍ ଅଙ୍ଗେନ୍ ଏରିମା ଏଞ୍ଜି ଏସେବେଲ୍ ଅଣ୍ତ୍ ୱେଟଣ୍ତ୍, ଅଣ୍ତ୍ ଆୟ୍ ସେପାଲ୍ ଆନ୍ପେଲ୍ଟୁକ୍ ଏରାଣ୍ତ୍, ଅଣ୍ତ୍ ମରିୟମୁଙ୍ଗ ଲାଜ୍ କେଗିଙ୍ଗ୍ ଇସା କେୟୁଟଣ୍ତ୍, ଆଦିଙ୍ଗ୍ ଅଣ୍ତ୍ ଗୁପତ୍ନା ସାକାରିଙ୍ଗ୍ ଜଜନା କେନଣ୍ତ୍, ଅଣ୍ତ୍ ଆଦ୍ କେଦାନ୍ ଆଗାଡି ଉକୁଟ୍ ଦୁତ୍ ଅଣ୍ତୁନ୍ କାକେଲ୍ ୱାରି ଦର୍ସନ୍ନା ଅଣ୍ତୁଙ୍ଗ୍ ପକେଟେ।
ଦୁତ୍ ପକେଟେ “ଜସେପ୍ ଇନ୍ ଇନେ ଆୟାଲ୍ ମରିୟମ୍ମୁଙ୍ଗ୍ ଉଗୁଙ୍ଗ୍ ନାରିସ୍ମେନ୍। ଆଦିନେ ପୁଡୁଗ୍ତୁନ୍ ମାନାକ୍ ସେପାଲ୍ ପବିତ୍ର ଆତ୍ମାନା ଏରିମାଣ୍ତ୍, ଆଦ୍ ଉକୁଟ୍ ସେପାଲିଙ୍ଗ୍ ଜନମ୍ ସିଦା, ଅଣ୍ତୁନ୍ ପିଦିର୍ ଜିସୁ ସିୟୁର୍ (ଆଦିନେ ଅରତ୍ “ପର୍ବୁ ରକିୟା କେଦାଣ୍ତ୍”), ମାତର୍ ଅଣ୍ତ୍ ଲକ୍ଗୁଲୁଙ୍ଗ୍ ଅର୍ନ ପାପ୍ଟୁକ୍ ଉଦାର୍ କେଦାଣ୍ତ୍।”
ଆଦିଙ୍ଗ୍ ଜସେପ୍ ମରିୟମୁଙ୍ଗ୍ ଅଦୁର୍ ଏନଣ୍ତ୍ ଆରେ ଆଦିଙ୍ଗ୍ ଆୟାଲ୍ କେୟି ନିଜେଟେ ଉଲେନ୍ ଉନଣ୍ତ୍, ମାତର୍ ଆଦ୍ ସେପାଲିଙ୍ଗ୍ ଜନମ୍ ସିୟା ଆରେକ୍ ଅଣ୍ତ୍ ଆଦିନା ଅଡୁଟଣ୍ତ୍।
ଏସେବେଲ୍ ମରିୟମ୍ ସେପାଲିଙ୍ଗ୍ ଜନମ୍ ସିୟଣ୍ତି କାକେଲ୍ ୱାନେ, ରମିୟ ସର୍କାର୍ ପାଟିନ୍ଲକୁଙ୍ଗ୍ ନିଜେନିଜେଟେ ଦାଦିଆନିଟେ ବାସେନ୍ ସେଞ୍ଜି ମାନିଙ୍ଗ୍ ପକେଣ୍ତ୍। ଜସେପ୍ ଆରେ ମରିୟମ୍ ବାସେ ଏରଣ୍ତି ନାଜରିତ୍ଟୁକ୍ ପେରାଦୁରିନ୍ ତାକି ବେତ୍ଲିହିମ୍ ସେନିଙ୍ଗ୍ ପାରେଟେ ଏନାଦିଙ୍ଗ୍ କି ଆୟ୍ଲକ୍ନେ ଦାଦିଆନି ଦାଉଦ୍ନେ ନିଜେଟେ ଗଡ୍ ବେତ୍ଲିହିମ୍ ମାଟେ।
ଆୟ୍ଲକ୍ ଏସେବେଲ୍ ବେତ୍ଲିହିମ୍ ଏଦେର୍, ଆୟ୍ଲକୁଙ୍ଗ୍ ମାନିଙ୍ଗ୍ ପାୟିଟ୍ ବାସେ ମାନୁଟେ। ପସୁଲ୍ ମାନଣ୍ତି ଉଲେନ୍ ଇ ଆୟ୍ଲକୁଙ୍ଗ୍ ବାସେ ତଣ୍ତେଟେ। ସେପାଲ୍ ଆମାନ୍ ଜନମ୍ ଏନଣ୍ତ୍ ଆରେ ଅଣ୍ତୁଙ୍ଗ୍ ତାମିୟା ଅଣ୍ତୁଙ୍ଗ୍ ପସୁଲ୍ ତିନଣ୍ତି ଡଙ୍ଗାନ୍ ଅଡୁସିମାଟେ, ଏନାଦିଙ୍ଗ୍ କି ଅଣ୍ତୁଙ୍ଗ୍ ଅଡୁକୁଙ୍ଗ୍ ପାୟିଟ୍ ଆୟ୍ଲକୁଙ୍ଗ୍ ବାସେ ମାନୁଟେ। ଆୟ୍ଲକ୍ ଅଣ୍ତୁଙ୍ଗ୍ ଜିସୁ ପିଦିର୍ ଇରେର୍।
ଆୟ୍ ନାର୍କାମ୍ ଆର୍ସେଲ୍ଟେ ଉକୁଟ୍ ବାସେନ୍ ଏଙ୍ଗୁର୍ତୁଲ୍ କଲାକର୍ ଆୟ୍ଲକ୍ନେ ରାସିଙ୍ଗ୍ କାକିନର୍। ଅଟାତ୍ ଉକୁଟ୍ ପେରିନ୍ ୱିଣ୍ତ୍ଟେ ଦୁତ୍ ଆୟ୍ଲକୁଙ୍ଗ୍ କାକେଲ୍ ୱାନେ ଆରେ ଆୟ୍ଲକ୍ ନାର୍ସି ସେୟର୍। ଦୁତ୍ ଆୟ୍ଲକୁଙ୍ଗ୍ ପକେଣ୍ଡ୍ “ନାରିସ୍ମେର୍, ଏନାଦିଙ୍ଗ୍ କି ଇମ୍ ପାୟିଟ୍ ଆନ୍ ଉକୁଟ୍ ନିୟାଟେ କାବୁର୍ ଇନ୍ଦ୍ରିମାନ୍। ପର୍ବୁ କିସ୍ଟ ବେତ୍ଲିହିମ୍ତିନ୍ ଜନମ୍ ଏରିମାଣ୍ତ୍ !”
“ଆୟ୍ ସେପାଲିଙ୍ଗ୍ କାଣ୍ତ୍ପୁର୍, ଆରେ ଇମ୍ଗୁଲ୍ ଅଣ୍ତୁଙ୍ଗ୍ ପସୁଲ୍ ତିନଣ୍ତି ଡଙ୍ଗାନ୍ ସେନ୍ଦ୍ରା ଡାବା ସି ଅଡୁପଣ୍ତି ସୁଡ୍ଦାର୍।” ଅଟାତ୍, ଆକାସ୍ ଦୁତ୍ଗୁଲ୍ନା ପରିପୁରୁନ୍ ଏରିସେଣ୍ତେ ଆରେ ମାପ୍ରୁନେ ତୁତି କେନେୱ୍ ଆରେ ପକେଟେୱ୍, “ମାପ୍ରୁନେ ମହିମା ପୁର୍ତିନ୍ ଅଣ୍ତୁନେ ପିଦିର୍ ଆରେ ଲକୁଙ୍ଗ୍ ପେଲ୍ ସାନ୍ତି!”
ମେଣ୍ଡା କଲାକର୍ ଦାପ୍ରେନ୍ ଜିସୁ ଏରେମାନ୍ ମାଟଣ୍ତ୍ ଆମାନ୍ ଏଦେର୍ ଆରେ ଆୟ୍ଲକୁଙ୍ଗ୍ ଦୁତ୍ ପକଣ୍ତି ୱାଡିନ୍ ଡଙ୍ଗାନ୍ ଅଡିମାନଣ୍ତି ସୁଡେର୍। ଆୟ୍ଲକ୍ ପେରିନ୍ କିର୍ଦେ ଏରିସେୟର୍। କଲାକର୍ ଆୟ୍ ବାସେନ୍ ଏଦେର୍ ଏରେମାନ୍ ଆୟ୍ଲକ୍ନେ ରାସିଲ୍ ମାଟେୱ୍ ଆରେ ଆୟ୍ଲକ୍ ଏନାଦ୍ ପାଟିନ୍ ୱେଞ୍ଜିମାଟର୍ ସୁଡିମାଟର୍ ଆଦିଙ୍ଗ୍ ପାୟିଟ୍ ମାପ୍ରୁନେ ପର୍ସଙ୍ଗ୍ସା କେଗିନର୍।
କାଣ୍ତେକ୍ ବେଲା କୁଣ୍ତେଲ୍, ପୁରୁବ୍ ଦେସ୍ଟୁକ୍ ୱାରଣ୍ତି ପଣ୍ତିତ୍ତିଲ୍ ଆକାସ୍ତିନ୍ ଉକୁଟ୍ କାବାଏରଣ୍ତି ପୁତ୍ ସୁଡେର୍। ଆୟ୍ଲକ୍ନେ ଗର୍ବେନ୍ କିର୍ଦେ ଏନର୍ ଜିଉଦି ଲକ୍ନେ ପୁନେଦ୍ଟେ ରାଜା ଜନମ୍ ଏରଣ୍ତି ବିସୟ ବୁଜାକିନର୍। ଆଦିଙ୍ଗ୍, ଆୟ୍ଲକ୍ ଆୟ୍ ରାଜାଙ୍ଗ୍ ସୁଡୁଙ୍ଗ୍ ପାୟିଟ୍ ଦୁରିଟେ ଦେସ୍ଟୁକ୍ ୱାନର୍। ଆୟ୍ଲକ୍ ବେତ୍ଲିହିମ୍ତୁନ୍ ୱାରି ଜିସୁଙ୍ଗ୍ ଆରେ ତାମିୟା ତାମ୍ବାଙ୍ଗ୍ ଏରେ ଉଲେନ୍ ମାନ୍ନର୍ ଆୟ୍ଉଲେଙ୍ଗ୍ କାଣ୍ତ୍ତର୍।
ପଣ୍ତିତ୍ତିଲ୍ ଏସେବେଲ୍ ଜିସୁଙ୍ଗ୍ ତାମିୟାନା ସୁଡେର୍ ଆୟ୍ଲକ୍ ୱାଙ୍ଗୁସୁଲ୍ କୁଟି ଅଣ୍ତୁଙ୍ଗ୍ ଜୁୱାର୍ କେନର୍। ଆୟ୍ଲକ୍ ଜିସୁଙ୍ଗ୍ ପେରିନ୍ ମୁଲିକାଟେ ଉପହାର୍ଗିଲ୍ ସିନର୍। ଆଦିଙ୍ଗ୍ କୁଣ୍ତେଲ୍ ଆୟ୍ଲକ୍ ନିଜେନିଜେଟେ ଉଲେନ୍ ମାଣ୍ତି ୱାନର୍।
ବାଇବଲ୍ଟେ ଉକୁଟ୍ କେରାଲ୍ : ମାତିଉ ୧ ; ଲୁକ ୨
Free to use, adapt, and share under an open license (CC BY-SA 4.0).