26. ୨୬- ଜିସୁ ଅଣ୍ତୁନେ ସେବାକାମେ ମୁଲ୍ୟାତଣ୍ତ୍
ସୟ୍ତାନ୍ନେ ଲାଲ୍ସା ପେଲ୍ଟୁକ୍ ଜିନ୍ତାନ୍ କୁଣ୍ତେଲ୍, ଜିସୁ ପବିତ୍ର ଆତ୍ମାନ୍ ସକ୍ତିନା ଅଣ୍ତ୍ ବାସେ ଏରଣ୍ତି ଗାଲିଲିନ୍ ସେୟଣ୍ତ୍। ଜିସୁ ସିକିୟା ସି ୱେନ୍ ୱେନ୍ ଦିଗାଲ୍ ସେୟ୍ଣ୍ତ୍, ପାଟିନ୍ଲକ୍ ଅଣ୍ତୁନ୍ ନିୟାଟେ ବିସୟ୍ରେନ୍ ପକେର୍।
ଜିସୁ ଏରେ ନାଜରିତ୍ତିନ୍ ନିନିବେଲ୍ଟୁଙ୍ଗ୍ ମାଟଣ୍ତ୍ ଆୟ୍ ଗଡ୍ତିନ୍ ସେୟଣ୍ତ୍, ବିସ୍ରାମ୍ବାର୍ ସିରିସ୍ ଅଣ୍ତ ମଣ୍ତ୍ଲି ଉଲେନ୍ ସେୟଣ୍ତ୍, ଅଣ୍ତୁନ୍ କିତିନ୍ ଉକୁଟ୍ ପୁସ୍ତକ୍ ସିନର୍ ଏଟେନ୍କି ଅଣ୍ତ୍ ଜିସାୟ୍ ବାବବାଦିନେ ପୁସ୍ତକ୍ ପଡ୍ଏଦାଣ୍ତ୍, ଜିସୁ ଆୟ୍ ପୁସ୍ତକ୍ ପୁସ୍କି ଆମାଟେ କାଣ୍ତେକ୍ ଲକୁନ୍ କାକେଲ୍ ପଡ୍ଏନଣ୍ତ୍।
ଜିସୁ ପଡ୍ଏନଣ୍ଡ୍, “ମାପ୍ରୁନ୍ ଆତ୍ମା ଆନୁଙ୍ଗ୍ ସିଏରିମା ଏଟେନ୍କି କାକୁର୍ତି ଲକୁଙ୍ଗ୍ କାକେଲ୍ ସୁସମାସାର୍ ୱେଣ୍ତୁକୁଙ୍ଗ୍ ପାଇଟ୍ ବନ୍ଦିଲକୁଙ୍ଗ୍ ମୁକ୍ଲାକିଙ୍ଗ୍ ପାଇଟ୍, କାନାଲକୁଙ୍ଗ୍ ସୁଡୁଙ୍ଗ୍ ପାଇଟ୍ ଆରେ ମାନାନୟ୍ଲା ଲକୁଙ୍ଗ୍ ମୁକ୍ତି କେୟଣ୍ତି ବିସୟ୍ ରେନ୍, ଇଦ୍ ପର୍ବୁନ୍ ଅନୁଗ୍ରଟେ ବାରିସ୍।
ଆମାଟୁକ୍ ଜିସୁ ଉଣ୍ତେଣ୍ତ୍। ପାଟିନ୍ ଲକ୍ ଅଣ୍ତୁନ୍ ଦିଗାଲ୍ ସୁଡୁଙ୍ଗ୍ ଉଣ୍ତେର୍, ଜିସୁ ସାସ୍ତର୍ଟେ ଏରେ ପାଟେ ପଡ୍ଏରି ମାଟଣ୍ତ୍ ଆଦ୍ କିସ୍ଟଙ୍ଗ୍ ଦର୍ସାକିନେ ଜେ ଆୟ୍ଲକ୍ ପୁଟର୍, ଜିସୁ ପକେଣ୍ତ୍, “ଆନ୍ ଏରେଦ୍ ପଡ୍ଏନନ୍ ଆଦ୍ ଇଣ୍ତି ଗଟ୍ଏରିଦା।” ପାଟିନ୍ ଲକ୍ କାବାଏରି ସେୟର୍, ଆୟ୍ଲକ୍ ପକେର୍, “ ଇୟଣ୍ତ୍ ଏନା ଜସେପ୍ନେ ସେପାଲ୍ ଏରାଣ୍ତ୍?”
ଆମାଟୁକ୍ ଜିସୁ ପକେଣ୍ତ୍, “ଇଦ୍ ସତ୍ ଏରେମେନ୍ ବାବବାଦି ନିଜେଟେ ପଲୁବ୍ତୁନ୍ ଗରନ୍ ଟଣ୍ତ୍ ଏରାଣ୍ତ୍। ଏଲିୟ ବାବବାଦିନ୍ ବେଲ୍ମେନ୍ ଇସ୍ରାଏଲ୍ ତିନ୍ ପେଙ୍ଗିଟ୍ କେଟାସିଲ୍ ମାଟେୱ୍। ମାତର୍ ଏସେବେଲ୍ ତିନ୍ବାରିସ୍ ସଅ ମାସ୍ ଏତାଲିନ୍ ମାପ୍ରୁ ଏଲିୟଙ୍ଗ୍ ଇସ୍ରାଏଲ୍ତିନ୍ ମାନଣ୍ତି ଏରେମେନ୍ କେଟାସିଲିଙ୍ଗ୍ କାକେଲ୍ ସେନାକେଟେନ୍ ୱେନ୍ ଉକୁଟ୍ ଦେସ୍ତିନ୍ ମାନଣ୍ତି କେଟାଲିଙ୍ଗ୍ କାକେଲ୍ ସେଞ୍ଜିମାଟଣ୍ତ୍।
ଜିସୁ ପକି ପେସିସେୟଣ୍ତ୍, ଆରେ ଏଲିସାୟ୍ ବାବବାଦିନ୍ ବେଲ୍ ଚର୍ମରଗ୍ ମାନ୍ ପେଙ୍ଗୁର୍ତୁଲ୍ ଇସ୍ରାଏଲ୍ତିନ୍ ମାଟର୍, ମାତର୍ ଏଲିସାୟ ଆୟ୍ଲକୁନ୍ ତାଣ୍ତ୍ରେଲ୍ଟୁକ୍ ଏରୁଙ୍ଗ୍ ମେନ୍ ସୁସ୍ତତା କେୟୁଟଣ୍ତ୍, ଅଣ୍ତ୍ ଇସ୍ରାଏଲ୍ଟେ ସତ୍ରୁ ଦେସ୍ଟେ ଉକୁର୍ ସେନାପତିଙ୍ଗ୍ ଚର୍ମରଗ୍ ଟୁକ୍ ସୁସ୍ତତା କେନଣ୍ତ୍, ଏରେଲକ୍ ଜିସୁନେ ପାଟେ ୱେନ୍ନର୍ ଆୟ୍ ପାଟିନ୍ଲକ୍ ଜିଉଦି ଲକ୍ମାଟର୍, ଆଦିଙ୍ଗ୍ ଆୟ୍ଲକ୍ ଏସେବେଲ୍ ଇଦ୍ ପକଣ୍ତି ୱେଟର୍, ଆୟ୍ଲକ୍ ଅଣ୍ତୁନ୍ ପୟିତାନ୍ ପେରିନ୍ ରିସା ଏନର୍।
ନାଜରିତ୍ତିନ୍ ମାନ୍ଲକ୍ଗୁଲ୍ ଉପାସନା ଉଲେଟୁକ୍ ଜିସୁଙ୍ଗ୍ ପେପ୍ସି ଇନ୍ଦିରି ଆଟିକାରିଙ୍ଗ୍ ଉକୁଟ୍ ଉସାଟେପେଲ୍ଟୁକ୍ କାରିସିଗିଙ୍ଗ୍ ପାଇଟ୍ ଆମାନ୍ ଇନ୍ଦ୍ରେର୍, ମାତର୍ ଜିସୁ ମାନ୍ଦାଲକୁନ୍ ପେଲ୍ଟୁକ୍ ପେସି ସେୟ୍ଣ୍ତ୍ ଆରେ ନାଜରିତ୍ ଗଡ୍ଟୁକ୍ ସାକାରି ସେୟଣ୍ତ୍।
ଆମାଟୁକ୍ ଜିସୁ ଗାଲିଲି ଦିଗାଲ୍ ସେୟଣ୍ତ୍, ପେଙ୍ଗୁର୍ତୁଲ୍ ଅଣ୍ତୁନ୍ କାକେଲ୍ ୱାନର୍, ଏରେଲକ୍ଗୁଲ୍ ସୁଡୁଙ୍ଗ୍ ଅଡାମାନର୍, ତାକିଙ୍ଗ୍ ଅଡାମାନ୍ର୍, ୱେନିଙ୍ଗ୍ ଅଡାମାନର୍ ଆୟ୍ଲକୁଙ୍ଗ୍ ପେଲ୍ଟୁ ପେଙ୍ଗୁର୍ତୁଲ୍ ରଗିତିଲିଙ୍ଗ୍ ଇନ୍ଦ୍ରେର୍।
ବୁତ୍ ପାଦାନ୍ ଲକୁଙ୍ଗ୍ ଜିସୁନ୍ କାକେଲ୍ ଇନ୍ଦ୍ରିନର୍, ଜିସୁନେ ଆଦେସ୍ନା ଦୁତ୍ଗୁଲ୍ ଲକ୍ଗୁଲୁଙ୍ଗ୍ ପେଲ୍ଟୁକ୍ ପେସି ୱାରିନେୱ୍, ଆରେ ପେରିନ୍ ସମୟ୍ରେନ୍ ଆୱ୍ଗୁଲ୍ ଆୱ୍ଲି ଏରିନେୱ୍, ଇନ୍ ମାପ୍ରୁନେ ସେପାଲ୍, ପେଙ୍ଗୁର୍ତୁଲ୍ କାବା ଏରିନର୍ ଆରେ ମାପ୍ରୁନେ ଉପାସନା କେଗିନର୍।
ଆମାଟୁକ୍ ଜିସୁ ବାରଗଟା ଲକୁଙ୍ଗ୍ ଆସ୍କେଣ୍ତ୍ ଏରେଲକ୍ କି ସୟ୍ସି ଏଦାନ୍ ସିସୁତୁଲ୍ ଏଞ୍ଜି ପକିଏରିନେ, ସିସୁତୁଲ୍ ଜିସୁନା ସେନ୍ନର୍ ଆରେ ଅଣ୍ତୁନ୍ ପେଲ୍ଟୁକ୍ ମାୟ୍ରିନର୍।
ବାଇବଲ୍ଟେ ଉକୁଟ୍ କେରାଲ୍ :ମାତିଉ ୪:୧୨-୨୫; ମାର୍କ ୧:୧୪-୧୫, ୩୫-୩୯; ୩:୧୩-୨୧; ଲୁକ ୪:୧୪-୩୦, ୩୮-୪୪
Free to use, adapt, and share under an open license (CC BY-SA 4.0).