7. ୭-ଜାକୁବୁଙ୍ଗ୍ ମାପ୍ରୁ ଆସିର୍ବାଦ୍ କେନଣ୍ତ୍
ଆଟେଲ୍ ସେପାକିଲ୍ ବୁଦି ଏରିଙ୍ଗ୍ ଉଣ୍ତେର୍, ଉଲେନ୍ ଜାକୁବ୍ ମାନିଙ୍ଗ୍ ଲାଡ୍ କେଗିଙ୍ଗ୍ନଣ୍ତ୍, ମାତର୍ ଏସ କିଗାଟ୍ ସେନିଙ୍ଗ୍ ଲାଡ୍ କେଗିଙ୍ଗ୍ନଣ୍ତ୍। ରିବିକା ଜାକୁବଙ୍ଗ୍ ଲାଡ୍ କେଗିଙ୍ଗ୍ନେ, ମାତର୍ ଇସାକ୍ ଏସଙ୍ଗ୍ ଲାଡ୍ କେଗିଙ୍ଗ୍ନଣ୍ତ୍।
ଦିନେକ୍, ଏରେବେଲାଙ୍ଗ୍ ଏସ କିଗାଟ୍ ସେଞ୍ଜି ଉଲେନ୍ ୱାନଣ୍ତ୍, ଅଣ୍ତ୍ ପେରିନ୍ ଆଣ୍ଡ୍କିର୍ ନା ମାଟଣ୍ତ୍। ଏସ ଜାକୁବଙ୍ଗ୍ ପକେଣ୍ତ୍, “ଇନ୍ ୱାଡ଼ଡି କାଡ୍ସେ ଆନୁଙ୍ଗ୍ କାଣ୍ଡେକ୍ ଦୟାକେୟି ଇନ୍ଦେ। ପାଟିନ୍ ଉତର୍ଟେ ଜାକୁବ୍ ପକେଣ୍ତ୍, ପର୍ତୁମ୍, ଇନେ ବେର୍ଟେ ସିଣ୍ତ୍ନେ ଅଦିକାର୍ ଆନୁଙ୍ଗ୍ ଇନ୍ଦେ। ଆଦିଙ୍ଗ୍ ପାୟିଟ୍ ଏସ ଅଣ୍ତୁନେ ବେର୍ଟେ ସିଣ୍ତ୍ନେ ଅଦିକାର୍ ଜାକୁବଙ୍ଗ୍ ସିନଣ୍ତ୍। ଆଦିଙ୍ଗ୍ କୁଣ୍ତେଲ୍ ଜାକୁବ୍ କାଣ୍ଡେକ୍ କାଡ୍ସେ ସିନଣ୍ତ୍।
ଏସଙ୍ଗ୍ ଇସାକ୍ ଅଣ୍ତୁନେ ଆସିର୍ବାଦ୍ ସିଗିଙ୍ଗ୍ ଇଚାକେନଣ୍ତ୍। ମାତର୍, ଅଣ୍ତ୍ ଆଦ୍ କେଦାନ୍ ଆଗାଡ଼଼ି, ଜାକୁବ୍ ଏସ ୱାଡିନ୍ ଏରି ନାଡାତଣ୍ତ୍ ରିବିକା ଆରେ ଜାକୁବ୍ ଅଣ୍ତୁଙ୍ଗ୍ ପର୍ତାରଣା କେୟିମାଟର୍। ଇସାକ୍ ମୁତାଙ୍ଗ୍ ଏରିମାଟଣ୍ତ୍ ଆରେ ସୁଡୁଙ୍ଗ୍ ଅଡାମାନ୍ନଣ୍ତ୍। ଆଦିଙ୍ଗ୍ ଜାକୁବ୍ ମେଣ୍ତାନେ ତଲୁଙ୍ଗ୍ କଡ୍ରଙ୍ଗ୍ତୁନ୍ ଆରେ କିଲ୍ଗିଲ୍ତିନ୍ ଡାବାଏରି ଏସନେ ସକା ଜଗ୍ଡା ଏନଣ୍ତ୍।
ଇସାକିଙ୍ଗ୍ ଆରେସେଲ୍ ଜାକୁବ୍ ୱାରି ପକେଣ୍ତ୍, ଆରେ ପକେଣ୍ତ୍, “ଆନ୍ ଏସ” ୱାରିମାନ୍, ଆଦିଙ୍ଗ୍ ଇନ୍ ଆନୁଙ୍ଗ୍ ଆସିର୍ବାଦ୍ ଇନ୍ଦେ। ଇସାକ୍ ଆୟ୍ ବେଲାଙ୍ଗ୍ ସକାନେ ଗାନ୍ଦ୍ ଆରେ ମେଣ୍ତାନେ ସେଣ୍ଡିଙ୍ଗ୍ ଅନୁଭବ୍ କେନଣ୍ତ୍, ଅଣ୍ତୁଙ୍ଗ୍ ଏସ ଏଟଣ୍ଡ୍ ଆରେ ଅଣ୍ତୁଙ୍ଗ୍ ଆସିର୍ବାଦ୍ କେନଣ୍ତ୍।
ଏସ ଜାକୁବଙ୍ଗ୍ ଗୁରୁନା କେନଣ୍ତ୍ ଏନାଦିଙ୍ଗ୍ କି ଜାକୁବ୍ ବେର୍ଟେ ସିଣ୍ତ୍ନେ ଅଦିକାର୍ ଆରେ ଅଣ୍ତୁନେ ଆସିର୍ବାଦ୍ ସାଡାସି ଉନଣ୍ତ୍। ଆଦିଙ୍ଗ୍ ଅଣ୍ତ୍ ଆବା ସାୟିସେନ୍ଗଡ୍ ଜାକୁବଙ୍ଗ୍ ୱାଟ୍ତେନ୍ ଅଟିକାରିଙ୍ଗ୍ ଜଜନା କେନଣ୍ତ୍।
ମାତର୍ ରିବିକା ଏସନେ ଜଜନାଙ୍ଗ୍ ପୁନୁଙ୍ଗ୍ ଅଡ୍ତେ। ଆଦିଙ୍ଗ୍ ଆଦ୍ ଆରେ ଇସାକ୍, ଜାକୁବଙ୍ଗ୍ ପେରାଦୁରିଙ୍ଗ୍ ତାମ୍ ଲକ୍ବାକିଙ୍ଗ୍ ପେଲ୍ ମାନିଙ୍ଗ୍ ସୟ୍ତର୍।
ଜାକୁବ୍ ରିବିକାନେ ଲକ୍ବାକିଙ୍ଗ୍ ପେଲ୍ ପେରିନ୍ ବରସ୍ ଆରେକ୍ ମାଟଣ୍ତ୍। ଆୟ୍ବେଲେନ୍ ଅଣ୍ତ୍ ଅଦୁର୍ ଏନଣ୍ତ୍ ଆରେ ଅଣ୍ତୁନେ ବାର୍ଲକ୍ ସିଣ୍ତିଲ୍ ଅକାଲ୍ ମାଲ୍। ମାପ୍ରୁ ଅଣ୍ତୁଙ୍ଗ୍ ପେରିନ୍ ସକ୍ତିଶାଲି କେନଣ୍ତ୍।
ଅଣ୍ତୁନେ ଉଲେଲ୍ କିଣାଣ୍ ପେଲ୍ କଡେବରସ୍ ମାନ୍ କୁଣ୍ତେଲ୍, ଜାକୁବ୍ ଅଣ୍ତୁନେ ପରିବାର୍ ନାଟ୍, ଅଣ୍ତୁନେ ଦାସ୍ ଲକ୍ ପସୁଆଡାର୍ ନାଟ୍ ଆୟ୍ ବାସେନ୍ ୱାନର୍।
ଜାକୁବ୍ ପେରିନ୍ ନାର୍ସିଙ୍ଗ୍ ନଣ୍ତ୍ ଏନାଦିଙ୍ଗ୍ କି ଅଣ୍ତ୍ ଏତାକିନଣ୍ତ୍ ଜେ ଇଣ୍ତି ମେନ୍ ଏସ ଅଣ୍ଡୁଙ୍ଗ୍ ଆଟିକାରିଙ୍ଗ୍ ଏତାକିଦାଣ୍ତ୍। ଆଦିଙ୍ଗ୍ ଅଣ୍ତ୍ ପେଙ୍ଗିଟ୍ ପସୁ ଆଡାରିଙ୍ଗ୍ ଏସଙ୍ଗ୍ ଉପହାର ନା ସୟ୍ତଣ୍ତ୍। ଏରେ ଦାସ୍ ଲକ୍ ପସୁଲୁଙ୍ଗ୍ ଇନ୍ଦ୍ରି ମାଟର୍ ଏସଙ୍ଗ୍ ପକେର୍, ଇନେ ଦାସ୍, ଜାକୁବ୍, ଇନୁଙ୍ଗ୍ ଇ ପସୁଲୁଙ୍ଗ୍ ସିମାଣ୍ତ୍। ଅଣ୍ତ୍ ଦାପ୍ରେନ୍ ୱାରିଦାଣ୍ତ୍।
ମାତର୍ ଏସ ଜାକୁବଙ୍ଗ୍ କେମା କେୟିପଲି ମାଟଣ୍ତ୍, ଆଦିଙ୍ଗ୍ ଆୟ୍ଲକ୍ ଉକୁର୍ ଆରେକୁରୁଙ୍ଗ୍ କିର୍ଦେନା ସୁଡୁଙ୍ଗ୍ ଚାୟ୍ଏରିଙ୍ଗ୍ନର୍। ଆଦିଙ୍ଗ୍ କୁଣ୍ତେଲ୍ ଜାକୁବ୍ କିନାନ୍ତିନ୍ ସାନ୍ତିନା ବାସେ ଏନର୍। ଆଦିଙ୍ଗ୍ କୁଣ୍ତେଲ୍ ଇସାକ୍ ସାୟିସେୟଣ୍ତ୍, ଏସ ଆରେ ଜାକୁବ୍ ଅଣ୍ତୁଙ୍ଗ୍ ପେନ୍ଦୁତର୍। ମାପ୍ରୁ ଏରେ ନିୟମ୍ଟେ ଜିଦ୍ଗିଲ୍ ଅବ୍ରାମୁଙ୍ଗ୍ କେୟିମାଟଣ୍ତ୍, ଇଣ୍ତି ଇସାକିଙ୍ଗ୍ ପେଲ୍ଟୁକ୍ ଜାକୁବଙ୍ଗ୍ କେନର୍।
ବାଇବଲ୍ଟେ ଉକୁଟ୍ କେରାଲ୍: ଆଦି ୨୫:୨୭-୩୩;୨୦
Free to use, adapt, and share under an open license (CC BY-SA 4.0).