8. ୮- ମାପ୍ରୁ ଜସେପ୍ ଆରେ ଅଣ୍ତୁନେ ପରିବାରିଙ୍ଗ୍ ରକିୟା କେନଣ୍ତ୍
ପେଙ୍ଗିଟ୍ ବରସ୍ କୁଣ୍ତେଲ୍, ଜାକୁବ୍ ଆୟ୍ବେଲେନ୍ ମୁତାଙ୍ଗ୍ ମାଟଣ୍ତ୍, ଅଣ୍ତ୍ ଅଣ୍ତୁନେ ଲାଡ୍ଟେ ସେପାଲ୍, ଜସେପ୍ ଅଣ୍ତୁନେ ତଡ଼ଣ୍ତ୍କୁଲୁଙ୍ଗ୍ ଆର୍ସେଲ୍ ସୁଡୁଙ୍ଗ୍ ପାୟିଟ୍ ଏରେଲକ୍ କି ମେଣ୍ତା ରାସିନେ ଜତନ୍ ଉଗୁଙ୍ଗ୍ନର୍, ସୟିସିମାଟଣ୍ତ୍।
ଜସେପ୍ନେ ତଡ଼ଣ୍ତ୍କୁଲ୍ ଅଣ୍ତୁଙ୍ଗ୍ ଗୁର୍ନା କେଗିଙ୍ଗ୍ନର୍, ଏନାଦିଙ୍ଗ୍ କି ଆୟ୍ ଲକ୍ନେ ତାମ୍ବା ଅଣ୍ତୁଙ୍ଗ୍ ପେରିନ୍ ଲାଡ୍ କେଗିଙ୍ଗ୍ନଣ୍ତ୍, ଜସେପ୍ କିର୍କାଲ୍ ସୁଡିମାଟଣ୍ତ୍ ଜେ ଅଣ୍ତ୍ ଆୟ୍ଲକ୍ନେ ଶାସନ୍କାର୍ୟା ଏଦାଣ୍ତ୍। ଏରେବେଲାଙ୍ଗ୍ ଜସେପ୍ ଆୟ୍ଲକୁଙ୍ଗ୍ ଆର୍ସେଲ୍ ୱାନଣ୍ତ୍, ଆୟ୍ଲକ୍ ଅଣ୍ଡୁଙ୍ଗ୍ ମାୟା କେନର୍ ଆରେ ଅଣ୍ତୁଙ୍ଗ୍ ୱିଡ଼଼ିଏରାକ୍ ଦାସ୍ନେ ବେବାରିତିଲିଙ୍ଗ୍ ପେଲ୍ ୱିଡ଼଼ି କାରେର୍।
ଜସେପ୍ନେ ତଡ଼ଣ୍ତ୍କୁଲ୍ ଉଲେନ୍ ୱାଦାନ୍ ଆଗାଡ଼଼ି, ଜସେପ୍ନେ ସକାଙ୍ଗ୍ ସାରୁସି କାରେର୍ ଆରେ ଆଦିଙ୍ଗ୍ ମେଗେନେ ନେତିର୍ନା ଜବ୍ଲାସି ସିନର୍। ଆଦିଙ୍ଗ୍ କୁଣ୍ତେଲ୍ ଆୟ୍ ସକାଙ୍ଗ୍ ତାମ୍ ଆବାଙ୍ଗ୍ ତଟ୍ତର୍, ଆଦିଙ୍ଗ୍ ପାୟିଟ୍ ଅଣ୍ତ୍ ଚିନ୍ତା କେନଣ୍ତ୍ ଜେ ଉକୁଟ୍ ବନ୍ଟେ ଜିଆତ୍ ତିଞ୍ଜିକାରିମାୟା। ଜାକୁବ୍ ପେରିନ୍ ଦୁକ୍ କେନଣ୍ତ୍।
କ୍ରିତଦାସ୍ ( ୱିଡ଼଼ିଏରାକ୍ ) ଦାସ୍ ଜସେପୁଙ୍ଗ୍ ବେପାରିତିଲ୍ ମିଶର୍ତୁନ୍ ପାତିସେୟର୍। ମିଶର୍ ଉକୁଟ୍ ବେର୍ଟେ, ସକ୍ତିଶାଲି ଦେଶ୍ ନିଲି ପେରେଟ୍ ଆର୍ସେଲ୍ ମାଟେ। କିର୍ତ ଦାସ୍ ପେବାରିତିଲ୍ ଜସେପଙ୍ଗ୍ ଉକୁଟ୍ ଦାସ୍ ୱାଡିନ୍ ସମୃଦିଶାଳି ସରକାର୍ ପଦାଧିକାରିଙ୍ଗ୍ ୱିଡି କାରେର୍। ଜସେପ୍ ଅଣ୍ତୁନେ ମାଲିକିଙ୍ଗ୍ ନିୟାରେନ୍ ସେବା କେନଣ୍ତ୍, ମାପ୍ରୁ ଜସେପଙ୍ଗ୍ ଆସିର୍ବାଦ୍ କେନଣ୍ତ୍।
ଅଣ୍ତୁନେ ମାଲିକିଙ୍ଗ୍ ଆୟାଲ୍ ଅଣ୍ତୁନା ଅଡୁଙ୍ଗ୍ ପାୟିଟ୍ ଚେଷ୍ଟା କେନେ, ମାତର୍ ଜସେପ୍ ମାପ୍ରୁନେ ବିରଦ୍ ନା ପାପ୍ କେଗିଙ୍ଗ୍ ମାନା କେନଣ୍ତ୍। ଆଦ୍ ଗିଦ୍ରି ଏନେ ଆରେ ମିଚ୍ରେନ୍ ଜସେପୁଙ୍ଗ୍ ଦସ୍ ସିନେ, ଆଦିଙ୍ଗ୍ ପାୟିଟ୍ ଅଣ୍ତୁଙ୍ଗ୍ କାଟେର୍ ଆରେ ଜୟିଲ୍ ଉଲେନ୍ ସୟ୍ତର୍। ଜୟିଲ୍ ଉଲେନ୍ମେନ୍ ଜସେପ୍ ମାପ୍ରୁଙ୍ଗ୍ ବିସ୍ବାସ୍ ନାଟ୍ ମାଟଣ୍ତ୍, ଅଣ୍ତୁଙ୍ଗ୍ ମାପ୍ରୁ ଆସିର୍ବାଦ୍ କେନଣ୍ତ୍।
ଜଦି ଅଣ୍ତ୍ ନିର୍ଦସ୍ ମାଟଣ୍ତ୍, ଆରେମେନ୍ ଜସେପ୍ ଜୟିଲ୍ ଉଲେନ୍ ଦୁଇ ବରସ୍ ମାଟଣ୍ତ୍। ଉକୁଟ୍ ନାର୍କାମ୍, ପାରଙ୍ଗ୍ ମିଶରିୟଟେ ଲକ୍ଗୁଲ୍ ରାଜା ଏଞ୍ଜି ପକୁନର୍, ଜଡେକ୍ କିର୍କାସିଲ୍ ଅଣ୍ତୁଙ୍ଗ୍ ପେରିନ୍ ଗାବ୍ରା କେଗିନେୱ୍। ଅଣ୍ତୁନେ ଏରେମେନ୍ ରାଜାକିଲ୍ କିର୍କାସିଲ୍ନେ ଅରତ୍ ପକୁଙ୍ଗ୍ ଅଡାମାନ୍ ନର୍।
ଜସେପୁଙ୍ଗ୍ କିର୍କାସିଲ୍ନେ ଅରତ୍ ପକୁଙ୍ଗ୍ ମାପ୍ରୁ ଅଦିକାର୍ ସିମାଟଣ୍ତ୍, ଆଦିଙ୍ଗ୍ ପାରଙ୍ଗ୍ ପାୟିଟ୍ ଜସେପୁଙ୍ଗ୍ ଜୟିଲ୍ ଉଲେଟୁକ୍ ଇନ୍ଦ୍ରେର୍। ଅଣ୍ତୁଙ୍ଗ୍ ପାୟିଟ୍ ଜସେପ୍ କେରାସିଲ୍ନେ ଅନୁବାଦ୍ କେନଣ୍ତ୍ ଆରେ ପକେଣ୍ତ୍, ସାତ୍ ବରସ୍ ମାପ୍ରୁ ପେରିନ୍ ତାସ୍ ସିଦାଣ୍ତ୍, ଆୟ୍ ୱାଡିନ୍ ସାତ୍ ବରସ୍ ଦୁର୍ବିକିୟ ଏଦା।
ଜସେପୁଙ୍ଗ୍ ପାର ପେରିନ୍ କିର୍ଦେ ଏନଣ୍ତ୍ ଆଦିଙ୍ଗ୍ ଅଣ୍ତ୍ ଦୁତିୟଟେ ଶକ୍ତିଶାଲି ଏନଣ୍ତ୍।
ସାତ୍ ବରସ୍ ପେରିନ୍ ତାସ୍ ଏଦା ଆଦିଙ୍ଗ୍ କାଦି ପେରିନ୍ ଇରିଙ୍ଗ୍ ଏଦା ଏଞ୍ଜି ଲକ୍ଗୁଲୁଙ୍ଗ୍ ଜସେପ୍ ପକେଣ୍ତ୍। ଏରେବେଲାଙ୍ଗ୍ ସାତ୍ ବରସ୍ ଦୁର୍ବିୟ ୱାନେ, ଜସେପ୍ କାଦି ଲକ୍ଗୁଲୁଙ୍ଗ୍ ୱିଡି କାରିନଣ୍ତ୍ ଏନାଦିଙ୍ଗ୍ କି ଆୟ୍ଲକ୍ କାଦି ତିନିଙ୍ଗ୍ ପାୟିଟ୍ ଅଡ୍ତାର୍।
ମିଶର୍ ତୁନି ଏରା, ମାତର୍ କିଣାନ୍ ତିନ୍ମେନ୍ ଏରେମାନ୍ କି ଜାକୁବ୍ ଆରେ ଅଣ୍ତୁନେ ପରିବାର୍ ବାସେ ଏରିଙ୍ଗ୍ ନର୍, ଦୁର୍ବିକ୍ୟ ପେରିନ୍।
ଆଦିଙ୍ଗ୍ ପାୟିଟ୍ ଜାକୁବ୍ ଅଣ୍ତୁନେ ବେର୍ସେପାକିଲିଙ୍ଗ୍ କାଦି ୱିଡିଙ୍ଗ୍ ମିଶର୍ତୁନ୍ ସୟ୍ତଣ୍ତ୍। ଏରେବେଲାଙ୍ଗ୍ ଜସେପୁଙ୍ଗ୍ ତଡଣ୍ତ୍କୁଲ୍ କାଦି ୱିଡିଙ୍ଗ୍ ୱାନର୍ ଅୟ୍ବେଲାଙ୍ଗ୍ ଅଣ୍ତୁଙ୍ଗ୍ ଆର୍ସେଲ୍ ନିଲ୍ସି ମାଟର୍ ମାତର୍ ଜସେପୁଙ୍ଗ୍ ଚିନାକିଙ୍ଗ୍ ଅଡୁଟର୍। ମାତର୍ ଜସେପ୍ ଆୟ୍ ଲକୁଙ୍ଗ୍ ଚିନାକିଙ୍ଗ୍ ଅଡ୍ତଣ୍ତ୍।
ଆୟ୍ଲକ୍ ବାଦ୍ଲାଏନର୍କି ମାନା ଏଞ୍ଜି ପରିକିୟା କେଦାନ୍ କୁଣ୍ତେଲ୍, ଜସେପ୍ ଆୟ୍ଲକୁଙ୍ଗ୍ ପକେଣ୍ତ୍, ଆନ୍ ଇମେ ତଡଣ୍ତ୍, ଜସେପ୍। ନାରିସ୍ମେର୍। ଇମ୍ଗୁଲ୍ ଉୟାଟେ କାମେ କେଗିଙ୍ଗ୍ ଚେସ୍ଟା କେନର୍ ଆୟ୍ବେଲ୍ ଆନୁଙ୍ଗ୍ ଇମ୍ ଦାସ୍ କେୟି ୱିଡି କାରେର୍, ମାତର୍ ମାପ୍ରୁ ଉୟାଟେଙ୍ଗ୍ ନିୟାକେୟି ବାଦ୍ଲାତଣ୍ତ୍। ମିଶର୍ତୁନ୍ ୱାରି ବାସେ ଏରୁର୍ ଅମାଟୁକ୍ ଆନ୍ ଇମୁଙ୍ଗ୍ ଆରେ ଇମ୍ଗୁଲ୍ନେ ପରିବାରିଙ୍ଗ୍ ପାୟିଟ୍ ଜାଗାସି ସିଦାନ୍।
ଏରେବେଲାଙ୍ଗ୍ ଜସେପ୍ନେ ତଡଣ୍ତ୍କୁଲ୍ ଉଲେନ୍ ୱାନର୍ ଆରେ ଆୟ୍ଲକ୍ନେ ତାମ୍ ଆବାଙ୍ଗ୍, ଜାକୁବଙ୍ଗ୍ ପକେର୍ ଜେ ଇ ଆରେକ୍ ଜସେପ୍ ଜିୱେ ମାୟାଣ୍ତ୍, ଅଣ୍ତ୍ ପେରିନ୍ କିର୍ଦେ ଏନଣ୍ତ୍।
ମାତର୍ ଜାକୁବ୍ ମୁତାକ୍ ଏରିମାଟଣ୍ତ୍ ଏନ୍ଗଡ୍ମେନ୍ ଅଣ୍ତ୍ ଆୟ୍ଲକ୍ନେ ପରିବାର୍ ନାଟ୍ ମିଶର୍ଦେଶ୍ ତିନ୍ ସେୟଣ୍ତ୍ ଆମାନ୍ ଅଣ୍ତ୍ ଆୟ୍ଲକ୍ ନାଟ୍ ବାସେ ଏନଣ୍ତ୍। ଜାକୁବ୍ ସାଦାନ୍ ଆଗାଡି ପାଟିନ୍ ସେପାକିଲ୍ଙ୍ଗ୍ ଆସିର୍ବାଦ୍ କେନଣ୍ତ୍।
ଏରେ ଜିଦ୍ କେୟଣ୍ଡି ନିୟମ୍ ମାପ୍ରୁ ଅବ୍ରାମ୍ ନାଟ୍ କେୟିମାଟଣ୍ତ୍ ଅଣ୍ତ୍ ଅଣ୍ତୁନେ ଇସାକ୍କିଙ୍ଗ୍ ସର୍ପାସି ସିନଣ୍ତ୍, ଆରେ ଜାକୁବ୍ନେ ବାର୍ ଗଟା ସେପାକିଲିଙ୍ଗ୍ ଆରେ ଆୟ୍ଲକ୍ନେ ପରିବାରିଙ୍ଗ୍ କିତିନ୍ ସର୍ପାତଣ୍ତ୍। ବାର୍ଗଟା ସେପାକିଲ୍ନେ ଲକ୍ଗୁଲ୍ ଇସ୍ରାଏଲ୍ଟେ ବାର୍ ଗସ୍ଟି ଏନର୍।
ବାଇବଲ୍ଟେ ଉକୁଟ୍ କେରାଲ୍: ଆଦି ୩୭-୫୦
Free to use, adapt, and share under an open license (CC BY-SA 4.0).