25. ૨૫. શેતાન દુવારા ઇસુ નું પરિક્ષણ

ઇસુવેં બક્તિસ્મ લેંદા પસી પવિત્ર આત્મા હેંનનેં ઉજોડ જગ્યા મ લેંજ્યો, ઝાં ઇસુવેં સાળીસ દાડા અનેં સાળીસ રાતેં ઉપવાસ કર્યો. તર શેતાન ઇસુ કનેં આયો અનેં ઇસુ નેં પાપ મ પાડવા હારુ હેંનું પરિક્ષણ કર્યુ.

શેતાનેં ઇસુ નેં કેંદું,“અગર તું પરમેશ્વર નો બેંટો વેહ તે આ ભાઠં નેં કે, વેયા રુંટો બણેં જાએ અનેં તું ખાએં સકે!”

પુંણ ઇસુવેં શેતાન નેં જવાબ આલ્યો, “પરમેશ્વર ના વસન મ લખેંલું હે, મનખ ખાલી રુંટા થકીસ નેં પુંણ પરમેશ્વર ના મોડા મથી નકળવા વાળા દરેક વસન થી જીવતું રે હે.”

હેંનેં બાદ શેતાન ઇસુનેં મંદિર ની ટેકરી ઇપેર લેં જ્યો, અનેં કેંદું,“અગર તું ખરેખર પરમેશ્વર નો બેંટો વેહ તે આંહો નિસં કુદેં પડ. કેંમકે વસન મ લખેંલું હે, કે પરમેશ્વર પુંતાનં દૂતં નેં હોકમ કરહે, અનેં વેયા પુંતાનં હાથં મ તુંકેં લેંહે, એંતરે કે તનેં કઈ ઠેહ હુદી નેં વાગે.”

પુંણ ઇસુવેં શેતાન નેં પરમેશ્વર ના વસન થીસ જવાબ આલ્યો, પરમેશ્વર ના વસન મ લખેંલું હે, કે તમારા પ્રભુ પરમેશ્વર નું પરિક્ષણ નેં કરવું.”

હેંનેં બાદ શેતાનેં ઇસુ નેં ધરતી ઇપેર ન બદ્દ રાજં અનેં હીની મુંટી વાતેં વતાડજ્યી અનેં કેંદું,“અગર તું મનેં પોગેં લાગહે, તે આ બદ્દી વસ્તુવેં હૂં તનેં આલ દેં.”

ઇસુવેં જવાબ આલ્યો, “જા શેતાન મારી કન થી જાતોરે! કેંમકે પરમેશ્વર ના વસન મ લખેંલું હે, કે પ્રભુ તારા પરમેશ્વર નેં ભજ અનેં હીની સેવા કર.”

તર શેતાન ઇસુ નેં સુંડેંનેં જાતોર્યો, કેંમકે ઇસુ હેંના પરિક્ષણ મ નેં બદલાયો અનેં હરગદૂતવેં આવેંનેં ઇસુ ની હાળ-હમાળ કરી.