Ti Panagrugi iti Iglesia

Kalpasan a nagsubli ni Jesus idiay langit, nagtalinaed dagiti adalanna idiay Jerusalem kas imbilinna kadakuada. Kanayon nga aguummong dagiti namati tapno agkararag.

Kada tawen, limapulo nga aldaw kalpasan iti Ilalabas, ramrambakan dagiti Judio ti napateg nga aldaw a maaw-awagan iti Pentecostes. Ti Pentecostes ket ti panawen a panangrambak dagiti Judio iti pannakaapit dagiti trigo. Mapmapan idiay Jerusalem dagiti Judio a naggapu iti nadumaduma a lugar iti lubong tapno agmaymaysada a mangrambak iti aldaw iti Pentecostes. Ti aldaw Pentecostes iti daytoy a tawen ket maysa a lawas kalpasan iti panagsubli ni Jesus idiay langit.

Kabayatan a naguummong dagiti namati, kellaat a napunno ti ayanda a balay iti ungor a kasla napigsa nga angin. Kalpasanna, nagparang ti kasla apuy iti ngatoen iti ulo dagiti amin a namati. Binendisionan ida iti Espiritu Santo ket nangrugida a nagsao kadagiti dadduma a pagsasao.

Idi nangngeg dagiti tattao idiay Jerusalem ti ringgor, immay dagiti adu a bungoy iti tattao tapno kitaenda no ania ti mapaspasamak. Idi nangngeg dagiti tattao ti ibagbaga dagiti namati maipapan kadagiti nakaskasdaaw nga inar-amid iti Dios, nasdaawda ta nangngegda dagitoy a banbanag manipud iti bukodda a pagsasao.

Impagarup dagiti dadduma a tattao a nabartek dagiti adalan. Timmakder ni Pedro ket kinunana kadakuada, “Dumngegkayo kaniak! Saan a nabartek dagitoy a tattao! Daytoy ti pannakatungpal iti padto nga imbaga ni profeta a Joel maipapan iti imbaga iti Dios, “Bendisionan kayo babaen iti Espirituk sakbay nga aggibus ti lubong.”

“Kadagiti padak nga Israelita dumngeg kayo! Ni Jesus ket maysa a tao a nangaramid kadagiti adu a nabibileg a pagilasinan ken pagsiddaawan babaen iti pannakabalin iti Dios. Nakita ken ammoyo daytoy ngem inlansayo isuna iti krus!”

"Noman pay natay ni Jesus, pinagungar isuna iti Dios. Daytoy ti pannakatungpal iti naipadtu, ‘Saanmo nga ipalubos nga agrupsa ti Nasantoan nga Adipenmo iti tanem.’ Dakami ti saksi iti kinapudno a panagpagungar iti Dios kenni Jesus."

“Tatta naitan-ok ni Jesus iti makannawan iti Dios Ama. Imbaon ni Jesus ti Espiritu Santo kas inkarina. Ti Espiritu Santo ti mangar-aramid kadagiti banbanag a makitkita ken mangmangngegyo ita.”

“Inlansayo iti krus daytoy a tao, ni Jesus. Nalawag nga ammoyo a pinagbalin iti Dios ni Jesus nga Apo ken Messias!”

Kasta unay ti pannakatignay iti puso dagiti tattao a dumdumngeg kenni Pedro gapu kadagiti imbagana. Gapu iti daytoy, dinamagda kenni Pedro ken kadagiti adalan “Kakabsat, ania ngarud ti nasken nga aramidenmi?”

Simmungbat ni Pedro kadakuada ket kinunana, “Masapul nga agbabawi ti tunggal maysa kadakayo, mabautisaran babaen iti nagan ni Jesu-Cristo tapno pakawanen iti Dios dagiti basbasolyo. Kalpasanna, itednanto kadakayo ti bendision iti Espiritu Santo.”

Namati ti agarup 3000 a tattao iti imbaga ni Pedro ken nagbalinda nga adalan ni Jesus. Nabautisaranda ken naibilangda kadagiti namati idiay Jerusalem.

Nagtultuloy dagiti adalan a dimngeg kadagiti sursuro dagiti apostol, inusarda ti panawenda tapno agtitiponda. Nagkakaduada a nangan ken nagkarkararag. Rinagragsakda ti panagkakaduada a nagdaydayaw iti Dios. Imbingayda kadagiti kakaduada dagiti amin a sanikuada. Nasayaat ti nagbalin a pakadamagan iti tunggal maysa kadakuada. Inaldaw nga adu ti mainaynayon a namati.