Pinaimbag ni Pedro ken ni Juan ti Agpalpalama

Iti maysa nga aldaw, magmagna ni Pedro ken ni Juan nga mapan idiay templo. Idi sumungsungadda iti ruangan iti templo, nakitada ti maysa a pilay a lalaki nga agpalpalama.

Kimmita ni Pedro iti lalaki ket kinunana, “Awan ti kuarta a maitedko kenka ngem itedko ti banag nga adda kaniak. Iti nagan ni Jesus, tumakderka ket magnaka!”

Dagus a pinaimbag iti Dios ti pilay a lalaki. Rinuggianna ti nagna ken naglagto-lagto ken dinaydayawna ti Dios. Nasdaaw dagiti tattao nga ada iti arubayan iti templo.

Napan a dagus dagiti tattao tapno makitada no siasino diay tao a napaimbag. Kinuna ni Pedro kadakuada, “Apay a masdaawkayo iti pannakapaimbag daytoy a tao? Saanmi a pinaimbag isuna babaen iti bukodmi a pannakabalin wenno kinaimbag. Ti pannakabalin ni Jesus ken ti pammati nga intedna ti nangpaimbag iti daytoy a tao.”

“Dakayo ti nangibaga iti gobernador tapno matay ni Jesus. Pinatayyo ti nagtaudan iti biag! ngem pinagungar isuna iti Dios. Noman pay saanyo a naawatan dagiti inar-aramidyo, inaramat iti Dios dagiti aramidyo tapno matungpal dagiti padto nga agsagaba ken matayto ti Messias. Isu nga ita, agbabawi ken agtulnog kayo iti Dios tapno maugasan dagiti basbasolyo.”

Kasta unay ti pungtot dagiti panguloen iti templo iti imbaga ni Pedro ken ni Juan. Tiniliwda isuda ken impanda iti pagbaludan. Adu kadagiti tattao ti namati iti mensahe ni Pedro. Immadu agingga a nagbalin nga aggarup limaribu dagiti lallaki a namati kenni Jesus.

Iti simmaruno nga aldaw, impan dagiti panguloen dagiti Judio ni Pedro ken ni Juan iti kangatoan a padi, ken kadagiti panguloen iti relihion. Sinaludsodda ken ni Pedro ken ni Juan, “Kasano a napaimbagyo daytoy pilay a tao?"Ania a pannakabalin ti inusaryo?

Simmungbat ni Pedro kadakuada ket kinunana, “Immimbag daytoy a lalaki babaen iti pannakabalin ni Jesus a Messias. Inlansayo ni Jesus iti krus ngem pinagungar isuna iti Dios! Linaksidyo isuna ngem awanen iti sabali pay a wagas a pakaisalakanan malaksid iti pannakabalin ni Jesus!”

Nasdaaw dagiti panguloen kenni Pedro ken ni Juan agsipud ta situturedda a nagsao. Ammoda a gagangay dagitoy a lallaki ken saanda a nakaadal ngem malagipda a nakikadkadua dagitoy a lallaki kenni Jesus. Kalpasan a binutbutengda ni Pedro ken ni Juan, pinalubosanda ida.