1. ଗନଡେଲ୍
Translation ଅଡ୍କୋନ୍ ଆଗନଡେଲ୍ ଏନ୍ନେଗୋ ଡେଲୋ। ତୁଡ୍ରୁଡ଼଼ିନ୍ନାଲୋଙ୍ ଈଶ୍ୱରନ୍ ରୁଆଙନ୍ ଡ଼ ପୂର୍ତ୍ତିନ୍ ଡ଼ ତିଲୋଙ୍ ଅଡ୍କୋନ୍ ଆତେ ଗବ୍ଡେଲେନ୍। ଈଶ୍ୱରନ୍ ଗନବ୍ଡେଲନ୍ ଲୁମେନ୍ କି ପୂର୍ତ୍ତିନ୍ ଲୋଙଡ୍ ଡ଼ ଆରିକ୍କା ଡକୋଏନ୍। ଇନ୍ନିଙ୍ ଜା ଏର୍ତ୍ନୁବ୍ ଡକୋଏନ୍। ବନ୍ଡ ଈଶ୍ୱରନ୍ ଆପୁରାଡା ଡାଆନ୍ ଆତୋଣ୍ତୋ ଡକୋଏନ୍।
ତି ଆତିକ୍କି ଈଶ୍ୱରନ୍ ବର୍ରନ୍, ସାଆରେତୋ। ତାଡିତ୍ ସାଆରେନ୍। ଈଶ୍ୱରନ୍ ସନାଆରନ୍ ଲଗଡ ଗିଜେନ୍ ଡ ଆନିନ୍ ତମ୍ୱା ଗାମ୍ଲେ ଅବ୍ଞୁମେନ୍ । ଆନିନ୍ କେନ୍ ଆତେ ଲୋଙଡନ୍ ସିଲଡ୍ ଆନ୍ନାଏନ୍, ତି ଆତେ ଆନିନ୍ ତଗଲ୍ ଗାମ୍ଲେ ଅବ୍ଞୁମେନ୍ । ଈଶ୍ୱରନ୍ ଗନଡେଲନ୍ ଆପର୍ତ୍ତମ୍ମୁଡିନ୍ନା ସାଆରନ୍ ଗବ୍ଡେଲନ୍ ।
ଗନଡେଲନ୍ ଆବାର୍ତା ଈଶ୍ୱରନ୍ ପୂର୍ତ୍ତିନ୍ ଆତୋଣ୍ତୋ ରୁଆଙନ୍ ଗନଡେଲନ୍ ଆସନ୍ ବର୍ରନ୍ । ଆନିନ୍ ଜାୟ୍ତାନ୍ ଆଡାଆ ସିଲଡ୍ ତୋଣ୍ତୋନ୍ ଆଡାଆ ଆରାନ୍ନାଏନ୍ ଆସନ୍ ରୁଆଙନ୍ ଗଡେଲେନ୍।
ଏର୍ତାଡିନ୍ନାଲୋଙ୍ ଈଶ୍ୱରନ୍ ବର୍ରନ୍ ଡ ଆସର୍ଲନ୍ ସିଲଡ୍ ଡାଆନ୍ ଅବ୍ନାନ୍ନାଏନ୍ । ଆନିନ୍ ଆସର୍ଲନ୍ “ପୂର୍ତ୍ତିନ୍” ଗାମେନ୍ ଡ ଆନିନ୍ ଡାଆନ୍ ଆଡଅଙ୍ “ସମୟଁଡ୍ରା” ଗାମେନ୍। ଈଶ୍ୱରନ୍ ଗିଜେନ୍ ଆନିନ୍ ଇନିଜି ଗବ୍ଡେଲେନ୍ ତି ଆତେଜି ଲଗଡ ଡକୋଏନ୍ ।
ତି ସିଲଡ୍ ଈଶ୍ୱରନ୍ ଗାମେନ୍ “ପୂର୍ତ୍ତିଲୋଙନ୍ ଅଡ୍କୋନ୍ ଆରାନୁବ୍ ଜି ଡ ଅଜିଙଞ୍ଜି ଡୁଙ୍ନାୟ୍ ତଜି । ଆରି ଏତ୍ତେଗୋମା ଡେଲୋ । ଈଶ୍ୱରନ୍ ଗିଜେନ୍ ଆନିନ୍ ଇନିଜି ଗବ୍ଡେଲନ୍ ତି ଆତେଜି ଲଗଡ ଡମ୍ ଡକୋଏନ୍ ।
ଗନବ୍ଡେଲନ୍ ଊଞ୍ଜିଡିନ୍ନାଲୋଙ୍ ଈଶ୍ୱରନ୍ ଗାମେନ୍ ଆରି ଓୟୋଙନ୍, ଆଙ୍ଗାଜନ୍ ଡ ତୁତୁଜଞ୍ଜି ଗବ୍ଡେଲନ୍ । ଈଶ୍ୱରନ୍ ଆନିଞ୍ଜି ଆଡଅଙ୍ ସନାଆରନ୍ ତନିୟନ୍ ଡ ତମ୍ୱା, ତଗଲ୍, ଡିନ୍ନାଞ୍ଜି ଡ ବର୍ଷେଙଞ୍ଜି ଆରବ୍ଜନାନ୍ ଆସନ୍ ଞନନ୍ଡ୍ରମନ୍ ଆଡନେ ଡେଏତୋ ଗାମେନ୍। ଈଶ୍ୱରନ୍ ଗିଜେନ୍ ଇନିଜି ଆନିନ୍ ଗବ୍ଡେଲେନ୍ ତି ଆତେଜି ଲଗଡ ଡମ୍ ଡ଼କୋଏନ୍ ।
ମଲ୍ଲୟ୍ ଡିନ୍ନଲୋଙନ୍ ଈଶ୍ୱରନ୍ ଗାମେନ୍ ଆରି ଡ଼ାଆଲୋଙନ୍ ଆପ୍ରୁପୁଡାତନେଞ୍ଜି ଅଡକୋନ୍ ଆଜନ୍ତୁଞ୍ଜି ଡ ଅନ୍ତିଡଞ୍ଜି ଗବ୍ଡେଲେନ୍ । ଈଶ୍ୱରନ୍ ତି ଆତେ ଲଗଡ ଗିଜେନ୍ ଡ ଆନିଞ୍ଜି ଆଡଅଙ୍ ଅବ୍ ସିତ୍ତାଏଞ୍ଜି ।
ଗନଡେଲନ୍ ତୁଡ୍ରୁଡିନ୍ନାଲୋଙ୍ ଈଶ୍ୱରନ୍ ଗାମେନ୍ ଲବରେଙନ୍ ଅଡ୍କୋନ୍ ଅନ୍ତମ୍ ଆଜନ୍ତୁଜି ଗଡେଲେତୋ । ଈଶ୍ୱରନ୍ ଏଙ୍ଗାଲେ ବର୍ରନ୍, ତି ଅନ୍ତମ୍ ଡେଲୋ । ଲାଙ୍ଲେତ୍ ଅର୍ରନ୍ ଆଡରେତେନ୍ ଅନ୍ତମ୍ ଆଜନ୍ତୁ ଡକ୍କୋଏଞ୍ଜି, ଲାଙ୍ଲେଡ୍ ଲବଲୋଙନ୍ ଆତରଙିୟ୍ ତଞ୍ଜି ଆଜନ୍ତୁ ଡ ଲାଙ୍ ଲେତ୍ କିନ୍ରେଙ୍ ଜନ୍ତୁଞ୍ଜି ଡକୋଏଞ୍ଜି। ଡ ଈଶ୍ୱରନ୍ ତିଜି ଆତେ ଲଗଡ ଗିଜେନ୍ ।
ତି ଆତିକ୍କି ଈଶ୍ୱରନ୍ ଗାମେନ୍, ୟବା, ଇନ୍ଲେନ୍ ମନ୍ଡ୍ରାନ୍ ଇନ୍ଲେନ୍ ଅନ୍ତମ୍ ଏତୁବ୍ବା । ପୂର୍ତ୍ତିଲୋଙନ୍ ଡ ଅଡ୍କୋ ଜନ୍ତୁଲୋଙଞ୍ଜି ଆନିଞ୍ଜି ଡନେତଜି ।
ତି ଆସନ୍ ଈଶ୍ୱରନ୍ ଅସୋୟ୍ ଆଉମରିଲନ୍ ପାଙେନ୍ , ମନ୍ଡ୍ରାନ୍ ଆଡଅଙ୍ ତୁବେନ୍, ଆରି ଆମୁଗଡନ୍ ଉମ୍ଫେଲ୍ଲେ ଆପ୍ରାନ୍ନାନ୍ ତିୟେନ୍ । ତି ଆମନ୍ର୍ଡା ଆଞୁମ୍ ଆଦମ ଡକୋଏନ୍ । ଈଶ୍ୱରନ୍ ଅବୟ୍ କୋତ୍ତାନ୍ ତୁବେନ୍ । ଅଙ୍ଗାଲୋଙ୍ ଆଦମନ୍ ଡକୋତନେ ଡ ତି ଆଗନିଜନ୍ ଆସନ୍ ଆନିନ୍ ତେତ୍ତେ ଡକ୍କୋଏନ୍।
କୋତ୍ତାଲୋଙନ୍, ଈଶ୍ୱରନ୍ ବାଗୁ ସୋଡା ଅରାନୁବନ୍ ଗୁଏନ୍ । ଅନମେଙନ୍ ଆରାନୁବ୍ ଡ ମନଙ୍ ଅଡେ ମନଙ୍ ତଡନ୍ ଆଜନନା ଆରାନୁବ୍ । ଈଶ୍ୱରନ୍ ଆଦମନ୍ ଆଡଅଙ୍ ଗାମେନ୍ ଡ ମନଙ୍ ଅଡେ ମନଙ୍ ତଡନ୍ ଆଜନନା ଆରାନୁବ୍ ଆଜଅ ଅମ୍ରେଙ୍ ଲେ କୋତ୍ତାଲୋଙନ୍ ଅଡ୍କୋନ୍ ଆରାନୁବ୍ ଆଜଅ ଜୋମ୍ଲେ ଏରପ୍ତିତେ । ଡ ଆନା କେନ୍ ଆରାନୁବ୍ ଆଜଅ ଜୋମ୍ତେ ଆନିନ୍ ରବୁତେ ।
ତି ସିଲଡ୍ ଈଶ୍ୱରନ୍ ଗାମେନ୍, ମନ୍ଡ୍ରାନ୍ ଆଉନ୍ସନ୍ ଆଡକୋନେ ମନଙ୍ତଡ୍ । ବନ୍ଡ ଅନ୍ନିଙ୍ ଆଜନ୍ତୁ ଆଦମନ୍ ଆସନ୍ ମନ୍ନାୟନ୍ ଆସନ୍ ଅଡ୍ଡକୋଲଜି ।
ତତ ଆସନ୍, ଈଶ୍ୱରନ୍ ଆଦମନ୍ ଆଡଅଙ୍ ମେଡ୍ରନ୍ ଅବ୍ଡିମଡ୍ଲେ ଅବଲୁଡ୍ଲୁଡେନ୍ । ତି ସିଲଡ୍ ଈଶ୍ୱରନ୍ ଆଦମନ୍ ଆପନରାଜାଙ୍ ଅବୟ୍ ପାଙେନ୍ କି ଅବୟ୍ ଆଇମରନ୍ ତୁବେନ୍ ଡ ଆନିନ୍ ଆଡଅଙ୍ ଆଦମନ୍ ଆମଙ୍ ଓରୋଙ୍ଲାୟ୍ ।
ଏଙ୍ଗାଲେ ଆଦମନ୍ ଆନିନ୍ ଆଡଅଙ୍ ଗିଜେନ୍, ଆନିନ୍ ଗାମେନ୍, ଆତନିକ୍କି ! କେନ୍ ଆନିନ୍ ଞେନ୍ ଅନ୍ତମ୍ ! ଆନିନ୍ ଆଇମର୍ ଗାମଲେ ଅନୋଡ୍ଡେନ୍ ଡେତେ । ଇନି ଆସନ୍ ଗାମେଣ୍ତେନ୍ ଆନିନ୍ ଓବ୍ବାମରନ୍ ସିଲଡ୍ ଗଡେଲେନ୍ । କେନ୍ ଆସନ୍ ମନ୍ଡ୍ରାନ୍ ଆବାପ୍ପାନ ଆନନଞ୍ଜି ଅମ୍ରେଙ୍ଲେ ଆଡୁର୍କୀନ୍ ବାତ୍ତେ ଅବୟ୍ ଡେତଜି ।
ଈଶ୍ୱରନ୍ ଓବ୍ବାମରନ୍ ଡ ଆଇମରନ୍ ଆମୁକ୍କାଡମନ୍ ଅନ୍ତମ୍ ତୁବେନ୍। ଆନିନ୍ ଆନିଞ୍ଜି ଆଡଅଙ୍ ଅବ୍ସିତ୍ତାଏଞ୍ଜି ଡ ଗାମେନ୍, ଗୋଗୋୟ୍ ପସିଜଞ୍ଜି ଡ ଉଲ୍ଲେଙଞ୍ଜି କୋବ୍ବା ଡ ପୁର୍ତ୍ତିନ୍ ବବ୍ରିୟବା । ଈଶ୍ୱରନ୍ ଇନିଜି ଗବ୍ଡେଲେନ୍ ତି ଆତେ ଅଡ୍କୋନ୍ ଲଗଡ ଗିୟ୍ତ୍ତାଏନ୍ ତି ଆତେଜିଲୋଙ୍ ଆନିନ୍ ଗୋଗୋୟ୍ ସର୍ଡାଏନ୍ । କେନ୍ ଅଡ୍କୋନ୍ ଆଗନଡେଲ୍ ତୁଡ୍ରୁ ଡିନ୍ନାଲୋଙ୍ ଗଡେଲେନ୍ ।
ଏଙ୍ଗାଲେ ବପାଲ୍ଲି ଡେଲୋ, ଈଶ୍ୱରନ୍ ଅଡ୍କୋନ୍ ଆଲନୁମନ୍ ଅବ୍ଗଡେନ୍ । ତି ଆସନ୍ ଅଡ୍କୋନ୍ ଆଲନୁମନ୍ ଅବ୍ଗଡ୍ଲେ ଲୋଲୋଲନେ । ଆନିନ୍ ବପାଲ୍ଲି ଡିନ୍ନା ଅବ୍ସିତ୍ତାଲେ ମଡ଼଼ିର୍ ଏମ୍ମେନ୍ । ଇନି ଆସନ୍ ଗାମେଣ୍ତେନ୍ ତି ଆଡିନ୍ନା ଆନିନ୍ ଆଲନୁମନ୍ ସିଲଡ୍ ଲୋଲୋଲନ୍। କେନ୍ଅନ୍ତମ୍ ଈଶ୍ୱରନ୍ ରୁଆଙନ୍, ପୂର୍ତ୍ତିନ୍ ଡ ତେତ୍ତେ ଡକୋନ୍ ଅଡ୍କୋନ୍ ଆଜନବ୍ ଜି ଗବ୍ଡେଲେନ୍ ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍ : ଆଦି ୧-୨
Free to use, adapt, and share under an open license (CC BY-SA 4.0).