2. ଇର୍ସେନ୍ ପୂର୍ତ୍ତିନ୍ ଗନ୍ଲନାୟ୍।
ଈଶ୍ୱରନ୍ ଆନିଞ୍ଜି ଆସନ୍ ଆତରୁବେନ୍ ମନଙ୍ ଡମନ୍ ଆକୋତ୍ତାଲୋଙ୍ ଆଦମନ୍ ଡ ଆଡୁର୍କୀନ୍ ଗୋଗୋୟ୍ ସର୍ଡାନ୍ ବାତ୍ତେ ଡକୋଲଞ୍ଜି । ଆନିଞ୍ଜି ଆନ୍ନିଙ୍ ସିଣ୍ତ୍ରିନ୍ ଆଜିଜିନେତଡ୍ ଜି, ବନ୍ଡ ତି ଆତେ ଆନିଞ୍ଜି ଆସନ୍ ଇନ୍ନିଙ୍ ଗନ୍ଡ୍ରଜନ୍ ଅଡ୍ଡକୋଲୋ । ଇନି ଆସନ୍ ଗାମେଣ୍ତେନ୍, ପୂର୍ତ୍ତିଲୋଙନ୍ ଇର୍ସେନ୍ ଅଡ୍ଡକୋଲୋ । ଆନିଞ୍ଜି ଡିତାନ୍ କୋତ୍ତାଲୋଙନ୍ ଆଡ୍ରକୋଲଞ୍ଜି ଆଡିତ୍ ଈଶ୍ୱରନ୍ ଆନିଞ୍ଜି ସରିନ କଡ଼ାଡିଲନ୍ ।
ବନ୍ଡ, କୋତ୍ତାଲୋଙନ୍ ଅବୟ୍ ସାଲାକ୍କି ଜାଆଡ୍ ଡକୋଏନ୍ । ଆନିନ୍ ଆଇମରନ୍ ଆଡଅଙ୍ ବରେନ୍, ଆଜାଡିନ୍ ପଁ ଈଶ୍ୱରନ୍ କୋତ୍ତାଲୋଙନ୍ ଅନ୍ନିଙ୍ ଆରାନୁବ୍ ଆଜଅ ଏଜୋମ୍ଡଙ୍ ଗାମ୍ଲେ ବର୍ରବେନ୍ ?
ଆଇମରନ୍ ଗାମେନ୍, ଈଶ୍ୱରନ୍ ଇନ୍ଲେନ୍ ଆଡଅଙ୍ ବର୍ରଲେନ୍ ମନଙ୍ ଡ ମନଙ୍ ତଡନ୍ ଜନନାନ୍ ଆରନୁବ୍ ଆଜଅ ଅମ୍ରେଙ୍ଲେ ଆଙ୍ଗାଜାକିଁ ଆରାନୁବ୍ ଆଜଅ ଇନ୍ଲେନ୍ ଜୋମ୍ଲେ ଏରପ୍ତିତାୟ୍ । ଈଶ୍ୱରନ୍ ଇନ୍ଲେନ୍ ବର୍ରଲେନ୍, ଡ ଆମ୍ୱେନ୍ ତି ଆଜଅ ଏଜୋମେଣ୍ତେନ୍ ଅଡେ ଏସୁଙେନ୍ ଡେନ୍ ତାଡିନ୍ନାମା ଆମ୍ୱେନ୍ ରବୁତବେନ୍ ।
ଜାଆଡନ୍ ଆଇମରନ୍ ଆଡଅଙ୍ ବରେନ୍, କେନ୍ ଆତେ ଆଜାଡିନ୍ ତଡ୍ । ଆମ୍ୱେନ୍ ଅର୍ରବୁବେନ୍ । ଈଶ୍ୱରନ୍ ଜନା ଡ, ଆମ୍ୱେନ୍ ଜୋମାନ୍ ଜୋମାନ୍ ଈଶ୍ୱରନ୍ ଅନ୍ତମ୍ ଆମ୍ୱେନ୍ ଡେତବେନ୍ ଡ ଆନିନ୍ ଅନ୍ତମ୍ ମନଙ୍ ଡ ମନଙ୍ତଡନ୍ ଆତେ ଜନାଲେ ଏରପ୍ତିତେ,।
ଆଇମରନ୍ ତିଆତେ ଗିଜେନ୍, ତି ଆଜଅ ଗନିୟ୍ ଗିୟ୍ ଲୋଙନ୍ ମନଙ୍ ଡକୋଏନ୍ ଡ ଜନୋମନ୍ ଆସନ୍ ମନା ଡକୋଏନ୍ । ଆନିନ୍ ଜନଙ୍ ବନୁଡ୍ଡିନ୍ ଆସନ୍ ସାଜେନ୍, ତି ଆସନ୍ ଆସୋୟ୍ ଆଜନ୍ ରୋଡେନ୍ ଡ ଜୋମେନ୍ । ତି ସିଲଡ୍ ଆସୋୟ୍ ଆଜନ୍ ଆଅୟ୍ତବନ୍ ତିୟେନ୍, ଆନା ଆନିନ୍ ବାତ୍ତେ ଡକୋଏନ୍ ଆରି ଆନିନ୍ ନିୟ୍ ତେତ୍ତେ ସିଲଡ୍ ଅସୋୟ୍ ଜୋମେନ୍ ।
ଏର୍ରବ୍ବୋମଙ୍, ଆନିଞ୍ଜି ସାଆର୍ ମଡେଞ୍ଜି, ଡ ଆନିଞ୍ଜି ଅମ୍ଲଞ୍ଜି ଡ, ଆନିଞ୍ଜି ଆଉର୍ଡ୍ଡିଜ୍ଜି । ଅଲାନ୍ ପଡ୍ଲୋଙ୍ପଡ୍ଲେ ଆଡଅଙଞ୍ଜି ଅନବ୍ସନେନ୍ ଆସନ୍ ସାଜେଞ୍ଜି ।
ତି ଆତିକ୍କି ଈଶ୍ୱରନ୍ କୋତ୍ତାଲୋଙନ୍ ଆଜିର୍ତାଞନ୍ ଆସନଡ୍ଡା ଓବ୍ୱାମରନ୍ ଡ ଆଡୁକ୍କରିନ୍ ଅମ୍ଡଙେଞ୍ଜି । ଆନିଞ୍ଜି ବାଗୁଞ୍ଜି ଈଶ୍ୱରନ୍ ଆମଙ୍ ସିଲଡ୍ । ତି ଆତିକ୍କି ଈଶ୍ୱରନ୍ ଓବ୍ୱାମରନ୍ ଆଡଅଙ୍ ଓଡ୍ଡେଏନ୍, ଆମ୍ୱେନ୍ ଅଡେଙ୍ଗାଜି ? ଆଦମନ୍ ଗାମେନ୍, ଆମନ୍ କୋତ୍ତାଲୋଙନ୍ ଆଜିର୍ରାଞନ୍ ଞେନ୍ ଅମ୍ଡଙ୍ ଲାୟ୍ ଡ ଞେନ୍ ବତଙ୍ ଲିଞ୍, ଇନି ଆସନ୍ ଗାମେଣ୍ତନ୍ ଞେନ୍ ଆଉରଡିୟ୍ ଡକୋଲିଞ୍ । ତାସନ୍ ଞେନ ସଲନାୟ୍।
ଈଶ୍ୱରନ୍ ଗାମେନ୍, ଆମ୍ୱେଞ୍ଜି ଆଉର୍ଡିଜ୍ ଗାମ୍ଲେ ଆମ୍ୱେନ୍ ଆଡଅଙ୍ ଆନା ବର୍ରବେନ୍ ? ଅଙ୍ଗା ଆଜଅ ଏଜୋମ୍ଡଙ୍ ଗାମ୍ଲବେନ୍, ତି ଆଜଅ ଆମ୍ୱେନ୍ ଏଜୋମେନ୍ ପଁ ? ଓବ୍ବାମରନ୍ ଗାମେନ୍, କେନ୍ ଆଇମର୍ ଆମନ୍ ତିୟ୍ଲିଞ୍ ଡ ଆନିନ୍ ଞେନ୍ ଆଡଅଙ୍ ଜଅନ୍ ଜନୋମନ୍ ତିୟ୍ଲିଞ୍ । ଈଶ୍ୱରନ୍ ଆଇମରନ୍ ଆଡଅଙ୍ ବରେନ୍, କେନ୍ଆତେ ଆମନ୍ ଇନି ଲୁମେନ୍ ? ଆଇମରନ୍ ଜାଲଙେନ୍, ଜାଆଡନ୍ ଞେନ୍ କଣ୍ତାୟ୍ଲିଞ୍ ।
ଈଶ୍ୱରନ୍ ଜାଆଡନ୍ ଆଡଅଙ୍ ବରେନ୍, ଆମନ୍ ସନୟ୍ପନ୍ ଡେଲମ୍ । ଆମନ୍ କିମ୍ଫୋଙ୍ନମ୍ ବାତ୍ତେ ତଙିୟ୍ତନ୍ ଆରି ଆଉମରିଲନ୍ ଜୋମ୍ତେ । ଆମନ୍ ଡ ଆଇମରନ୍ ଏଲ୍ସଙ୍ଗତ୍ତାତେ । ଅନ୍ବେଞ୍ଜି ଡ ଆଅନଞ୍ଜି ବାତ୍ତେ ଅଲ୍ସଗତ୍ତାତେ । ଆଇମରନ୍ ଆକେଜ୍ଜା ଅବବ୍ନମ୍ ତିଡ୍ତମ୍ଜି ଆମନ୍ ଆରି ତି ଆଜଙନ୍ ରମ୍ତେ ।
ତି ସିଲଡ୍ ଈଶ୍ୱରନ୍ ଆଇମରନ୍ ଆଡଅଙ୍ ବର୍ରେନ୍, ଞେନ୍ କରୋକ୍କୋଡ୍ ବନମ୍ ବମନ୍ନେନମ୍ ଅବ୍ ଗୋଗୋୟତାୟ୍। ଆମନ୍ ଅୟତବ୍ନମ୍ ସାୟ୍ତେ ଡ ଆନିନ୍ ଆମନ୍ ଆଡଅଙ୍ ଡନେତନ୍ନେ।
ଈଶ୍ୱରନ୍ ମର୍ଡାନ୍ ଆଡଅଙ୍ ଗାମେନ୍, ଆମନ୍ ଡୁକ୍ରିନମ୍ ଆବର୍ନେ ଅମ୍ଡଙେନ୍ ଡ ବର୍ନେଞେନ୍ ଆଲ୍ଲେଏନ୍ । ନମି ଲବନ୍ ସନୟ୍ପନ୍ ଞାଙେନ୍, ଡ ଆମନ୍ ଜନ୍ଡ୍ରୋମନ୍ ଆଞନାଙ୍ ଆସନ୍ ଡ଼ ଆକ୍କରାନ୍ କାବ୍ୱାଡାତନ୍ । ଆମ୍ୱେନ୍ ରବୁତବେନ୍ ଡ ଡଅଙ୍ବେନ୍ ଲବନ୍ ୟର୍ତନେ । ଓବ୍ୱାମରନ୍ ଆଡୁକ୍ରିନ୍ ଆଞୁମ୍ ଅବା ଡକ୍କୋଏନ୍, ତି ଆଗରାମ୍ଗାମ୍ “ଅନମେଙନ୍”, ଇନିଆସନ ଗାମେଣ୍ତେନ୍ ଆନିନ୍ ଗୋଗୋୟ୍ ମନ୍ଡ୍ରାନ୍ ଆନନ ଡେତେ । ଈଶ୍ୱରନ୍ ଆଦମନ୍ ଡ ଅବାନ୍ ଜନ୍ତୁନ୍ ଆଉସାଲ୍ ବାତ୍ତେ ଅବ୍ଜିଜିଏଞ୍ଜି ।
ତି ସିଲଡ୍ ଈଶ୍ୱରନ୍ ଗାମେନ୍, ନମି ମନଙ୍ ଡ ମନଙ୍ ତଡନ୍ ଅଜନନା ବାତ୍ତେ ମର୍ଡାନ୍ ଇନ୍ଲେନ୍ ଅନ୍ତମ୍ ଡେଏନ୍, ଆନିନ୍ ଡିତାନ୍ ଅମେଙ୍ଲେ ଆଡକୋନେ ଆସନ୍ ଅନମେଙନ୍ ଆରାନୁବ୍ ଆଜଅ ଜନୋମନ୍ ଅଡ୍ଡେଏ । ତି ଆସନ୍ ଈଶ୍ୱରନ୍ ଆଦମନ୍ ଡ ଅବାନ୍ ଆଡଅଙ୍ ମନଙ୍ଡମ୍ ଆକୋତ୍ତାଲୋଙ୍ ସିଲଡ୍ ଅମ୍ଡୁଙେଞ୍ଜି ଡ ସଙାୟ୍ ଆପ୍ପାୟେଞ୍ଜି ।ଅନମେଙନ୍ ଆରାନୁବ୍ ଆଜଅ ଏଙ୍ଗାଲେ ଜୋମ୍ଲେ ଅର୍ରପ୍ତିଏଜି, ଈଶ୍ୱରନ୍ ବୋର୍ସା ରୁଆଙ୍ କବରପାଙ୍ମରଞ୍ଜି କୋତ୍ତାନ୍ ଆଗରନ୍ନେଗଡ୍ ଜନଗ୍ଗେନ୍ ଆସନ୍ ଡକ୍କୋଏଞ୍ଜି ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍ : ଆଦି ୩
Free to use, adapt, and share under an open license (CC BY-SA 4.0).