3. ବୁବ୍ଡାନ୍
ଗୋଗୋୟ୍ ଡିନ୍ନା ଆତିକ୍କି, ଗୋଗୋୟ୍ ମନ୍ଡ଼୍ରାଞ୍ଜି ପୁର୍ତ୍ତିଲୋଙନ୍ ଡକୋଲଞ୍ଜି । ଆନିଞ୍ଜି ଗୋଗୋୟ୍ ବନ୍ଡ୍ରାବ୍ମର୍ ଡ ସଙ୍ଗତ୍ତାମର୍ ଡକୋଏଞ୍ଜି । ଡିୟ୍ତେ ଇର୍ସେ ଡକୋଏନ୍ ଡ, ଈଶ୍ୱରନ୍ ଅମ୍ଫରା ପୂର୍ତ୍ତିନ୍ ସୋଡା ବୁବ୍ଡାନ୍ ବାତ୍ତେ ପୂର୍ତ୍ତିନ୍ ଅନବ୍ମୋସ୍ସାନ୍ ଆସନ୍ ଆନିନ୍ ଗବ୍ରିୟ୍ୟମ୍ଲନେ ।
ବନ୍ଡ ନୋଅନ୍ ଈଶ୍ୱରନ୍ ଆଗନିୟ୍ ଗିୟ୍ଲୋଙ୍ ସନାୟୁମ୍ ଞାଙ୍ମର୍ ଡକୋଏନ୍ । ଆନିନ୍ ଇର୍ସେ ମରଞ୍ଜିଲୋଙ୍ ଅବୟ୍ ଡର୍ନେମର୍ ଅନ୍ତମ୍ ଡିଲେ ଡିନ୍ନାନ୍ ଡକୋଲନେ । ଈଶ୍ୱରନ୍ ନୋଅନ୍ ଆଡଅଙ୍ ବନୁବ୍ଡ୍ଡାନ୍ ଆରାପ୍ପାୟ୍ତାଞନ୍ ଆନିୟ୍ୟମ୍ ବର୍ନେଞ୍ଜି ବରେନ୍ । ଆନିନ୍ ନୋଅନ୍ ଆଡଅଙ୍ ଅବୟ୍ ସୋଡା ଜାଆଜନ୍ ତନୁବନ୍ ଆସନ୍ ବରେନ୍ ।
୧୪୦ ମିଟର୍ ଡନେଙ୍ଗାନ୍, ୨୩ ମିଟର୍ ଲନାଆଙନ୍ ଡ ୧୩.୫ ମିଟର୍ ତୋଣ୍ତୋନ୍ ଆଡନେଙ୍ଗା ଅବୟ୍ ଜାଆଜନ୍ ତନୁବନ୍ ଆସନ୍ ଈଶ୍ୱରନ୍ ନୋଅନ୍ ଆଡଅଙ୍ ବରେନ୍ । କେନ୍ ଆତେ ଅରାନ୍ ବାତ୍ତେ ତନୁବନ୍ ଆସନ୍ ଡ ୟାଗି ତନେଡେଙ୍ ଲୋଙ୍ ଗୋଗୋୟ୍ ଆଲୋଙ୍ସିଙନ୍, ଅବୟ୍ ବିଲେଙନ୍ ଡ ଅବୟ୍ କିନ୍ତାଲ୍ ସନଙନ୍ ତନୁବନ୍ ଆସନ୍ ବରେନ୍। କେନ୍ ଆଜାଆଜଲୋଙ୍ ବୁବ୍ଡ୍ଡାଇଙନ୍ ଆଡିନ୍ନା ନୋଅନ୍, ଆସିଙ୍ମରଞ୍ଜି, ଆରି ଅଡକୋନ୍ ଲବଲୋଙନ୍ ଆଡ୍ରକୋତନ୍ ଆଜନ୍ତୁଜି ଡୋବ୍ଲେ ଡକ୍କୋତେ ।
ନୋଅନ୍ ଈଶ୍ୱରନ୍ ଆବନାୟ୍ ମାନ୍ନେଏନ୍ । ଈଶ୍ୱରନ୍ ଏଙ୍ଗାଲେ ବର୍ରନ୍, ତି ଅନ୍ତମ୍ ନୋଅନ୍ ଡ ୟାଗି ଆଡାଙ୍ଗାଡଅନଞ୍ଜି ଜାଆଜନ୍ ତୁବେଞ୍ଜି । ଜାଆଜନ୍ ଆତନୁବ୍ ଆସନ୍ ଗୋଗୋୟ୍ ବର୍ଷେଙ୍ ଡେଏଞ୍ଜି ଇନି ଆସନ୍ ଗାମେଣ୍ତେନ୍ କେନ୍ଆତେ ଗୋଗୋୟ୍ ସୋଡା ଡକୋଲୋ । ଆରଡୋତାଞନ୍ ଆବନୁବ୍ଡ୍ଡା ଆବର୍ନେ ନୋଅନ୍ ମନ୍ଡ୍ରାଞ୍ଜି ଆଡଅଙ୍ ଅବ୍ଜନାଏଞ୍ଜି, ଡ ଈଶ୍ୱରନ୍ ଆମଙ୍ ୟର୍ନେନ୍ ଆସନ୍ ବରେଞ୍ଜି, ବନ୍ଡ ଆନିଞ୍ଜି ତି ଆବର୍ନେନ୍ ଅଡ୍ଡରଞ୍ଜି ।
ଈଶ୍ୱରନ୍ ନୋଅନ୍ ଆଡଅଙ୍ ଡ ତି ଆକୁତ୍ତମ୍ମାଞ୍ଜି ଡ ଜନ୍ତିଞ୍ଜି ଗୋଗୋୟ୍ ଜନୋମନ୍ ସାୟ୍ଲେ ଡନକ୍କୋନ୍ ଆସନ୍ ବାଞେଞ୍ଜି । ଅଙ୍ଗାଡିନ୍ନା ଅଡକୋନ୍ ଅସ୍କ୍କାୟେଞ୍ଜି, ନୋଅନ୍ ଆଡଅଙ୍ ଈଶ୍ୱରନ୍ ଗାମେନ୍, ନମି ଆମନ୍, ଡୁକ୍କରିନମ୍, ଅନ୍ନମ୍ଜି ଡ ଆଡୁକ୍କରିଞ୍ଜି ଅଡକୋନ୍ ଆଟ ମନ୍ଡ୍ରା ଜାଆଜଲୋଙନ୍ ଗନନ୍ନେନ୍ ଆବେଡା ଅଡୋଲାୟ୍ ।
ଈଶ୍ୱରନ୍ ଜନ୍ତୁନ୍ ଡ ଅନ୍ତିଡନ୍ଞ୍ଜି ଡିଲେ ଆଇନ୍ ଡ ଓବ୍ବାନ୍ ନୋଅନ୍ ଆମଙ୍ ଆପ୍ପାୟ୍ଲାଜି ଏଙ୍ଗାଲେ ଆନିଞ୍ଜି ବନୁବ୍ଡ୍ଡାଇଙନ୍ ଅମ୍ମଃ ଜାଆଜନ୍ ଜିର୍ରେ ଅମେଙ୍ତଜି । ଈଶ୍ୱରନ୍ ଅନଃମେଙନ୍ ଆସନ୍ ସାତଟା ଓବ୍ବାନ୍ ଡ ଆଇନ୍ ଅଡକୋନ୍ ଆଜିନ୍ତୁଜି ନୋଅନ୍ ଆମଙ୍ ଆପ୍ପାୟେଞ୍ଜି। ଏଙ୍ଗାଲେ ଆନିଞ୍ଜି ଜାଆଜନ୍ ଆଅମ୍ମଃ ଡକୋଏଞ୍ଜି, ଈଶ୍ୱରନ୍ ଆନିନ୍ ଡମ୍ ସନଙନ୍ ଅଙଡେନ୍ ।
ତି ସିଲଡ୍ ଗୋଗୋୟ୍ ତରୁବନ୍ ଅଡୋଲାୟ୍ । ବାକୁଡି ଡିନ୍ନା ଡ ବାକୁଡିତଗଲ୍ ଏର୍ନାରେଙନ୍ ତରୁବନ୍ ଅଡୋଲାୟ୍। ପୂର୍ତ୍ତିଲୋଙନ୍ ଡାଆନ୍ ପେଏନ୍। ପୂର୍ତ୍ତିଲୋଙନ୍ ଅଡକୋନ୍ ଏନ୍ନେଲେ ଡ ଅଡକୋନ୍ ସିଲଡ୍ ଡେଙ୍ଗାରାନ୍ ଆବରୁଜି ଡାଆଲୋଙନ୍ ମାୟାଜେନ୍ ।
ଜାଆଜଲୋଙନ୍ ଡକୋନ୍ ଆମନ୍ଡ୍ରାଜି ଡ ଜନ୍ତୁ ଅନ୍ତିଡଞ୍ଜି ଅମ୍ରେଙ୍ଲେ ପୂର୍ତ୍ତିଲୋଙନ୍ ଅଡକୋନ୍ ଆଜନ୍ତୁ ଆନାଜି ଡକୋଏଞ୍ଜି ରବୁଆଜେଞ୍ଜି । ଜାଆଜନ୍ ଡାଆଲୋଙନ୍ ମଙ୍ଲାୟ୍ ଡ ଜାଆଜଲୋଙନ୍ ଡକୋନ୍ ଅଡକୋଞ୍ଜି ପନଃତୁଲନ୍ ସିଲଡ୍ ଅମେଙେଞ୍ଜି ।
ତରୁବନ୍ ଆରେଙ୍ନ କି ଆତିକ୍କି, ଜାଆଜନ୍ ଡାଆନ୍ ଆତୋଣ୍ତୋ ମଲ୍ଲୟ ଆଙ୍ଗାୟଯାୟ୍ ମଙ୍ଲେ ଡକୋଏନ୍ । ଆରି ତି ଆବନେଡା ଡାଆନ୍ ଅସୋୟ୍ଲେ ପାଙେନ୍ । ତି ଆତିକ୍କି ବମିୟ୍ତା ଜାଆଜନ୍ ଅବୟ୍ ତୋଣ୍ତୋବରୁନ୍ ଜାବେନ୍, ବନ୍ଡ ନମିଆନ୍ତାନ୍ ପୂର୍ତ୍ତିନ୍ ଡାଆଲୋଙନ୍ ମାୟାଲେ ଡକୋଏନ୍ । ଆରି ୟାଗି ଆଙ୍ଗାୟ୍ ଆତିକ୍କି ଆତୋଣ୍ତୋବୁରନ୍ ଅସୋୟ୍ ଗିୟ୍ତାଏନ୍ ।
ଆରି ବାକୁଡି ଡିନ୍ନା ଆତିକ୍କି ଡାଆନ୍ ଅଞଡେନ୍ ଅଡେ ଡକୋ ଗନିଜନ୍ ଆସନ ନୋଅନ୍ ଅବୟ୍ ଅନ୍ତିଡନ୍ କାକାନ୍ ଡାଣ୍ତନ୍ ଆପ୍ପାୟେନ୍ । କାକାନ୍ ଆସର୍ ଡରକୋନେନ୍ ସନାଜନ୍ ଆସନ୍ ୟର୍ରନେ ଅଡେତ୍ତେ ଅଡେନ୍ନେ ଏଙଲ୍ଲେ ବୁଲ୍ଲେଏନ୍,ବନ୍ ଡ ଅନ୍ନିଙ୍ ଡରକୋନେନ୍ ଅଞାଙ୍ଲୋ ।
ତିକ୍କି ନୋଅନ୍ ଆରି ଅବୟ୍ ଅନ୍ତିଡନ୍ କୁକ୍କୁରନ୍ ଆଡଅଙ୍ ଡାଣ୍ତନ୍ ଆପ୍ପାୟେନ୍ ବନ୍ଡ ଆନିନ୍ ଜାୟ୍ ଅନ୍ନିଙ୍ ଆସର୍ ଡରକୋନେନ୍ ଅଞାଙ୍ଲୋ, ଡ ଆନିନ୍ ନୋଅନ୍ ଆମଙ୍ ୟର୍ରନାୟ୍ । ବପାଲ୍ଲି ଆତିକ୍କି ନୋଅନ୍ ଆରି ବତର କୁକ୍କୁରନ୍ ଡାଣ୍ତନ୍ ଆପ୍ପାୟେନ୍ ଡ ଆନିନ୍ ଜିତନୁବନ୍ ଆଅଲା ଆତଅଡ୍ ଲୋଙନ୍ ଞମ୍ଲେ ୟର୍ରନାୟ୍ । ଡାଆନ୍ ଅସୋୟ୍ ଲେ ପାଙେନ୍ ଡ ଅରାନୁବଞ୍ଜି ଆରି ସୋଡାଲେ ପାଙେନ୍ ।
ନୋଅନ୍ ଆରି ବପାଲ୍ଲି ଜଗ୍ଗେଡାଲେ କୁକ୍କୁରନ୍ ଆଡଅଙ୍ ୟାଗିତର ଆସନ୍ ଡାଣ୍ତନ୍ ଆପ୍ପାୟେନ୍ । କେନ୍ ଆଡିତ୍ ଲୋଲୋନେନ୍ ଆସନ୍ ଡରକୋନେନ୍ ଞାଙେନ୍ ଡ ଆରି ଅୟର୍ରନାୟ୍ । ଡାଆନ୍ ଅଞଡ୍ଲେ ପାଙେନ୍ ।
ବାଗୁ ଆଙ୍ଗାଜ୍ ଆତିକ୍କି ନୋଅନ୍ ଆଡଅଙ୍ ଈଶ୍ୱରନ୍ ବରେନ୍, କୁତ୍ତମ୍ମାନମ୍ ଡ ଅଡକୋ ଜନ୍ତୁଅନ୍ତିଡଞ୍ଜି ଡ ଆମନ୍ ଜାଆଜନ୍ ସିଲଡ୍ ଡୁଙ୍ଲନ୍ ଏରପ୍ତିତେ । ଗୋଗୋୟ୍ ଅନଞ୍ଜି ଡ ଉଲ୍ଲେଙଞ୍ଜି କୋଡ୍ ଲେ ପୂର୍ତ୍ତିନ୍ ବବ୍ ରିୟ୍ ବା । ତି ସିଲଡ୍ ନୋଅନ୍ ଡ ଆକୁତ୍ତମ୍ମାଞ୍ଜି ଜାଆଜନ୍ ସିଲଡ୍ ଡୁଙ୍ଲନ୍ ଜିର୍ରାଜି ।
ନୋଅନ୍ ଜାଆଜନ୍ ସିଲଡ୍ ଆଡ୍ରୁଙ୍ ଲନାଞନ୍ ସିଲଡ୍, ଆନିନ୍ ଅବୟ୍ ତନମ୍ଫିଲନ୍ ତୁବେନ୍ ଡ ଅଙ୍ଗା ଆଜନ୍ତୁଜି ଅନମଙନ୍ ଆସନ ସନାୟ୍ ସାୟ୍, ଲାଙ୍ଲେଡ୍ ଆନ୍ନା ଆନ୍ନା ଆଜନ୍ତୁଞ୍ଜି ପାଙଲେ ଅନଃମେଙନ୍ ତୁବେନ୍ । ଈଶ୍ୱରନ୍ ଆତନିୟ୍ ତିୟ୍ ଅନମଙନ୍ ଲୋଙନ୍ ସର୍ଡାଏନ୍ । ନୋଅନ୍ ଡ ଆକୁତ୍ତମ୍ମାଞ୍ଜି ଆଡଅଙ୍ ଅନବ୍ ସିତ୍ତାନ୍ ତିୟେନ୍ ।
ଈଶ୍ୱରନ୍ ଗାମେନ୍, “ଞେନ୍ ସିବଡୟ୍ ବର୍ତନାୟ୍ ଡ ମନ୍ଡ୍ରାଞ୍ଜି ଆସନ୍ ଲବନ୍ ଆଙ୍ଗିୟ୍ଜ୍ଜା ସନୟ୍ପନ୍ ଅତ୍ତିୟାୟ୍ ଅଡେ ମନ୍ଡ୍ରାଞ୍ଜି ଆଡଅଙ୍ ଆନିଞ୍ଜି ଆରେସାଞ୍ଜି ସିଲଡ୍ ଇର୍ସେମର୍ ଡକୋଏନ୍ ଜନଙ୍ ଡେନ୍ ଞେନ୍ ପୁର୍ତ୍ତିନ୍ ଆରି ଡାଆନ୍ ବାତ୍ତେ ଅନ୍ନବ୍ମୋସ୍ସାୟ୍।
ସନିବ୍ଡୟ୍ ବରନ୍ ଅବୟ୍ ଅରବ୍ମଡନ୍ ଅନ୍ତମ୍ ଈଶ୍ୱରନ୍ ଆପର୍ତ୍ତମ୍ମୁନ୍ ସୁସୁରୁଆଙନ୍ ଗବ୍ଡେଲେନ୍ । ଅଡକୋତରନ୍ ରୁଆଙନ୍ ଆଙ୍ଗା ସୁସୁରୁଆଙନ୍ ଗିୟ୍ତ୍ତାତେ, ଈଶ୍ୱରନ ଆନିନ୍ ଆସନିବ୍ଡୟ୍ ବରନ୍ ଇୟ୍ୟମ୍ତେ, ତି ଅନ୍ତମ୍ ମନ୍ଡ୍ରାଞ୍ଜିନିୟ୍ ଲୁମ୍ତଜି ।
ବାଇବଲନ୍ ଅବୟ୍ ଅନବଜଙ୍ ବର୍: ଆଦି ୬-୮
Free to use, adapt, and share under an open license (CC BY-SA 4.0).