4. ଅବ୍ରାମନ୍ ଡ ଈଶ୍ୱରନ୍ ଆସନିବ୍ଡୟବର୍ର
ବୁବ୍ଡାନ୍ ଆଡ୍ରେନ୍ ଗୋଗୋୟ୍ ବଷେଙ୍ ଆତିକ୍କି ପୂର୍ତ୍ତି ଲୋଙନ୍ ଗୋଗୋୟ୍ ମନ୍ ଡ୍ରାନ୍ ଡକୋଲଞ୍ଜି ଡ ଆନିଞ୍ଜି ଅବୟ୍ ଆଲଙ୍ ଲଙ୍ ବର୍ନେନ୍ ବର୍ର୍ଞ୍ଜି। ଈଶ୍ୱରନ୍ ଆବନାଞ୍ ପୂର୍ତ୍ତିନ୍ ବନବ୍ରିଜନ୍ ଆପାଲତେଙ୍, ଆନିଞ୍ଜି ଅଡକୋଞ୍ଜି ଆବୟନ୍ ଏମ୍ମେଲେ ଅବୟ୍ ଗଡାନ୍ ତୁବେଞ୍ଜି।
ଆନିଞ୍ଜି ଗୋଗୋୟ୍ ବନ୍ଡ୍ରାବ୍ମର୍ ଡଜୋଏଞ୍ଜି ଡ ଈଶ୍ୱରନ୍ ଆବର୍ନେ ଅନ୍ନମ୍ଡଙ୍ ଲଜି। ଆନିଞ୍ଜି ରୁଆଙନ୍ ଆତନୁଙ୍ ଆସନ୍ ସୋଡା କିନ୍ତାଲନ୍ ତୁବେଞ୍ଜି। ଈଶ୍ୱରନ୍ ଗିଜେନ୍, ଡ ଆନିଞ୍ଜି ଇର୍ସେଲୁମନ୍ ଲୁମ୍ଲେ ଡକୋଲଞ୍ଜି ଡେନ୍, ଆନିଞ୍ଜି ଗୋଗୋୟ୍ ଇର୍ସେଲୁମନ୍ ଲୁମ୍ତଜି।
ତି ଆସନ୍ ଈଶ୍ୱରନ୍ ଆନିଞ୍ଜି ଆଲଙ୍ ଲଙନ୍ ଆନ୍ନା ଆନ୍ନା ଆଲଙଲଙ୍ ଲୋଙ୍ ଆନ୍ନାଏନ୍, ଡ ପୁର୍ତ୍ତିଲୋଙନ୍ ଆଡ୍ରକୋନେରେଙ୍ ଆନିଞ୍ଜି ଆଡଅଙ୍ ରମ୍ମଙ୍ରମ୍ମଙ୍ ଏମ୍ମେଞ୍ଜି। ଅଙ୍ଗା ଆଗଡା ଆନିଞ୍ଜି ତନୁବନ୍ ଉଲ୍ଲଞ୍ଜି ତି ଆଞୁମନ୍ ବାବିଲ୍ ଡକ୍କୋଏଞ୍ଜି। ତି ଆଗ୍ରାମଗାମ୍ “ରମ୍ମଙ୍“।
ବଶଅ ବଶଅ ବଷେଙ୍ ଆତିକ୍କି, ଅବୟ୍ ମଡ୍ରାନ୍, ଅବ୍ରାମନ୍ ସରିନ୍ ଈଶ୍ୱରନ୍ କଡ୍ଡାଡିଲନ୍। ଇଶ୍ୱରନ୍ ଆନିନ୍ ଆଡଅଙ୍ ବରେର୍ନ, “ କୁତ୍ତମ୍ମାନମ୍ ଡ ଡେସାନମ୍ ଅମ୍ରେଙଲେ ଞେନ୍ ଅଙ୍ଗା ଆଡେସା ଅବତୁୟତମ୍, ତି ଆଡେସା ଜିର୍ରା। ଞେନ୍ ଡଅଙନମ୍ ଅବ୍ସିତ୍ତାତମ୍ ଡ ଆମନ୍ ଆଡଅଙ୍ ସୋଡା ଆଡେସା ଏମ୍ମେତାୟ୍। ଆନାଜି ଆମନ୍ ଅବ୍ସିତ୍ତାତମ୍ଞ୍ଜି, ଆନିଞ୍ଜି ଞେନ୍ ଅବ୍ସିତ୍ତାତାୟ୍, ଆନାଜି ଆମନ୍ ସୟପତମଞ୍ଜି, ଆନିଞ୍ଜି ଞେନ୍ ସୟପତାଜି। ଲତେଙ୍ ଲୋଙ୍ନମ୍ ପୂର୍ତ୍ତିନ୍ ଅକୋନ୍ ଆକୁତ୍ତମ୍ମା ଅନବ୍ସିତ୍ତାନ୍ ଞାଙ୍ତଜି।
ଡ ଅବ୍ରାମନ୍ ଈଶ୍ୱରନ୍ ମାନ୍ନେଏନ୍। ଆନିନ୍ ଆଡୁକ୍ରିନ୍ ସାରୀନ୍ ଆଡଅଙ୍ ଓରୋଞେନ୍, ଆକମ୍ୱାରୀଞ୍ଜି ଡ ଆମଙନ୍ ଇନ୍ନି ଡକୋଏନ୍ ତି ଅଡକୋନ୍ ପାଙଲେ ଈଶ୍ୱରନକ୍ ଅଙ୍ଗା ଆଡେସା ଅବ୍ ତୁଜେନ୍, ତି ‘କିଣାନ’ ଡେସାନ୍ ଜିର୍ରେନ୍।
ଅଙ୍ଗାବେଳା ଅବ୍ରାମନ୍ କିଣାନନ୍ ତୁଙେନ୍, ଈଶ୍ୱରନ୍ ଗାମେନ୍, “ଏର୍ରେବୟଲ୍ଲେ ଗିଜା।“ ଇନ୍ନି ଆମନ୍ ଗିୟଲେ ରପ୍ତିତେ, ତି ଅଡକୋନ୍ ଞେନ୍ ଆମନ୍ ଡ କେଜାନଞ୍ଜି ଡନେନ୍ ତିୟତବେନ୍। ତି ସିଲଡ୍ ଅବ୍ରାମନ୍ ତି ଆଡ୍ରକୋନେ ଲୋଙ୍ ଡକୋଲନେ।
ବମିୟତା, ଅବ୍ରାମନ୍ ସୋଡା ଈଶ୍ୱରନ୍ ଆପୁର୍ର୍ପୁର୍ରମର୍ ମଲ୍କିଶେଦକନ୍ ଆଡଅଙ୍ ରବାଙେନ୍। ମଲ୍କିଶେଦକନ୍ ଅବ୍ରାମନ୍ ଆଡଅଙ୍ ଅବ୍ସିତ୍ତାଏନ୍ ଡ ବର୍ରେନ୍, ସୋଡା ଇଶ୍ୱରନ୍ ଆନ୍ନା ରୁଆଙନ୍ ଡ ପୁର୍ତ୍ତିନ୍ ଅଡକୋନ୍ ଆ ଡନ୍ନେମର୍ର, ଅବ୍ରାମନ୍ ଆଡଅଙ୍ ଅବ୍ସିତ୍ତାଏନ୍। ତି ସିଲଡ୍ ଅବ୍ରାମନ୍ ତି ଅଡକୋ ବିତ୍ତିଲୋଙନ୍ ସିଲଡ୍ ଦଶ ତନିୟତିୟ୍ ମଲ୍କିଶେଦକନ୍ ତିୟେନ୍।
ଗୋଗୋୟ୍ ବର୍ଷେଙ୍ ଜିରେନ୍, ବନ୍ଡ ନମିଆନ୍ତାନ୍ ଅବ୍ରାମନ୍ ଡ ସାରୀନ୍ ଆଞ୍ଜେମର୍ର ଡକୋଏଞ୍ଜି। ଈଶ୍ୱରନ୍ ଆବ୍ରାମନ୍ ଆରି ସିବ୍ଡେୟଡାଲେ ବର୍ରେନ୍ ଡ ଆମନ୍ ଅବୟ୍ ଓବ୍ୱାଅନନ୍ତମ୍ ଡ କେଜାନମ୍ଞ୍ଜି ରୁଆଙନ୍ ଆତୁତୁୟ୍ ଜି ଅନ୍ତମ୍ ଡେତେ। ଈଶ୍ୱରନ୍ ଆସନିବ୍ଡେୟ୍ବର୍ର ଅବ୍ରାମନ୍ ଡର୍ରନେ। ଈଶ୍ୱରନ୍ ଅବ୍ରାମନ୍ ଆଡଅଙ୍ ଡାର୍ମିକମର୍ର ଗାମେନ୍, ଇନିଆସନ୍ ଗାମେନ୍ ଡେନ୍ ଆନିନ୍ ଈଶ୍ୱରନ୍ ଆମଙ୍ ଡର୍ରନେ।
ତି ଲୋଙ୍, ଈଶ୍ୱରନ୍ ବାତ୍ତେ ଆଓକ୍କାନ୍ ଗବ୍ରିଏଞ୍ଜି। ବାଗୁ ଡଳ ଲୋଙନ୍ ଅବୟ୍ ସନିବ୍ଡୟ୍ ତନୁବନ୍ ଅବୟ୍ ଅନୋକ୍କାନ୍ ଡକୋ। ଈଶ୍ୱରନ୍ ଗାମେନ୍, ଡଅଙ୍ଲୋଙନମ୍ ଞେନ୍ ଅବୟ ଓବ୍ୱାଅନନ୍ ତିୟତମ୍। ବନ୍ଡ ନମିଆନ୍ତାନ୍ ଅବ୍ରାମନ୍ ଆମଙ୍ ଓବ୍ବାଅନନ୍ ଅବୟତଡ୍।
ବାଇବଲନ୍ ଅବୟ୍ ଅନବଜନଙ୍ ବର୍ର: ଆଦି ୧୧-୧୫
Free to use, adapt, and share under an open license (CC BY-SA 4.0).