5. ସନିବ୍‌ଡଜ୍ ଅନନ୍

ଦସ ବର୍ଷେଙ୍ ଆତିକ୍କି କିଣାନ ଡେସାନ୍ ଆଜିର୍ରାଞଞ୍ଜି ଆତିକ୍କି ନିୟ୍ ଅବ୍ରାମନ୍ ଡ ସାରୀନ୍ ଆମଙ୍ ଓବ୍ବଅନନ୍ ଅଡ୍ଡକୋଲୋ । ତାସନ୍ ଅବ୍ରାମନ୍ ଆଡୁକ୍ରି ସାରିନ୍ ଅବ୍ରାମନ୍ ଆଡଅଙ୍ ଗାମେନ୍, “ନମିଆନ୍ତାନ୍ ଈଶ୍ୱରନ୍ ଞେନ୍ ଅନନ୍ ଆକୋଡ୍‌ନେ ଆଡରଙେନ୍ ଆସନ୍‌ ଡ ନମି ଅନନ୍ ଆକନୋଡ୍ ଆସନ୍ ଞେନ୍ ଗୋଗୋୟ୍ ମିୟନୁମ୍‌ଲିୟ୍, କେନ୍ କମ୍ୱାରି ବୟ୍ଞେନ୍ ହାଗରନ୍ ଡକୋ । ଆନିନ୍ ଞେନ୍ ଆସନ୍ ଓବ୍ୱା ଅନନ୍ କୋତ୍ତେ ।

ତାସନ୍ ଅବ୍ରାମନ୍ ହାଗରନ୍ ବିବାଲନେ । ହାଗରନ୍ ଅବୟ୍ ଓବ୍ୱା ଅନନ୍ ଡେଲୋ ଡ ଅବ୍ରାମନ୍ ଆନିନ୍ ଇସମାଏଲ ଆଅବ୍ଞୁମେନ୍‌ । ବନ୍‌ଡ ସାରୀନ୍ ହାଗରନ୍ ଆଡ୍‌ଅଙ୍ ସଙ୍ଗ୍‌ତ୍ତାଏନ୍ । ଅଙ୍ଗାଆବେଡା ଇସ୍ମାଏଲନ୍ ଆଡଅଙ୍ ତେର ବର୍ଷେଙ୍ ଡେଏନ୍ ଆରି ଈଶ୍ୱରନ୍ ଅବ୍ରାମନ୍ ଆଡଅଙ୍ ବର୍ନେନ୍ ବର୍ରେନ୍ ।

ଈଶ୍ୱରନ୍ ଗାମେନ୍, “ଞେନ୍ ଅଡକୋନ୍ ସିଲଡ୍ ବୋରରର୍ସା ଈଶ୍ୱରନ୍।” ଆମନ୍ ସରିନ୍ ଞେନ୍ ଅବୟ୍ ଆଓକ୍କାନ୍ ତମ୍ମିୟ୍‌ତାୟ୍। ଡ ଅବ୍ରାମନ୍ ତୁଡୁମ୍‌ଲ୍ଲେ ଲୋମେନ୍ । ଈଶ୍ୱରନ୍ ନିୟ୍ ଅବ୍ରାମନ୍ ଆଡଅଙ୍ ବର୍ରେନ୍, ଆମନ୍ ଗୋଗୋୟ୍ ଡେସାନ୍ ଆବାପ୍ପା ଡେତମ୍ । ‘ଞେନ୍ ଆମନ୍ ଆଡଅଙ୍ ଡ କେଜ୍ଜାନମ୍ଞ୍ଜି କିଣାନ୍ ଡେସାନ୍ ଆଡେନ୍ନେମର୍ରଜି ଏମେତାୟ୍, ଆନିଞ୍ଜି ତେତ୍ତେ ଡକୋଲଞ୍ଜି । ଞେନ୍ ଅଡକୋଡିନ୍ନାନ୍ ଆସନ୍ ଆନିଞ୍ଜି ଆଈଶ୍ୱର ଡକୋତନାୟ୍ । କୁତ୍ତମ୍ମାନମ୍ ଅଡକୋଓବ୍ବାମର୍ରନ୍ ଗବ୍ରେନେନ୍ ଡନେନ୍ ଡେତେ ।

ଡୁକ୍ରିନମ୍ ସାରୀନ୍ ଅବୟ୍ ଓବ୍ବାଅନନ୍ ଡେତେ , ‘ ଆନିନ୍ ସନିବ୍‌ଡେୟ୍ଅନ ଡେତେ ।’ ତି ଆଞୁମନ୍ ଇସାକ ଡକ୍କୋବା। ଆନିନ୍ ବାତେ ଅନୋକ୍କା ଞେନ୍ ଗବରିତାୟ୍ ଡ ଆନିନ୍ ଅବୟ୍ ଡେସାନ୍ ଡେତେ। ଞେନ୍ ଇସ୍ମାଏଲନ୍ ନିୟ୍ ଅବୟ୍ ସୋଡା ଡେସା ତୁବ୍ବତାୟ୍, ବନ୍‌ଡ ସନିବ୍‌ଡେୟ୍‌ଜନ୍‌ ଇଷାକ ବାତେ ଡକୋତନ୍ନେ। ତି ଆତିକ୍କି ଇଶ୍ୱରନ୍ ଅବ୍ରାମନ୍ ଆଞୁମ୍ ଅବ୍ରାହାମ୍ ଡକୋଏନ୍, ଆନ୍ନା ଆଗରମ୍‌ଗାମ୍ ‘ ଗୋଗୋୟ୍ ମର୍ରାନ୍ ଆବପ୍ପା’। ଈଶ୍ୱରନ୍ ସାରିନ୍ ଆଞୁମ୍ ନିୟ୍ ସାରା ଡକୋଏନ୍, ତୁ ଆଗରାମ୍‌ଗାମ୍ ‘ ରାଣୀବୟ୍’।

ତି ଆଡିନ୍ନା ଅବ୍ରାହାମନ୍ ଆକୁତ୍ତମ୍ମାଲୋଙନ୍ ଅଡକୋନ୍ ଆଓବ୍ବାମର୍ର ଗବ୍ରେଡେନ୍। ବବର୍ଷେଙ୍ ଆତିକ୍କି, ଅବ୍ରାହାମନ୍ ଅଙ୍ଗାବେଳା ବଶଅ ବଷେଙ୍ ଡେଲୋ, ଡ ସାରାନ୍ ନବେ ବଷେଙ୍ ଡେଲୋ, ସାରା ଅବ୍ରାହାମନ୍ ଆଡଅଙ୍ ଅବୟ୍ ଓବ୍ବାଅନନ୍‌ନେନ୍। ଈଶ୍ୱରନ୍ ଆବର୍ରେନଞ୍ଜି ଅନ୍ତମ୍ ଆନିଞ୍ଜି ଆଞୁମନ୍ ଇସହାକ ତିୟେଞ୍ଜି।

ଅଙ୍ଗାବେଳା ଇସାହାକନ୍ ବେନ୍ଡିଆଏନ୍, ଈଶ୍ୱରନ୍ ଅବ୍ରାହାମନ୍ ଆଡର୍ରନେ ମାଲେନ୍ ଡ ବର୍ରେନ୍, ‘ ଆମନ୍ ଆବୟ୍ଅନନମ୍ ଇସାହାକନ୍ ଓରୋଙା ଡ ଅନମେଙନ୍ ତିୟନ୍ ଆସନ୍ ରବ୍ବୁଆ। ଆରି ଅବ୍ରାହାମନ୍ ଈଶ୍ୱରନ୍ ଆବନାୟ୍‌ ମାନ୍ନେଏନ୍ ଡ ଇସାହାକନ୍ ଅନମେଙ୍ ତିୟନ୍ ଆସନ୍ ଅବ୍‌ଜାଡାଏନ୍।

ଆଙ୍ଗାବେଳା ଅବ୍ରାହାମନ୍ ଡ ଇସାହାକନ୍ ଅନମେଙ ତିୟନ୍ ଆସନ୍ ଜିର୍ରେ ପାଙେଞ୍ଜି, ଇସାହାକନ୍ ଆବାପ୍ପା ବର୍ରେନ୍, “ଅନମେଙନନ୍ ଆତନିୟ୍ ଆସନ୍ ଅମଙଲେନ୍ ଅର୍ରାନ ଡକୋ ଡ ମେଣ୍ତାନ୍ ଅଡେଙ୍ଗା ଡକୋ?’ ଅବ୍ରାହାମନ୍ ଗାମେନ୍, “ଏ ଅନଞେନ୍ ଅନମେଙ୍ ତିୟନ୍ ଆସନ୍ ଈଶ୍ୱରନ୍ ମେଣ୍ତାନ୍ ତିୟତିୟଲଙ୍‌ତନେ”।

ଅଙ୍ଗାବେଳା ଆନିଞ୍ଜି ଅନମେଙନ୍ ଆତନିୟ୍ ଆଜାଗ୍ଗା ଲୋଙ୍ ତୁଙେଞ୍ଜି, ‘ଅବ୍ରାହାମନ୍ ଆଡାଙ୍ଗାଡାଅନନ୍ ଇସାକନ୍ ଜିଲ୍ଲେ ତନମ୍ପିଲ୍ ଲୋଙନ୍ ଅବ୍‌ଲୁଲୁଡେନ୍। ଅଙ୍ଗାବେଳା ଆନିନ୍ ଆଡାଙ୍ଗଗଡାଅନନ୍ ଆରନବ୍ବୁ ଆସନ୍ ଆସିନ୍ ଅବଡୋଏନ୍, ଈଶ୍ୱରନ୍ ଆନିନ୍ ବର୍ରେନ୍, “ଡକୋନା”। ପସିଜନ୍ ସମ୍ବବଡଙେ! ନମି ଞେନ୍ ଆମନ୍ ଆଡଅଙ୍ ଜନାଲିଞ୍ ଡ ଆମନ୍ ଞେନ୍ ଆଡଅଙ୍ ବତଙତମ୍। ଡ ଆମନ୍ ଆବୟ୍ଅନନମ୍ ଞେନ୍ ଆସନ୍ ଅଡକ୍କୋଲୋ।

ଆତନ୍ନଡନ୍‌ ଡକୋନ୍‌ ଲଟିଲୋଙନ୍ ଅବୟ୍ ମେଣ୍ତାନ୍ ଅବ୍ରାହାମନ୍ ଗିଜେନ୍। ଇସାହାକନ୍ ଆପାଲତେଙ୍ ଈଶ୍ୱରନ୍ ମେଣ୍ତାନ୍ ଅନମେଙନ୍ ତନିୟନ୍ ଆସନ୍ ତିୟଲାୟ୍। ଅବ୍ରାହାମନ୍ ମେଣ୍ତାନ୍ ସର୍ଡାନବାତ୍ତେ ତନିୟତିୟନ୍ ତିୟେନ୍।

ତି ଆତିକ୍କି ଈଶ୍ୱରନ୍ ଅବ୍ରାହାମନ୍ ବର୍ରେନ୍, “ଅମଙନମ୍ ଅଡକୋନ ଏନେଲେ ଡ ଆମନ୍ ଆବୟଅନନମ୍ ନିୟ୍ ଞେନ୍ ଆସନ୍ ତନିୟନ୍ ଆରିସୁମେନ୍ ଆସନ୍, ଞେନ୍ ଆମନ୍ ଆଡଅଙ୍ ଅନବସିତ୍ତାନ୍ ତିୟନ୍ ଆସନ୍ ସିବଡେୟ୍ ବର୍ରତନାୟ୍।” ରୁଆଙନ୍ ଆତୁତୁୟଜି ସିଲଡ୍ କେଜ୍ଜାନଞ୍ଜି ଗୋଗୋୟତେ। ଇନି ଆସନ୍ ଗାମେନଡେନ୍ ଆମନ୍ ଞେନ୍ ମାନ୍ନେଲିଞ୍, ଆମନ୍ ଲୋଙ୍ ପୁର୍ତ୍ତିନ୍ ଅଡକୋ କୁତ୍ତମ୍ମାଞ୍ଜି ଅନବ୍‌ସିତ୍ତାନ୍ ଞାଙତଜି।