11. ଏନେଲାୟ ପୁରନ୍
ଈଶ୍ୱରନ୍ ଫାରୋନ୍ ଆଡଅଙ୍ ଅବ୍ତରକେଲେ ବରେନ୍ ଡ ଆନିନ୍ ଈଶ୍ରାୟେଲ ଆମନଡ୍ରାଜି ଆଡଅଙ୍ ଜନିରନ୍ ଅତ୍ତିୟ୍ଲଜି ଡେନ୍, ଆନିନ୍ ମନ୍ଡ୍ରାନ୍ ଡ ଜନ୍ତୁଞ୍ଜି ଆପର୍ତ୍ତମ୍ମୁକୋଡଲୋଙ୍ଞ୍ଜି ରବ୍ବୁଆୟ୍ତେ । ଫାରୋନ୍ କେନ ଆତେ ଅମ୍ଡଙେନ୍ ଡେଲୋଜାକିଁଡେନ୍ କେନ୍ ଆତେ ଅଡ୍ଡର୍ରନ୍ ଆରି ଈଶ୍ୱରନ୍ ଆବନାଞ୍ ମନାନ୍ନେନ୍ ଆସନ୍ ଅର୍ଡରନେ ।
ଆମଙନ୍ ଆନାଜି ଡର୍ରଞ୍ଜି ଈଶ୍ୱରନ୍ ତି ଆପର୍ତ୍ତମ୍ମୁ ଅନଞ୍ଜି ଅଡକୋନ୍ ଆଡନୋବନ୍ ଆସନ୍ ଅବୟ୍ ତଙର୍ନ ଅବ୍ତୁଜେଞ୍ଜି। ଡିଲେ କୁତ୍ତମ୍ମାନ୍ ଅବୟ୍ ଏର୍ପନାରାନ୍ ଆଅନ୍ମେଣ୍ତାନ୍ ବାସ୍ସେଲେ ତି ଆତେ ରନବ୍ବୁଏଞ୍ଜି ।
ଈଶ୍ୱରନ୍ ଈଶ୍ରାୟେଲଞ୍ଜି ଆଡଅଙ୍ ଆଅନ୍ ମେଣ୍ତାନ୍ ଆମିଞାମ୍ ଅସୋୟ୍ ପାଙ୍ଲେ ତିଆସିଙଞ୍ଜି ଆଡୁଆରାଲୋଙ୍ ଜନଡନ୍ ଆସନ୍ ବରେଞ୍ଜି, ଆରି ଜେଲୁନ୍ ବାଲ୍ଲ୍ଲେ ଡ ରୁଟିନ୍ ଜନୋମନ୍ ଆସନ୍ ବରେଞ୍ଜି । ଆନିଞ୍ଜି ଜୋମ୍ଲେ ସାଡେଞ୍ଜି ସିଲଡ୍ ମିସର ଡେସା ଅନମ୍ରେଙନ୍ ଆସନ୍ ଅବ୍ଜାଡାନାବା ଗାମ୍ଲେ ବରେଞ୍ଜି ।
ଈଶ୍ୱରନ୍ ଏଙ୍ଗାଲେ ଆନିଞ୍ଜି ଲନୁମନ୍ ଆସନ୍ ବନାଞନ୍ ତିୟେଞ୍ଜି ଈଶ୍ରାୟେଲଞ୍ଜି ଅଡକୋନ୍ ଏତ୍ତେଲେ ଲୁମେଞ୍ଜି। ଅଡ୍ରାତିନ୍, ଈଶ୍ୱରନ୍ ମିସରଡେସାଗଡ୍ ଜିର୍ରେ ଆପର୍ତ୍ତମ୍ମୁଅନଞ୍ଜି ଅଡକୋନ୍ ସମ୍ୱବାଃଜେନ୍ ।
ଈଶ୍ରାୟେଲବାଜି ଆସିଂ ଆଡୁଆରାଲୋଙ୍ ମିଞାମନ୍ ଆଜାବ୍ଜାବ୍ ଡକୋଏନ୍, ତି ଆସନ୍ ଈଶ୍ୱରନ୍ ତିଆତେଜି ଅମ୍ରେଙେନ୍ । ଅମ୍ମସିଙନ୍ ଅଡକୋଞ୍ଜି ଏରାମ୍ମୁୟ୍ ଡକୋଲଞ୍ଜି । ଆଅନ୍ ମେଣ୍ତାନ୍ ଆମିଞାମ୍ ଆସନ୍ ଆନିଞ୍ଜି ଅନୁରନ୍ ଞାଙେଞ୍ଜି ।
ବନ୍ଡ ମିସରବାଜି ଈଶ୍ୱରନ୍ ଅଳେ ତି ଆବନାଞଞ୍ଜି ଅଡ୍ଡରଞ୍ଜି । ତି ଆସନ୍ ଈଶ୍ୱରନ୍ ତି ଆସିଙଞ୍ଜି ଅଡକୋନ୍ ଅନ୍ନୁମ୍ରେଙ୍ଲୋ । ମିସରବାଜି ଅଡକୋ ଆପର୍ତ୍ତମ୍ମୁଅନଞ୍ଜି ରବ୍ବୁଆଜେନ୍ ।
ଡିଲେ ମିସରବାଜି ଅଡକୋ ଆପର୍ତ୍ତମ୍ମୁଅନଞ୍ଜି ରବୁଆଜେନ୍, ବଣ୍ତିସିଂଲୋଙନ୍ ଆବଣ୍ତି ଆପର୍ତ୍ତମ୍ମୁଅନନ୍ ସିଲଡ୍ ଫାରୋନ ଆପର୍ତ୍ତମ୍ମୁଅନ୍ ଅଡକୋନ୍ ରବୁଆଜେଞ୍ଜି । ଗୋଗୋୟ୍ ମିସରବାଜି ଗୋଗୋୟ୍ ଡୁକନ୍ ବାତ୍ତେ ୟେଏଞ୍ଜି ।
ତି ଆତଗଲ୍ ଫାରୋନ୍ ମୋଶାନ୍ ଡ ହାରୋଣନ୍ ଓଡ୍ଡେଲେ ବରେଞ୍ଜି “ଇଶ୍ରାୟେଲଞ୍ଜି ଓରୋଙ୍ଲେ ମିସର ଡେସାନ୍ ଅମ୍ରେଙ୍ଲେ ଲଜିର୍ବା !” ମିସରବାଜି ନିୟ୍ ଈଶ୍ରାୟେଲଞ୍ଜି ଆଡଅଙ୍ ମିସର ଡେସାନ୍ ଅମ୍ରେଙ୍ଲେ ଲଜିର୍ବା ଗାମ୍ଲେ ବରେଞ୍ଜି ।
ବାଇବଲ ଲୋଙ୍ ଅବୟ୍ ଅନବ୍ଜଙ୍ ବର୍ :ଯାତ୍ରା-୧୧:୧-୧୨:୩୨
Free to use, adapt, and share under an open license (CC BY-SA 4.0).